1 Ana God ere mogl, ka yegl dugwa, 2 Na Yawe, ene Godno moglka. Ene dumo Isip kane paimara kide kodinaiglmedi agre i ede wiga.

3 Ene god pere kamage ere tekre, na swara kamage ere nario!

4 Ene taragl swara ta kamage ere tenamnedi kwiano bekekrio! Taragl swara ta heven ibo moglkwa mo makandigle moglkwa mo nigl atne moglkwa i kwiamo bekekraiglkwa pre diga! 5 Na Yawe ene Godno moglka. Ene goglkono bodugl, bitno magide taragl ta tekre, taragl i kagno kade ere tekrio! I siragl pre yoba god pere kamage ere tedre, kagno kade teigwa i, na ye dena kubro teiga. Te, yoba na deno kubro narikwa i we, ye tadaglmeno pai moglko, na ye gawama okuo yugobuno namba 3 ya 4 meglkwa i ama yubun teiga. 6 Ba yoba tausan siramna ta na deno muduno narsre, ka giglede di teiga duglo beglkwa i, na ye ama dena muduna tedre, ye mitno gogl, ere wakai ere teiga.

7 Ana na Yawe ene Godno moglka i, na kagna gua gua daglkrio! Yoba na kagna gua gua daiglbi, na ye kanige erekre, ere kide ere tenaglka.

8 Te, ene wakan kade moraiglkwa igne i pre moglsre, na egena yomedi i pere edio! 9 Ene wakan swara swarade ege 6-pela de kogono kane kane eraiglkwa 10 ba ege namba 7 we, ene ege i na egena yomedi wakan kade moglsre, kogon ta erekraiglmiwa. Ene ya ene wanoma abroma ya ene nigl kogono yagl abu pre diga. Te, ene aglno buglano ya dumo pere nem mam tau ene bogl akie kipanaiglkwa i ama kogon erekraiglkwa pre diga. 11 Na Yawe moglka i, na ege 6-pela de mina kamun mitna ibo ya dumo makan ya mudi nigl ere yedre, taragl mudu kamun mina ibo ya makandigle ya mudi nigl wagle meglkwa ya paigwa i ere yei kodiga. Na ere yei kodidre, ege namba 7 mina wakan moglka pre na ege namba 7 i pere ede, Ege kade ta yenabiwe diga. Yegl pre ene ege namba 7 wakan moraiglkwa.

12 Te, ene neno mano moraiglmara mogl atne edidre, kano prio! Ene yegl eribi, tabre goglkre, na dumo makan ta tenaglmara i ege oglto moraiglmiwa.

13 Ana ene yoba si goglkrio!

14 Te, yagl abu, ene yagl abu ta bogl kunogl nekrio!

15 Te, ene yoba pere taraglno ta kunogl nekrio!

16 Te, ene ka kibi di, yoba ta kot ere tenamnedi erekrio!

17 Te, ene yoba pere yugumo mo ebie mo niglmo kogonmo yagl mo abu bubuno goglkre, kau mo donki kuglkwa mo ye taraglmo swara ta bubuno goglkrio! di, God yegl dugwa.