ଏର୍ଜିଉଦିମରଞ୍ଜି ଆବିବାନେ ଆସନ୍ ଏଜ୍ରାନ୍ ଜନାତେ
1 କେନ୍ ଅଡ଼୍କୋନ୍ ଆଲନୁମ୍ ଆଜରାଡାଏନ୍ ସିଲଡ୍ ସୋଡ଼ାମରଞ୍ଜି ଅମଙ୍ବାଲେନ୍ ଜିର୍ରେ ଇୟ୍ଲାୟ୍ ବର୍ନେଜି, "ଇସ୍ରାଏଲନ୍ ଆ ମନ୍ରାଜି ଡ ରାଓଡ଼ାଞ୍ଜି ଡ ଲେବିୟଞ୍ଜି ବଡେସା ଆ କେଜ୍ଜାମର୍ଜି ସିଲଡ୍ ତର୍ଡମ୍ ଅର୍ରନ୍ନାନେନ୍ ଆନିଞ୍ଜି ସରିନ୍, ଆଗ୍ରାମ୍ଗାମ୍, କିଣାନିଅ, ଇତିଅ, ପରିସିଅ, ଜିବୁସିଅ, ଆମୋନିଅ, ମୋୟାବିଅ, ମିସ୍ରିଅ ଡ ଇମୋରିଅଞ୍ଜି ଏଡ଼ୁର୍ମଡ୍ କାବ୍ବାଡ଼ାନ୍ ଅନ୍ତମ୍ ଲୁମ୍ତଜି । 2 ଇନିଆସନ୍ଗାମେଣ୍ଡେନ୍ ଆନିଞ୍ଜି ତର୍ଡମ୍ ଡ ତର୍ଡମ୍ ଆ ଡାଙ୍ଗାଡ଼ାଅଞ୍ଜି ଆସନ୍ ଆ ଡାଙ୍ଗଡ଼ିଅନଞ୍ଜିଆଡଙ୍ ଜାଏଞ୍ଜି; କେନ୍ ଅନ୍ତମ୍ ମଡ଼ିର୍ କେଜ୍ଜାନ୍ ବଡେସାବାୟ୍ ଆ କେଜ୍ଜାଜି ସରିନ୍ ମାୟ୍ମାୟ୍ୟେଞ୍ଜି; ଆରି, କେନ୍ ଆ ଡୋସାଲୋଙ୍ ସୋଡ଼ାମରନ୍ ଡ ସାସନମରଞ୍ଜି ଆସି ସୋଡ଼ାଏନ୍ ।" 3 ସିଲତ୍ତେ ଞେନ୍ କେନ୍ ଆ ବର୍ନେ ଅରମ୍ଡଙ୍ଲାଞନ୍, ସିନ୍ରିନ୍ ଡ କୋଟଞେନ୍ ପେଲାୟ୍, ଆରି ଅବବ୍ବ୍ଞେନ୍ ଡ କୋରୋତମ୍ଞେନ୍ ପୁୟ୍ଲେ ଅଃମୁସୁକ୍କାଲନ୍ ତଙ୍କୁମ୍ଲାୟ୍ । 4 ତିଆଡିଡ୍ ଆ ବନଣ୍ତି ମନ୍ରଞ୍ଜି ଡୋସା ଆସନ୍ ଇସ୍ରାଏଲନ୍ ଆ ଇସ୍ୱର ଆବର୍ନେଲୋଙ୍ ଆତକ୍କରେଞ୍ଜି ଆ ମନ୍ରାଜି ଅମଙ୍ଞେନ୍ ରୁକୁଲଞ୍ଜି; ଆରି, ଞେନ୍ ସାଲ୍ଲୁମ୍ ଓଲେନ୍ ଆନମଙ୍ ଆଡିଡ୍ ଜାୟ୍ ତୁର୍ଞାମ୍ସିଲନ୍ ତଙ୍କୁମ୍ଲାୟ୍ । 5 ସିଲତ୍ତେ ସାଲ୍ଲୁମ୍ ଓଲେନ୍ ଆନମଙ୍ ଆଡିଡ୍ ଞେନ୍ ଡୁକଲନ୍ ଆଡ୍ରକୋଲନାଞନ୍ ସିଲଡ୍ ଡୋଲନାୟ୍, ଡଅଙ୍ଲୋଙ୍ ଞେନ୍ ଆପ୍ରେତେନ୍ ଆସିନ୍ରି ଡ କୋଟନ୍ ଡକୋଏନ୍; ଆରି, ଞେନ୍ ତୁଡ଼ୁମ୍ଡାଲେ ସଦାପ୍ରବୁ ଇସ୍ୱରଞେନ୍ ଆମଙ୍ବା ତେକେସିଲନ୍ ବର୍ରନାୟ୍, 6 "ଏ ଇସ୍ୱରଞେନ୍, ଞେନ୍ ଗରୟ୍ଡାତିୟ୍, ଏ ଇସ୍ୱରଞେନ୍, ଅମଙ୍ବାନମ୍ ଅବ୍ଡୁୟ୍ବବ୍ବ୍ଲନ୍ ଆନାଙାଙନ୍ ଆସନ୍ ଞେନ୍ ଗରୟ୍ଡାତିୟ୍; ଇନିଆସନ୍ଗାମେଣ୍ଡେନ୍ ଡୋସାଲେନ୍ ଅବବ୍ବ୍ଲେନ୍ ଆ ତୁଣ୍ତୁ ସିଲଡ୍ ପଡେନ୍ ଆରି ଡୋସାଲେନ୍ ରୁଆଙନ୍ ଜାବେନ୍ । 7 ପୁର୍ବାଃ ଜୁଜୁଲେଞ୍ଜି ଆଡିଡ୍ ସିଲଡ୍ ନମିଆନ୍ତାନ୍ ଜାୟ୍ ଇନ୍ଲେଞ୍ଜି ଗୋଗୋୟ୍ ଡୋସାଜି; ଡୋସାଲେନ୍ ଆସନ୍ ଲଙେ ଅନ୍ତମ୍ ଇନ୍ଲେଞ୍ଜି, ରାଜାଲେଞ୍ଜି ଡ ରାଓଡ଼ାଲେଞ୍ଜି ତରଙ୍ଆନ୍ନା ଡେସାନ୍ ଆ ରାଜାଜି ଆସିଲୋଙ୍, କଡ଼ିବ୍ଲୋଙନ୍, ବଣ୍ତିଲୋଙନ୍ ଡ ଜୁରୁଲୋଙନ୍ ଡ ବନନ୍ତଙନ୍ ବାତ୍ତେ ସନପରୋପ୍ପାୟନ୍ ଡେଲଲେନ୍ । 8 ଆରି ଇସ୍ୱରଲେନ୍ ଏଙ୍ଗାଲେ ଅବ୍ତାରିଙଁମଡ୍ତନ୍ ଡ ଆ ବନଣ୍ତିଇଙ୍ଲେନ୍ ଇନ୍ଲେଞ୍ଜିଆଡଙ୍ ଅସୋୟ୍ ଡଙ୍ଡଙ୍ତଲେନ୍, ତିଆସନ୍ ଇନ୍ଲେଞ୍ଜିଆଡଙ୍ ଡନୋବନ୍ ଆସନ୍ ଅସୋୟ୍ ଆଡନକ୍କୋ ଡ ଆ ମଡ଼ିର୍ ଜାଗାଲୋଙନ୍ ଇନ୍ଲେଞ୍ଜିଆଡଙ୍ ଅବୟ୍ ସୋଣ୍ତାଙନ୍ ତନ୍ରୁବ୍ ଆସନ୍ ନମି ସଦାପ୍ରବୁ ଇସ୍ୱରଲେନ୍ ଆମଙ୍ ସିଲଡ୍ ଅସୋୟ୍ ଡିନ୍ନା ସନୁୟୁମନ୍ ଏଞାଙ୍ଲାୟ୍ । 9 ଇନିଆସନ୍ଗାମେଣ୍ଡେନ୍ ଇନ୍ଲେଞ୍ଜି ବଣ୍ତିମରଞ୍ଜି । ଡେଲୋଜନଙ୍ଡେନ୍ ଆ ବନଣ୍ତିଇଙ୍ଲେନ୍ ଜାୟ୍ ଇସ୍ୱରଲେନ୍ ଇନ୍ଲେଞ୍ଜିଆଡଙ୍ ଅନମ୍ରେଙ୍ଲଲେନ୍, ବନ୍ଡ ଇନ୍ଲେଞ୍ଜିଆଡଙ୍ ସନାୟୁମନ୍ ଆତନିୟ୍ ଆସନ୍, ଇସ୍ୱରଲେନ୍ ଆସିଙ୍ ଆତନୁବ୍ ଆସନ୍ ଡ ଆରଡ଼ୁଙ୍ତାଲନ୍ ଆବନାର୍ତୁବ୍ ଆସନ୍, ଆରି ଜିଉଦାନ୍ ଡ ଜିରୁସାଲମଲୋଙ୍ ଇନ୍ଲେଞ୍ଜିଆଡଙ୍ ଅବୟ୍ କିନ୍ତାଲନ୍ ଆତନୁବ୍ ଆନିନ୍ ପାରସ୍ୟ ରାଜାଞ୍ଜି ଆଗନିୟ୍ଗିୟ୍ଲୋଙ୍ ଇନ୍ଲେଞ୍ଜିଆଡଙ୍ ସାୟୁମ୍ଲଲେନ୍ ।
10 ନମି ଆନ୍ତାନ୍ ଇସ୍ୱରଲେନ୍, ତିସିଲଡ୍ ଇନ୍ଲେଞ୍ଜି ଆରି ଇନି ଗାମ୍ବୋ ? ଇନିଆସନ୍ଗାମେଣ୍ଡେନ୍ ଇନ୍ଲେନ୍ ବନାଁୟ୍ବର୍ନମ୍ ଏମ୍ମାନେଲାୟ୍ 11 ଆମନ୍ କମ୍ୱାରିନମ୍ ପୁର୍ବାଃତେ ବର୍ନେମରଞ୍ଜି ବାତ୍ତେ ବନାଁୟ୍ବରନ୍ ତିୟ୍ଲେ ବର୍ନେ, ‘ଆମ୍ୱେଞ୍ଜି ଅଙ୍ଗା ଆଡେସା ଆଡନେ ଆସନ୍ ଏଜିର୍ତେ, ତିଆତେ ବଡେସାବାୟ୍ ଆକେଜ୍ଜାଜି ଏର୍ମଡ଼ିର୍ ବାତ୍ତେ ଏର୍ମଡ଼ିର୍ ଡେସା,ଏଡ଼ୁର୍ମଡ୍ କାବ୍ବାଡ଼ାନ୍ ବାତ୍ତେ ଡେସାନ୍ଆଡଙ୍ ବତନ୍ନଡ୍ ସିଲଡ୍ ଆରି ବତନ୍ନଡ୍ ତି ଜାୟ୍ ଏର୍ମଡ଼ିରଞ୍ଜି ବବ୍ବ୍ରିଜେଞ୍ଜି । 12 ତିଆସନ୍ ଆମ୍ୱେଞ୍ଜି ଡାଙ୍ଗଡ଼ିଅବେଞ୍ଜିଆଡଙ୍ ଆ ଡାଙ୍ଗାଡ଼ାଅଞ୍ଜି ସରିନ୍ ଏବ୍ବିବାଡଙ୍, ଅଡ଼େ ଡାଙ୍ଗଡ଼ାଅବେଞ୍ଜି ଆସନ୍ ଆ ଡାଙ୍ଗଡ଼ିଅନଞ୍ଜିଆଡଙ୍ ଏଜାଡଙ୍, ଅଡ଼େ ଆ ସନୟୁଞ୍ଜି ଅଡ଼େ ଆ ମନରଙଞ୍ଜି ଆଙ୍ଗିୟ୍ଜା ଏର୍ଡଙ୍ କି ଏଗୋୟ୍ଡଙ୍; ତିଡେନ୍ ଆମ୍ୱେନ୍ ବୋର୍ସାତବେନ୍ ଆରି ଡେସାନ୍ ଆ ମନଙ୍ ଜନବ୍ ଆ ଜନୋମ୍ ଏଜୋମ୍ତେ ଆରି ଅଡ଼୍କୋଡିନ୍ନାନ୍ ଆସନ୍ ତର୍ଡମ୍ ଅଅନ୍ବେଞ୍ଜି ଆଡନେ ଆସନ୍ ତିଆତେ ଡକୋଲେଏଜିର୍ତେ ।’ ବନ୍ଡ ଇନ୍ଲେଞ୍ଜି ବନାଁୟ୍ବର୍ନମ୍ ଅଡ଼୍କୋନ୍ କେନ୍ ଏଅମ୍ରେଙ୍ଲାୟ୍ । 13 ତିଆସନ୍ ଏ ଇସ୍ୱରଲେନ୍, ଇର୍ସେ କାବ୍ବାଡ଼େଞ୍ଜି ଡ ସୋଡ଼ା ଡୋସାନ୍ ଆସନ୍ ଇନ୍ଲେଞ୍ଜିଆଡଙ୍ କେନ୍ ଅଡ଼୍କୋନ୍ ଗଟେଏନ୍ ଜାୟ୍ ଆମନ୍ ଡୋସାଲେନ୍ ପନବ୍ରଡ୍ ଅବ୍ସୋୟ୍ଲେ ଇନ୍ଲେଞ୍ଜିଆଡଙ୍ ଡଣ୍ତନ୍ ତିୟ୍ତଲେନ୍ ଆରି କେନ୍ ଏନ୍ନେଗନ୍ ଆ ମନ୍ରାଜି ଲାଙ୍ଲେଡ୍ ଡକୋତେ, 14 କେନ୍ଆତେ ଗିୟ୍ଲେ ଇନ୍ଲେଞ୍ଜି ଇନି ଆରିପଙ୍ ବନାଁୟ୍ବର୍ନମ୍ ଏଆଲ୍ଲେତାୟ୍ ଆରି କେନ୍ ଏଡ଼ୁର୍ମଡନ୍ ଆର୍ଲୁମ୍ତେଞ୍ଜି ଆନ୍ନା କେଜ୍ଜାଞ୍ଜି ସରିନ୍ ଏକୁଲମ୍ନାୟ୍ ? ଏକୁଲମ୍ଲନାୟ୍ ଡେନ୍ ଆମନ୍ ଇନି ଇନ୍ଲେଞ୍ଜିଆଡଙ୍ ଅନ୍ରଙ୍ ଗୁରୁଡ୍ଡେଲେନ୍ ଜାୟ୍ ଅବ୍ବ୍ରାବମ୍ ? ସିଲତ୍ତେ ଲାଙ୍ଲେଡ୍ ଆନ୍ନିଙ୍ ପଙ୍ ଅଃର୍ରଏଲଜି ତଡ୍ । 15 ଏ ସଦାପ୍ରବୁ, ଇସ୍ରାଏଲନ୍ ଆ ଇସ୍ୱର, ଆମନ୍ ଡରମ୍ମମର୍; ଇନିଆସନ୍ଗାମେଣ୍ଡେନ୍ ଇନ୍ଲେଞ୍ଜି ନମିଆନ୍ତାନ୍ ଜାୟ୍ ଡନୋବନ୍ ଞାଙ୍ଲେ ଲାଙ୍ଲେଡ୍ ଡକୋ; ଗିଜା, ଇନ୍ଲେଞ୍ଜି ମୁକ୍କାଲୋଙ୍ନମ୍ ଡୋସାନମ୍ ବାତ୍ତେ ଇନ୍ଲେନ୍ ଡୋସା ଡେଲଲେନ୍; ଇନିଆସନ୍ଗାମେଣ୍ଡେନ୍ ମୁକ୍କାବାନମ୍ ଆନ୍ନିଙ୍ ତିଆସନ୍ ତନଙ୍ଲେ ଅଃରପ୍ତିଏ ।"
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)