1 GODAY, «Tana woossonttaytas

ta qonccadis;

tana koyonttaytas beettadis.

Ta sunththaa xeygontta

kawoteththas,

‹Yee! Yee!› ga koyadis.✝

2 Makkallanchcha deretas,

iita ogera bizaytas,

bantta wozina amo kaallizaytas,

ta kushe gallas kumeth miccadis.✝

3 Atakiltesohon yarsho yarshizayti,

urqqafe medhettida

yarshosohota bolla

exaane cuwasizayti,

ubba wode tana

hanqeththiza dereta.

4 Duufo giddon uttizayti,

geemasohon aqizayti,

guddunththa asho mizayti,

istti bantta otota tunida asho

camba kunththizayta.

5 Istti, ‹Ta geesh gidida gishshas

kichcha; ta mata yooppa;

taakko shiiqoppa› gizayta.

Hayssa mala derey

ta siidhen cuwa malanne

gallas kumeth eexxiza

tama mala.

6 «Be7ite, ta sinththan

xaafetti uttides;

ta co7u giikke;

gido attiin iza ooso ooso mala

ta izas immana;

istta hano mala

ta isttas ciggana.

7 Intte nagara halonne

intte aawata nagara

halo ta kessana.

Istti zumata bolla xuugettiza

yarsho shiishshida gishshas,

zumbullata bolla

tana cayida gishshas,

istti makkida miishshan

isttas zaari makettana;

istti kase ooththida ooso kushe

zaari ekkana» gees.

8 GODAY, «Woyne wurco giddon

ililoy diza mala

asaykka, ‹Iza giddon

lo7o miishshi diza gishshas

iza qanxxofte› giza mala,

tanikka ta aylleta gishshas

gaada hessaththo ooththana;

mulera tani istta dhayssike.

9 Tani Yaaqoobe zereththatappenne

Yuhuda zereththafe ta zumata

laattanayta ta ehana;

doorettida ta derey

istta laattana;

ta ashkaratikka heen daana.

10 Tana minththi koyza ta derezas,

Lasharooney dorsa wudey

heemettizaso,

Akoore zulley wude mehey

pe7izaso gidana.✝

11 Gido attiin GODAA aggida inttes,

ta geeshsha zumaa dogida inttes,

‹Ta baso› geetettiza

eeqa xoossas soho

giigsida inttes,

‹Gaade› geetettiza eeqa xoossas

walakettida woyne ushshu

wancan kunththida inttes,

12 ta xeygiin zaarontta

ixxida gishshas,

ta yootiin siyontta

ixxida gishshas,

ta sinththankka

iita ooththida gishshas,

tana hanqeththiza miish

intte doorida gishshas,

ta inttena mashshas

aaththa immana;

intte ubbayka shukettanaas

qoodhe immana» gees.

13 Hessa gishshas,

Ubbaa Haariza GODAY,

«Be7ite, ta ashkarati maana;

intte gidikko gafana;

ta ashkarati uyana;

intte gidikko saamettana;

Ta ashkarati ufayettana;

intte gidikko yeellatana.

14 Ta ashkarati

wozinappe ufayssan yexxana;

intte gidikko wozinay meqqiin

intte waassana;

intte ayanay meqqida gishshas

intte woo woo giidi waassana.

15 Intte intte sunththaa

doorettida ta derey

qanggana mala aaththi immana;

Ubbaa Haariza GODAY

inttena wodhana;

baas haggazizaytas gidikko

izi hara sunth immana.

16 Hessa gishshas biittay bolla

anjjo koyzaadey

tuma Xoossa

sunththan anjjettana;

biittayn caaqqiza asi

tuma Xoossa

sunththan caaqqana;

kase aadhdhida metoti dogettida;

ta ayfeppekka geemmida» gees.

17 GODAY, «Hekko,

tani ooraththa salotanne

ooraththa sa7a medhdhana;

kase aadhdhida miishshati

qofettettennanne

hassa7ettettenna.

18 Gido attiin

tani medhdhizayssan ufayettite;

mernaas hombocite;

tani Yerusalaame ufayssas,

izi deraakka homboceththas

medhdhana.

19 Tani Yerusalaamen ufayettana;

tani ta derezan hombocana;

hayssafe guyen yeehoynne

waasoy heen seetettenna.✝

20 Hayssafe guyen

heen guuththa wodes

shemppora paxa

daana yidhay

woykko wode kallontta

cimay deenna;

xeetu layth kumida asi hayqqiko

wodey gakkontta

mulqqetti hayqqida

asa mala qoodettana;

asi xeetu layth

kumontta hayqqiko

boshan hayqqida mala

qoodeettes.

21 He wode asay keeth keexxana;

izankka daana;

woyne mith tokkidi

iza ayfe maana.

22 Hayssafe guye hara asi

izan daana keeth keexxettenna;

woykko haray maana

miishshi tokettenna;

ta deraa layththi

miththa layththa mala aduqqana;

tani dooridayti bantta

kushe ooson

adussa layth ufayettana.

23 Istta daaburay hada attenna;

qaada iita naakka yelettenna;

isttinne istta zereththi

GODAY anjjida dere gidana.

24 Istti buro tana xeyganaappe

kaseta tani koyana;

istti taas yooti wursontta

ta siyana.

25 Kana suyteynne dorsa laaqqay

issife maana;

gaammoy boora mala

maata maana;

shooshshi gudulla laaccana;

ta geeshsha zumaa bolla

istti qohettettenna;

bashshika istta bolla

yeenna» gees.✝