1 Ana Yawe ye Israel yoba di togo, ye dumere dumo wau yomara Sen ikra kide kodidre, bage bage pai ede pi dumo ta Refidim we dimara sel yugu kipaigwa. Sel yugu kipaigwa ba ye nigl nenaiglkwa ta moglkrukwa. 2 Nigl moglkruko, yoba Moses ka te, Nigl nenamga ta noro! digwa. Yegl digo, Moses di ikne ede, yegl dugwa, Ene siragl pre na ka narime? Ene siragl pre Yawe eran, kanamnedi ere meglme? di, yegl dugwa. 3 Yegl dugwa ba ye nigl goglsre, Moses kide pre tedre, ka kane kane digwa. Ye ka kane kane didre, Moses yegl di prikwa, Siragl eruko, ene no dumo Isip munara no agre i ede meda une? No gagroma bogl ya aglno buglano bogl nigl goglsre, goraiglmedi prisre, agre i ede uno? di, yegl digwa. 4 Yegl digo, Moses ye Yawe agle di prisre, yegl dugwa, Na yoba i siragl ere tenagle? Ye kuri ta mogl, kobuglo mina na na si goraiglkwa pamiwe dugwa. 5 Yegl dugo, Yawe di ikne ede, Moses yegl di togwa, Ene muglbonen okna nigl Nail singa ikra idre, Israel yagl kade tau ama idre, yoba gumanomugl ede okna pio! 6 Te, na we, na ede okna pi muglo meglbi Horep we dimara pidre, kobuglo ta pamara bolamugl adigl moraglka. Ene kobuglo i muglbonen wagle sin, nigl ede meda unabuka. Nigl unan, yoba nenaiglmiwe di, yegl dugwa. Yawe yegl dugo, Moses ye dumere erukwa. Eruko, nigl ede meda ugo, Israel yagl kade ikra kan meglkwa.