1 ଅର୍ତକସ୍ତର ରାଜାନ୍‌ ଆସରାସନଏନ୍‌ ଆଡିଡ୍‌ ରମ୍ମଙ୍‌ ରମ୍ମଙ୍‌ ଅଙ୍ଗା ଆପ୍ପେୟ୍‌ ସୋଡ଼ା କେଜ୍ଜାନ୍‌ ଞେନ୍‌ ସରିନ୍‌ ବାବିଲୋନ୍‌ ସିଲଡ୍‌ ଜିର୍ରାଜି, ଆକେଜାଞ୍ଜି କେନ୍‌, ଆଗ୍ରାମ୍‌ଗାମ୍‌, 2 ପିନଅସନ୍‌ ଆଅଞ୍ଜି ଆମଙ୍‌ଲୋଙ୍‌ ସିଲଡ୍‌ ଗେର୍ସୋମନ୍‌; ଇତାମରନ୍‌ ଆଅଞ୍ଜି ଆମଙ୍‌ଲୋଙ୍‌ ସିଲଡ୍‌ ଦାନିଏଲନ୍‌; ଦାଉଦନ୍‌ ଆଅଞ୍ଜି ଆମଙ୍‌ଲୋଙ୍‌ ସିଲଡ୍‌ ଅଟୁସନ୍‌ । 3 ସକନିଅନ୍‌ ଆଅଞ୍ଜି ଆମଙ୍‌ଲୋଙ୍‌ ସିଲଡ୍‌; ପରିୟୋସନ୍‌ ଆଅଞ୍ଜି ଆମଙ୍‌ଲୋଙ୍‌ ସିଲଡ୍‌ ଜିକରିଅନ୍‌ ଡ ଓବ୍ବାମରଞ୍ଜି ଆକେଜ୍ଜା ଆଡନିଡି ବସଅ ବାକୁଡ଼ିଦସ ମନ୍‌ରା । 4 ପଅତ୍‌-ମୋୟାବନ୍‌ ଆଅଞ୍ଜି ସିଲଡ୍‌ ସରଇଅନ୍‌ ଆଡାଙ୍ଗାଡ଼ାଅନ୍‌ ଇଲିଓଅଇନୟନ୍‌ ଡ ଆନିନ୍‌ ଅମ୍ପରା ବାଗୁ ସଅ ଓବ୍ବାମରନ୍‌ । 5 ସକନିୟନ୍‌ ଆଅଞ୍ଜି ଆମଙ୍‌ଲୋଙ୍‌ ସିଲଡ୍‌ ଜଅସିଏଲନ୍‌ ଆ ଡାଙ୍ଗାଡ଼ାଅନ୍‌; ଆନିନ୍‌ ଅମ୍ପରା ୟାଗି ସଅ ଓବ୍ବାମରନ୍‌ । 6 ଆରି ଆଦିନନ୍‌ ଆଅଞ୍ଜି ସିଲଡ୍‌ ଜୋନାତନନ୍‌ ଆ ଡାଙ୍ଗାଡ଼ାଅନ୍‌ ଏବଦ୍‌ ଡ ଆନିନ୍‌ ଅମ୍ପରା ପସାସ ଓବ୍ବାମରନ୍‌ । 7 ଆରି ଏଲମ୍‌ମନ୍‌ ଆଅଞ୍ଜି ସିଲଡ୍‌ ଅତଲିଅନ୍‌ ଆ ଡାଙ୍ଗାଡ଼ାଅନ୍‌ ଜିସାୟାଅନ୍‌ ଡ ଆନିନ୍‌ ଅମ୍ପରା ସତୁରି ଓବ୍ବାମରନ୍‌ । 8 ଆରି ସପଟିଅନ୍‌ ଆଅଞ୍ଜି ସିଲଡ୍‌ ମିକାଏଲନ୍‌ ଆ ଡାଙ୍ଗାଡ଼ାଅନ୍‌ ସବଦିଅନ୍‌ ଡ ଆନିନ୍‌ ଅମ୍ପରା ଉଞ୍ଜିକୁଡ଼ି ଓବ୍ବାମରନ୍‌ । 9 ଜୋଆବନ୍‌ ଆଅଞ୍ଜି ସିଲଡ୍‌ ଜିଇଏଲନ୍‌ ଆ ଡାଙ୍ଗାଡ଼ାଅନ୍‌ ଓବଦିଅନ୍‌ ଡ ଆନିନ୍‌ ଅମ୍ପରା ବାଗୁ ସଅ ଅଟର ଜଣ ଓବ୍ବାମରନ୍‌ । 10 ଆରି ସଲୋମିତ୍‌ତନ୍‌ ଆଅଞ୍ଜି ସିଲଡ୍‌ ଜୋସିପିଅନ୍‌ ଆଡାଙ୍ଗାଡ଼ାଅନ୍‌ ଡ ଆନିନ୍‌ ଅମ୍ପରା ବସଅ ୟାକୁଡ଼ି ଓବ୍ବାମରନ୍‌ । 11 ଆରି ବେବୟନ୍‌ ଆଅଞ୍ଜି ସିଲଡ୍‌ ବେବଅନ୍‌ ଆ ଡାଙ୍ଗାଡ଼ାଅନ୍‌ ଜିକରିଅନ୍‌ ଡ ଆନିନ୍‌ ଅମ୍ପରା ବକୁଡ଼ି ଆଟ ଜଣ ଓବ୍ବାମରନ୍‌ । 12 ଅସ୍‌ଗଦନ୍‌ ଆଅଞ୍ଜି ଆମଙ୍‌ଲୋଙ୍‌ ସିଲଡ୍‌ ଅକାଟନ୍‌ ଆ ଡାଙ୍ଗାଡ଼ାଅନ୍‌ ଜୋଆନନ୍‌ ଡ ଆନିନ୍‌ ସରିନ୍‌ ବସଅ ଦସ ଜଣ ଓବ୍ବାମରନ୍‌ । 13 ଆରି ଅଦୋନିକମ୍‌ ଆଅଞ୍ଜି ସିଲଡ୍‌ ଆସନ୍ନା ବୋଞାଙଞ୍ଜି ଡ ଆଞୁମଞ୍ଜି କେନ୍‌, ଇଲିପେଲଟନ୍‌, ଜିଜିଏଲନ୍‌ ଡ ସମୟିୟ; ଆନିଞ୍ଜି ଅମ୍ପରା ୟାକୁଡ଼ି ଓବ୍ବାମରନ୍‌ । 14 ଆରି ବିଗ୍‌ବୟନ୍‌ ଆ ଅନଞ୍ଜିଲୋଙ୍ ସିଲଡ୍‌ ଉତୟନ୍‌, ସକ୍କୁରନ୍‌ ଡ ଆନିଞ୍ଜି ସରିନ୍‌ ସତୁରି ଜଣ ଓବ୍ବାମରନ୍‌ ।

15 ଆରି, ଞେନ୍‌ ଆନିଞ୍ଜିଆଡଙ୍‌ ଅଅବାଗାମିନି ଅଲନ୍‌ ଆ ତୁୟାୟ୍‌ ଅବ୍‌ରୁକ୍କୁଲାଜି; ଆରି ତେତ୍ତେ ଞେନ୍‌ ତମ୍ବୁସିଙନ୍‌ ତୁବ୍‌ଲେ ୟାଗି ଡିନା ଏଡକୋଲନାୟ୍‌; ତିସିଲଡ୍ ଞେନ୍‌ ମନ୍‌ରାଞ୍ଜିଆଡଙ୍‌ ଡ ରାଓଡ଼ାଞ୍ଜିଆଡଙ୍‌ ଏଙ୍ଗାଲେ ଗିୟ୍‌ଲାୟ୍‌ ଲେବିନ୍‌ ଆଅଞ୍ଜି ଆମଙ୍‌ସିଲଡ୍‌ ଆନ୍ନିଙ୍‌ଆଡଙ୍‌ ଅଃଞାଙ୍‌ଲାୟ୍‌ । 16 ସିଲତ୍ତେ ଞେନ୍‌ ଇଲିଆଜରନ୍‌, ଅରିଏଲନ୍‌, ସମୟିୟ, ଇଲ୍‌ନାତନ୍‌, ଜାରିବ, ଇଲ୍‌ନାତନ୍‌, ନାତନ, ଜିକରିୟନ୍‌ ଡ ମସୁଲ୍ଲମ୍‌, କେନ୍‌ ଆ ସୋଡ଼ା ମନ୍‌ରାଞ୍ଜିଆଡଙ୍‌; ଆରି ଜୋଆରିବନ୍‌ ଡ ଇଲ୍‌ନାତନ୍‌ ଞନଙ୍‌ତିୟ୍‌ମରଞ୍ଜିଆଡଙ୍‌ ଆନୋଡ୍ଡେ ମନ୍‌ରାନ୍‌ ଆପ୍ପାୟ୍‌ଲାୟ୍‌ । 17 ସିଲତ୍ତେ ଞେନ୍‌ ଆନିଞ୍ଜିଆଡଙ୍‌ କାସିପିଆ ଆଞୁମ୍‌ ଆଡ୍ରକୋନେ ସୋଡ଼ାମରନ୍‌ ଇଦ୍ଦୋନ୍‌ ଆମଙ୍‌ବା ଆପ୍ପାୟ୍‌ଲାୟ୍‌; ଆରି, ଇସ୍ୱରଲେନ୍‌ ଆସିଙ୍‌ ଆସନ୍‌ ଅମଙ୍‌ବାଲେନ୍‌ କାବ୍ବାଡ଼ାମରଞ୍ଜିଆଡଙ୍‌ ଓରୋଙାୟ୍‌ବା ଗାମ୍‌ଲେ କାସିପିଆନ୍‌ ଇଦ୍ଦୋନ୍‌ଆଡଙ୍‌ ଡ ଆବୋଞାଙଞ୍ଜି ନତିନିୟଞ୍ଜିଆଡଙ୍‌ ଆବନର୍‌ ଆସନ୍‌ ଆନିଞ୍ଜିଆଡଙ୍‌ ବାଞ୍‌ଲାୟ୍‌ । 18 ସିଲତ୍ତେ ଇନ୍‌ଲେଞ୍ଜିଆଡଙ୍‌ ଇସ୍ୱରଲେନ୍‌ ଆ କନାରକାରମ୍‌ସି ବାତ୍ତେ ଆନିଞ୍ଜି ଇସ୍ରାଏଲନ୍‌ ଆଉଲେଙଞ୍ଜି, ଲେବିନ୍‌ ଆ ଡାଙ୍ଗାଡ଼ାଅନ୍‌ ମହଲିନ୍‌ ଆଅଞ୍ଜି ସିଲଡ୍‌ ଅବୟ୍‌ନେ ଆଜନ୍ନାମରନ୍‌ଆଡଙ୍‌; ଆରି, ସେରେବିଅନ୍‌ ଡ ଆ ଡାଙ୍ଗାଡ଼ାଅନ୍‌ ଡ ଆବୋଞାଙଞ୍ଜି ସରିନ୍‌ ଅଟର ମନ୍‌ରା; 19 ଆରି ଅସବିଅନ୍‌ ଡ ଆନିନ୍‌ ସରିନ୍‌ ମରାରିନ୍‌ ଆଅଞ୍ଜି ଆମଙ୍‌ସିଲଡ୍‌ ଜିସାୟାଅନ୍‌, ଆବୋଞାଙଞ୍ଜି ଡ ଆ ଡାଙ୍ଗାଡ଼ାଅନଞ୍ଜି ସରିନ୍‌ ବକୁଡ଼ି ମନ୍‌ରା; 20 ଆରି ଦାଉଦନ୍‌ ଡ ସୋଡ଼ାମରଞ୍ଜି ସେବାକାବ୍ବାଡ଼ାମରଞ୍ଜିଆଡଙ୍‌ ନତିନିଅଞ୍ଜି ଲେବିୟଞ୍ଜିଆଡଙ୍‌ ଆସନାକେ କାବ୍ବାଡ଼ା ଆସନ୍‌ ଅଙ୍ଗା ଆ ମନ୍‌ରାଜି ତିୟେଞ୍ଜି, ଆନିଞ୍ଜି ସିଲଡ୍‌ ବାଗୁ ସଅ ବକୁଡ଼ି ଜଣ ନତିନିୟ ମରଞ୍ଜି ଓରୋଙ୍‌ଲାଜି; କେନ୍‌ ଅଡ଼୍‌କୋଞ୍ଜି ଆଞୁମ୍‌ ଅନିଡଲନ୍‌ ଡେନ୍‌ ।

21 ତିସିଲଡ୍‌ ଇନ୍‌ଲେଞ୍ଜି ଆସନ୍‌ ଡ ଡାଙ୍ଗଡ଼ା ଡାଙ୍ଗଡ଼ିଅନନ୍‌ ଡ ଅଡ଼୍‌କୋ ଅନର୍ଜେଲେନ୍‌ ଆସନାୟୁମ୍‌ ଆସନ୍‌ ଇସ୍ୱରଲେନ୍‌ ଆତେମଡ୍‌ ଇନ୍‌ଲେନ୍ ଲଗଡ୍‌ ଇନ୍‌ଲେନ୍‌ ଅଅବା ଅଲନ୍ ଆନେଙ୍‌ ଆନମ୍‌ନେନ୍‌ ଆସନ୍ ଏବର୍ରାଜି । 22 ଇନିଆସନ୍‌ଗାମେଣ୍ଡେନ୍‌ ତଙର୍‌ଲୋଙନ୍‌ ବନେରାଞ୍ଜି ଆ ବିରୁଦଲୋଙ୍‌ ଇନ୍‌ଲେଞ୍ଜି ଆସନାଜ ଆସନ୍‌ ରାଜାନ୍‌ ଆଡଡ଼ ସିପାୟିନ୍‌ ଡ କୁର୍ତାନ୍‌ ଆବନେନ୍‌ ଆସନ୍‌ ଗରୟ୍‌ଡାଲଲେନ୍‌; "ଇନିଆସନ୍‌ଗାମେଣ୍ଡେନ୍‌ ଅଙ୍ଗା ଆ ମନ୍‌ରାଜି ଇସ୍ୱରଲେନ୍‌ ସାୟ୍‌ଡଙ୍‌ତଜି, ତି ଅଡ଼୍‌କୋନ୍‌ ଆ ମନ୍‌ରା ଆସୁକ୍କା ଆସନ୍‌ ଆନିଞ୍ଜିଆଡଙ୍‌ ଆସନାୟ୍‌ସିନ୍‌ ଡକୋ; ବନ୍‌ଡ ଅଙ୍ଗା ଆ ମନ୍‌ରା ଆନିନ୍‌ଆଡଙ୍‌ ଅମ୍‌ରେଙ୍‌ତଜି, ତି ଅଡ଼୍‌କୋନ୍‌ ଆ ମନ୍‌ରାଜି ଆ ସନଙ୍ଗତାଲୋଙ୍‌ ଆ ରନପ୍ତିସିନ୍‌ ଡ ଆବନ୍‌ର୍ରାବ୍‌ ଡକୋ ।" କେନ୍‌ ଆବର୍ନେ ଇନ୍‌ଲେଞ୍ଜି ରାଜାନ୍‌ଆଡଙ୍‌ ଏବର୍ରାୟ୍‌ । 23 ତିଆସନ୍‌ ଇନ୍‌ଲେଞ୍ଜି ଆନମ୍‌ଲନାୟ୍‌ ଆରି ତିଆସନ୍‌ ଇସ୍ୱରଲେନ୍‌ ଆମଙ୍‌ବା ଏକାକୁର୍ତ୍ତିଲନୟ୍‌; ସିଲତ୍ତେ ଆନିନ୍‌ ଇନ୍‌ଲେଞ୍ଜିଆଡଙ୍‌ ଜାଲଙ୍‌ଲଲେନ୍‌ ।

24 ସିଲତ୍ତେ ଞେନ୍‌ ରାଓଡ଼ାଞ୍ଜିଆମଙ୍‌ ସିଲଡ୍‌ ବାର ମନ୍‌ରା ସୋଡ଼ାମରଞ୍ଜିଆଡଙ୍‌, ଆଗ୍ରାମ୍‌ଗାମ୍‌, ସେରେବିଅ, ଅସବିଅନ୍‌ ଡ ଆନିଞ୍ଜି ସରିନ୍‌ ଦସ ମନ୍‌ରା ଆବୋଞାଙଞ୍ଜିଆଡଙ୍‌ ଆଙ୍‌ସାଲାୟ୍‌; 25 ଆରି ରାଜାନ୍‌ ଆରି ଆ ମନ୍ତ୍ରିଞ୍ଜି ଆରି ଆସୋଡ଼ାମରଞ୍ଜି ଡ ଆଡ୍ରକୋଏଞ୍ଜି ଇସ୍ରାଏଲନ୍‌ ଅଡ଼୍‌କୋନ୍‌ ଆ ମନ୍‌ରା ଇସ୍ୱରଲେନ୍‌ ଆସିଙ୍‌ ଆସନ୍‌ ଅଙ୍ଗା ଆ ରୁପା ଡ ସୁନା ଡ ସିମ୍ମାନ୍‌ ଅଡ଼୍‌କୋନ୍‌ ତନିୟ୍‌ତିୟନ୍‌ ତିୟେଞ୍ଜି, ତିଆତେ ଆନିଞ୍ଜିଆଡଙ୍‌ ତୁଡ଼େଲେ ତିୟ୍‌ଲାୟ୍‌ଜି; 26 ଞେନ୍‌ ଆସିଲୋଙଜି ତୁଡ୍‌ରୁ ସଅ ପସାସ ତାଡ଼ନ୍ତ ରୁପାନ୍‌ ଡ ବସଅ ତାଡ଼ନ୍ତ ରୁପା ସିମନ୍‌; ବସଅ ତାଡ଼ନ୍ତ ସୁନାନ୍‌; 27 ବଅଜାର ଡ୍ରାକ୍‌ମା ଗ୍ରିସ୍‌ ଡେସାନ୍‌ ଆଡାବ୍ବୋ ଆମୁଲ୍ଲ ବକୁଡ଼ି ସୁନା ସିମନ୍‌, ଆରି ସୁନାନ୍‌ ଅନ୍ତମ୍‌ ମଡ଼ଗାଡମନ୍‌, ମନଙ୍‌ ଆ ତନାଆର୍‌ ବାଗୁ ପିତ୍ତଡ଼ ସିମ୍ମାଲୋଙନ୍‌ ତୁଡ଼େଲେ ତିୟ୍‌ଲାଜି । 28 ଆରି, ଞେନ୍‌ ଆନିଞ୍ଜିଆଡଙ୍‌ ବର୍‌ରାଜି, "ଆମ୍ୱେଞ୍ଜି ପ୍ରବୁନ୍‌ ଆସନ୍‌ ମଡ଼ିର୍‌ଜି ଆରି ସିମ୍ମାନ୍‌ ଅଡ଼୍‌କୋନ୍‌ ଜାୟ୍‌ ମଡ଼ିର୍‌; ଆରି, କେନ୍‌ ଆ ରୁପା ଡ ଆ ସୁନା ଆପ୍ପେୟ୍‌ବେଞ୍ଜି ଜୋଜୋବେଞ୍ଜି ଆ ଇସ୍ୱର ପ୍ରବୁନ୍‌ ଆସନ୍‌ ଇସ୍ସୁମ୍‌ ତନିୟ୍‌ତିୟ୍‌ ଡେତେ । 29 ଜିରୁସାଲମନ୍‌ ପ୍ରବୁନ୍‌ ଆସିଙ୍‌ ଆବକରାଲୋଙ୍‌ ସୋଡ଼ା ରାଓଡ଼ାଞ୍ଜି ଆକେଜ୍ଜା ଡ ଲେବିୟଞ୍ଜି ଡ ଇସ୍ରାଏଲିଅନ୍‌ ପୁର୍ବାଃଜୋଜୋନ୍‌ ଆ କେଜ୍ଜାନ୍‌ ସୋଡ଼ାମରଞ୍ଜି ଆତେମଡ୍‌ଲୋଙ୍‌ କେନ୍‌ ଅଡ଼୍‌କୋନ୍‌ ତୁଡ଼େଲେ ଅନ୍‌ରଙ୍‌ ତିୟ୍‌ବେନ୍‌ ଜାୟ୍‌ ଆମ୍ୱେନ୍‌ ଆବୟ୍‌ଲନ୍‌ ଡକୋନାବା ଆରି ତି ଅଡ଼୍‌କୋନ୍‌ ଜୁବାୟ୍‌ବା ।" 30 ସିଲତ୍ତେ ରାଓଡ଼ାଞ୍ଜି ଡ ଲେବିୟଞ୍ଜି ଇସ୍ୱରଲେନ୍‌ ଜିରୁସାଲମନ୍‌ ଆସିଙ୍‌ ଆପନାଙ୍‌ ଆସନ୍‌ ତି ଆତନୁଡ଼େନ୍‌ ଆ ରୁପା ଡ ଆ ସୁନା ଡ ଆସିମ୍ମା ଅଡ଼୍‌କୋନ୍‌ ଜାଏଞ୍ଜି ।

31 ତିସିଲଡ୍‌ ଇନ୍‌ଲେଞ୍ଜି ଜିରୁସାଲମନ୍‌ ଆଜନିର୍‌ ଆସନ୍‌ ଆପ୍ରର୍ତମୁନ୍‌ ଆଙ୍ଗାୟ୍‌ ବାର ଡିନ୍ନାଲୋଙ୍‌ ଅଅବା ଅଲନ୍‌ ସିଲଡ୍‌ ଏଜିରେନ୍‌; ଇସ୍ୱରଲେନ୍‌ ଆସି ଇନ୍‌ଲେଞ୍ଜି ସରିନ୍‌ ଡକୋଏନ୍‌, ଆରି ତଙର୍‌ଲୋଙନ୍‌ ଆନିନ୍‌ ବନେରାମରଞ୍ଜି ଡ କୁବ୍‌ଲେ ଜଗ୍ଗେଲେ ଆସ୍ରେତେ ଆମନ୍‌ରା ଆସିଲୋଙ୍‌ ସିଲଡ୍‌ ଇନ୍‌ଲେଞ୍ଜିଆଡଙ୍‌ ଡୋବ୍‌ଲଲେନ୍‌ । 32 ସିଲତ୍ତେ ଇନ୍‌ଲେଞ୍ଜି ଜିରୁସାଲମଲୋଙ୍‌ ତୁଙ୍‌ଲେ ତେତ୍ତେ ୟାଗି ଡିନ୍ନା ଏଲୋଲୋଲନାୟ୍‌ । 33 ସିଲତ୍ତେ ଅନବ୍‍ଉଞ୍ଜି ଡିନ୍ନା ତି ଆ ରୁପା ଡ ସୁନ୍ନା ସିମ୍ମାଞ୍ଜି ଅଡ଼୍‌କୋନ୍‌ ଇସ୍ୱରନ୍‌ ଆସିଙ୍‌ଲୋଙ୍‌ ତୁଡ଼େଲେ ଉରିୟ ରାଓଡ଼ାନ୍‌ ଆ ଡାଙ୍ଗାଡ଼ାଅନ୍‌ ମରେମୋତନ୍‌ ଆସିଲୋଙ୍‌ ଏତିୟ୍‌ଲାୟ୍‌; ଆନିନ୍‌ ସରିନ୍‌ ପିନଅସନ୍‌ ଆଡାଙ୍ଗାଡ଼ାଅନ୍‌ ଇଲିଆସନ୍‌ ଆତେ ଡକୋଏନ୍‌; ଆରି, ଆନିଞ୍ଜି ସରିନ୍‌ ଜେସୁଅନ୍‌ ଆ ଡାଙ୍ଗାଡ଼ାଅନ୍‌ ଜୋସାବଦ୍‌ ଡ ବିନ୍ନୁୟିନ୍‌ ଆ ଡାଙ୍ଗାଡ଼ାଅନ୍‌ ନୋଅଦିଅନ୍‌, କେନ୍‌ ଆ ଲେବିୟଜି ଡକୋଏଞ୍ଜି; 34 ଅଡ଼୍‌କୋନ୍‌ ଆଜନବ୍‌ ଡିଡିଲେ ଡ ତୁଡ଼େଲେ ଏତିୟ୍‌ଲାୟ୍‌ ଆରି ତି ଆଡିଡ୍‌ ତି ଅଡ଼୍‌କୋନ୍‌ ଆତନୁଡ଼େ ଇଡେଞ୍ଜି । 35 ବାବିଲୋନ୍‌ ସିଲଡ୍‌ ଆଜରିର୍‌ରାଞଞ୍ଜି ଆ ବନଣ୍ତି ଆଅନଞ୍ଜି ସମ୍ପରା ଇସ୍ରାଏଲନ୍‌ ଆସନ୍‌ ଇସ୍ରାଏଲନ୍‌ ଆ ଇସ୍ୱର ଆସନ୍‌ ତନୋମୋଡ ଅନମଙନ୍‌ ଅନ୍ତମ୍‌ ବାର ସଣ୍ତନ୍‌, ସୟାନବେ ମେଣ୍ତାନ୍‌, ସତସ୍ତରି ଆ ଅନମ୍ମେନ୍‌, ଇର୍ସେ ଅନମଙନ୍‌ ଆସନ୍‌ ବାରଟା କୁମ୍ମେଡନ୍‌ ଏସୋରୋପ୍ପାୟେଞ୍ଜି; କେନ୍‌ ଅଡ଼୍‌କୋନ୍‌ ପ୍ରବୁନ୍‌ ଆସନ୍‌ ତନୋମୋଡ୍‌ପୁରନ୍‌ ଅନମଙ୍‌ ଡକୋଏନ୍‌ । 36 ତି ସିଲଡ୍‌ ଆନିଞ୍ଜି ମିୟ୍‌ତାଲ୍‌ ଅଲନ୍‌ ରାଜାନ୍‌ ଆନମ୍‌ଞାନେମର୍ରଞ୍ଜି ଡ ଡେସାନ୍‌ ସୋଡ଼ାମରଞ୍ଜିଆଡଙ୍‌ ରାଜାନ୍‌ ଆବନାଁବର୍‌ ଆ ସିଟି ତିୟେଞ୍ଜି; ସିଲତ୍ତେ ଆନିଞ୍ଜି ମନ୍‌ରାଞ୍ଜି ଡ ଇସ୍ୱରନ୍‌ ଆସିଙ୍‌ ଆକାବ୍ବାଡ଼ା ସାଜଏଞ୍ଜି ।