1 Ana Yawe ere mogl, Moses yegl di togwa, Erme we, na taragl tau Isip king ere tenaglka i, ene kanatniwa. Na yobuglo ersre, ye yubun tebo, ye ene Israel yoba ede enaiglmedi pra we dinabuka. Te, na yegl eribo, ye ene tabre ede enaiglmedi si pi meda edenabiwe di, Yawe yegl dugwa.

2 Ana God ere mogl, ka ta ama Moses di te, yegl dugwa, Na Yawe moluwa. 3 Na okna Abraham ya Aisak ya Jekop meglmara u plau digo, ye na God Yobuglo Podo Paugwa we digwa. Yegl we digwa ba na kagna Yawe i, ye obuno di tekrika. 4 Na ye meglmara u plau didre, na ama dumo Kenan ye tenagledi ka kaima di te padiglka. Ye dumo Kenan suna kipai meglkwa ba i, yoba pere makano yomiwe dugwa. 5 Ana erme we, Isip yoba ye Israel yoba si kane sigo, Israel yoba gign akin didre, na agle digwa i, na prisre, ka kaima di te padiglka ikra pre moglka. 6 Yegl pre na ka ta erme dinarika i, ene i pi, Israel yoba di to dugwa. Na Yawe moglka. Na ene ere ibo, Isip yoba ene yubun teigwa i ene ye meglmara kide kodidre, ene kane paigwa ama kide kodidre, ede enaiglkwa. Na yobuglo podo ersre, Isip yoba yubun podo tedre, ene ikne edenaglka. 7 Na ene ikne edidre, ene na yobanama moraiglmedi eraglka. Eribo, nana ene Godno moraglka. Te, na yegl eribo, ene yegl praiglkwa, Yawe we, ye no Godno moglsre, Isip yoba no yubun norikwa i kide kodinaiglmedi no i meda edume di praiglkwa. 8 Na ene agre i ede pi dumo pere ta ene dumono yenabedi edenaglka. Na dumo ta okna Abraham ya Aisak ya Jekop ka giglede di te, dumo makan i ene tenaluwe diga ikra pre diwa. Na Yawe yegl dumiwe di, ene Israel yoba yegl di to dugwa.