1 ସାତ ଆଙ୍ଗାୟ୍‌ ଆଡିଡ୍‌ ଇସ୍ରାଏଲ୍‌ ମରଞ୍ଜି ଅଡ଼୍‌କୋଞ୍ଜି ରମ୍ମଙ୍‌ ରମ୍ମଙ୍‌ ଆଗଡ଼ାରେଙ୍ ଡକୋଲଞ୍ଜି, ତିସିଲଡ୍ ଆନିଞ୍ଜି ଆ ବମନ୍ନନ୍ ଅମ୍ମେଲନ୍ ଜିରୁସାଲମ ଗଡ଼ାଲୋଙନ୍ ଇୟ୍‌ଲେ ରୁକ୍କୋନେଜି । 2 ଇସ୍ୱରନ୍‌ ଆକାବ୍ବାଡ଼ାମର୍ ମସାନ ଆବନାଁୟ୍‌ବର୍ ଅନ୍ତମ୍‌ ତନୋମ୍ମୋଡନ୍‌ ଡ ସନୋରୋପ୍ପାୟନ୍ ଆସନ୍ ଜୋସାଦକରନ୍ ଆଡାଙ୍ଗାଡ଼ାଅନ୍‌ ଜେସୁଏଲନ୍‌ ଡ ଆ ରାଓଡ଼ା ସର୍ସିରାଓଡ଼ାଞ୍ଜି ଆରି ସଲ୍‌ଟିଏଲନ୍‌ ଆଡାଙ୍ଗାଡ଼ାଅନ୍‌ ଜିରୁବାବିଲନ୍‌ ଡ ଆ ବୋଞାଙଞ୍ଜି ଇସ୍ରାଏଲନ୍‌ ଆ ଇସ୍ୱର ଆସନ୍ ଅବୟ୍‌ ତନମ୍ପିଲନ୍ ତୁବେଞ୍ଜି । 3 ଆରି ଆନିଞ୍ଜି ଆନ୍ନା ଡେସାବାଜି ବତଙ୍‌ଡାଲେ ତନମ୍ପେଲନ୍ ପାପୁର୍‌ ତନମ୍ପିଲ୍ ଆଜିମ୍ମିଲୋଙନ୍ ତୁବେଞ୍ଜି; ଆରି ତି ଆତୋଣ୍ତୁଲୋଙ୍‌ ସଦାପ୍ରବୁନ୍‌ ଆସନ୍‌ ଅନମଙନ୍‌ ତୁବେଞ୍ଜି କି ଡୋତାନ୍‌ ଡ ସାଲ୍ଲୁମନ୍ ଓଲେନ୍‌ ତନୋମ୍ମୋଡନ୍‌ ଅନମଙନ୍‌ ତିୟ୍‌ଲେ ସୋରୋପ୍ପାୟେଞ୍ଜି । 4 ସିଲଡ୍‌ଲ୍ଲନ୍‌ ଆନିଞ୍ଜି ଆଇଡିଡନ୍‌ ଆବନାଁୟ୍‌ବରନ୍ ଅନ୍ତମ୍‌ ପୁତସିଙ୍‌ ପୁରନ୍‌ ପାଡ଼େଏଞ୍ଜି ଆରି ଆଏଡ଼ର୍‌ ଅଙ୍ଗାଆତେ ସନାୟ୍‌ସାୟ୍ ତିଆତେ ଅନମଙନ୍‌ ସୋରୋପାୟେଞ୍ଜି; 5 ତିସିଲଡ୍‌ ଆନିଞ୍ଜି ଅଡ଼୍‌କୋ ଡିନ୍ନାନ୍‌ ତନୋମ୍ମୋଡନ୍‌ ଅମାସିଆନ୍ ଡ ଇସ୍ୱରନ୍‌ ଆସନ୍ ଇସ୍ସୁମ୍‌ତନିୟତିୟନ ତି ଅଡ଼୍‌କୋନ୍ ପାଡ଼େଏଞ୍ଜି ଆରି ଇସ୍ୱରନ୍‌ ଆସନ୍ ଡିଅଙ୍ଗା ଇସ୍ସୁମ୍ ତନିୟ୍‌ତିୟନ୍ ତିୟେଞ୍ଜି ତିଆତେ ନିୟ୍‌ ସୋରୋପାୟେଞ୍ଜି । 6 ଇସ୍ୱରନ୍‌ ଆ ସରେବାସିଂ ଆସନ୍ ଜିମ୍ମିନ୍‌ ଅନ୍‌ରଙ୍‌ ସୁସୁଏଜି ବନ୍‌ଡ ସାତ ଆଙ୍ଗାୟ୍‌ ଆ ପର୍ତମ୍ମୁ ଡିନ୍ନା ସିଲଡ୍‌ ଇସ୍ୱରନ୍‌ ଆସନ୍‌ ତନୋମ୍ମୋଡନ୍‌ ସନୋରୋପ୍ପାୟଞ୍ଜି ସୁସୁଏଞ୍ଜି ।

7 ପାରସ୍ୟନ୍‌ ଆ ରାଜା କୋରସନ୍‌ ଆବନାଁୟ୍‌ ଅନ୍ତମ୍‌ ଆନିଞ୍ଜି ବାଡ୍ଡୋୟଞ୍ଜି ଡ ସେଜର୍‌ମରଞ୍ଜିଆଡଙ୍‌ ବଡିନ୍‌ ତିୟ୍‌ଲେ ବାୟେଁଞ୍ଜି ଆରି ଲିବାନୋନନ୍‌ ସିଲଡ୍‌ ଏରସ ଅରାନ୍‌ ସମେଁୟ୍‌ଣ୍ତ୍ରାଗଡ୍ ଜାପୋନ୍‌ ଜାୟ୍‌ ଆପନାଙ୍‌ ଆସନ୍‌ ଆନିଞ୍ଜି ସିଦୋନନ୍‌ ଡ ସୋରିୟନ୍‌ ଆମନ୍‌ରାଜିଆଡଙ୍‌ ଜନୋମନ୍‌, ଗରାଡାନେନ୍‌ ଡ ମିଞଲନ୍‌ ତିୟେଞ୍ଜି । 8 ଜିରୁସାଲମ୍‌ଲୋଙନ୍‌ ଇସ୍ୱରନ୍‌ ଆସନ୍ ଅଙ୍ଗା ଆ ସରେବାସିଂ ଡକୋଏନ୍, ତେତ୍ତେ ସିଲଡ୍‌ ଆନିଞ୍ଜି ଆଜିର୍ରାଞଞ୍ଜି ଅନବ୍‌ବାଗୁ ବର୍ସେଙ୍‌ ବାଗାଙ୍‌ଗାୟ୍‌ଲୋଙ୍‌ କାବ୍ବାଡ଼ାନ୍ ସୁସୁଏଞ୍ଜି । ସଲ୍‌ଟିୟେଲନ୍‌ ଆଡାଙ୍ଗାଡ଼ାଅନ୍‌ ଜିରୁବାବିଲନ୍, ଜୋସାଦକନ୍‌ ଆଡାଙ୍ଗାଡ଼ାଅନ୍‌ ଜେସୁଅନ୍‌ ଡ ବୋଞାଙଞ୍ଜି, ରାଓଡ଼ାବୋଞାଙଞ୍ଜି ଡ ଲେବିଅଞ୍ଜି ଆରି ଡିଅଙ୍ଗା ମନ୍‌ରା ଜିରୁସାଲମନ୍ ୟର୍ରନାଜି ଆନିଞ୍ଜି ଅଡ଼୍‌କୋଞ୍ଜି କେନ୍ ଆକାବ୍ବାଡ଼ା ଆଲନୁମ୍ ଆସନ୍ ମାୟ୍‌ଲଞ୍ଜି । ବକୁଡ଼ି ବର୍ସେଙ୍ ସିଲଡ୍‌ ଗୋଗୋୟ୍ ବର୍ସେଙ୍ ଆଡ୍ରେଏନ୍ ଆଲେବିଅଜି ଇସ୍ୱରନ୍‌ ଆ ସରେବାସିଂ ଆଲନୁମ୍ ଆସନ୍ ରୟଙନ୍ ତିୟେଞ୍ଜି । 9 ତିଆଡିଡ୍‌ ଜେସୁଅନ୍‌ ଆଡାଙ୍ଗାଡ଼ାଅନନ୍‌ ଡ ଆ ବୋଞାଙଞ୍ଜି, କଦ୍‌ମିୟେଲନ୍‌ ଡ ଆଡାଙ୍ଗାଡଅନଞ୍ଜି, ଜିଉଦାନ୍‌ ଆଡାଙ୍ଗାଡଅନଞ୍ଜି, ଇସ୍ୱରନ୍‌ ଆସରେବାସିଙ୍‌ଲୋଙ୍‌ ଆ କାବ୍ବାଡ଼ା ମର୍‌ଜି ଆଜନୁବାୟ୍‌ ବୁଡ଼ାରନ୍‌ ଆଞନାଙ୍‌ ଆସନ୍‌ ରୁକ୍କୁଲନ୍‌ ତନଙେଞ୍ଜି; ଏନାଦଦରନ୍‌ ଆ ଡାଙ୍ଗାଡ଼ାଅଞ୍ଜି, ଆ ଡାଙ୍ଗାଡ଼ାଅନଞ୍ଜି ଡ ବୋଞାଙଞ୍ଜି ତିଅନ୍ତମ୍‌ ଲୁମେଞ୍ଜି, କେନ୍‌ଆନିଞ୍ଜି ଲେବିୟମର୍‌ଞ୍ଜି । 10 ଆରି, ତନ୍‌ରୁବ୍‌ମରଞ୍ଜି ପ୍ରବୁନ୍‌ ଆସ୍ରେବାସିଙ୍‌ ଆ ଜିମ୍ମିତାଲ୍‌ ଆତ୍ରବ୍‌ମିଜେଞ୍ଜି ଆଡିଡ୍‌ ଆନିଞ୍ଜି ଇସ୍ରାଏଲନ୍‌ ଆ ରାଜା ଦାଉଦନ୍‌ ଆତ୍ରୁବେନ୍‌ ଅନ୍ତମ୍‌ ପ୍ରବୁନ୍‌ ଆ ସନେଙ୍କେନ୍‌ ଆସନ୍‌ ରମ୍ମଙ୍‌ ରମ୍ମଙ୍‌ ଆସିନ୍‌ରି ଆରନେନ୍‌ ଆ ରାଓଡ଼ାଞ୍ଜିଆଡଙ୍‌ ପନେଡନ୍‌ ବାତ୍ତେ ଡ ଆସପନ୍‌ ଆଅନ୍‌ ଲେବିୟଞ୍ଜିଆଡଙ୍‌ ତାର୍ଜୋବ୍‌ସିନ୍‌ ବାତ୍ତେ ତୁବେଞ୍ଜି । 11 ଆନିଞ୍ଜି ପ୍ରବୁନ୍‌ ଆସନେଙ୍କେ ଡ ସେଙ୍କେଲେ ତର୍ଡମ୍‌ କନନନ୍‌ କନ୍‌ଲେ ବର୍ରେଞ୍ଜି, "ଆନିନ୍‌ ସୁକ୍କା, ଇନିଆସନ୍‌ଗାମେଣ୍ଡେନ୍‌ ଇସ୍ରାଏଲନ୍‌ ଆସନ୍‌ ଆନିନ୍‌ ଆ ସନାୟୁମନ୍‌ ଆଙ୍ଗିୟ୍‌ ଅଃନ୍ନଞିଡେ ।" ଆରି, ପ୍ରବୁନ୍‌ ଆସିଙ୍‌ ଆ ଜିମ୍ମିତାଲ୍‌ ଆତର୍ମିଜେଞ୍ଜି ଆସନ୍‌ ଆନିଞ୍ଜି ପ୍ରବୁନ୍‌ ଆସନେଙ୍କେ ଆଡିଡ୍‌ ଅଡ଼୍‌କୋ ମନ୍‌ରାନ୍‌ ସୋଡ଼ା ସର୍‌ରଙନ୍‌ ବାତ୍ତେ କନନ୍‌ଲଞ୍ଜି । 12 ବନ୍‌ଡ ଅଙ୍ଗା ରାଓଡ଼ା ଡ ଆ ଲେବିୟ ଡ ଆପ୍ପେୟନ୍ ଆକେଜ୍ଜା ଆସୋଡ଼ା ପାପୁର୍‌ ମରଞ୍ଜି ଆପର୍ତମ୍ମୁନ୍‌ ଅସିଙନ୍‌ ଗିଜେଞ୍ଜି, ଆଗନିୟ୍‌ଗିୟ୍‌ଲୋଙଞ୍ଜି କେନ୍‌ ଆସିଙ୍‌ ଆ ଜିମ୍ମିତାଲ୍‌ ଆତରବ୍‌ଙିଜେଞ୍ଜି ଆଡିଡ୍‌ ଆନିଞ୍ଜି ଆମଙ୍‌ଲୋଙ୍‌ ଲାଙ୍‌ଲେନ୍ନେ ସୋଡ଼ା ସର୍ରଙନ୍‌ ବାତ୍ତେ ୟେଏଞ୍ଜି ଆରି ଗୋଗୋୟ୍‌ନେ ସର୍ଡାନ୍‌ ଆସନ୍‌ କନନ୍‌ଲଞ୍ଜି; 13 ସିଲତ୍ତେ ମନ୍‌ରାଞ୍ଜି ଆ ସର୍ଡା ସର୍ରଙନ୍‌ ଡ ମନ୍‌ରାଞ୍ଜି ଆୟନେ ଆସନଡ୍ଡା ତରଙ୍‌ଆନ୍ନା ଅମ୍‌ଡଙ୍‌ଲେ ଅରପ୍ତିଲୋଜି; ତିଆସନ୍‌ ମନ୍‌ରାଞ୍ଜି ସୋଡ଼ା ସର୍ରଙନ୍‌ ବାତ୍ତେ କନନ୍‌ଲଞ୍ଜି, ସିଲତ୍ତେ ତି ଆସନଡ୍ଡା ଗୋଗୋୟ୍‌ ସଙାୟ୍‌ ସଡ୍ଡାଏନ୍‌ ।