1 ନାର୍ଗେ ଦାମ୍‌ଦେ ନିୟ୍‌ ବାଦୁଲ୍‌ତେ ଲେକେତ୍‌ ପେଦେର୍‌ ସାୟେ ନୁ ଜନମ୍‌ ଦିନ୍‌ତେ ବାଦୁଲ୍‌ତେ ଡଲାନ୍‌ ଦିନ୍‌ ସାୟେ । 2 ବଜିଲନ୍‌ ଆଦାନାଦ୍‌ ୱିଡ଼୍‌ସି କେୟାନ୍‌ ଲନ୍‌ ଆଦାନାଦ୍‌ ସାୟେ; ବାତେଙ୍କ୍‌ଇତ୍କେ ଆଦ୍‌ ସାରେ ନାରୁଡ଼ାଦ୍‌ ମାରେଙ୍ଗ୍‌ ଉଡାନାଦ୍‌ ନୁ ଜିୱ୍‌ମାନ୍ଦାନ୍‌ ନାରୁଣ୍ଡ୍‌ ଆଗେ ମାନ୍‌ ଇଦ୍‌ତଣ୍ଡ୍‌ । 3 କାୱୁଦାନାଗାଙ୍କ୍‌ ମୁର୍‌ମୁରା ଆଦାନାଦ୍‌ ସାୟେ; ବାତେଙ୍କ୍‌ଇତ୍କେ ମକମ୍‌ ୱାସ୍ପାନାଦିନାଗାଙ୍କ୍‌ ହୃଦୟ ୱେଡ଼୍‌କେ ଆଦାନାଦ୍‌ ସାୟେ। 4 ଜ୍ଞାନିଡ଼୍‌ ହୃଦୟ କେୟାନ୍‌ ଲନ ମାନ୍ତେ, ମାତର୍‌ ମୁର୍କଡ଼୍‌ ହୃଦୟ ସାର୍ଦେ ଲନ୍‌ ମାନ୍ତେ । 5 ମୁର୍କଡ଼୍‌ ପାଟେ କେଞ୍ଜାନ୍‌ ବାଦୁଲ୍‌ତେ ଜ୍ଞାନିଡ଼୍‌ ଦେଞ୍ଜ୍‌ସ୍କାନାଦ୍‌ କେଞ୍ଜାଙ୍କ୍‌ ସାୟେ। 6 ବାତେଙ୍କ୍‌ଇତ୍କେ କୁଣ୍ଡେତ୍‌ ମଦଲ୍‌ ନିଡ଼୍‌ସ ମାନ୍ଦାନ୍‌ କୟେନାଦ୍‌ ଲେଙ୍ଗ୍‌ ଚଡ଼ଚଡ଼ ବେଦ୍‌ପୁଟୁଙ୍କ୍‌, ମୁର୍କ କାୱୁଦାନାଦ୍‌ ଆଲେକେ; ଇଦେକେ ବେକାର୍ । 7 ନିଜାମ୍‌ ଅନ୍ୟାୟ୍‌ ଦନ୍‌ଗୁଡ଼୍‌ପିତେ ଜ୍ଞାନି ନାରୁଙ୍କ୍‌ ମୁର୍କ ମାଡ଼ିତେ ନୁ ଲାଞ୍ଚ୍‌ ବୁଦ୍‌ତିଙ୍କ୍‌ ନଷ୍ଟ ମାଡ଼ିତେ । 8 ପାଡ଼ିୟ୍‌ଦେ ଆରାମ୍‌ ବାଦୁଲ୍‌ତେ ଆଗେତ୍‌ ତେର୍ସ୍ପାନାଦ୍‌ ସାୟେ; ମେଣ୍ଡେ, ଆତ୍ମାତାଗ୍‌ ଗର୍ବ ଆଦାନ୍‌ ବାଦୁଲ୍‌ତେ ଆତ୍ମାତାଗ୍‌ ଜାମେ ଆଦାନାଦ୍‌ ସାୟେ । 9 କପାମ୍‌ ଆଦାନ୍‌ ମାଇଦିଙ୍କ୍‌ ନିଜର୍‌ ଆତ୍ମାତାଗେ ଦାନ୍ଦେ ଆୟିମାଟ୍‌ ବାତେଙ୍କ୍‌ଇତ୍କେ ମୁର୍କନଡ଼୍‌ ହୃଦୟତାଗେ କପାମ୍‌ ମାନ୍ତେ । 10 ଇଞ୍ଜେତେ କାଲାମ୍‌ ବାଦୁଲ୍‌ତେ ମୁନେତ୍‌ କାଲାମ୍‌ ସାୟେ ମାନ୍ଦାନାଦ୍‌ ଇତ୍କେ ବାତେ, ଇଦ୍‌ କେଲ୍‌ମା, ବାତେଙ୍କ୍‌ଇତ୍କେ ନିକ୍‌ ବାତେ ଜ୍ଞାନ ଇଲେକି ପାଚାରା ମାଡ଼ୁତି । 11 ଜ୍ଞାନ ଆନିଦାଦିଡ଼୍‌ ସମ୍ପତିତେ ଅଦିକାର୍‌ତେ ଲେକାମ୍‌ ସାୟେ; ମେଣ୍ଡେ ବେନଡ଼୍‌ ଗେଲ୍‌ସି ମାନ୍ଦାନ୍‌ ନାରୁଡ଼୍‌ ମାଇଦିଙ୍କ୍‌ ଆଦ୍‌ ନାର୍ଗେ ଲାବ୍‌ । 12 ବାତେଙ୍କ୍‌ଇତ୍କେ ଦନ୍‌ ବେଲା ଆଶେ ଲେକାମ୍‌, ଜ୍ଞାନ ଆନ୍ତେ ଆଦେଲେକାମ୍‌ ଆଶେ ଲେକାମ୍‌ ଆଦ୍‌ତେ; ମାତର୍‌ ଶିକ୍ଷାତେ ବେଡ଼୍‌ୟାଦ୍‌ ଇଦ୍‌ ଜେ, ଜ୍ଞାନ୍‌ ନିଜର୍‌ ଅଦିକାରିନ୍‌ ଜିଉନ୍‌ ରକ୍ଷା ମାଡ଼ିତ୍‌ । 13 ପରମେଶ୍ୱର୍‌ତେ ପାଡ଼ିୟ୍‌ ଚିନ୍ତେ ମାଡ଼ା; ବାତେଙ୍କ୍‌ଇତ୍କେ ଅଣ୍ଡ୍‌ ବାତେ ୱାଙ୍ଗ୍‌ସି ମିନ୍ଦେଣ୍ଡ୍‌, ବେନ ଆଦ୍‌ ତିନାଙ୍କ୍‌ ମାଡ଼୍‌ ପାର୍ଦ୍‌ତଣ୍ଡ୍‌ ? 14 ସୁକାମ୍‌ ସମୟ୍‌ତେ ସାର୍ଦେ ଆୟିମ୍‌ ନୁ ଦୁକାମ୍‌ ସମୟ୍‌ତେ ଚିନ୍ତେ ମାଡ଼ାଟ୍‌; ନାରୁଡ଼୍‌ ବବିଷତ୍‌ତେ ବାତେ ଗଟେମ୍‌ ଆଦ୍‌ତେ, ଆଦ୍‌ ବେଦ୍‌ପୁଟୁଙ୍କ୍‌ ଅଣ୍ଡ୍‌ ପୁନ୍ଦ୍‌ ପାର୍‌ୱଣ୍ଡ୍‌, ଆଦିନ୍‌ ମାଇଦିଙ୍କ୍‌ ପରମେଶ୍ୱର୍‌ ସୁକାମ୍‌ ନୁ ଦୁକାମ୍‌ତିଙ୍କ୍‌ ଗାରେ ଗାରେ ନେହଃସ୍‌ ମିନ୍ଦେଣ୍ଡ୍‌ । 15 ନାନେ ନିଜର୍‌ ବେକାର୍‌ ସମୟ୍‌ତେ ଇଦ୍‌ ସାରେ ଉଡ଼୍‌ତାନ୍‌; ଦାର୍ମିକ୍‌ ନାରୁଣ୍ଡ୍‌ ବେସୁଙ୍କ୍‌ ବେସୁଙ୍କ୍‌ ନିଜର୍‌ ଦାର୍ମିକ୍‌ତେ ନଷ୍ଟ ଆଦ୍‌ତଣ୍ଡ୍‌, ମେଣ୍ଡେ ଦୁଷ୍ଟ ନାରୁଣ୍ଡ୍‌ ନିଜର୍‌ କାରାପ୍‌ ପାଡ଼ିୟ୍‌ ମାଡ଼ି ନାର୍ଗେଦିନାମ୍‌ ବାଦ୍‌କିଣ୍ଡ୍‌ । 16 ଅଦିକ୍‌ ଦାର୍ମିକ ଆୟିମାଟ୍‌; ଆଗେକ୍‌ବା ନିଜ୍‌ତିଙ୍କ୍‌ ଗାଟି ଜ୍ଞାନି ତମାଟ୍‌; ବାତେଙ୍କ୍‌ ନିମେ ନିଜ୍‌ତିଙ୍କ୍‌ ନଷ୍ଟ ମାଡ଼ିତି ? 17 ନିମେ ଗାଟି ଦୁଷ୍ଟ ଆୟ୍‌ମା, ଆଗେକ୍‌ବା ମୁର୍କ ଆୟିମାଟ୍‌; ନିଜର୍‌ ଦିନାମ୍‌ ଏୱାକେ ମୁନେଙ୍କ୍‌ ବାତେଙ୍କ୍‌ ଡଲିତି ? 18 ଇଦ୍‌ ପୟ୍‌ସ୍‌ ମାନ୍ଦାନାଦ୍‌, ବେସୁଙ୍କ୍‌ ତାନାଗାଙ୍କ୍‌ କାଇ ପେସ୍ପି ଅୟ୍‌ୱାଦ୍‌ ନିୟାଦ୍‌ ସାୟେ; ବାତେଙ୍କ୍‌ଇତ୍କେ ବେନ‌ ପରମେଶ୍ୱର୍‌ତିଙ୍କ୍‌ ୱେର୍‌ଦ୍‌ତଣ୍ଡ୍‌, ଅଣ୍ଡ୍‌ ଇ ସାରେକଞ୍ଚ୍‌ ଜିଡ଼ିତଣ୍ଡ୍‌ । 19 ଜ୍ଞାନିନାରୁନ୍‌ ପର ନାର୍‌ଦେ ଦଶଜାନ୍‌ ଶାସନମାଡ଼ାନଡ଼୍‌ ବାଦୁଲ୍‌ତେ ଜ୍ଞାନ ଅଦିକ୍‌ ଶକ୍ତି ଲେକାମ୍‌ ଆଦ୍‌ତେ । 20 ପାପ୍‌ ମାଡ଼କଟ୍‌ ସତ୍‌ପାଡ଼ିୟ୍‌ ମାଡ଼୍‌ତେନଣ୍ଡ୍‌, ଇଲା ୱେରଣ୍ଡ୍‌ ବା ଦାର୍ମିକ୍‌ ନାରୁଣ୍ଡ୍‌ ନିଜାମ୍‌ ପୃତିବିତାଗେ ଇଲେଣ୍ଡ୍‌ । 21 ମେଣ୍ଡେ ବେସୁଙ୍କ୍‌ ଗଟ୍‌ କେତାନଙ୍କ୍‌ ଆଦ୍‌ତେ, ଆ ସାରେତାୱିନାଗେ ମନ୍‌ ଇମା; ଉମ୍ଭକି ନି ଦାସ ନିକିଙ୍କ୍‌ ଅବିଶାପ୍‌ ଇଦାନାଦ୍‌ ନିମେ କେଞ୍ଜିତିନ୍‌; 22 ବାତେଙ୍କ୍‌ଇତ୍କେ ନିୟାଦ୍‌ ମନ୍‌ ପୁନ୍ତେ ଜେ, ନିମେ ଆନ୍ତେ ୱେର୍‌ତଡ଼୍‌କିଙ୍କ୍‌ ଆଲେକେ ନାର୍ଗେଦାମ୍‌ ଅବିଶାପ୍‌ ଇସ୍‌ ମିନ୍ଦେନି । 23 ନାନେ ଜ୍ଞାନତଡ଼୍‌ ଇୱ୍‌ସାରେ ପରିକ୍ଷା ମାଡ଼ିମିନ୍ଦେନ୍‌; ନାନେ କେତ୍‌ତାନ୍‌, ନାନେ ଜ୍ଞାନି ଆଦ୍‌ତାନ୍‌; ମାତର୍‌ ଆଦ୍‌ ନାୟାଗାକଞ୍ଚ୍‌ ଦୁରାମ୍‌ ମାତ୍‍ତେ । 24 ବାତେମିନ୍ଦେ, ଆଦ୍‌ ଦୁରାମ୍‌ ମିନ୍ଦେ ନୁ ନାର୍ଗେ କୁୟ୍‌ଙ୍ଗ୍‌ମିନ୍ଦେ; ଆଦ୍‌ ବେନ ଦର୍ସ୍କେ ପାର୍ଦ୍‌ତଣ୍ଡ୍‌ ? 25 ଜ୍ଞାନ ନୁ ସାରେ ବିଷୟ୍‌ତେ ପୁନ୍ଦାନଙ୍କ୍‌, ମେଣ୍ଡେ ଦୁଷ୍ଟ ଜେ ବାକ୍‌ୱା ଲେକ୍‌ତାଦ୍‌ ନୁ ମୁର୍କ ଜେ ବାୟାନ୍‌ ଲେକ୍‌ତାଦ୍‌, ଇଦ୍‌ ପୁନ୍ଦାନଙ୍କ୍‌ ନାନେ ମାଲ୍‌ତାନ୍‌ ନୁ ନାୟାଦ୍‌ ମନ୍‌ ଆଦ୍‌ ମେଃକାନଙ୍କ୍‌ ନୁ ପେର୍କେ ତାକାନଙ୍କ୍‌ ନଷ୍ଟ ଆତ୍‌ତେ । 26 ମେଣ୍ଡେ, ନାନେ ଉଡ଼ୁତାନ୍‌ ଯେ, ବେନ୍‌ ମୁତେନ୍‌ ମନ୍‌ ଉଡ଼ୁୟି ନୁ ୱାଲେତ୍‌ ଲେକାମ୍‌ ନୁ କାଇ ତହଃତେ ଲେକାମ୍‌, ଆଦ୍‌ ଡଲାନ୍‌ ବାଦୁଲ୍‌ତେ ଅଦିକ୍ ଦୁଃକ ଆଦ୍‌ତେ; ବେନବା ପରମେଶ୍ୱର୍‌ତିଙ୍କ୍‌ ୱେଡ଼୍‌କେ ମାଡ଼ିତେ, ଆଦ୍‌ ଅନାଗାଙ୍କ୍‌ ଗେଲ୍‌ସିତ୍‌; ମାତର୍‌ ବେନ ପାପି ତାନ୍‌ତଡ଼୍‌ ଦରାପଡ଼େମ୍‌ ଆଦ୍‌ତଣ୍ଡ୍‌ । 27 ମେସ୍ତେରି କେତୁତଣ୍ଡ୍‌, ଉଡ଼ା, ନାନେ ଶିକ୍ଷା ବିଷୟ୍‌ ପୁନ୍ଦାନ୍‌ ମାଇଦିଙ୍କ୍‌ ଅଣ୍ଡୟ ବିଷୟ୍‌ତିଙ୍କ୍‌ ୱେରେ ୱାଟି ମେଣ୍ଡେ ଆଦ୍‌ଦେ ବିଷୟ୍‌ତିଙ୍କ୍‌ ଦର୍ସ୍କ୍‌ତାନ୍‌; 28 ନାୟାଦ୍‌ ଜିଉନ୍‌ ଇଞ୍ଜେକ୍‌ ଆୟ୍‌ନା ମେଃକୁତ୍‌, ମାତର୍‌ ନାନେ ଆଦ୍‌ ପାହେମ୍‌ ଆୟନ୍‌; ହଜାର୍‌ତେ ଲପେ ନାନେ ଅର୍ତୁଣ୍ଡ୍‌ ମାନେୟ୍‌ତିଙ୍କ୍‌ ଦର୍ସ୍କି ମିନ୍ଦେନ୍‌; ମାତର୍‌ ଅଣ୍ଡ୍‌ ସାରେତଡ଼୍‌ ଲପେ ନାନେ ୱେରଡ୍‌ ମୁତେଙ୍କ୍‌ବା ଦର୍ସ୍କନ୍‌ । 29 ଉଡ଼ା, ନାନେ ଇସରେ ମାତର୍‌ ଦର୍ସ୍କି ମିନ୍ଦେନ୍‌ ଜେ, ପରମେଶ୍ୱର୍‌ ନାରୁଙ୍କ୍‌ ସହଜ୍‌ତେ ତିଆର୍‌ ମାଡ଼୍‌ତଣ୍ଡ୍‌; ମାତର୍‌ ଅଡ଼୍‌ ନାର୍ଗେ ତିଆର୍‌ ଆତ୍‌ତାଦିଙ୍କ୍‌ ମେଃକିମିନ୍ଦେଡ଼୍‌।