1 ତିଆଡିଡ୍‌ ଦାରିଆବସ ରାଜାନ୍‌ ଆବରାଞେନ୍‌ ସିଲଡ୍‌, ବାବିଲଲୋଙନ୍‌ ଡକୋନ୍ ଅଙ୍ଗା ବଇଲୋଙ୍‌ ଆରନ୍ନା ତନର୍ତୁମନ୍‌ ଡେନ୍‌, ତିଆତେ ସନାଜନ୍‌ଡେନ୍‌ । 2 ଆରି ମାଦିୟ ଡେସାନ୍‌ ଅକ୍ୟତାନ୍‌ ଆଞୁମ୍‌ମର୍‌ ରାଜାସିଙ୍‌ଲୋଙନ୍‌ ଅବୟ୍‌ ଆନେଡେଡ୍‌ ବଇନ୍‌ ଞାଙେନ୍‌, ତିଆତେ ମନନ୍ନେନ୍‌ ଆସନ୍‌ କେନ୍‌ ଏନ୍ନେଲେ ଆନିଡ୍‌ ଡକୋଏନ୍‌ ।

3 କୋରସ୍‌ ରାଜାନ୍‌ ଆସ୍ରାସନଏନ୍‌ ଆପର୍ତମ୍ମୁ ବର୍ସେଙ୍‌ଲୋଙ୍‌ କୋରସ ରାଜା ଜିରୁସାଲମଲୋଙନ୍ ଡକୋନ୍ ଇସ୍ୱରନ୍‌ ଆସିଙ୍‌ ଆବର୍ନେ କେନ୍‌ ଆବନାଞ୍‌ ତିୟେନ୍‌, "ମନ୍‌ରାଞ୍ଜି ଅନମଙ୍‌ ଆଡ୍ରକୋନେ ତି ଆସିଙ୍‌ ତନୁବନ୍‌ ଡେଏତୋ ଆରି ତି ଆଜିମିତାଲ୍‌ ରବ୍‌ଡୋଲେ ତନୁବନ୍‌ ଡେଏତୋ; ଡନେଙ୍ଗାନ୍‌ ୟାକୁଡ଼ି ସନ୍ତି ଆରି ଲନାଆଙନ୍‌ ୟାକୁଡ଼ି ସନ୍ତି ଡେଏତୋ; 4 ତିଆତେ ୟାଗି ଲଙ୍‌ନେ ସୋଡ଼ାରାନ୍‌ ଆରେଙ୍‌ ବାତ୍ତେ ଡ ବ ଲଙ୍‌ନେ ରଙ୍‌ ପଟାନ୍‌ ବାତ୍ତେ ଡାଲ୍‌ନେତୋ; ଆରି, ରାଜାସିଙନ୍‌ ସିଲଡ୍‌ ତି ଅଡ଼୍‌କୋନ୍‌ ଆତନୁବ୍‌ ଆସନ୍‌ ଡାବୁନ୍‌ ତନିୟନ୍‌ ଡେତେ; 5 ଆରି, ଇସ୍ୱରନ୍‌ ଆସିଙ୍‌ ଆଡ୍ରକୋଏନ୍‌ ଅଡ଼୍‌କୋନ୍‌ ଆ ସୁନା ଡ ଆ ରୁପା ସିମ୍ମାନ୍‌ ନବୁକଦ୍‌ନିତ୍ସରନ୍‌ ଜିରୁସାଲମନ୍‌ ସ୍ରେବାସିଙ୍‌ ବାବିଲନ୍‌ ପାଙ୍‌ଲାୟ୍‌, ତି ଅଡ଼୍‌କୋନ୍‌ ଆବ୍‌ଡିନେତୋ, ଆରି ଅଡ଼୍‌କୋନ୍‌ ଆସିମ୍ମା ଜିରୁସାଲମନ୍‌ ସ୍ରେବାସିଙ୍‌ଲୋଙ୍‌ ପାଙାୟ୍‌ବା, ଆରି ଆମ୍ୱେନ୍‌ ଇସ୍ୱରନ୍‌ ଆସିଂଲୋଙ୍‌ ତି ଅଡ଼୍‌କୋନ୍‌ ଡକ୍କୋବା ।"

6 "ତିଆସନ୍‌ ଏ ତତ୍ତନୟ, ମିୟ୍‌ତାଲ୍‌ ଅଲନ୍‌ ଡେସାନ୍‌ ଆସୋଡ଼ାମର୍‌, ଏ ସତର-ବୋସଣୟନ୍‌, ଆମ୍ୱେଞ୍ଜି ଡ ଗଡ଼ିବେଞ୍ଜି ଅଲନ୍‌ ଆ ମିୟ୍‌ତାଲ୍‌ ଅପର୍ସକିଅଞ୍ଜି, ଆନିଞ୍ଜି ସିଲଡ୍‌ ସବ୍‌ଙାୟ୍‌ଲନ୍‌ ଡକୋନାବା; 7 ଇସ୍ୱରନ୍‌ କେନ୍‌ ଆସିଙ୍‌ ଆକାବ୍ବାଡ଼ା ଇନିଜା ଏଲୁମ୍‌ଡଙ୍‌; ଜିଉଦିଞ୍ଜି ଆସୋଡ଼ା ଡ ଜିଉଦିମରଞ୍ଜି ଆମ୍ମୁଙ୍‌ଗଡ୍ ମରଞ୍ଜି ଇସ୍ୱରନ୍‌ କେନ୍‌ ଆସିଙ୍‌ ଆମ୍ମୁଙ୍‌ ମା ଆଡ୍ରକୋଲୋଙେନ୍‌ ତୁବେତଜି । 8 ଆରି ଇସ୍ୱରନ୍‌ କେନ୍‌ ଆସିଙ୍‌ ଆତନୁବ୍‌ ଆସନ୍‌ ଜିଉଦିଅଞ୍ଜି ଆମ୍ମୁଙ୍‌ଗଡ୍‌ ମରଞ୍ଜି ଆସନ୍‌ ଇନି ଆକାବ୍ବାଡ଼ା, ତିଆତେ ଞେନ୍‌ ଏବାଞ୍‌ଲାୟ୍‌; ଏଙ୍ଗାଲେ ଆନିଞ୍ଜି ଡନଙ୍‌ଡଙନ୍‌ ଅଃଡ୍ଡେଏ, ତିଆସନ୍‌ ତି ଆମନ୍‌ରାଜିଆଡଙ୍‌ ରାଜାନ୍‌ ଆନର୍ଜେ ସିଲଡ୍‌, ଆଗ୍ରାମ୍‌ଗାମ୍‌, ମିୟ୍‌ତାଲ୍‌ ଅଲନ୍‌ ରାଜାନ୍‌ ଆ ତନର୍ତୁମ୍‌ ସିଲଡ୍‌ ଜୁବାୟ୍‌ଲେ କର୍ସନ୍‌ ତନିୟନ୍‌ ଡେଏତୋ । 9 ଆରି, ରୁଆଙନ୍‌ ଆ ଇସ୍ୱର ଅନମଙନ୍‌ ଆସନ୍‌ ଜିରୁସାଲମନ୍‌ ଆ ରାଓଡ଼ାଜି ଆବର୍ନେ ଅନ୍ତମ୍‌ ସଣ୍ତତାଙନ୍‌ ଡ ମେଣ୍ତାନ୍‌ ଡ ଆଅନ୍‌ମେନନ୍‌, ଗଅମନ୍‌, ବସିଡନ୍‌, ଦ୍ରାକ୍ୟାଡାନ୍‌ ଡ ମିଞ୍‌ଲନ୍‌, ଇନିଜି ଆନିଞ୍ଜି ଆସନ୍‌ ସନାୟ୍‌ସାୟ୍‌, ତି ଅଡ଼୍‌କୋନ୍‌ ବଡିନ୍ନା କି ବଡିନ୍ନାନ୍‌ ଇନ୍ନିଙ୍‌ ଏର୍ଗନାମନ୍‌ ଆନିଞ୍ଜିଆଡଙ୍‌ ତନିୟନ୍‌ ଡେଏତୋ; 10 ସିଲତ୍ତେ ଆନିଞ୍ଜି ରୁଆଙନ୍‌ ଆ ଇସ୍ୱର ଆସନ୍‌ ଆସରାୟ୍‌ତେନ୍‌ ଅନ୍ତମ୍‌ ଆନମଙ୍‌ ସୁରୁପାୟ୍‌ତଜି, ଆରି ରାଜାନ୍‌ ଡ ଆ ଡାଙ୍ଗାଡ଼ାଅନଞ୍ଜି ଅନମେଙ୍‌ ଆସନ୍‌ ପାର୍ତନା ନେତୋଜି ।" 11 "ଆରି ଞେନ୍‌ ବନାଞନ୍‌ ତିୟ୍‌ତାୟ୍‌ ଡ, ‘ଆନ୍ନିଙ୍‌ କେନ୍‌ ଆବର୍ନେ ଆଲ୍ଲେତେ, ଆସିଙନ୍‌ ସିଲଡ୍‌ ଅବୟ୍‌ ଅଙଲନ୍‌ ତବ୍‌ଲେ ତି ଅରାଲୋଙ୍‌ ଆନିନ୍‌ ଜିଲେ ୟନୋଡନ୍‌ ଡେଏତୋ; ତିଆସନ୍‌ ଆସିଙନ୍‌ ଲନାଜିଙନ୍‌ ବନବ୍‌ରିଜନ୍‌ ଡେଏତୋ । 12 ଆରି, ଅଙ୍ଗା ଅଙ୍ଗା ଆ ରାଜା ଡ ଆ କେଜ୍ଜାମର୍‌ଜି ଇସ୍ୱରନ୍‌ ଆ ଜିରୁସାଲମ୍‌ କେନ୍‌ ଆସିଙ୍‌ ଆନବ୍‌ଗୁରୁଡ୍ଡେନ୍‌ ଆସନ୍‌ ଆଇଡିଡନ୍‌ ଆବର୍ନେ ଆତନାନ୍‌ ଏର୍‌ତଜିଗୋୟ୍‌ତଜି, ତି ଅଡ଼୍‌କୋଞ୍ଜିଆଡଙ୍‌ ଜିରୁସାଲମଲୋଙ୍‌ ଆଞୁମ୍‌ଡମନ୍‌ ଆ ଗନୁତୁଲ୍‌ ଆ ଇସ୍ୱର ସବ୍‌ଙାଜେତୋଜି ।’ ଞେନ୍‌ ଦାରିଆବସ କେନ୍‌ ଆ ବନାଞ୍‌ ବାଞ୍‌ତାୟ୍‌; କେନ୍‌ଆତେ ଜୁବାୟ୍‌ଲେ ଲନୁମନ୍‌ ଡେଏତୋ ।"

13 ସିଲତ୍ତେ ଦାରିଆବସ ରାଜାନ୍‌ କେନ୍‌ ଆ ବନାଞ୍‌ ଆରାପ୍ପାୟେନ୍‌ ସିଲଡ୍‌ ମିୟ୍‌ତାଲ୍‌ ଅଲନ୍‌ ଡେସାନ୍‌ ଆସୋଡ଼ାମର୍‌ ତତ୍ତନୟ ଡ ସତର-ବୋସଣୟନ୍‌ ଡ ଆଗଡ଼ିଞ୍ଜି ମନଙ୍‌ ଜୁବାୟ୍‌ଲେ ଆଇଡିଡନ୍‌ ଅନ୍ତମ୍‌ କାବ୍ବାଡ଼ାଲଞ୍ଜି । 14 ତିତେତ୍ତେ ଆଗୟ ପୁର୍ବାଃତେବର୍ନେମର୍‌ ଡ ଇଦ୍ଦୋନନ୍‌ ଆ ଡାଙ୍ଗାଡ଼ାଅନ୍‌ ଜିକରିୟନ୍‌ ପୁର୍ବାଃତେ ଆବର୍ନେ ବାତ୍ତେ ଜିଉଦିଅନ୍‌ ଆ ପାରୁର୍‌ମର୍‌ଜି ଆ ସ୍ରେବାସିଙନ୍‌ ତୁବେଞ୍ଜି ଆରି ଗବ୍‌ଡେଲ୍‌ଲେ ରପ୍ତିଏଞ୍ଜି । ଆରି, ଆନିଞ୍ଜି ଇସ୍ରାଏଲନ୍‌ ଆ ଇସ୍ୱର ଆବନାଞ୍‌ ଅନ୍ତମ୍‌ ଡ ପାରସ୍ୟନ୍‌ ଆ ରାଜା କୋରସ୍‌ ଡ ଦାରିଆବସ ଡ ଅର୍ତକସ୍ତରନ୍‌ ଆବନାଞ୍‌ ଅନ୍ତମ୍‌ ତୁବ୍‌ଲେ ଅବ୍‌ଞିଡେଞ୍ଜି । 15 ଦାରିଆବସ ରାଜାନ୍‌ ଆରାଜାଗଡ୍‌ ତୁଡ୍‌ରୁ ବର୍ସେଙ୍‌ଲୋଙ୍‌ ଅଦର ଆଞୁମ୍‌ ଆଙ୍ଗାୟ୍‌ ୟାଗି ଡିନାଲୋଙ୍‌ କେନ୍‌ ଆସିଙ୍‌ ତୁବ୍‌ଲେ ସାଡେଞ୍ଜି । 16 ସିଲତ୍ତେ ଇସ୍ରାଏଲନ୍‌ ଆଅଞ୍ଜି, ରାଓଡ଼ାଞ୍ଜି ଡ ଲେବିୟଞ୍ଜି ଡ ଆୟର୍ରନାଞଞ୍ଜି ଅଡ଼୍‌କୋନ୍‌ ବଣ୍ତିସିଙନ୍‌ ଆଅନଞ୍ଜି ସର୍ଡାଲନ୍‌ ଇସ୍ୱରନ୍‌ କେନ୍‌ ଆ ଗରନ୍ନେସିଂପୁରନ୍‌ ପାଡ଼େଏଞ୍ଜି । 17 ଆରି ଇସ୍ୱରନ୍‌ କେନ୍‌ ଆସିଙନ୍‌ ଆଗ୍ରନ୍ନେଇଙନ୍‌ ଆଡିଡ୍‌ ଆନିଞ୍ଜି ବସଅ ସଣ୍ତନ୍‌, ବାଗୁ ସଅ ମେଣ୍ତାନ୍, ଉଞ୍ଜି ସଅ ମେଣ୍ତାଅନନ୍‌ ସୋରୋପ୍ପାଏଞ୍ଜି; ଆରି ଅଡ଼୍‌କୋ ଇସ୍ରାଏଲନ୍‌ ଆ ଇର୍ସେ ଆନମଙ୍‌ ଆସନ୍‌ ଇସ୍ରାଏଲନ୍‌ ଆକେଜ୍ଜା ଆଡନିଡି ଅନ୍ତମ୍‌ ବାରଟା କିମେଡନ୍‌ ସୋରୋପ୍ପାଏଞ୍ଜି । 18 ଆରି ଆନିଞ୍ଜି ମସାନ୍‌ ଆନିଡ୍‌ ବଇଲୋଙନ୍‌ ଅନ୍ତମ୍‌ ଜିରୁସାଲମଲୋଙ୍‌ ଇସ୍ୱରନ୍‌ ଆସନେବା ଆସନ୍‌ ରାଓଡ଼ାଞ୍ଜିଆଡଙ୍‌ ଡ ଲେବିୟଞ୍ଜିଆଡଙ୍‌ ଆ ପାଡ଼ିଞ୍ଜି ଅନ୍ତମ୍‌ ତବ୍‌ନଙେଞ୍ଜି ।

19 ସିଲତ୍ତେ ଆପର୍ତମ୍ମୁ ଆଙ୍ଗାୟ୍‌ ସଉଦ ଡିନାଲୋଙ୍ ବଣ୍ଡିଲେ ଆଡ୍ରକୋଲଞ୍ଜି ଆମନ୍‌ରାଜି ଅନେଲାୟ୍‌ପୁରନ୍‌ ପାଡ଼େଏଞ୍ଜି । 20 ଇନିଆସନ୍‌ଗାମେଣ୍ଡେନ୍‌ ରାଓଡ଼ାଞ୍ଜି ଡ ଲେବିୟଞ୍ଜି ଆବରୁକ୍କୁନ୍‌ ଅମ୍ମେଲନ୍ ଆନିଞ୍ଜିମା ମବ୍‌ଡ଼ିର୍‌ଲଞ୍ଜି; ଅଡ଼୍‌କୋଞ୍ଜି ମଡ଼ିର୍‌ ଡେଏଞ୍ଜି; ତିଆସନ୍‌ ଆନିଞ୍ଜି ବଣ୍ଡିଲେ ଆଡ୍ରକୋଲଞ୍ଜି ଆମନ୍‌ରାଜି ଆସନ୍‌, ଆ ରାଓଡ଼ା-ବୋଞାଙଞ୍ଜି ଆସନ୍‌ ଡ ଆନିଞ୍ଜିଡମନ୍‌ ଆସନ୍‌ ଆରି ଅନେଲାୟ୍‌ପୁର୍‌ ଡିନ୍ନାନ୍‌ ଅନମଙନ୍‌ ରବୁଏଞ୍ଜି । 21 ଆରି ବଣ୍ତିନ୍‌ ଆବନାର୍ଜିର୍‌ ଇସ୍ରାଏଲନ୍‌ ଆଅଞ୍ଜି ଡ ଅଙ୍ଗା ଆ ମନ୍‌ରାଜି ଆନିଞ୍ଜିଆଡଙ୍‌ ଡନ୍ନେଲେ ଇସ୍ରାଏଲନ୍‌ ଆ ଇସ୍ୱର ପ୍ରବୁନ୍‌ ଆସନାୟ୍‌ ଆସନ୍‌ ଡେସାନ୍‌ ଆ ମନ୍‌ରା ବଡେସାବାୟ୍‌ଜି ଏର୍ମଡ଼ିର୍‌ ସିଲଡ୍‌ ରମ୍ମଙ୍‌ଆଡଙ୍‌ ଆଙ୍‌ସାଲେ ଡକୋଏଞ୍ଜି, ତି ଅଡ଼୍‌କୋଞ୍ଜି ଗାଗାଲଞ୍ଜି । 22 ଆରି, ବପାଲି ସର୍ଡାନ୍‌ ବାତ୍ତେ କମିରନ୍‌ ଏର୍ମନାୟ୍‌ ରୁଟିନ୍‌ ପୁରନ୍‌ ମାନ୍ନେଏଞ୍ଜି; ଇନିଆସନ୍‌ଗାମେଣ୍ଡେନ୍‌ ପ୍ରବୁନ୍‌ ଆନିଞ୍ଜିଆଡଙ୍‌ ଅବ୍‌ସର୍ଡାଏଞ୍ଜି ଆରି ଇସ୍ରାଏଲନ୍‌ ଇସ୍ୱର, ଇସ୍ୱରନ୍‌ ଆସିଂଙ୍‌ କାବ୍ବାଡ଼ାନ୍‌ ଆସନ୍‌ ଆସିଞ୍ଜି ଅବ୍ବୋର୍ସାନ୍‌ ଅସୁରିଅ ରାଜାନ୍‌ ଆ ଉଗର୍‌ ଆନିଞ୍ଜିଆଡଙ୍‌ ଅବ୍‌ୟରେନ୍‌ ।