1 फिर यहोवा ने मूसा से बोल्यो, हारुन का बेटा जो याजक हइ उनका से बोल कि तुम्हारा दुनियाहोन मे से कोय भी मर्ये, ते ओका कारण तुम मे से कोय खुद खे अशुध्द नी कर्ये. 2 अपना नजिक परिवारहोन, अर्थात् अपनी माय या बाप, या बेटो, या बेटी, या भैइ का लिये. 3 या अपनी कुव्वारी बहिन जोको भ्याव नी हुयो हइ, जेको नजिक को सम्बन्ध हइ; जेखे कोय अदमी हि नि हइ उनका लिये उ खुद खे अशुध्द करी सकस हइ. 4 पर याजक होन को नातो वे अपना दुन्या मे प्रधान हइ, येकालिये उ अपना खे असो अशुध्द नी कर्ये कि अपवित्र हुइ जाये. 5 वे नी ते अपनो माथो मुंडाये, अरु नी अपना दाडी का बालहोन खे मुंडाये, अरु नी अपना आंग चीरें. 6 वे अपना परमेश्‍वर का लिये पवित्र बन्यो र्‍हिये, अरु अपना परमेश्‍वर को नाम खे अपवित्र नि करनु; क्युकि वे यहोवा का बलिदान खे जो उनका परमेश्‍वर को खानो हइ, चडायो करस हइ; यो कारण वे पवित्र बन्यो र्‍हिये. 7 वे वेश्या या भ्रष्‍टा से भ्याव नी कर्‍हे, अरु नी छोडी हुये से भ्याव कर; क्युकी याजक अपना परमेश्‍वर का लिये पवित्र होस हइ. 8 येकालिये तू याजक खे पवित्र जाननु, क्युकी उ तुमारा परमेश्‍वर को खानो चडायो करस हइ; येकालिये उ तरी नजर मे पवित्र ठयर्ये; क्योकि मी यहोवा, जो तुम खे पवित्र करुस हइ, पवित्र हइ. 9 अरु अगर याजक की बेटी वेश्या बनीखे अपना आप खे अपवित्र कर्ये, ते वा अपना बाप खे अपवित्र ठहरास हइ; वा अंगार मे जलइ जाये. 10 "जो अपना भैइहोन मे महा याजक हइ, जेका माथा पर अभिषेक को तेल डाल्यो गयो हुये, अरु जेको पवित्र कपडाहोन खे पेनन का लिये अभिषेक हुयो हइ उ अपना माथा का बाल बगरन नी दे, अरु नी अपना कपडा फाड्ये. 11 अरु नी वा कोय लास का पास जाये, अरु नी अपना बाप या माय का कारण खुद खे अशुध्द करस हइ; 12 अरु वा पवित्रजगा से बाहेर नी निकलनु, अरु नी अपना परमेश्‍वर कि पवित्रजगा खे अपवित्र ठहराये. क्युकी उ अपना परमेश्‍वर का अभिषेक को तेलरूपी मुकुट धारण कर्यो हुयो हइ; मी यहोवा आय. 13 अरु उ कुव्वारी बय से ही भ्याव कऱ्हे. 14 जो विधवा, या छोडी हुई, या भ्रष्‍ट, या वेश्या हुये, असी कोय से उ भ्याव नी कर्‍हे, उ अपना ही दुनियाहोन का बीच मे की कोय कुवारी पोऱ्य से भ्याव कऱ्हे. 15 अरु उ अपना बच्चा खे अपना दुन्या मे अपवित्र नी कर्ये; क्योकि मी ओको पवित्र करनवालो यहोवा हइ." 16 फिर यहोवा ने मूसा से बोल्यो, 17 "हारुन से बोल कि तरो कुल की पिडी पीढी मे जो कोय का कोय भी दोष हुये उ अपना परमेश्‍वर को खानो चडान का लिये नजीक नी आय. 18 कोय क्यु नी हुये जेमे दोष हुये उ नजीक नी आय, चाहे उ अंन्धो हुये, चाहे लंगडो, चाहे नाकचपटो हुये, चाहे ओको कुछ जादा आंग हुये, 19 ओको पाय, या हाथ विकलांग हुये, 20 या उ कुबडो, या ठेंगनो हुये, अरु ओका आख मे दोष हुये, या उ इन्सान के चईं या खुजली हुये, या उ नपुसक हुये; 21 हारुन याजक का कुल मे से जो कोय मे कोय भी दोष हुये उ यहोवा खे बलिदान चडान का लिये नजीक नी आय; उ जो दोषयुक्‍त हइ कभी भी अपना परमेश्‍वर को खानो चडान का लिये नजीक नी आय. 22 उ अपना परमेश्‍वर का पवित्र अरु परमपवित्र दोय प्रकार का खाना खे खाये, 23 पन ओका दोष का कारण उ नी ते बीचआला परदा का अंदर आय अरु नी वेदी का नजीक, जेकासे असो नी हुये कि उ मरा पवित्रजगाहोन खे अपवित्र कर्ये; क्योकि मी उनको पवित्र करन आलो यहोवा आय". 24 येकालिये मूसा ने हारुन अरु ओका बेटाहोन खे तथा सब इस्राएलिहोन खे या बात बोल सुनय.