Daniel 10

दानिएल खे नद्दी का किनारा मिल्यो दर्शन

1 फारस देश का राजा कोरेस का राज का तीसरा साल मे दानिएल पर, जो बेलतशस्सर भी बोलस हइ, तक बात प्रगट करी गइ. वा बात सच्ची थी कि बडो युध्द हुये. ओने या बात खे जानी ली, अरु ओखे या देखी हुइ बात समझदार अय गइ. 2 वे दिनहोन मी, दानिएल, तीन हप्ता तक दु:ख करतो ऱ्हीयो. 3 वे तीन हप्ताहोन का पुरा होना तक, मे ने नी ते स्वादिष्ट खानो खायो अरु नी मास या दाखमधु अपना मुडा मे रखी, अरु नी अपना आग मे कुछ तेल लगायो. 4 फिर पहला महिना का चौबीसवा दिन खे जब मी हिद्देखेल*10:4 दजला नामकी नद्दी का किनारा पर थो, 5 तब मे ने आख उठयखे देख्यो, कि सन का कपडा पेन्यो हुयो, अरु उफाज देश का सोना को पंट्टो से कंमर बाध्यो हुयो एक इन्सान खडो हइ. 6 ओको आंग फीरोजा चमकनवाला फत्थर का जसो, ओको मुडो बिजली का जसो, ओका आख जलता हुया दिवा का जसो, ओका बाहा अरु पाय चमकाया हुया पीतल का जसा, अरु ओका वचनहोन को बोल गर्दी का बोल का जसो थो.*10:6 प्रकाशित 1:13-15;2:18;19:12 7 ओखे फक्त मी दानिएल ही ने देख्यो, अरु मरा सातआला इन्सानहोन खे ओको कुछ भी दर्शन नी हुयो; पन वे बोत ही थरथरान लग्या, अरु लुकन का लिये भागी गो. 8 तब मी ऐखेलो ऱ्हीखे यो अदुभत*10:8 बडो दर्शन देखतो ऱ्हीयो, येका से मरी ताकत कम हुयो ऱ्ही; मी भयभुत हुइ गो, अरु मरा मे कुछ भी ताकत नी ऱ्ही. 9 तेभी मे ने उ इन्सान का वचनहोन को बोल सुन्या, अरु जब वे मेखे सुनाइ दिया, तब मी उबडो गिरी गो अरु गहरी निद मे जमिन पर ओड्या मुडा पर दब्यो ऱ्हीयो. 10 फिर कोय से अपना हात से मरा आग खे छुयो, अरु मेखे उठयखे टोग्याहोन अरु हथेलिहोन का भलोसा कापता हुया बठय दियो. 11 तब ओने मरा से बोल्यो, "हे दानिएल, हे अति प्रिय इन्सान, जो वचन मी तरा से बोलुस हइ ओखे समझी ले, अरु सीधो खडो हो, क्युकी मी अभी तरा नजिक भेज्यो गयो हइ." जब ओने मरा से यो वचन बोल्यो, तब मी खडो तो हुइ गो पन कापते ऱ्हीयो. 12 फिर ओने मरा से बोल्यो, "हे दानिएल, मत डर, क्युकी पहला ही दिन खे जब तोने समझन-बुजन का लिये मन लगायो अरु अपना परमेश्वर का सामने अपना खे दीन कऱ्यो, उही दिन तरा वचन सुन्या गया, अरु मी तरा वचनहोन का कारन अय गो हइ. 13 फारस का राज को मुखियो इक्कीस दिन तक मरो सामनो कऱ्यो ऱ्हीयो; पन मीकाएल जो मुख्यो मुखियाहोन मे से हइ, उ मरा सहायता का लिये आयो, येकालिये मी फारस का राजाहोन का पास ऱ्हीयो,✝10:13 प्रकाशन 12:7 14 अरु अब मी तोखे समझान आयो हइ, कि आखरी दिनहोन मे तरा दुनियाहोन कि का दशा हुये. क्युकी जो दर्शन तोने देख्यो हइ उ कुछ दिनहोन का बाद पुरो हुये." 15 जब उ इन्सान मरा से असी बात बोली चुक्या, तब मे ने जमिन का तरप मुडो कऱ्यो अरु कुछनी बोल्यो अरु चुप ऱ्ही गो. 16 तब इन्सान का बेटा का जसो कोय ने मरी ओठ छी, अरु मी मुडो खोलीखे बोलन लग्यो. जो मरा सामने खडो हुयो, ओका से मे ने बोल्यो, "हे मरा प्रभु, दर्शन कि बातहोन का कारन मेखे पीडा-सी उठी, अरु मरा मे कुछ भी ताकत नी ऱ्ही. 17 येकालिये मी प्रभु को दास, अपना प्रभु का सात कसी बात करी सखे? क्युकी मरा आग मे नी तो कुछ ताकत ऱ्ही, अरु नी मरा से सास लेनो हुये." 18 तब इन्सान का जसो कोय ने मेखे छीखे अरु मेखे ताकत दी; 19 अरु ओने बोल्यो, "हे परमेश्वर का अति प्रिय इन्सान, मत डर, तोखे शान्ति मिले; तु मजबुत हुये अरु तरी ताकत बधी ऱ्हीहे." जब ओने यो बोल्यो, तब मेखे शक्ति प्राप्त हुइ, "हे मरा प्रभु, अब बोल, क्युकी तोने मेखे शक्ति प्रदान करी हइ." 20 तब ओने बोल्यो, का तु जानस हइ कि मी कोय कारन तरा नजिक आयो हइ? अब मी फारस का मुखिया से झगडा खे वापस हुयु; अरु जब मी निकल्यु, तब यूनान का मुखिया आये. 21 जो कुछ सच्ची बातहोन से भरी हुइ किताब मे लिख्यो हुयो हइ, उ मी तोखे बतयुस हइ; वे मुखियाहोन का विरोध्द, तुमारो मुखियो मीकाएल खे छोड, मरा सात स्थिर ऱ्हेनवाला अरु कोय भी नी हइ.✝10:21 प्रकाशन 12:7