1 Ubbaa Haariza GODAA Ayanay ta bolla dees;

hiyeesatas mishiraachcho

yootana mala,

GODAY tana tiydes.

Izi tana wozinay meqqidayta

koolana mala,

di7ettidayta la7a kessana mala,

qashettidaytas birsheth

awajjana mala kiittides.✝

2 Dosettida GODAA layth,

nu Xoossay halo kessiza gallassa

awajjana malanne

yeekkizayta ubbaa

minththeththana mala

tana kiittides.✝

3 Qasseka Xiyoonen kayottizayta

doshisana mala,

bidinththa gishshas

puulateththa kallachcha;

yeeho gishshas ufayssa zayte

istta hu7en ta gussana mala,

ceece ayana gishshas galata seelo

ta istta bolla gophana mala

tana kiittides;

isttika iza bonchcho

qonccisana mala

GODAY tokkida xillo mith

geetetti xeygettana.

4 Istti beni laalettidayta

zaari keexxana;

kase wode kundidaytakka

zaari essana;

daro yeletatappe

kase kundidaytanne

laalettida katamata

zaari keexxana.

5 Imaththati intte dorsa

wudeta heemmana;

allaga biitta asati

intte gadeninne

intte woyne

atakilte giddon ooththana.

6 Intte qasse, «GODAA qeeseta»

geetetti xeygettana;

asaykka inttena,

«Nu Xoossaa oosanchchata»

giidi xeygana;

intte kawoteththata aqota maana;

istta dureteththankka

intte ceeqettana.

7 Ta derey yeellatidayssa qoodhe

nam7u kushe ekkana;

kawuyidayssa qoodhe

bantta xinxxon ufayettana;

bantta biittaas

nam7u kushe laattana;

mernaa ufayssi isttas gidana.

8 Tani GODAY suure pirda dosays;

bonqqanne qoho ixxays.

Ta ammaneteththan

isttas bessizayssa immana;

isttara mernaa caaqo

qaala gelana.

9 Istta zareti kawoteththata giddon,

istta nayti dere giddon

erettidayta gidana;

istti be7iza ubbay GODAY anjjida

dere gididayssa erana;

10 Tani GODAAN keehippe ufayettays;

ta shemppoyakka

ta Xoossan hombocawus;

mishiray ba hu7en

kallachcha goxxiza mala,

mishirayakka bana inqqun

seeleththiza mala

atoteththa may7o tana mayzides;

xilloteththa seelokka

ta bolla gophides.✝

11 Biittay caarech caarissiza mala,

atakiltesohoy

puute puutisiza mala,

Ubbaa Haariza GODAY

kawoteththata ubbaa sinththan

xilloteththinne galata caarissana.