Woyne Tokkiza Gade Gishshas Yootettida Ginxo
1 Tani ta siiqo laggeza gishshassinne
iza woyne turaa
tokkizasoho gishshas
siiqo mazamure yexxana.
Tani siiqiza laggezas
aradda zumbullan
woyne turaa tokkizasohoy dees.
2 Biitta bookkidi,
shuchchaa qori kessidi,
ubbaafe lo7iza
woyne turaa tokkides;
histtidi iza naaganaas
shakko giigsides;
woyne ushshu gum7izasoho
olla bookki giigsides.
Hessafe guye lo7o ayfe ayfana
giidi naagides;
gido attiin caala phanqida
ayfe ayfides.5:1-2 Mato 21:33; Mar 12:1
3 Histtiin ta siiqoy,
«Intteno Yerusalaamen
de7izaytoo!
Intteno Yuhuda asatoo!
Taappenne ta woyne turaa
tokkiza sohozappe giddon
de7iza yo7oza
ane ha7i intte pirdite.
4 Tani ta woyne turaa
sohozasi ooththidayssafe
hara ay ooththanayssi attidee?
Izi lo7o ayfe ayfana gaada
ta naagishin ays caala phanqida
ayfe ayfidee?
5 Ha7i tani ta woyne
tokkiza gadeza bolla
ooththanaaz inttes yootays.
Dirsaa shoddana;
izikka dhayana mala ooththana;
Tani gimbeza laallana;
he sohoykka durettana.
6 Tani he sohoza
mago biitta ooththana.
He turay xunqqettenanne
bul7ettenna;
Histtiin kindichchoynne
agunththi izan mokkana.
Iray izan bukkontta mala,
tani shaarata azazana» gides.
7 Ubbaafe Wolqqama
GODAA woyne tokkiza gadey
Isra7eele asaa.
Yuhuda asay
izi ufayettiza atakilte.
Istti suure pirda pirdana
giidi naagides;
gido attiin
suuth gussishin be7ides.
Izi xilloteth koyides;
gido attiin meto waaso siyides.