लैव्यव्यवस्था 11

शुध्द अरु अशुध्द जनवर

1 फिर यहोवा ने मूसा अरु हारुन से बोल्यो, 2 "इस्राएलिहोन से बोल : जेत्ता जनवर पृथ्वी पर हइ वे सब मे से तुम ये जिवधारीहोन को मास खय सकस हइ." 3 जनवरहोन मे से जेत्ता चिर या फट्या खुर का होस हइ अरु बागुल करस हइ, उनखे खय सकस हइ. 4 पन बागुल करणआला या फट्या खुरवाला मे से ये जनवरहोन खे नी खानु, पन उट, जो बागुल तो करस हइ पन चिरा खुर को नी हइ, येकालिये उ तुमारा लिये अशुध्द ठऱ्यो हइ. 5 टेकली पर ऱ्हेन आलो बिच्छु, जो बागुल तो करस हइ पन चिरा खुर को नी हइ, उ भी तुमारा लिये अशुध्द हइ. 6 अरु ससो, जो बागुल तो करस हइ पन चिरा खुर को नी हइ, येकालिये उ भी तुमारा लिये अशुध्द हइ. 7 अरु डुक्कर, जो चिरा अर्थात फट्या खुर को होतो तो हइ पन बागुल नी करस, येकालिये उ तुमारा लिये अशुध्द हइ. 8 इनका मास मे से कुछ नी खानु, अरु उनका लास खे पकडनु भी नी; ये तो तुमारा लिये अशुध्द हइ. 9 "फिर जत्ता पानी का जन्तु हइ ओमे से तुम इनखे खय सकस हइ, पन समुद्र या नद्दीहोन का पानी का जन्तुहोन मे से जेत्ता का पंख अरु छिलका होस हइ, उनखे खय सकस हइ." 10 अरु जलचरी जनवरहोन मे से जेत्ता जीव धारी बिना पंख अरु छिलका का समुद्र या नद्दीहोन मे र्‍हेस हइ वे सब तुम्हारा लिये अशुध्द हइ. 11 वे तुम्हारा लिये अशुध्द ठहर्ये; तुम उनका मास मे से कुछ नी खानु, अरु उनका लास खे अशुध्द जाननु. 12 पाणी मे जो कोय जनवर का पंख अरु छिलका नी होय उ तुमारा लिये अशुध्द हइ. 13 "फिर चिडीहोन मे से इनखे अशुध्द जाननु, ये अशुध्द होन का कारण खायो नी जाये, पन घुब्बड, दाडी आलो गिधाड, कालो आलो गिधाड," 14 लाल चील, अरु सब प्रकार कि काली चील, 15 अरु हर प्रकार का सब कव्वा, 16 शुतुर्मुर्ग, रात सिकऱ्यो, पान कोमडी, अरु भाति भाति का सिकऱ्या, 17 घुब्बड, बगल्यो, बडी घुब्बड, 18 राजहंस, पान मुर्गी, घुब्बड, 19 सारस, भाति भाति का बगल्या, टिटीहरी अरु चमगादड़. 20 "जेत्ता पंखआला ले कीड़ा चार पाय का बल से चलस हइ वे सब तुम्हारा लिये अशुध्द हइ." 21 पर रेंगनआला अरु पंखआला जो चार पाय का उपर चलस हइ, जिनखे जमीन पर कूदन भागन के टागहोन ऱ्हेस हइ उनखे खय सकस हइ, 22 वे ये हइ, पन भाति भाति का टोटरहोन, पान बिच्छु, झुल्लो. 23 पन अरु सब रेंगनआला अरु पंखआला किडा जो चार पायआला होस हइ वे तुमारा लिये अशुध्द हइ. 24 "येका कारण तुम अशुध्द ठहर्ये; जो कोय से उनकी लास पकडी जाये उ संज्या तक अशुध्द ठहरे." 25 अरु जो कोय इनका लास मे को कुछ भी उठाये वे अपना कपडा धो अरु संज्या तक अशुध्द ऱ्हिये. 26 फिर जेत्ता जनवर चिऱ्ये खुर का होस हइ पन नी ते बिलकुल फट खुर अरु नी बागुल करणआला हइ वे तुम्हारा लिये अशुध्द हइ. जो कोय उनखे पकड्ये उ अशुध्द ठहरे. 27 अरु चार पाय का बल चलनआला मे से जेत्ता पंजाहोन का बल चलस हइ वे सब तुम्हारा लिये अशुध्द हइ. जो कोय उनकी लास पकड्ये उ संज्या तक अशुध्द ऱ्हिये. 28 अरु जो कोय उनकी लास उठाये वे अपना कपडा धोये अरु संज्या तक अशुध्द ऱ्हिये. क्युकि वे तुमारा लिये अशुध्द हइ. 29 "जो पृथ्वी पर रेंगस हइ ओमे से ये रेंगनआला तुमारा लिये अशुध्द हइ, पन मुंगुस, उंदरो, अरु भाति भाति का घोरपड," 30 अरु बिसमल्लो, मगर, सापसुरडी, सांडा, अरु हत्तीसडल्यो. 31 सब रेंगनआलाहोन मे से ये ही तुमारा लिये अशुध्द हइ. जो कोय इनकी लास पकड्ये उ संज्या तक अशुध्द ऱ्हिये. 32 अरु येमे से कोय की लास जो कोय चिज पर पडी जाये उ भी अशुध्द ठयर्ये, चाहे उ लकडी को कोय बर्तन हुये, चाहे कपडा, चाहे चामडो, चाहे बोरो, चाहे कोइ काम को कसो ही बर्तन आदि क्यु नी हुये; उ पानी मे डाल्यो जाये, अरु संज्या तक अशुध्द ऱ्हिये, तब शुद्ध समझ्यो जाये. 33 अरु अगर मट्टी को कोय बर्तन हुये जेमे ये जन्तुहोन मे से कोय पड्ये, ते उ बर्तन मे जो कुछ हुये उ अशुध्द ठयर्ये, अरु बर्तन खे तुम तोडी डालनु. 34 ओमे जो खान का लिये खानो हइ, जेमे पानी गिरी जाये ते उ सब अशुध्द ठयर्ये; फिर अगर असा बर्तन मे पीन का लिये कुछ हुये ते उ भी अशुध्द ठयर्ये. 35 अरु अगर उनकी लास मे को कुछ भट्टी या चुला पर पड्ये ते उ भी अशुध्द ठयर्ये, अरु तोडी डाली जाये; क्युकी उ अशुध्द हुइ जाये, उ तुमारा लिये भी अशुध्द ठयर्ये. 36 पन झरनो या तलाव जेमे पाणी जमा हुये उ तो शुद्ध ही र्हिये; पन जो कोय उनकी लास खे पकड्ये उ अशुध्द ठयर्ये. 37 अरु अगर उनकी लास मे को कुछ कोय प्रकार का बीज पर जो बोन का लिये हुये, ते उ बीज शुद्ध र्हिये. 38 पर अगर बीज पर पाणी डाल्यो गयो हुये अरु पीछे लास मे को कुछ ओका पर पडि जाये, ते उ तुमारा लिये अशुध्द ठयर्ये. 39 "फिर जो जनवरहोन खे खाना की आज्ञा तुमखे दी गइ हइ अगर उनमे से कोय जनवर मरे, ते जो कोय उनकी लास पकड्ये उ संज्या तक अशुध्द र्हिये." 40 अरु ओकी लास मे से जो कोय कुछ खाये उ अपना कपडा धो अरु संज्या तक अशुध्द र्हिये; अरु जो कोय ओकी लास उठाये उ भी अपना कपडा धो अरु संज्या तक अशुध्द र्हिये. 41 "सब प्रकार का धरती पर रेंगनआला जन्तु गंदा हइ; वे खाया नी जाये. 42 पृथ्वी पर सब रेंगनआलाहोन मे से जेत्ता पेट या चार पायहोन का बल चलस हइ, या जादा पायआला होस हइ, उनखे तुम नी खानु; क्युकि वे गंदा हइ. 43 तुम कोय प्रकार का रेंगनआला जन्तु का वजेसे अपना खुद खे गंदा नी करनु; अरु नी उनका वजेसे खुद खे अशुध्द करीखे अपवित्र ठैरानु. 44 क्युकी मी तुमारो परमेश्‍वर यहोवा हइ; यो कारण अपना खे शुद्ध करीखे पवित्र बन्या ऱ्हे, क्युकी मी पवित्र हइ. येकालिये तुम कोय प्रकार का रेंगनआला जन्तु का वजेसे जो पृथ्वी पर चलस हइ अपना खुद खे अशुध्द नी करनु. 45 क्युकी मी उ यहोवा हइ जो तुमखे मिस्र देश से येकालिये निकालीके लायो हइ कि तुम्हारो परमेश्‍वर ठैइर्यु; येकालिये तुम पवित्र बन, क्युकी मी पवित्र हइ." 46 जनवरहोन, चिडीहोन, अरु सब जलचरी जनवरहोन, अरु पृथ्वी पर सब रेंगनआला जनवरहोन का बारे मे यही व्यवस्था हइ, 47 कि शुद्ध अशुध्द अरु खय सकन आला अरु नी खय सकन आला जिवधारीहोन मे भेद कर्यो जाये.