1 GODAY, «Intteno saamettidaytoo

ubbayka haa yiite!

Haaththaako haa yiite;

Intteno miishshi bayndaytoo

shammite; miite.

Haa yiite; miishshi bayndanne

qanxxontta woyne ushshinne

maath shammite.✝55:1 Ajju 21:6; 22:17

2 Go7ontta kaththas

ays intte miish dhaysseetii?

inttena kalssontta miishshas

ay ekkanaas

intte wolqqa wurseetii?

Siyite; ta gidaaz siyite;

lo7o gididaaz miite;

lo7o quman inttena ufayssite.

3 Intte hayth doydi

haa taakko shiiqite;

intte shemppora paxa daana mala

ta gizaa ezgi siyite;

kase ta Dawitera caaqqida

mino siiqon inttenarakka

mernaa caaqo caaqettana.✝55:3 Hawa 13:34

4 Be7ite, tani iza deraas markka,

kaaleththizaadenne

ola gadawa ooththadis.

5 Be7a, neni erontta

kawoteththata xeygana;

nena erontta kawoteththati

neekko eeson yaana.

Gaasoykka GODAA ne Xoossay

Isra7eele Geeshshay

ba bonchchon

nena dhoqqu dhoqqu

histtides» gees.

6 GODAY beettiza wode

iza koyite;

matan diza wode

iza xeygite.