1 Derezi, «Nuni yootidayssa

oonee ammaniday?

GODAA qesey oonas qonccidee?✝

2 Izi iza sinththan caarechcha mala,

mela biittafe mokkiza

xapho mala mokkides;

nu iza xeellanaas shicateththi

woykko teemay deenna;

nu iza dosanaas

iza malay lo7enna.

3 Izi asan kadhettidaadenne

ixettidaade;

izi hargefenne metoppe

shaaketti erontta asa;

Izi asi iza be7anaappe

ba ayfeso haraso zaariza asa mala

kadhettidaade gidides;

nunikka iza bonchchibeekko.

4 «Tumukka Izi nu harge

baas ekkides;

qasse nu sakokka izi tookkides.

Nuni gidikko iza gakkida metoy,

desheteththaynne waayey

Xoossafe izas imettidaaza

giidi qoppidos.✝

5 Gido attiin izi

nu mooro gishshas cadettides;

nu qoho gishshas liiqides;

iza bolla wodhdhida qixaatey

nuus saro ehides;

iza madunththan nu paxidos.✝

6 Nuni ubbay dorsa mala

toylatti dhaydos;

nuni issoy issoy nu oge bidos;

GODAY nu ubbaa qoho

iza bolla woththides.✝

7 «Izi un7ettidessinne waayettides;

gido attiin doonakka pogibeenna.

Dorsa laaqqa mala

shukettanaas laagettides;

ba iske qanxxizayta sinththan

co7u giza dorsa mala

izi doonakka phoqqibeenna.✝

8 Iza metoththoninne pirdan efida;

Izi ta deraa mooro gishshas

deshettidi, paxay diza biittafe

digettidayssa iza zereththafe

akeekiday oonee?✝

9 Izi aykko gene haasayontta,

ay moorokka ooththontta,

iza hayqoy iitatara

issife qoodettides;

gido attiin izi dureta

duufon moogettides.✝

10 «Iza liiqeththinne waayezi

GODAA shene gidides;

GODAY iza shemppo

nagara yarsho ooththikoka

izi ba zereththaa be7ana;

GODAA sheney

iza kushen polettana.

11 Iza shemppoy waayettidaappe guye

izi de7o poo7o

be7ananne ufayettana.

Ta xillo ayllezi ba erateththan

darota xillisana;

istta moorokka tookkana.

12 Hessa gishshas iza gakkiza gisha

gita asata gishara issife histtana;

di7i ehidayssa wolqqamatara

izi issife gishettana;

izi ba shemppo

hayqos aaththi immidi,

iita ooththizaytara

issife qoodettida gishshas,

darota nagara tookkides;

qohidayta gishshas

gaannatides» gaana.✝