Êxodo 2

मूसा को जन्म

1 लेवी का कुल को एक अदमी ने एक लेवी कुल की बई से भ्याव करीयो. 2 वा बई दिन से हुई अरु ओखे एक बेटो पैदा हुयो; अरु ओने बच्चा खे देख्यो की उ सुन्दर हई, ते ओखे ओने तीन महीना तक लुकई खे रख्यो. 3 जब वा ओखे अरु लुकइ नी सकी ते ओका लिये धोगडा कि एक टोपली लीखे, ओका पर चिकनी मट्टी अरु डाबर लगइखे, ओमें बच्चा खे रखी खे नील नदी का किनारा मे घास का बीच छोडी खे अई. 4 उ बच्चा कि बहीन दूर खडि हुईखे देखी री थी कि ओका सात का होस. 5 तब फिरोन की बेटी आगधोन का लिये नदी का किनारा अई; ओकी दासीहोन नदी का किनारा-किनारा घुमी री थी; तब उनखे घास का बीच टोपली देखी ते ओने अपनी दासी खे ओखे लान का लिये भेजो. 6 तब ओने टोपली खोली खे देख्यो ते ओमे एक रोतो हुयो बच्चो थो; तब ओखे दया अइ अरु ओने बोल्यो, "यो तो कोइ इब्री बई को बच्चो हुये." 7 तब बच्चा की बहीन ने फिरोन की बेटी से बोल्यो, "कि मी जइ खे इब्री बईहोन में से कोई एक बइ खे तरा पास बुलई लि आयु जो तरा लिये बच्चा खे दूध पिलइ सखे?" 8 फिरोन की बेटी ने बोल्यो, "जा." तब वा उ बच्चा की माय खे बुलइ खे लई. 9 फिरोन की बेटी ने ओका से बोल्यो, "तू यो बच्चा खे ली जई खे मरा लिये दूध पिलाती जा, अरु मी तोखे मजदूरी दियु." जब वा बई बच्चा खे ली जई खे दूध पिलान लगी. 10 जब बच्चो थोडो बडो हुयो तब ओखे फिरोन की बेटी का पास लीखे गई, अरु ओने ओखे अपनो बेटो मान्यो; अरु ओने यो बोली खे ओको नाम मूसा रख्यो, "मेने येखे पाणी मे से निकाल्यो थो."

मूसा को मिद्यान देश मे भागनो

11 जब मूसा जवान हुयो तब उ दिन मे, उ बाहेर अपना भईहोन मे गयो उनका दुःख पर नजर डाली; तब ओने देख्यो कि कोई मिस्री जन मरा एक इब्री भई खे मारी रहा हइ 12 जब ओने इधर-उधर देख्यो कि कोई नी हइ, तब ओने उ मिस्री खे मारी डाल्यो अरु रेती में लुकइ दियो. 13 फेर दुसरा दिन बाहेर जैय खे ओने देखीयो कि दो इब्री अदमी आपस मे झगडो करी रहा; ते ओने अपराधी से बल्यो, "तू अपना भई खे क्युव मारी रो हइ?" 14 ओने बोल्यो, "कोने तोखे हम दुन्या पर अधिकारी अरु न्यायी ठहरायो? तु कल जसो तु मिस्र का इन्सान खे मारी डाल्यो?" तब मूसा यो सोचीखे डरि गयो, "सच्ची वा बात फैली गई हई." 15 जब फिरोन ने या बात सुनी तब मूसा खे मारन की योजना करी. पर मूसा फिरोन का सामने से भागी गो, अरु मिद्यान देश में जैइखे रेहन लगियो; अरु उ एक कुओ का पास बठी गो. 16 मिद्यान को याजक की सात बेटि थीं; अरु वे वहा माय खे पानी भरन लगी अरु कठौतों में भरी खे अपना बाप की मेंडा-बकरिहोन खे पिलाऐ. 17 तब थाठंयो अई खे उनखे हटान लग्यो; ये पर मूसा ने खडो हुइ खे उनखे साथ दियो, अरु मेंडा-बकरिहोन खे पानी पिलायो. 18 जब वे अपना बाप रुएल का नजिक अई, तब ओने ओकासे पूछीयो, "का कारण हइ कि आज तु असी भांगी खे जल्दी माय?" 19 उन्हे बोलियो, "एक मिस्री अदमी ने हमखे थांठया का हाथ से छुड़ायो, अरु हमारा लिये घनोही पानी भरिखे मेडो-बकरिहोन खे पिलायो." 20 जब ओने अपनी बेटीहोन से पुछ्यो, "वु अदमी काहाँ हई? तुम ओखे बोल्यो छोडी खे माय जा ओखे बुलय खे? ला कि उ खानो खैलीये." 21 अरु मूसा उ अदमी का साथ रेह्न का लिये खुस हुयो; ओने अपनी बेटी सिप्पोरा को भ्याव करी दियो. 22 अरु ओखे एक बेटो पैदा हुयो, तब मूसा ने यो बोलियो, "मी अलग-अलग देश में घुमन आलो आय," ओको नाम गेर्शोम रखनु. 23 बहोत दिन बीतना का बाद मिस्र को राजो मरी गयो. अरु इस्राएली मुसकिल को काम देखभाल का कारण लम्बी-लम्बी दम लिकर आहें भरन लगीयो, अरु चिलय उठ्यो, अरु ओकि दुहाई जो मुसकिल देखभाल का कारण हुई उ परमेश्वर तक पहुँचे. 24 अरु परमेश्वर ने उनकी बात सुनिखे अपनी वाचा खे, जो ओने अब्राहम, अरु इसहाक, अरु याकुब का साथ बाँधी थी, याद करियो. 25 अरु परमेश्वर ने इस्राएलिहोन पर दृष्टि करी अरु उन पर मन लगायो.