1 Ana Yawe okna Moses di te, yegl dugwa, Na ege swara ta ama Isip king ya Isip yoba mudu yubun podo tenaglka. Na yubun swara i tebo, king ene ede enaiglkwa mane dikrabuka. Ye ene mudu tabre ede enaiglmedi si pi meda edenabuka. 2 Ana erme ene Israel yoba di ten, Israel yagl abu ede pi Isip yoba tau magigl kipai meglmara pidre, taragl gol ya silva pre diga ikra, ye noraiglmedi di praiglmiwe di, Yawe yegl dugwa. 3 Yawe yegl dugo, ye ama Isip yoba ye Israel yoba wakai kanaiglmedi ere edugwa. Te, Moses ama king yobamo kade ya Isip yoba mudu ye yagl kade moglmedi kanigwa.

4 Ana Yawe okna Moses yegl di togwa pre ye erme Isip king yegl di togwa, King yo, Yawe ene yegl di togwa, Na we, na eduer suna ede Isip suna udre, u ikne ikne pi, 5 Isip yoba wano komono mudu si goraglka. Ene king sia king mina ame di motnga i, wan komono goran, yoba mudu wano komono geglbi, ede pi nigl kogon abu, ye plau si deduagle ere meglkwa i, ye wano komono ama goraiglkwa. Te, agl bugla gagro komono kiglkwa i, ama goraiglkwa. 6 Yoba wano komono geglbi, dumo Isip suna i, yoba kai podo eraiglkwa. Ye okna kai podo erekrimere ya te okuo ama kai podo erekraiglmere yegl eraiglkwa. 7 Yegl eraiglkwa ba Israel yoba meglmara i, taragl swara ta ye ere kide ere tekraiglkwa. Yegl plau dinan, ene pratnga i, Yawe ye Israel yoba ya Isip yoba i pere edidre, Israel yoba ere wakai ere tedre, Isip yoba ere kide ere tedre, yegl erumedi pratniwe di, Yawe ene yegl di togwa. 8 Ye dumere yegl plau dinan, ene yobanen kade magigl meglkwa i, mudu na moglmara u yegl dinaiglkwa, Moses yo, ene ya Israel yoba mudu ene sugl motnga i, ene ede pio! dinaiglkwa. Ye yegl dibi, na ede enaluwe di, Moses yegl dugwa. Ye yegl didre, dem kubrisre, king moglmara kide kodidre, ede ogwa.