ଜିଉଦିଞ୍ଜି ଆୟର୍ନେ ଆସନ୍ କୋରସନ୍ ଆବନାଁୟ୍
1 ଜିରିମିଅନ୍ ଆ ତଅଡ୍ଗଡ୍ ପ୍ରବୁନ୍ ଆବର୍ନେ ଆଜାଡ଼ିନ୍ ଆଡ୍ରେନ୍ ଆସନ୍ ପାରସ୍ୟନ୍ ଆରାଜା କୋରସନ୍ ସାସନଡାଲେ ପର୍ତମ୍ମୁ ବର୍ସେଙ୍ ଆଡ୍ରେଏନ୍ ଆଡିଡ୍, ପ୍ରବୁନ୍ ପାରସ୍ୟନ୍ ଆ ରାଜା କୋରସନ୍ ଆ ମନ୍ନଲୋଙ୍ ଅବ୍ନୁୟୁବେନ୍, ତିଆସନ୍ ଆନିନ୍ ଆ ରାଜ୍ୟଲୋଙନ୍ ସମ୍ପରାନ୍ କେନ୍ ଆବର୍ନେ ଅବ୍ଜନାଏନ୍, ଆରି ଅବ୍ନିଡିଡ୍ଲେ କେନ୍ ଆବର୍ନେ ଅବ୍ବରବରେନ୍ ।
2 "ପାରସ୍ୟନ୍ ଆ ରାଜା କୋରସନ୍ ଏନ୍ନେଲେ ବର୍ତନେ, ପ୍ରବୁନ୍ ରୁଆଙନ୍ ଆ ଇସ୍ୱର, ପୁର୍ତିନ୍ ଆରାଜ୍ୟଜି ଅଡ଼୍କୋନ୍ ଞେନ୍ଆଡଙ୍ ତିୟ୍ଲିଁୟ୍; ଆରି, ଜିଉଦା ଡେସାନ୍ ଜିରୁସାଲମ୍ ଗଡ଼ାଲୋଙନ୍ ଆନିନ୍ ଆସନ୍ ଅବୟ୍ ସରେବାସିଂ ତୁବ୍ତୁବନ୍ ଆସନ୍ ଆନିନ୍ ଞେନ୍ଆଡଙ୍ ବାଁୟ୍ଲିୟ୍ । 3 ଅଡ଼୍କୋ ମନ୍ରାଞ୍ଜି ଆମଙ୍ଲୋଙ୍ ସିଲଡ୍ ଆନ୍ଜାକିଁୟ୍ ଡେଏତୋ ଇସ୍ୱରନ୍ ଆନିଞ୍ଜି ସରିନ୍ ଡକୋନେତୋ, ଆରି ଆନିନ୍ ଜିଉଦା ଡେସାନ୍ ଡକୋ ଜିରୁସାଲମନ୍ ଜିର୍ରେ ସଦାପ୍ରବୁ ଇସ୍ରାଏଲନ୍ ଆଇସ୍ଵର ଜିରୁସାଲମଲୋଙନ୍ ଅସିଙନ୍ ତୁବେତୋ, ଇନିଆସନ୍ଗାମେଣ୍ତେନ୍ ଆନିନ୍ ଡମ୍ ଇସ୍ୱର । 4 ଆରି, ଆନାଜାକିଁୟ୍ ଅଙ୍ଗାଲୋଙ୍ଜାକିଁ ଆଡ୍ରକୋନେଲୋଙ୍ ଲାଙ୍ଲେଡ୍ ମନ୍ରାନ୍ ଡକୋତଞ୍ଜି, ତି ଅଡ଼େତେ ଆଡ୍ରକୋତଞ୍ଜି ଆ ମନ୍ରାଜି ଜିରୁସାଲମଲୋଙ୍ ଇସ୍ୱରନ୍ ଆସରେବାସିଙ୍ ଆତନୁବ୍ ଆସନ୍ ଇସ୍ସୁମ୍ତନିୟ୍ତିୟ୍ ଅନମଙନ୍ ଅମ୍ରେଙ୍ଲେ ରୁପାନ୍, ସୁନ୍ନାନ୍, ଏର୍ଜାଡ଼ିକାନ୍ ଆଜନବ୍ ଆରି ଜନ୍ତୁନ୍ ତିୟ୍ଲେ ଆନିନ୍ଆଡଙ୍ ସାୟ୍ସିଏତଜି ।"
5 ତିଆଡିଡ୍ ଜିଉଦାନ୍ ଡ ବିନ୍ନାମିନନ୍ ଆପ୍ପେୟନ୍ ଆକେଜ୍ଜା ଆମ୍ମୁଙ୍ଗଡ୍ମରଞ୍ଜି, ଆରି ରାଓଡ଼ାଞ୍ଜି ଡ ଲେବିୟଞ୍ଜି, ଆଗ୍ରାମ୍ଗାମ୍ ପ୍ରବୁନ୍ ଜିରୁସାଲମଲୋଙନ୍ ଆ ସରେବାସିଂ ଆତନୁବ୍ ଆସନ୍ ଆଜନିର୍ ଆସନ୍ ଇସ୍ୱରନ୍ ଅଙ୍ଗା ଆମନ୍ରାଜି ଆମନ୍ ଅବ୍ନୁୟୁବେନ୍, ଆନିଞ୍ଜି ଡୋଲଞ୍ଜି ।
6 ଆରି, ଇସ୍ସୁମ୍ ତନିୟ୍ତିୟ୍ ଆଜନବ୍ ଉମ୍ରେଙ୍ଲେ ଆନିଞ୍ଜିଆଡଙ୍ ଏର୍ରେ ଆଡ୍ରକୋଲଞ୍ଜି ଆମନ୍ରାଜି ଅଡ଼୍କୋ ରୁପା ସିମନ୍, ସୁନ୍ନାନ୍, ଏର୍ଜାଡ଼ିକାନ୍ ଆଜନ, ଜନ୍ତୁନ୍ ଡ ମଡ଼ଗାଡମନ୍ ଆଜନବ୍ ତିୟ୍ଲେ ଆସିଞ୍ଜି ରବ୍ଡୋଏଞ୍ଜି ।
7 ଆରି ନବୁକଦ୍ନିତ୍ସରନ୍ ପ୍ରବୁନ୍ ଆସରେବାସିଙ୍ ଡକୋନ୍ ଅଙ୍ଗା ଆସିମ୍ମାଜି ଅଡ଼୍କୋନ୍ ଜିରୁସାଲମନ୍ସିଲଡ୍ ପାଙ୍ଲେ ଆ ସନୁମ୍ସିଙ୍ଲୋଙନ୍ ଡକ୍କୋଏନ୍ କୋରସ ରାଜାନ୍ ତି ଅଡ଼୍କୋନ୍ ତବ୍ଲେ ପାଙ୍ଲାୟ୍ । 8 ପାରସ୍ୟନ୍ ଆ ରାଜା କୋରସନ୍ ତି ଅଡ଼୍କୋନ୍ ଡକ୍କୋଡାବ୍ମର୍ ମିତ୍ରଦାତନ୍ ଆସିଲୋଙ୍ ତିୟେନ୍ ଆରି ଆନିନ୍ ତି ଅଡ଼୍କୋନ୍ ତବ୍ଲେ ଜିଉଦାନ୍ ଆସୋଡ଼ାମର୍ ସେସବସରନ୍ଆଡଙ୍ ଡିଡିଲେ ତିୟେନ୍ । 9 ତି ଆଜନବ୍ ଆଡନିଡି କେନ୍; ତିରିସି ସୁନ୍ନା ସିମନ୍, ବଅଜାର ରୁପା ସିମନ୍, ବକୁଡ଼ିନଟା କୁଣ୍ତିନ୍; 10 ତିରିସ୍ଟା ଗରାଡାନେ ସୁନ୍ନା ସିମନ୍, ଉଞ୍ଜିସଅ ଦସଟା ରୁପା ସନ୍ନାରା ଗରାଡାନେ ସିମନ୍, ଆରି ବଅଜାର ଏର୍ଜାଡ଼ିକାନ୍ ଆସିମ୍ମା, 11 ଅଡ଼୍କୋନ୍ ମାୟ୍ମାୟ୍ଲେ ମନ୍ଲୟ୍ ଅଜାର ଉଞ୍ଜି ସଅ ସୁନ୍ନାନ୍ ଡ ରୁପା ସିମନ୍ ଡକୋଏନ୍; ଆବଣ୍ଡିମରଞ୍ଜି ବାବିଲନ୍ ସିଲଡ୍ ଜିରୁସାଲମନ୍ ଅନୋରୋଙ୍ଆଡ୍ରେଞ୍ଜି ଆଡିଡ୍ ସେସବରନ୍ କେନ୍ ଅଡ଼୍କୋନ୍ ଆଜନବ୍ ପାଙ୍ଲାୟ୍ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)