1 ମୀରୁ ଏ଼ୟୁ ଲାକ ନୀ କା଼ଦି ମେତ୍‌ଦୁ, ଇଚିହିଁ ହା଼ରେକା ଦିନା ଡା଼ୟୁ ଏ଼ଦାଆଁ ବେଟାଆ଼ଦି। 2 ସା଼ତା ଜା଼ଣା, କି ଆ଼ଟା ଜା଼ଣାକି ବା଼ଗା ହୀମୁ; ଇଚିହିଁ ଦାର୍‌ତିତା ଏ଼ନାୟି ଗଟୱି ଆ଼ନେ, ଏ଼ଦାଆଁ ନୀନୁ ପୁନଅତି।

3 ହା଼ଗୁ ପିୟୁତଲେ ନେଞ୍ଜିସାରେ ଦାର୍‌ତିତା ଏ଼ଦାଣି ୱା଼କ୍‌ହା ତୁହ୍‌ନେ; ଇଞ୍ଜାଁ, ମା଼ର୍‌ନୁ ଟିଃନି କି ଟେ଼ବ୍ରିୱାକି ରିନେ, ଇଞ୍ଜାଁ ଏମିନି ଟା଼ୟୁତା ରିନେ, ଏ଼ ଟା଼ୟୁତା ଡ଼ୟିନେ। 4 ଆମ୍ବାଆସି ଗା଼ଲିତି ସିନିକିନେସି, ଏ଼ୱାସି ମାଟଅସି ଅ଼ଡ଼େ ଆମ୍ବାଆସି ହା଼ଗୁତି ସିନିକିନେସି, ଏ଼ୱାସି ଦା଼ଅସି। 5 ମୀରୁ ଏ଼ନିକିଁ ଗା଼ଲି ହାନାଣି, ଅ଼ଡ଼େ ପୂରାମା଼ସା ଆ଼ହାମାନାଣି ବାଣ୍ତି ବିତ୍ରା ପାଡା ଆ଼ହିମାନି ପାର୍‌ଣା ଏ଼ନିକିଁ ପାଡାଆ଼ନେ, ଏ଼ଦାଣି ପୁନଅତେରି, ଏଲେକିହିଁ ବାରେ କିନି ମାହାପୂରୁ କାମା ଜିକେଏ ପୁନଅତେରି। 6 ମୀରୁ ଲା଼ଇ ବିଚା ମାଟାଦୁ ଅ଼ଡ଼େ ମିଡ଼୍‌ଅଲା ଜିକେଏ ମୀ କେୟୁ ସାପି କିଆଦୁ; ଇଚିହିଁ ନୀନୁ ପୁଞ୍ଜାହିଲଅତି, କି ଆମ୍ବାଆସି ଜୀଣା ଆ଼ନେସି, ଈୱାସି କି ଏ଼ୱାସି କି ଏ଼ ରିଆରି ଜିକେଏ ସମାନା ନେହିଁ ଆ଼ନେରି, ଏ଼ଦାଆଁ ମୀରୁ ପୁନଅତେରି।

7 ସାତେଏ ଉଜେଡ଼ି ସୁକୁ ହୀନାୟି, ଇଞ୍ଜାଁ ୱେ଼ଡ଼ାତି ମେହ୍‌ନାୟି କାନୁତାକି ନେହେଁ। 8 ହାଅ, ମାଣ୍‌ସି ହା଼ରେକା ବାର୍ସା ନୀଡିନେସି, ଆତିହିଁ ଏ଼ ବାରେତାକି ଏ଼ୱାସି ରା଼ହାଁ କିପାସି; ସାମା ଲାଗେଏତି ଦିନା ବାରେ ଏ଼ୱାସି ମ଼ନତା ଇଟାପେସି, ଇଚିହିଁ ଏ଼ ଦିନା ବାରେ ହା଼ରେକା ଆ଼ନେ। ଏ଼ନା ଏ଼ନାୟି ଗଟୱି ଆ଼ନେ, ବାରେ ଉଜେଏତାୟି।

9 ହେ଼ ଦାଂଗ୍‌ଣାୟାଁ, ମୀରୁ ମୀ ଦାଂଗ୍‌ଣା ବେ଼ଲାତା ରା଼ହାଁ କିଦୁ ଅ଼ଡ଼େ ଦାଂଗ୍‌ଣା ବେ଼ଲାତା ମୀ ହିୟାଁ ମିଙ୍ଗେ ରା଼ହାଁ କିୟାପେ, ଇଞ୍ଜାଁ ମୀ ମ଼ନତି ଜିରୁତି, ଅ଼ଡ଼େ ମୀ କାନୁ ମେସିମାନି ଲେହେଁ ତା଼କାଦୁ; ସାମା ମାହାପୂରୁ ଈ ବାରେ କାତା ଆସାହାଁ ବିଚାରାଣା କିୟାନେସି, ଈ କାତା ମୀରୁ ପୁଞ୍ଜୁ। 10 ଏ଼ଦାଆଁତାକି ମୀ ହିୟାଁଟି କାର୍‌ବି ହେକ କିଦୁ; ଅ଼ଡ଼େ ମୀ ଆଙ୍ଗାଟି ଦୁକୁ ହେକ କିଦୁ; ଇଚିହିଁ ଦାଂଗ୍‌ଣା ଜୀୱୁତା ଲେ଼ମ୍ବିନାୟି ଉଜେଏତାୟି।