1 फिर यहोवा ने मूसा अरु हारुन से बोल्यो, 2 "इस्राएलिहोन से बोल कि जो जो इन्सान खे स्त्राव हइ, ते उ स्त्राव का कारण अशुध्द ठयर्ये. 3 उ चाहे बोहाते र्‍हिये, चाह्ये बोहानो बंद भी हुये, तेभी ओकि अशुध्दी बनी र्‍हिये." 4 जेको स्त्राव हुये उ जो जो बिछाना पर सोये उ अशुध्द ठयर्ये, अरु जो जो चिज पर उ बठ्ये वे भी अशुध्द ठयर्ये. 5 अरु जो कोय ओका बिछाना खे पकड्ये उ अपना कपडा खे धोयखे पाणी से आंग धोये, अरु संज्या तक अशुध्द ठऱ्यो र्हिये. 6 अरु जेको स्त्राव हुये, अरु उ जो चिज पर बठ्यो हइ, ओका पर जो कोय बठे उ अपना कपडा खे धोयखे पाणी से आंग धो, अरु संज्या तक अशुध्द ठऱ्यो र्हिये. 7 अरु जेके स्त्राव हुये ओकासे जो कोय पड्यो जाये उ अपना कपडा खे धोयखे पाणी से आंग धो अरु संज्या तक अशुध्द र्हिये. 8 अरु जेको स्त्राव हुये अगर उ कोय अच्छा इन्सान पर थूक्ये, ते उ अपना कपडा खे धोयखे पाणी से आंग धो, अरु संज्या तक अशुध्द र्हिये. 9 अरु जेके स्त्राव हुये उ सवारी कि जो चिज पर बठ्ये उ अशुध्द ठयर्ये. 10 अरु जो कोय कोय चिज खे जो ओका नीचे ऱ्हि हुइ पकड्ये, उ संज्या तक अशुध्द र्हिये; अरु जो कोय असी कोय चिज खे उठाये वे अपना कपडा खे धोयखे पाणी से आंग धो, अरु संज्या तक अशुध्द र्हिये. 11 अरु जेको स्त्राव हुये उ जो कोय खे बिना हात धोयो पकड्ये उ अपना कपडा खे धोयखे पाणी से आंग धो, अरु संज्या तक अशुध्द र्हिये. 12 अरु जेखे स्त्राव हुये उ मट्टी को जो कोय बर्तन खे पकड्ये ओखे तोडी डाली जाये, अरु लकडी का सब प्रकार का बर्तन पाणी से धोया जाये. 13 फिर जेखे स्त्राव हुये उ जब अपनी बिमारी से शुद्ध हुइ जाये, तब से शुद्ध ठहरन का सात दिन गिनी ले, अरु उनका बीतना पर अपना कपडा खे धोयखे बोहानआला पाणी से आंग धो; तब उ शुद्ध ठर्ये. 14 अरु आठवा दिन वे दो फांडकुल या कबुतर का दो बच्‍चा लिखे मिलापवाला तम्बु का दरवाजा पर यहोवा का सामने जयखे उनखे याजक खे दे. 15 तब याजक ओमे से एक खे पापबलि, अरु दुसरा खे होमबलि का लिये दान चढाये, अरु याजक ओका लिये ओका स्त्राव का कारन यहोवा का सामने पाप खे झाके. 16 फिर अगर कोय इन्सान को वीर्य स्खलित हुइ जाये, ते उ अपना सब आंग खे पाणी से धो, अरु संज्या तक अशुध्द र्हिये. 17 अरु जो कोय कपडा या चमडा पर उ वीर्य पड्ये उ पाणी से धोयो जाये, अरु संज्या तक अशुध्द र्हिये. 18 जब कोय इन्सान बय से प्रसंग कर्ये, ते वे दोय पाणी से आंग धो, अरु संज्या तक अशुध्द र्हिये. 19 "फिर जब कोय बइ मासिक धर्म से र्‍हिये, ते वा सात दिन तक अशुध्द ठहरी र्‍हिये, अरु जो कोय ओखे पकड्ये उ संज्या तक अशुध्द र्हिये." 20 अरु जब तक उ अशुध्द र्हिये तब तक जो जो चिज पर उ सोये, अरु जो जो चिज पर उ बठ्ये वे सब अशुध्द ठयर्ये. 21 अरु जो कोय ओका बिछाना खे पकड्ये उ अपना कपडा धोयखे पाणी से आंग धोये, अरु संज्या तक अशुध्द र्हिये. 22 अरु जो कोय कोय चिज खे पकड्ये जेका पर वा बठी ऱ्हिये उ अपना कपडा धोयखे पाणी से आंग धोये, अरु संज्या तक अशुध्द र्हिये. 23 अरु अगर बिछानो या दुसरा कोय चिज पर जेका पर उ बठी हुइ पकडन का टेम ओको बेकार चिज लग्यो हइ, ते पकडनआलो संज्या तक अशुध्द र्हिये. 24 अरु अगर कोय इन्सान ओकासे प्रसंग कर्ये, अरु ओको बेकार चिज ओके लगी जाये, ते उ इन्सान सात दिन तक अशुध्द र्हिये, अरु जो जो बिछाना पर उ सोये वे सब अशुध्द ठयर्ये. 25 "फिर अगर कोय बय का अपना मासिक धर्म का नियुक्‍त टेम से जादा दिन तक रक्तस्त्राव बोहातो र्‍हिये, या वा नियुक्‍त टेम तक मासिक धर्म र्‍हिये, ते जब तक उ असी दशा मे ऱ्हिये तब तक वा अशुध्द ऱ्हिये." 26 ओका मासिक धर्म र्हेन का सब दिनहोन मे जो जो बिछाना पर वा सोये वे सब ओका मासिक धर्म का बिछाना का जसी ठहर्ये; अरु जो जो चिज पर वा बठ्ये वे भी ओका मासिक धर्म र्‍हेन का दिनहोन का जसो अशुध्द ठयर्ये. 27 अरु जो कोय वे चिजहोन खे पकड्ये उ अशुध्द ठयर्ये, येकालिये उ अपना कपडा खे धोयखे पाणी से आंग धोये, अरु संज्या तक अशुध्द र्हिये. 28 पर जब वा बइ अपना मासिक धर्म से अच्छी हुइ जाये, तब से वा सात दिन गिनी ले, अरु वे दिन का बितना पर वा अच्छी ठर्ये. 29 फिर आठवा दिन वे दो फांडकुल या कबुतर का दो बच्‍चा लिखे मिलापवाला तम्बु का दरवाजा पर याजक का पास जाये. 30 तब याजक एक खे पापबलि अरु दुसरा खे होमबलि का लिये चढाये, अरु याजक ओका लिये ओका मासिक धर्म की अशुध्दता का कारन यहोवा का सामने पाप के झाके. 31 "यो प्रकार से तुम इस्राएलिहोन खे उनकी अशुदधता से अलग रख्यो कर, कही असो नी हुये कि वे यहोवा का घर खे जो उनका बीच मे हइ अशुध्द करीखे अपनी अशुदधता मे फस्या हुया मरि जाये." 32 जेको स्त्राव हुये अरु जो इन्सान वीर्य स्खलित होन से अशुध्द हुये. 33 अरु जो बय अशुध्दता का करण कमजोर हुये; अरु का अदमी का बइ, जो कोय के स्त्राव हुये, अरु जो इन्सान अशुध्द बय का सात सोये, ये सब का लिये या व्यवस्था हइ.