1 ସାରେ ବିଷୟ୍‌ତିଙ୍କ୍‌ ସମୟ୍‌ ମିନ୍ଦେ ନୁ ମାବ୍‌ତେ ମଦଲ୍‌ ସାରେ ପାଡ଼ିୟ୍‌ଦେ ସମୟ୍‌ ମିନ୍ଦେ; 2 ଜନମ୍‌ ଆଦାନ୍‌ ସମୟ୍‌ ନୁ ଡଲାନ୍‌ ସମୟ୍‌; ଉର୍ସ୍‌କାନ୍‌ ସମୟ୍‌, ବାତ୍‌ତେ ଉର୍ସ୍‌କ୍‌ତାଦ୍‌, ଆୱ୍‌ ତାହ୍‌ଃକାନ୍‌ ସମୟ୍‌; 3 ଆୱ୍‌କାନ୍‌ ସମୟ୍‌ ନୁ ସାୟେ ମାଡ଼ାନ୍‌ ସମୟ୍‌; ଉହ୍‌ଃତାନ୍‌ ସମୟ୍‌ ନୁ ତିଆର୍‌ ମାଡ଼ାନ୍‌ ସମୟ୍‌, 4 କେୟାନ୍‌ ସମୟ୍‌ ନୁ କାୱ୍‌ଦାନ୍‌ ସମୟ; ଗୁଣ୍ଡ୍‌ତିଙ୍କ୍‌ ରେଃସ୍‌ କେୟାନ୍‌ ସମୟ୍‌ ନୁ ଏନ୍ଦାନ୍‌ ସମୟ୍‌; 5 କାଲ୍‌ବଦେ ୱାଟାନ୍‌ ସମୟ୍‌ ନୁ କାଲ୍‌ବଦେ ଗୁଡ଼୍‌ପାନ୍‌ ସମୟ; ଉର୍ଙ୍ଗାନ୍‌ ସମୟ୍‌ ନୁ ଉର୍ଙ୍ଗିୱିଡ଼୍‌ସାନ୍‌ ସମୟ୍‌, 6 ମେଃକାନ୍‌ ସମୟ୍‌ ନୁ ମାପାନ୍‌ ସମୟ୍‌; ନେଃତାନ୍‌ ସମୟ୍‌ ନୁ ଏସାନ୍‌ ସମୟ୍‌; 7 ଇକାନ୍‌ ସମୟ୍‌ ନୁ ଅଲ୍‌ସାନ୍‌ ସମୟ; କଟ ମାନ୍ଦାନ୍‌ ସମୟ୍‌ ନୁ ଗଟି କେତାନ୍‌ ସମୟ୍‌; 8 ପ୍ରେମ ମାଡ଼ାନ୍‌ ସମୟ୍‌ ନୁ ପାସ୍କାନ୍‌ ସମୟ; ଯୁଦ୍ଦ୍‌ ମାଡ଼ାନ୍‌ ସମୟ୍‌ ନୁ ଶାନ୍ତିତେ ସମୟ୍‌ ।

9 ପାଡ଼ିୟ୍‌ ମାଡ଼ାନ୍‌ ନାରୁନାଦ୍‌ ନିଜର୍‌ ତିପାଲ୍‌ତେ ବାତେ ଲାବ୍‌ ? 10 ପରମେଶ୍ୱର୍‌ ନାରୁଡ଼୍‌ ପିଲାକିଙ୍କ୍‌ ଦାନ୍ଦେ ଆଦାନ୍‌ ମାଇଦିଙ୍କ୍‌ ବେନ୍‌ ପାଡ଼ିୟ୍‌ ଇସ୍‌ ମିନ୍ଦେଣ୍ଡ୍‌, ଆଦ୍‌ ନାନେ ଉଡ଼ିମିନ୍ଦେନ୍‌ । 11 ଅଣ୍ଡ୍‌ ସାରେ ବିଷୟ୍‌ତିଙ୍କ୍‌ ତାନ୍‌ ସମୟ୍‌ତେ ସୁନ୍ଦର୍‌ ନେଃସ୍‌ ମିନ୍ଦେଣ୍ଡ୍‌; ମେଣ୍ଡେ ଅଣ୍ଡ୍‌ ଅଡ଼୍‌ ହୃଦୟତାଗେ ସାରେକାଲାମ୍‌ ଜାକ ନେଃସ୍‌ ମିନ୍ଦେଣ୍ଡ୍‌; ଆଗେକ୍‌ବା ପରମେଶ୍ୱର୍‌ ମୁନେକଞ୍ଚ୍‌ ତେର୍‌ନା ଜାକ ବେନ୍‌ ପାଡ଼ିୟ୍‌ ମାଡ଼ିମିନ୍ଦେଣ୍ଡ୍‌, ନାରୁଣ୍ଡ୍‌ ଆଦିଙ୍କ୍‌ ଚିନ୍ତେମାଡ଼୍‌ ପାର୍‌ୱଣ୍ଡ୍‌ । 12 ନାନେ ପୁତ୍‌ତାନ୍‌ ଜେ, ବାଦ୍‌କିମାନା ସାର୍ଦେ ନୁ ସାୟେତ୍‌ ପାଡ଼ିୟ୍‌ ମାଡ଼ାନ୍‌ ୱିଡ଼୍‌ସି ଅଡ଼୍‌ୱାଦ୍‌ ମେଣ୍ଡେ ବାତେବା ସାୟେ ବିଷୟ୍‌ ଇଲା । 13 ମେଣ୍ଡେ, ସାରେ ନାରୁଡ଼୍‌ ତିଞ୍ଜ୍‌ ନିଜର୍‌ ସାରେ ତିପାଲ୍‌ତେ ସାର୍ଦେ ମାଡ଼ିତଡ଼୍‌, ଇଦ୍‌ ପରମେଶ୍ୱର୍‌ତେ ଦାନ। 14 ନାନେ ପୁତ୍‌ତାନ୍‌ ଜେ, ପରମେଶ୍ୱର୍‌ ବାତେବା ମାଡ଼ିତଣ୍ଡ୍‌, ଆଦ୍‌ ତେର୍‌ୱେଜାକ ମାନ୍ଦାନାଦ୍‌; ଆଦିଙ୍କ୍‌ ବେଡ଼୍‌ୟାଦ୍‌ ମାଡ଼ାନଙ୍କ୍‌ ଆୟ; ବା ଆଦିଙ୍କ୍‌ ସଦୁରାଦ୍‌ ମାଡ଼ାନଙ୍କ୍‌ ଆୟ; ମେଣ୍ଡେ ନାରୁଡ଼୍‌ ପରମେଶ୍ୱର୍‌ତେ ମୁନେ ୱେର୍‌ଦାନ୍‌ ମାଇଦିଙ୍କ୍‌ ଅଣ୍ଡ୍‌ ଆଦ୍‌ ମାଡ଼ି ମିନ୍ଦେଣ୍ଡ୍‌ । 15 ବାତା ମିନ୍ଦେ, ଆୱ୍‌ ମାତ୍‌ତା; ମେଣ୍ଡେ, ବାତା ଆଦ୍‌ତା, ଆୱେକେ ମାତ୍‌ତା; ମେଣ୍ଡେ ବାତା ଆତ୍‌ତେ ମିନ୍ଦେ; ପରମେଶ୍ୱର୍‌ ଆୱିଙ୍କ୍‌ ମେଣ୍ଡନ୍‌ଦାମ୍‌ ମେଃକିତଣ୍ଡ୍‌ ।

16 ମେଣ୍ଡେ, ନାନେ ପଡ଼ଦ୍‌ତେ ମଦଲ୍‌ ବିଚାର୍‌ ମାଡ଼ାନ୍‌ ପଡ଼୍‌ୟେ ଉଡ଼୍‌ତାନ୍‌, ଆଗେ ଦୁଷ୍ଟତା ମିନ୍ଦେ, ମେଣ୍ଡେ ଦର୍ମପଡ଼୍‌ୟେତାଗେ ଉଡ଼୍‌ତାନ୍‌, ଆଗେ ଦୁଷ୍ଟତା ମିନ୍ଦେ । 17 ନାନେ ମନେ ମନେ ଆଲ୍‌ସ୍‌ତାନ୍‌, ପରମେଶ୍ୱର୍‌ ଦାର୍ମିକ ନୁ ଦୁଷ୍ଟନ୍‌ ବିଚାର୍‌ ମାଡ଼ିତଣ୍ଡ୍‌; ବାତେଙ୍କ୍‌ଇତ୍କେ ସାରେ ବିଷୟ୍‌ତିଙ୍କ୍‌ ନୁ ସାରେ ପାଡ଼ିୟ୍‌ଦେ ମାଇଦିଙ୍କ୍‌ ସମୟ୍‌ ମିନ୍ଦେ । 18 ନାନେ ମନେ ମନେ ଆଲ୍‌ସ୍‌ତାନ୍‌, ପରମେଶ୍ୱର୍‌ ବେଦ୍‌ପୁଟୁଙ୍କ୍‌ ନାରୁଡ଼୍‌ ପିଲାଙ୍କ୍‌ ପରିକ୍ଷା ମାଡ଼ିତଣ୍ଡ୍‌ ନୁ ନିଜେ କେ ଅଡ଼୍‌ ପଶୁ ଲେକାମ୍‌, ଇଦ୍‌ ବେଦ୍‌ପୁଟୁଙ୍କ୍‌ ଅଡ଼୍‌ ଉଡ଼ିତଡ଼୍‌, ଆଦିନ୍‌ମାଇଦିଙ୍କ୍‌ ଅଡ଼୍‌ ମାଇଦିଙ୍କ୍‌ ଇଦ୍‌ ଆସମିନ୍ଦେ । 19 ବାତେଙ୍କ୍‌ଇତ୍କେ ନାରୁଡ଼୍‌ ପିଲାନ୍‌ ପର ବାତେ ଗଟେମ୍‌ଆଦ୍‌ତେ, ପଶୁକିନ୍‌ ପର ଆଦ୍‌ ଗଟେମ୍‌ଆଦ୍‌ତେ; ସାରେତଡ଼୍‌ ପର କେ ଇଦ୍‌ଲେକାମ୍‌ତେ ଗଟନା ଗଟେମ୍‌ ଆଦ୍‌ତେ; ଇଦ୍‌ ବେଲା ଡଲିତେ, ଆଦ୍‌ ଆଲେକେ ଡଲିତ୍‌; ମେଣ୍ଡେ, ସାରେତଡ଼୍‌ ଜିୱୁନ୍‌ ଅଣ୍ଡୟ୍‌ ସାମାନେ; ମେଣ୍ଡେ, ପଶୁକଞ୍ଚ୍‌ ନାରୁନାଦ୍‌ ବାତେବା ମୁକ୍ୟ ଇଲା ବାତେଙ୍କ୍‌ଇତ୍କେ ସାରେ ବେକାର୍‌ । 20 ସାରେତଡ଼୍‌ ଅଣ୍ଡୟାଗେ ଆଦ୍‌ତଡ଼୍‌; ସାରେତଡ଼୍‌ ଦୁମ୍‌ଦେ ତିଆର୍‌ ନୁ ସାରେତଡ଼୍‌ ମେଣ୍ଡନ୍‌ଦାମ୍‌ ଦୁମ୍‌ଦାଗେ କାଇଲିତଡ଼୍‌। 21 ନାରୁନ୍‌ ଆତ୍ମାପର ନୁ ପଶୁତ୍‌ ଆତ୍ମା ପୃତିବିତେ ନାଡ଼୍‌ମେ ମାନ୍ତେଇଞ୍ଜ ବେନ ପୁତ୍‌ତଣ୍ଡ୍‌ ? 22 ଆଦିନ୍‌ ମାଇଦିଙ୍କ୍‌ ନାରୁଣ୍ଡ୍‌ ନିଜର୍‌ ପାଡ଼ିୟ୍‌ଦାଗ୍‌ ସାର୍ଦେ ମାଡ଼ାନ୍‌ ଇଡ଼୍‌ସି ମେଣ୍ଡେ ତାନ୍‌ ବାତେ ଅଦିକ୍‌ ସାୟେ ଇଲାଇଞ୍ଜ ନାନେ ପୁତ୍‌ତାନ୍‌; ବାତେଙ୍କ୍‌ଇତ୍କେ ଇଦେକେ ତାନ୍‌ ଅଦିକାର୍‌; ମେଣ୍ଡେ, ତାନ୍‌ ପେର୍କେ ବାତେ ଗଟେମ୍‌ ଆଦ୍‌ତେ, ଆଦ୍‌ ଉଡ଼ାନ୍‌ ମାଇଦିଙ୍କ୍‌ ବେନ ଅଂକିଙ୍କ୍‌ ମାଲ୍‌ପି ତାତ୍‌ତେବାର୍ଦ୍‌ତଣ୍ଡ୍‌ ?