6 Kɨmbʉki ntambʉ ɨyɨ, mʉntʉ nɨmʉkata wɨpʉɨla mʉnkonzele nʉ mʉntʉ nɨ mʉsimbi wɨpʉlaa wɨdʉ. 7 Mʉntʉ wɨhɨ nʉwapumye anga nʉsɨɨgɨe mʉnkolo akwe, waleke kʉpumya waze ʉhininae ang’wɨ kʉsingigwa, ndogoelyo Itunda wɨmʉlowa mʉntʉ nʉwɨpumya kʉʉlowa. 8 Itunda ʉhumile kʉmʉpa kʉkɨlɨnkɨɨla ayo nɨmʉtakile, mahikʉ ɨhi ɨze mʉkete maintʉ ɨhi nɨmʉkʉhiya, nɨ itɨ mʉlongoleke kiaɨɨlya mʉ mɨlɨmo nɨ mɨza. 9 Wandɨkwa wang’wi Itunda wandɨkile kɨna,

"Ʉpumilye yɨdʉ,

ʉapee ahimbɨ,

makani aʉkende wakwe ɨsaga ɨkalɨ na kalɨ."

10 Itunda wɨmʉpeza mʉminzi mbeʉ waminze nʉ kʉmʉpa indya, kʉlʉlo ʉkʉmʉpeza nʉ nyenye ga mbeʉ nɨmʉiloilwe, hangɨ ʉkʉipumisa yikʉle mʉhume kʉpʉla ntenya kʉ ʉkende wanyu. 11 Itunda ʉkʉmʉgolɨpya maintʉ ɨdʉ mʉtule mɨakende mahikʉ ɨhi, ingɨ antʉ ahume kʉmʉlʉmba Itunda kʉnsoko aɨpegwa yanyu nɨakʉisɨngɨɨlya kʉpuma kʉng’witʉ. 12 Kʉitɨ mʉlɨmo ʉwʉ nɨmʉkitʉma shanga ʉkʉaɨɨlya antʉ ang’wi Itunda du, ingɨ ikʉsasha antʉ ɨdʉ amʉsongelye Itunda.