1 फेर यहोवा ने मूसा से बोल्यो, "पहली पट्टिहोन का समान पत्थर की दो अरु पट्टिहोन बनइ ले; तब जो वचन वे पहली पट्टिहोन पर लिखी थी, जिनखे तोने तोडी डाली, वे ही वचन मी वे पट्टिहोन पर लिख्यु. 2 अरु सुबह तयार रहनु, अरु सुबह खे सीनै पहाड पर चढिखे ओकी चोटी पर मरा सामने खडो होनु. 3 तरा संग कोइ नी चढी पाए, वरन् पहाड भर पर कोई इन्सान कहीं दिखइ नी देनु; अरु नी मेडा-बकरी अरु गाय-बैल भी पहाड का आगे चरनो नी पाये." 4 तब मूसा ने पहली पट्टिहोन का समान दो अरु पट्टिहोन बनइ; अरु सुबह खे भोर उठीखे अपना हाथ में पत्थर की वे दोइ पट्टिहोन लिखे यहोवा की आज्ञा का अनुसार सीनै पहाड पर चढी गया. 5 तब यहोवा बद्दल में से उतरीखे ओका संग वहा खडो हुइखे यहोवा ने अपना नाम को प्रचार कर्यो. 6 अरु यहोवा ओका सामने हुइ खे यो प्रचार करतो हुयो चल्यो, "यहोवा, यहोवा, यहोवा दयालु अरु अनुग्रह कारी, गुस्सा करना में धीरजवन्त, अरु अत्यन्त करुणामय अरु सच्चो परमेश्वर हइ,✝ 7 हजार पीढ़िहोन तक हमेशा करुणा करनआलो, अधर्म अरु अपराध क्षमा अरु पाप खे माप करनआलो हइ, परन्तु दोषी खे उ कोइ प्रकार निर्दोष नी ठहरायो, उ बाबदादा को अधर्म को दण्ड उनका बेटाहोन वरन् नाती अरु परनाती खे भी देनालो हइ." 8 तब मूसा ने जलदी पृथ्वी का तरप माथो झुकयखे दण्डवत् कर्यो. 9 अरु ओने बोल्यो, "हे यहोवा, अगर तरी अनुग्रह की नजर मरा पर हुये ते यहोवा, हम दुनियाहोन का बीच में हुइखे चल्यो, या दुनिया हठीलो तो हइ, ते भी हमारा अधर्म अरु पाप खे माप कर, अरु हमखे अपनो निज भाग मानीखे ग्रहण करनु."

10 ओने बोल्यो, सुन, मी एक वाचा बाधुस है. तरा सब दुनियाहोन खे सामने मी मध्य कऱ्यु जसा पृथ्वी पर अरु सब संग में कभी नी हुयो; अरु वे सब दुनिया जिनका बीच तू ऱ्हेस हइ यहोवा का काम खे देख; क्योंकि जो मी तुम दुनियाहोन से डर करने पर हूँ उ काम हइ. 11 जो आज्ञा मी आज तुमखे देयुस हइ ओखे तुम दुनिया मान्ये. देख, मी तुम्हारा आगे से एमोरी, कनानी, हित्ती, परिज्जी, हिव्वी, अरु यबूसी दुनियाहोन खे निकालुस हइ. 12 येकालिये सावधान ऱ्हे कि जो देश में तू जानआलो हइ ओका निवासिहोन से वाचा नी बाधनु; कहीं असो नी हुये कि उ तरा लिये फंन्दो ठर्ये. 13 येकालिये उनकी वेदिहोन खे गिर्य देनु, उनका खंभा खे तोडी डालनु, अरु उनकी अशेरा नामक मूर्तिहोन खे तोडीस डालनु;✝ 14 क्योंकि तुमखे कोइ दूसरा का परमेश्वर खे दण्डवत् करन की आज्ञा नी हइ, क्योंकि यहोवा जेको नाम इषावान इर्षा जलन रखन आलो परमेश्वर,✝ 15 असो नी हुये कि तू उ देश का निवासिहोन से कुछ वाचा नी बाधनु, असो नी हुये कि जब वे अपना देवताहोन का अनुगमन करे अरु बुरा काम करे अरु उनका लिये बलिदान चेढाये, अरु कोय तोखे नेवता दे अरु तु भी ओका बलिजनवर को गोस खाये, 16 अरु तु उनकी बेटीहोन खे अपना बेटाहोन का लिये लाये अरु जो मरा बेटाहोन का प्रती विश्वासघाती होनु अरु उनकी मुर्ति पुजक देवाताहोन कि पुजा करन का लिये प्रेरीत करे. 17 तुम देवताहोन की मूर्तिहोन नी बनानु अरु उनकी भक्ती नी करनु.✝ 18 अखमीरी रोटी को तिवार माननु. ओमे मरी आज्ञा का अनुसार अबीब महीना का सही समय पर सात दिन तक अखमीरी रोटी खायो करनु; क्योंकि तू मिस्र से अबीब महीना में निकाल्यो लायो थो.✝ 19 हर एक पहलो मेरो हइ; अरु का बपट्टीहोन, का मेडो, तरा जनवरहोन में से जो नर पहलो हुये वे सब मरा ही हइ.✝ 20 अरु गद्ही का पहला का बदला मेडो दिखे ओखे छुडानु, अगर तू ओखे छुडानु नी चाहे ते ओकी गर्दन तोडी देनु. परन्तु अपना सब पहला बेटाहोन को बदलो दिखे छुड़ानु. गधा के बोल्यो कोइ चामडा हाथ अपनो मुडो नी दिखानु.✝ 21 छे दिन तक काम करना, परन्तु सातवा दिन अराम करनु; वरन् नागर जोतन अरु काटन का टेम में भी अराम करनु.✝ 22 अरु तू हप्ता को तिवार माननु जो नया काट्या हुया गेहू को तिवार बोलस हइ, अरु साल का आखरी में जमा करी खे तिवार माननु.✝ 23 तरा परिवार का सब अदमी साल में तीन बार इस्राएल खे परमेश्वर यहोवा का सामने अपनो मुडो बतानु 24 मि तो पकडीयु अरु दुसरा राष्ट्रहोन खे तरा आगे से निकालीखे तरी सीमाहोन खे बढ़ायु; अरु जब तू अपना परमेश्वर यहोवा का सामने अपनो मुडो दिखान का लिये आये, तब कोइ तरी जमिन को लालच नी कर्ये. 25 "मरा बलिदान दियो हुयो खुन खे ख़मीर का साथ नी चढ़ानु, अरु नी फसह को तिवार मे बलीदान में से कुछ सुबह तक नी रेन देनु.✝ 26 अपनी जमिन की पहली फसल को पहलो भाग अपना परमेश्वर यहोवा का भवन में ली आनु. बकरी का बच्चा खे ओकी माय को दूध में नी बनानु."✝ 27 अरु यहोवा ने मूसा से बोल्यो, "ये वचन लिखी ले; क्योंकि येही वचनहोन का अनुसार मी तरा अरु इस्राएल का साथ वाचा बाधुस हइ." 28 मूसा ते वहा यहोवा का सात चालीस दिन अरु चालीस रात ऱ्हियो अरु तब तक नी ते ओने रोटी खाइ अरु नी पानी पियो. अरु ओने वे पट्टीहोन पर वाचा को वचन अर्थात् दस आज्ञा लिखी दी.

29 जब मूसा साक्षी की दो पट्टिहोन हाथ में लिये हुयो सीनै टेकली से उतरा आथो थो तब यहोवा का साथ बात करन का कारण ओको चेहरे चमकी रो थो, परन्तु उ यो नी जानतो थो कि ओका चेहरे से चमक निकली री हइ.✝ 30 जब हारुन अरु सब इस्राएलिहोन ने मूसा खे देख्यो कि ओका चेहरे से चमक निकली री थी, तब वे ओका पास जाना से डरी गया. 31 तब मूसा ने उनखे बुलायो; अरु हारुन मण्डली का सात अरु प्रधान होन समेत ओका पास आया, अरु मूसा उनका से बात करन लग्यो. 32 येका बाद सब इस्राएली पास आया, अरु जेतना आज्ञा यहोवा ने सीनै टेकली पर ओका साथ बात करन का टेम दी थीं, वे सब बात उनखे बताइ. 33 जब तक मूसा उनका से बात नी करे तब तक अपना मुडा पर दस्ती झाकी ली. 34 अरु जब-जब मूसा अंदर यहोवा से बात करन खे ओका सामने जातो तब-तब उ ओखे अपना मुडा को दस्ती निकलता टेम तक दस्ती उतार रेतो थो; फेर बाहर ऐखे जो-जो आज्ञा ओखे मिली उनखे इस्राएली दुनिया से बोली देतो थो. 35 इस्राएली मूसा को मुडो देखता था कि कुछ ओकासे चमक निकलस हइ; अरु जब तक वे यहोवा से बात करन खे अंदर नी जाता तब तक उ अपना मुडा पर दस्ती डाल्यो ऱ्हेतो थो.