ବନାର୍ତୁବ୍ଲୋଙନ୍ ଆଡନଙ୍ଡଙ୍
1 ସିଲଡ୍ ଆ ବନଣ୍ତି ଆଅଞ୍ଜି ସଦାପ୍ରବୁ ଇସ୍ରାଏଲନ୍ ଆ ଇସ୍ୱର ଆସନ୍ ଅବୟ୍ ସରେବାସିଙନ୍ ତୁବ୍ତଜି ଗାମ୍ଲେ ଜିଉଦାନ୍ ଡ ବିନ୍ନାମିନନ୍ ଆବନେରାମର୍ଜି ଅମ୍ଡଙେଞ୍ଜି । 2 ତିଆଡିଡ୍ ଆନିଞ୍ଜି ଜିରୁବାବିଲନ୍ ଡ ଆପ୍ପେୟ୍ ଆକେଜ୍ଜା ମୁଡ଼ମରନ୍ ଆମଙ୍ବା ଇୟ୍ଲେ ଆନିଞ୍ଜିଆଡଙ୍ ବରେଞ୍ଜି, "ଇନ୍ଲେଞ୍ଜି ଆମ୍ୱେଞ୍ଜି ସରିନ୍ ମାୟ୍ଲନ୍ ଏତୁବ୍ବା; ଇନିଆସନ୍ଗାମେଣ୍ଡେନ୍ ଆମ୍ୱେଞ୍ଜି ଏଙ୍ଗାଲେ, ତିଅନ୍ତମ୍ ଇନ୍ଲେଞ୍ଜି ଇସ୍ୱରବେନ୍ଆଡଙ୍ ଏସାୟ୍ତାୟ୍; ଆରି ଅସୁରିଅ ରାଜା ଏସର୍ଅଦୋନନ୍, ଆନା ଇନ୍ଲେଞ୍ଜିଆଡଙ୍ କେନ୍ତେନ୍ନେ ଓରୋଙ୍ଲଲେନ୍, ତି ଆଡିନା ସିଲଡ୍ ଇନ୍ଲେଞ୍ଜି ଆସନ୍ ଅନମଙନ୍ ଏତିୟ୍ତାୟ୍ ।" 3 ବନ୍ଡ ଜିରୁବାବିଲନ୍ ଡ ଜେସୁୟନ୍ ଡ ଇସ୍ରାଏଲନ୍ ଲାଙ୍ଲେଡ୍ ଆପେୟ୍କେଜ୍ଜାନ୍ ସୋଡ଼ାମରଞ୍ଜି ଆନିଞ୍ଜିଆଡଙ୍ ବରେଞ୍ଜି, "ଇସ୍ୱରଲେନ୍ ଆସନ୍ ଅସିଙନ୍ ଏତରୁବ୍ତାଞନ୍ ଆବର୍ନେଲୋଙ୍ ଇନ୍ଲେଞ୍ଜି ସରିନ୍ ଆମ୍ୱେଞ୍ଜି ଇନ୍ନିଙ୍ କୁଲମ୍ତଡ୍; ବନ୍ଡ ଇନ୍ଲେଞ୍ଜି ଆସନ୍ ପାରସ୍ୟନ୍ ଆ ରାଜା କୋରସନ୍ ରାଜାନ୍ ଆବନାଁୟ୍ ଅନ୍ତମ୍ ଇନ୍ଲେଞ୍ଜି ଆମନକୁନ୍ ରୁକୁଡାଲନ୍ ଇସ୍ରାଏଲନ୍ ଆ ଇସ୍ୱର ପ୍ରବୁନ୍ ଆସନ୍ ଏତୁବ୍ବା ।" 4 ସିଲତ୍ତେ ଡେସାନ୍ ଆ ମନ୍ରାଜି, ଜିଉଦାନ୍ ଆମନ୍ରାଜି ଆସି ଏର୍ବପ୍ପୁ ଆର୍ରମେଞ୍ଜି ଆସନ୍ ଡ ତନ୍ରୁବ୍ କାବ୍ବାଡ଼ାଲୋଙନ୍ ଆନିଞ୍ଜିଆଡଙ୍ ପରାନ୍ଡଣ୍ଡନ୍ ଏମ୍ମେଏଞ୍ଜି, 5 ଆରି ଆନିୟମଞ୍ଜି ଆନବ୍ଡ଼ୟ୍ ଆସନ୍ ପାରସ୍ୟନ୍ ଆରାଜା କୋରସନ୍ ଆ ମନ୍ରେଙ୍ମତାନ୍ ଡ ପାରସ୍ୟ ରାଜା ଦାରିଆବସନ୍ ଆସନୋଡ଼ାଗଡ୍ ଜାୟ୍ ଆ ବନେରାଞ୍ଜି ତନିରିଆୟ୍ମର୍ଜିଆଡଙ୍ ବଡିନ୍ ତିୟ୍ଲେ ଡକ୍କୋଏଞ୍ଜି । 6 ଆରି ଅକେସ୍ୱରସନ୍ ଆବନେଡ଼ାଇଙ୍ ଜିଉଦାନ୍ ଡ ଜିରୁସାଲମ୍ ଆମନ୍ରାଜିଆଡଙ୍ ଆ ବିରୁଦଲୋଙ୍ ଅବୟ୍ କନାୟ୍କାୟ୍ ସିଟିନ୍ ଇଡେଞ୍ଜି ।
ଜିରୁସାଲମନ୍ ବାର୍ତନୁବନ୍
7 ଆରି ଅର୍ତକସ୍ତରନ୍ ଆସନୋଡ଼ାଗଡ୍ ଆଡିଡ୍ ବିସ୍ଳମ୍, ମିତ୍ରଦାତନ୍, ଟାବେଲନ୍ ଡ ଅନବ୍ଆନ୍ନା ଆଗଡ଼ିଞ୍ଜି ପାରସ୍ୟ ରାଜା ଅର୍ତ୍ତକସ୍ତରନ୍ ଆମଙ୍ବା ଇଡେଞ୍ଜି; ତି ଆ ସିଟି ଅରାମିୟ ଇଡଲନ୍ ବାତ୍ତେ ଆନିଡ୍ ଆରି ଅରାମିୟ ଲଙ୍ଲଙନ୍ ବାତ୍ତେ ଆନିଡିଡନ୍ ଡକୋଏନ୍ । 8 ରଉମ୍ ମନ୍ତ୍ରି ଡ ସିମ୍ସୟ ଇଡଲ୍ମର୍ ଅର୍ତକସ୍ତର ରାଜା ଆମଙ୍ବା ଜିରୁସାଲମନ୍ ଆ ବିରୁଦଲୋଙ୍ କେନ୍ ଏନ୍ନେଲେ ଆ ସିଟି ଇଡେଞ୍ଜି; 9 ରଉମ୍ ମନ୍ତ୍ରିନ୍ ଡ ସିମ୍ସୟ ଇଡଲ୍ମର୍ ଡ ଆନ୍ନା ଗଡ଼ିଞ୍ଜି ଅଡ଼୍କୋନ୍, ଆଗ୍ରାମ୍ଗାମ୍, ଦିନିଅନ୍ ଡ ଅପର୍ସ୍ତକିଅନ୍, ଟର୍ପଲିଅନ୍, ଅର୍ପର୍ସିଅନ୍, ଅର୍କବିଅନ୍, ବାବିଲିଅନ୍, ସୁସନିଅନ୍, ଦେଇଅନ୍, ଏଲମିଅନ୍ ଆମନ୍ରାଜି, 10 ଆରି ମାନନିଅ ମନାନ୍ନେମର୍ ଅସ୍ନପ୍ପରନ୍ ବାତ୍ତେ ଆପନାଙ୍, ଆରି ସମାରିଆନ୍ ଆଗଡ଼ାଲୋଙ୍ ଡ ପରାତ୍ ଅଲନ୍ ଆ ମିୟ୍ତାଲ୍ ଆଡେସା ତରଙ୍ଆନ୍ନା ଆଡ୍ରକୋନେଲୋଙ୍ ଆତନୁବ୍, ଏର୍ଜାଡ଼ିକାନ୍ ଆ କେଜ୍ଜାମର୍ଜି ଇଡେଞ୍ଜି । 11 ଆନିଞ୍ଜି ଅର୍ତକସ୍ତରନ୍ ରାଜା ଆମଙ୍ବା ଅଙ୍ଗା ଆ ସିଟି ଆପ୍ପାୟେଞ୍ଜି, ତେତ୍ତେ ଆଇଡିଡନ୍ ଆତେ କେନ୍; "ପରାତ୍ ଅଲନ୍ ଆ ମିୟ୍ତାଲ୍ ଆ ମନ୍ରା, କମ୍ୱାରିନମ୍ଞ୍ଜି ଆମଙ୍ ସିଲଡ୍, 12 ସୋଡ଼ା ରାଜାନ୍ ଆମଙ୍ ଆନବ୍ଜନ୍ନା କେନ୍ ଡ, ‘ଅମଙ୍ନମ୍ ସିଲଡ୍ ଆଜରିର୍ରାଞଞ୍ଜି ଜିଉଦିଅନ୍ ଆ ମନ୍ରାଜି ଜିରୁସାଲମନ୍ ଅମଙ୍ବାଲେନ୍ ଜିର୍ରାଜି; ଆନିଞ୍ଜି ତି ଗୋଡ଼େନ୍ ଆନମ୍ଡୁଙ୍ ପେଲ୍ଲା ଗଡ଼ାନ୍ ତୁବ୍ତଜି ଆରି କିନ୍ତାଲନ୍ ଆତନୁବ୍ ଅବ୍ସୁଜ୍ଜେଲେ ଆରୁଡ଼ାଙ୍ ଜିମ୍ମିତାଲନ୍ ବାର୍ତୁବେଞ୍ଜି ।’ 13 ସୋଡ଼ରାଜାନ୍ ଆମଙ୍ ଆନବ୍ଜନ୍ନାବର୍ କେନ୍, ‘କେନ୍ ଆଗଡ଼ା ଆତନୁବ୍ ଡ କିନ୍ତାଲନ୍ ଆକାବ୍ବାଡ଼ା ଅଞିଡ୍ତେ, ଏତ୍ତେଲ୍ଡେନ୍ କେନ୍ ମନ୍ରାଜି ପାନ୍ନୁନ୍, ସିସ୍ତୁନ୍ ଅଃତିୟେଜି, ଆରି ଆତନିକ୍କି ରାଜାଞ୍ଜି ଆସନ୍ ଅବୟ୍ ଅନସେଡମ୍ ଡେତେ । 14 ଇନ୍ଲେଞ୍ଜି ରାଜାସିଙନ୍ ଆ ବସିଡ୍ ଏଜୋମ୍ତାୟ୍ ଡ ସୋଡ଼ା ରାଜାନ୍ ଆଗନବ୍ରୟ୍ମଡ୍ ଗିୟ୍ଗିଜନ୍ ଆସନ୍ ଞେନ୍ ଅଃନ୍ନିସୁମାୟ୍, ତିଆସନ୍ ମନ୍ରାନ୍ ଆପ୍ପାୟ୍ଲେ ସୋଡ଼୍ରାଜାନ୍ଆଡଙ୍ ଏବ୍ଜନାଲାୟ୍ । 15 ପୁର୍ବାଃ ଜୋଜୋନମ୍ଞ୍ଜି ଆ ଇତିଆସ ବଇନ୍ ସାୟ୍ନେତୋ; ତିଆତେ ଇତିଆସ ବଇଲୋଙନ୍ ଆମନ୍ ଗିୟ୍ଲେ ଜନାତମ୍, କେନ୍ ଆଗଡ଼ା ଗୋଡ଼େନ୍ ଆନମ୍ଡୁଙ୍ ଗଡ଼ାନ୍, ଆରି ରାଜାଞ୍ଜି ସମ୍ପର୍ ରାଜ୍ୟନ୍ ସଙ୍ଗତାବା ଆରି ଆନିଞ୍ଜି ପୁର୍ବାଃନ୍ ଆଡିଡ୍ ତେତ୍ତସିଲଡ୍ ଗୋଡ଼େନ୍ ଅମ୍ଡୁଙ୍ଲାଜି । ତିଆସନ୍ କେନ୍ ଆଗଡ଼ା ଗୁରୁଡ୍ଡେଏନ୍ ।’ 16 ଇନ୍ଲେଞ୍ଜି ସୋଡ଼୍ ରାଜାନ୍ଆଡଙ୍ ଏବ୍ଜନାତାୟ୍, ଆରି ‘କେନ୍ ଆଗଡ଼ା ଆତନୁବ୍ ଡ କିନ୍ତାଲ୍ ଆକାବ୍ବାଡ଼ାନ୍ ଅଞିଡେନ୍ଡେନ୍, ମିୟ୍ତାଲ୍ ଅଲନ୍ ଆମନ୍ ଆସନ୍ ଇନ୍ନିଙ୍ ଅଃଡକ୍କୋଏ ।’" 17 ରାଜା ମନ୍ତ୍ରି ରଉମ୍ ଡ ଇଡଲ୍ମରନ୍ ସିମ୍ସୟନ୍ ଡ ଆ ସମାରିଆବାଜି ଆନ୍ନା ଗଡ଼ିଞ୍ଜିଆଡଙ୍, ଆରି ମିୟ୍ତାଲ୍ ଅଲନ୍ ଆଡେସା ଆନ୍ନା ଆନ୍ନା ମନ୍ରାଞ୍ଜି ଆମଙ୍ବା ଜାଲଙ୍ଲେ ଆପ୍ପାୟେନ୍, ଆଗ୍ରାମ୍ଗାମ୍, "ଆମ୍ୱେଞ୍ଜିଆଡଙ୍ ସୁକ୍କା ଡେଏତୋ । 18 ଆମ୍ୱେନ୍ ଅମଙ୍ବାଲେନ୍ ଅଙ୍ଗା ଆ ସିଟି ଏଆପ୍ପାୟ୍ଲାୟ୍, ତିଆତେ ତେମଡ୍ଲୋଙ୍ଲେନ୍ ରୟ୍ଲଙ୍ ପଡ଼େଲଞ୍ଜି । 19 ଆରି, ବନାଁଞ୍ବର୍ଲୋଙ୍ ଞେନ୍ ସନାଜନ୍ ଆଡ୍ରେନ୍, ଗିୟ୍ତାଏନ୍ ଡ, ପୁର୍ବାଃନ୍ ଆଡିଡ୍ କେନ୍ ଆଗଡ଼ା ରାଜାଞ୍ଜି ଆ ବିରୁଦଲୋଙ୍ ଗୋଡ଼େଲଞ୍ଜି ଆରି ଡେସାନ୍ ଆ ବିରୁଦ ଡ ଅବ୍ଗୋଡ଼େଏଞ୍ଜି । 20 ଆରି ଜିରୁସାଲମଲୋଙ୍ ସୋଡ଼ା ରନପ୍ତି ରାଜାଞ୍ଜି ଡକୋଏଞ୍ଜି, ଆନିଞ୍ଜି ଅଲନ୍ ଆ ମିୟ୍ତାଲ୍ ଅଡ଼୍କୋନ୍ ଆଡେସାଲୋଙ୍ ରାଜାଲଞ୍ଜି; ଆରି, ଆନିଞ୍ଜିଆଡଙ୍ ପାନ୍ନୁନ୍, ସିସ୍ତୁନ୍ ଡ ମାସୁଲ୍ ତନିୟନ୍ଡେନ୍ । 21 ତିଆସନ୍ ଅମଙ୍ଲେନ୍ ସିଲଡ୍ ବନାଁୟ୍ବରନ୍ ଅନ୍ରଙ୍ ଡେନ୍ଜାୟ୍ ତି ଆଗଡ଼ା ଏଙ୍ଗାଲେ କି ତନୁବନ୍ ଅଃଡ୍ଡେଏ, ତିଆସନ୍ ନମି ଆମ୍ୱେଞ୍ଜି ତି ଆମନ୍ରାଜିଆଡଙ୍ କାବ୍ବାଡ଼ାଡଙ୍ନେଜିତଡ୍ ଗାମ୍ଲେ ବାଁୟ୍ବାଜି । 22 ଆରି ଜାଗର୍ତ, କେନ୍ ଆ ବିସୟଲୋଙ୍ ଆମ୍ୱେଞ୍ଜି ଏଅବ୍ଡିଙ୍ଡଙ୍ନେ; ରାଜାଞ୍ଜି ଅନବ୍ମୋସ୍ସାନ୍ ଆସନ୍ ଇନିବା ପେଲ୍ଲାନ୍ ଗୋଗୋତେ ?" 23 ସିଲତ୍ତେ ରଉମ୍ ଡ ସେକ୍ରେଟେରିନ୍ ସିମ୍ସୟନ୍ ଡ ଆଗଡ଼ିଞ୍ଜି ଆ ମନ୍ରାଜି ଆମଙ୍ବା ଅର୍ତକସ୍ତରନ୍ ଆ ରାଜା ଆ ସିଟି ଆନିଡଲ୍ ଆ ପ୍ରେଡ଼େଲଞ୍ଜି ସିଲଡ୍, ଆନିଞ୍ଜି ଲଜିର୍ ଜିରୁସାଲମନ୍ ଜିଉଦିଞ୍ଜି ଆମଙ୍ବା ଜିର୍ରେ ବୋର୍ସା ଡ ରନପ୍ତିନ୍ ବାତ୍ତେ ଆନିଞ୍ଜିଆଡଙ୍ ଏନବ୍କାବ୍ବାଡ଼ାଲଜି । 24 ସିଲତ୍ତେ ଜିରୁସାଲମଲୋଙ୍ ଇସ୍ୱରନ୍ ଆସିଙ୍ ଆ କାବ୍ବାଡ଼ା ଅମ୍ରେଙେଞ୍ଜି । ଆରି, ପାରସ୍ୟନ୍ ଆ ରାଜା ଦାରିଆବସନ୍ ଅନବ୍ବାଗୁ ବର୍ସେଙ୍ଜାୟ୍ ତିଆତେ ଏର୍ତନୁବନ୍ ଡକୋଏନ୍ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)