1 फिर यहोवा ने मूसा से बोल्यो, 2 "हारुन अरु ओका बेटाहोन से बोल कि इस्राएलिहोन कि पवित्र करी हुइ चिजहोन से जेखे वे मरा लिये पवित्र करस हइ अलग र्हिये, अरु मरा पवित्र नाम खे अपवित्र नि करनु; मी यहोवा आय." 3 अरु उनका से बोल कि तुमारी पीडी–पीडी मे तुम्हारा पुरा कुल मे से जो कोय अपनी अशुध्द दशा मे वे पवित्र करी हुइ चिजहोन का पास जाये, जेने इस्राएली यहोवा का लिये पवित्र करस हइ, उ इन्सान मरा सामने से खत्म कर्यो जाये; मी यहोवा आय. 4 हारुन का कुल मे से कोय क्यु नी हुये जो कोढी हुये, या ओखे स्त्राव हुये, उ इन्सान जब तक शुद्ध नी हुइ जाये तब तक पवित्र करी हुइ चिजहोन मे से कुछ नी खानु. जो लास का कारन अशुध्द हुयो हइ, या जेको वीर्य स्खलित हुयो हइ, असा इन्सान खे जो कोय पकड्ये, 5 अरु जो कोय असा रेंगनेवाला जन्तु खे पकड्ये जेका से दुनीया अशुध्द हुइ सकस हइ, या कोय असा इन्सान खे पकड्ये जेमे कोय रंग की अशुध्दता हुये जो ओखे भी लगी सकस हइ 6 ते उ जनवर जो इनमे से कोय खे पकड्ये संज्या तक अशुध्द ठऱ्यो र्हिये, अरु जब तक पाणी से आंग नी धोये तब तक पवित्र चिजहोन मे से कुछ नी खानु. 7 जब सूरज डुबना पर उ शुद्ध ठर्ये; अरु तब उ पवित्र चिजहोन मे से खय सके, क्युकी ओको खानो उही हइ. 8 जो जनवर अपना आप से मऱ्यो हुये या कोय भी जनवर से फाड्यो गयो हुये ओखे खय खे उ अपना खुद खे अशुध्द नी कर्ये; मी यहोवा आय. 9 येकालिये याजक दुनीया मरी दी हुइ नियमहोन को पालन कर्ये, असो नी हुये कि वे उनखे अपवित्र करि खे पाप को बोज उठाये, अरु येका कारण मरी भी जाये; मी उनको पवित्र करन आलो यहोवा आय. 10 "दुसरा कुल को जन कोय पवित्र चिज खे नी खानु, चाहे उ याजक को मीजवान हुये या मजुर हुये, तेभी उ कोय पवित्र चिज नी खानु. 11 अगर याजक कोय दुन्या खे रुप्या दिखे मोल लिये, ते उ इंसान ओमे से खय सकस हइ. अरु जो याजक का घर मे पैदा हुया हुये वे भी ओका खाना मे से खाये. 12 अगर याजक की बेटी दुसरा कुल का कोय इन्सान से भ्याव करी हुये, ते वा दान करी हुइ पवित्र चिजहोन मे से नी खानु. 13 अगर याजक की बेटी विधवा या छोडी हुई हुये, अरु ओका बच्चा नी हुये, अरु वा अपनी बाल्यावस्था की रीति का जसी अपना बाप का घर मे ऱ्हेस हइ, ते वा अपना बाप का खाना मे से खाये; पर दुसरा कुल को कोय ओमे से नी खइ सक्खे. 14 अरु अगर कोय इन्सान कोय पवित्र चिज मे से कुछ भुल से खइ जाये, ते वा ओको पाचवा भाग बडीके ओखे याजक खे भरी दे. 15 वे इस्राएलिहोन कि पवित्र करी हुइ चिजहोन खे, जेखे वे यहोवा का लिये चढाये, अपवित्र नी कर्ये. 16 वे उन खे अपनी पवित्र चिजहोन मे से खलयके उनसे अपराध को दोष नी उठाये; मी उनको पवित्र करन आलो यहोवा आय". 17 फिर यहोवा ने मूसा से बोल्यो, 18 "हारुन अरु ओका बेटाहोन से अरु इस्राएलीहोन खे समझीखे बोल कि इस्राएल का घरानो या इस्राएलिहोन मे र्हेनआला परदेशीहोन मे से कोय क्यु नी हुये जो मन्नत या इच्छा से बलि करन का लिये यहोवा खे कोय होमबलि चढइ, 19 ते अपना लिये ग्रहण योग्य ठहरन का लिये पालतु पशु या मेडाहोन या बकरीहोन मे से नीरोगी नर चढायो जाये. 20 जेमे कोय भी दोष हुये ओखे नी चढानु; क्योंकि उ तुम्हारा लिये ग्रहण योग्य नि ठयर्ये. 21 अरु जो कोय पालतु जनवर या भेड़–बकरिहोन मे से विशेष चिज मन्नत करन का लिये या इच्छा से बलि का लिये यहोवा खे बलिदान चढाये, ते ग्रहण होन का लिये जरुरी हइ कि उ नीरोगी होनु, ओमे कोय भी कमी नी होनु. 22 जो अंधो या आंग को टुट्यो या लूलो हुये, अरु ओमे फोडा-फुंन्सी या पपडी या खुजली हुये, असा खे यहोवा का लिये नी चढ़ानु, ओमेसे वेदी पर यहोवा का लिये बलिदान नी चढ़ानु. 23 जो कोय पालतु जनवर या मेडो या बकरा को कोय हिस्सा जादा या कम बडो हुये ओखे इच्छा से बलि का लिये चडय सकस हइ, पन मन्नत पुरी करन का लिये उ ग्रहण नी हुये. 24 जो जनवर का अंड दब्या या कुचल्यो या टुट्यो या कट्यो गयो हुये ओखे यहोवा का लिये नी चढ़ानु, अरु अपना देश मे भी असो काम नि करनु. 25 येमे से कोय खे तुम अपना परमेश्‍वर को खानो जानीखे कोय परदेशी से लिखे नी चडानु. क्युकी ओमे उनके बिगाडी वर्तमान हइ, ओमे दोष हइ, येकालिये वे तुमारा लिये ग्रहण नी हुये". 26 फिर यहोवा ने मूसा से बोल्यो, 27 "जब गोरो या मेडो या बकरी को बच्‍चा पैदा हुये, ते उ सात दिन तक अपनी माय का साथ र्‍हिये; फिर आठवा दिन से सामने उ यहोवा खे बलिदान का लिये ग्रहण योग्य ठैर्ये." 28 चाहे पालतु जनवर, या मेडी, या बकरी हुये, ओखे अरु ओका बच्‍चा खे एक ही दिन मे बलि नी करनु. 29 अरु जब तुम यहोवा का लिये धन्यवाद को मेल-मिलाप बलिदान चडाये, ते ओखे योही रिति से करनु, जेकासे उ ग्रहण योग्य ठयर्ये. 30 उ यही दिन खायो जाये, ओमे से कुछ भी फजर तक ऱ्ही नी पाये; मी यहोवा आय. 31 "येकालिये तुम मरी आज्ञाहोन खे माननु अरु उनको पालन करनु; मी यहोवा आय. 32 अरु मरा पवित्र नाम खे अपवित्र नी ठहरानु, क्युकी मी इस्राएलिहोन का बिच जरुरी ही पवित्र मान्यो जायु; क्युकी मी तुमारो पवित्र करनवालो यहोवा आय, 33 जो तुम खे मिस्र देश से निकालीके लायो, जेकासे तुम्हारो परमेश्‍वर बन्यो र्‍हियु; मी यहोवा आय".