1 ନା଼ନୁ ନା଼ ମ଼ନତା ଅଣ୍‌ପାହାଁ ଏଲେଇଚେଏଁ, "ୱା଼ଦୁ, ନା଼ନୁ ମିଙ୍ଗେ ରା଼ହାଁ ତଲେ ତାୟିପାରି କିୟାଇଁ; ଏ଼ଦାଆଁତାକି ରା଼ହାଁ କିଦୁ; ଇଞ୍ଜାଁ ମେହ୍‌ଦୁ ଏ଼ଦି ଜିକେଏ ଉଜେଏତାୟି।" 2 ନା଼ନୁ କାକ୍‌ନି କାତା ଏଲେଇଚେଏଁ, "ଏ଼ଦି ସେତ୍‌ନା ହିଲାଆଗାଟାୟି*2:2 ସେତ୍‌ନା ହିଲାଆଗାଟାୟି/ପୁଞ୍ଜି ପୁଞ୍ଜି କିଆଗାଟାଣି କିନାୟି ଅ଼ଡ଼େ କିନାଣି କିଆଗାଟାୟି," ଅ଼ଡ଼େ ରା଼ହାଁତି କାତା ଏଲେଇଚେଏଁ, "ଏ଼ଦି ଏ଼ନି ଲା଼ବା ?" 3 ନା଼ନୁ ଏ଼ନିକିଁ କା଼ଡ଼ୁ ଗହ୍‌ନି ତା଼ଣା ନା଼ ଆଙ୍ଗାତି ରା଼ହାଁ କିଇଁ ଅ଼ଡ଼େ ହା଼ଗୁ ଡ଼଼ଇ ମାଣ୍‌ସି ନୀଡାମାନି ପାତେକା ଏ଼ନାଆଁ କିନାୟି ନେହେଁ, ଈ ବାରେ ତେଲ୍‌ହିନି ପାତେକା ଏ଼ନିକିଁ ବୁଦି ହିଲାଆଗାଟାଣି ଆସାହାଁ ଡ଼ୟିଇଁ, ଈଦାଆଁ ମ଼ନ ମ଼ନତା ଅଣ୍‌ପିତେଏଁ, ଈ ବେ଼ଲାତା ଜିକେଏ ନା଼ ମ଼ନ ନାଙ୍ଗେ ବୁଦିତି ଜିରୁ ତ଼ସିମାଞ୍ଜାତେ।

4 ନା଼ନୁ ନାଙ୍ଗେ ତାକି ହା଼ରେକା କାଜା କାଜା କାମା କିତେଏଁ; ନା଼ନୁ ନାଙ୍ଗେ ତାକି ଇଲ୍‌କା ତିୟାରା କିତେଏଁ; ଅ଼ଡ଼େ ନାଙ୍ଗେ ତାକି ଅଙ୍ଗୁରି ବା଼ଡ଼ା ଉହିତେଏଁ; 5 ନା଼ନୁ ନାଙ୍ଗେ ତାକି ଟ଼ଟା ବା଼ଡ଼ା ଅ଼ଡ଼େ ଟ଼ଟାୟାଁ ଡାଙ୍ଗୁ ତିୟାରା କିହାଁ ଏମ୍ବାଆଁ ବାରେ କୂଡ଼ାତି ପା଼ଡ଼େୟି ମା଼ର୍‌କା ଉହିତେଏଁ; 6 ନା଼ନୁ ମା଼ର୍‌କା ପା଼ଲା କିତେଏଁ ଅ଼ଡ଼େ ଜା଼ଡ଼ାତା ଏ଼ୟୁ ଡ଼ାଞ୍ଜାଲି ବାନ୍ଦାୟାଁ କା଼ର୍‌ୱି କିତେଏଁ; 7 ନା଼ ଇଜ ଜାର୍ନା ଆ଼ତି ହ଼ଲିୟାଙ୍ଗା ମାଚେରି ଅ଼ଡ଼େ ନା଼ନୁ ହ଼ଲିୟାଙ୍ଗା ହ଼ଲେଣିସିକାଣି କଡିତେଏଁ; ନା଼ ନ଼କେଏ ଜିରୁସାଲମତି ବାରେ କିହାଁ ନା଼ କ଼ଡି ଗରି ହା଼ରେକା ମାଚୁ; 8 ନା଼ନୁ ବାଂଗାରା ୱେଣ୍ତି, ଇଞ୍ଜାଁ ହା଼ରେକା ରାଜାୟାଁତି ଅ଼ଡ଼େ ହା଼ରେକା ରା଼ଜିଟି ଦାରାଗାଟି ଦ଼ନ କୂଡ଼ି କିତେଏଁ; ନା଼ନୁ ପା଼ଚିନାରାଇଁ ଅ଼ଡ଼େ ପା଼ଚିନାସିକାଣି, ଅ଼ଡ଼େ ମାଣ୍‌ସି ମୀର୍‌କାଣି ରା଼ହାଁକିନି ମୁହେଁ ଡକ୍ରିସିକାଣି ଇଟିତେଏଁ।

9 ଇଲେକିହିଁ ନା଼ ନ଼କେଏ ଜିରୁସାଲମତା ଆମ୍ବାଆରି ମାଚେରି ଏ଼ ବାରେତି କିହାଁ କାଜାତେଏଁ ଅ଼ଡ଼େ ବାତ୍‌କୁଗାଟାତେଏଁ ଆ଼ତେଏଁ; ଆ଼ତିଜିକେଏ ନା଼ ବୁଦି ନା଼ ତା଼ଣା ଡ଼ୟିତେ। 10 ଇଞ୍ଜାଁ ନା଼ କାନୁ ଏ଼ନାଆଁ ମେସାହାଁ ଏ଼ନାଆଁ କିତେ, ଏ଼ଦାଆଁ ନା଼ନୁ ଆ଼ଙ୍ଗାଆତେଏଁ; ନା଼ନୁ ନା଼ ହିୟାଁତି ଏ଼ନି ସୁକୁଟି ଆ଼ଙ୍ଗାଆତେଏଁ, ଇଚିହିଁ ନା଼ ବାରେ କସ୍ତ ତାକି ନା଼ ହିୟାଁ ରା଼ହାଁ କିତେ; ଇଞ୍ଜାଁ ନା଼ ବାରେ କସ୍ତଟି ଏ଼ଦି ନା଼ ବା଼ଗା ମାଚେ। 11 ଏଚେଟିଏ ନା଼ କେୟୁ ଏମିନି ବାରେ କାମା କିହାମାଚେ ଅ଼ଡ଼େ ଏମି ଏମିନି କାମାଟି ନା଼ନୁ ୱା଼ହାମାଚେଏଁ, ଏ଼ଦାଣି ସିନିକିତେଏଁ; ଅ଼ଡ଼େ ମେହ୍‌ଦୁ, ବାରେ ଉଜେଏତାୟି ଅ଼ଡ଼େ ଗା଼ଲି ଜେ଼ଚ ହାନାୟି, ଇଞ୍ଜାଁ ୱେ଼ଡ଼ାତି ଡ଼଼ଇକା ଏ଼ନି ଲା଼ବା ହିଲେଏ।

12 ଏଚେଟିଏ ନା଼ନୁ, ବୁଦି, ସେତ୍‌ନା ହିଲାଆଗାଟାଣି*2:12 ସେତ୍‌ନା ହିଲାଆଗାଟାଣି/ପୁଞ୍ଜି ପୁଞ୍ଜି କିଆଗାଟାଣି କିନାୟି ଅ଼ଡ଼େ କିନାଣି କିଆଗାଟାୟି ଅ଼ଡ଼େ ବୁଦି ହିଲାଆ କାତା ସିନିକିହାଲି ଅଣ୍‌ପିତେଏଁ; ଇଚିହିଁ ଏମିନି ମାଣ୍‌ସି ରାଜା ଡା଼ୟୁ ୱା଼ନେସି, ଏ଼ୱାସି ଏ଼ନାଆଁ କିନେସି ? ରାଜା ଏ଼ନାଆଁ କିହାମାନେସି ଏ଼ଦାଆଁ କିନେସି। 13 ଏଚେଟିଏ ନା଼ନୁ ମେସ୍ତେଏଁ, ଏ଼ନିକିଁ ଆନ୍ଦେରି କିହାଁ ଉଜେଡ଼ି ନେହେଁ, ଏଲେକିହିଁଏ ବୁଦି ହିଲାଆଗାଟାଣି କିହାଁ ବୁଦି ନେହେଁ। 14 ବୁଦିଗାଟାସି ଏ଼ନାଆଁ କିହିମାନେସି ଏ଼ଦାଆଁ ପୁନେସି, ଇଞ୍ଜାଁ ବୁଦି ହିଲାଆଗାଟାସି ଆନ୍ଦେରିତା ତା଼କିନେସି, ଆ଼ତିଜିକେଏ ବାରେତାକି ରଣ୍ତିଏ ସମାନା ଗଟୱି ଆ଼ନେ, ଈ କାତା ନା଼ନୁ ମେସ୍ତେଏଁ। 15 ଏଚେଟିଏ ନା଼ନୁ ନା଼ ମ଼ନତା ଏଲେଇଚେଏଁ, "ବୁଦି ହିଲାଆ ଗାଟାଣାକି ଏ଼ନିକିଁ ଆ଼ନେ, ନାଙ୍ଗେ ଜିକେଏ ଏଲେକିଁ ଆୟାନେ; ଆତିହିଁ ନା଼ନୁ ଏ଼ନାଆଁତାକି ହା଼ରେକା ବୁଦିଗାଟାତେଏଁ ଆ଼ତେଏଁ ?" ଏ଼ଦାଆଁତାକି ନା଼ନୁ ଏଲେଇଚେଏଁ, ଈଦି ଜିକେଏ ଉଜେଏତାୟି। 16 ଇଚିହିଁ ଏ଼ନିକିଁ ବୁଦି ହିଲାଆଗାଟାଣାକି, ଏଲେକିହିଁଏ ବୁଦିଗାଟାଣି ଅଣ୍‌ପୁ କା଼ଲେଏ ଡ଼ୟେଏ; ଇଚିହିଁ ଡା଼ୟୁ ବାରେଜା଼ଣା ବା଼ଣାଆ଼ହା ଡ଼ୟିନେରି। ବୁଦି ହିଲାଆଗାଟାସି ଏ଼ନିକିଁ ହା଼ନେସି, ବୁଦିଗାଟାସି ଜିକେଏ ଏଲେକିଁ ହା଼ନେସି। 17 ଏ଼ଦାଆଁତାକି ନା଼ନୁ ନା଼ ଜୀୱୁତି ଅ଼ପାଆତେଏଁ; ଇଚିହିଁ ୱେ଼ଡ଼ାତି ଡ଼଼ଇ କିହାମାନି କାମା ନା଼ ତାକି କସ୍ତଗାଟାୟି ଆ଼ତେ; ଇଚିହିଁ ବାରେ ଉଜେଏତାୟି ଅ଼ଡ଼େ ଗା଼ଲିତି ଜେ଼ଚ ହାନାୟି।

18 ଇଞ୍ଜାଁ ନା଼ନୁ ୱେ଼ଡ଼ା ଡ଼଼ଇକା ଏମିନି କସ୍ତତଲେ ୱା଼ହୁ ୱା଼ହାମାଚେଏଁ, ଏ଼ ବାରେ କସ୍ତ ଅ଼ପାଆତେଏଁ; ଇଚିହିଁ ଏ଼ ବାରେ ଡା଼ୟୁତି ଲ଼କୁକି ପିସା ହାଜାଲି ଆ଼ନେ ଆମ୍ବାଆସି ନା଼ ଡା଼ୟୁ ୱା଼ନେସି। 19 ଈ କାତା ଆମ୍ବାଆସି ପୁଞ୍ଜାମାନେସି କି ଏ଼ ମାଣ୍‌ସି ବୁଦିଗାଟାସି କି ବୁଦି ହିଲାଆଗାଟାସି ? ଆ଼ତିଜିକେଏ ୱେ଼ଡ଼ା ଡ଼଼ଇ ନା଼ନୁ ଏଚେକା କସ୍ତ କିତେଏଁ, ଅ଼ଡ଼େ ଏ଼ୱାଣି କ଼ସମି ବୁଦିତି ଲେ଼ମ୍ବିତେଏଁ ଏ଼ ବାରେତି ଅଦିକାରା ଏ଼ୱାସି ଆ଼ନେସି; ଏ଼ ବାରେ ଉଜେଏତାୟି। 20 ଏ଼ଦାଆଁତାକି ନା଼ନୁ ୱେ଼ଡ଼ା ଡ଼଼ଇ ଏଚେକା କସ୍ତତଲେ ୱା଼ହୁ ୱା଼ହିତେଏଁ, ଏ଼ ବାରେ କାତା ତାକି ନା଼ନୁ ନା଼ ହିୟାଁତି ନୀରାସା ଆ଼ହାଲି ମା଼ଟ୍‌ହେଏଁ। 21 ଇଚିହିଁ ର଼ ମାଣ୍‌ସି ବୁଦି ଅ଼ଡ଼େ ଜା଼ପିତାଣି ତଲେ କସ୍ତ କିନେସି; ଆ଼ତିଜିକେଏ ଏମିନି ମାଣ୍‌ସି କସ୍ତ କିହାହିଲଅସି, ଏ଼ୱାଣି ଅଦିକାରା ତାକି ଏ଼ୱାସି ଏ଼ଦାଣି ପିସାହାନେସି। ଈଦିଏ ଉଜେଏତାୟି ଅ଼ଡ଼େ ହା଼ରେକା ଲାଗେଏତାୟି। 22 ଆତିହିଁ ୱେ଼ଡ଼ାତି ଡ଼଼ଇ ମାଣ୍‌ସି ଏମି ଏମିନି କସ୍ତ ଅ଼ଡ଼େ ହିୟାଁତି ଅଣ୍‌ପୁତା ୱା଼ହୁ ୱା଼ହିନେସି, ଏ଼ ବାରେ ତା଼ଣା ଏ଼ୱାସି ଏ଼ନାଆଁ ବେଟାଆ଼ନେସି ? 23 ଇଚିହିଁ ଏ଼ୱାଣି ଦିନା ବାରେ ଦୁକୁ ଅ଼ଡ଼େ ତାନି କାମା କସ୍ତଗାଟାୟି ଆ଼ହାମାନେ; ଲା଼ଆଁୟାଁ ଜିକେଏ ଏ଼ୱାଣି ହିୟାଁ ଜ଼ମେଏ। ଈଦି ଜିକେଏ ଉଜେଏତାୟି।

24 ମାଣ୍‌ସି ତାକି ତିନାୟି ଉନାୟି ଅ଼ଡ଼େ କସ୍ତ କିହିହିଁ ତାନି ଜୀୱୁତି ସୁକୁ ହୀନାଣି ପିସ୍‌ପେ ଅ଼ଡ଼େ ଏ଼ନାୟି ନେହିଁ କାତା ହିଲେଏ। ନା଼ନୁ ମେସ୍ତେଏଁ, ଈ ବାରେ ଜିକେଏ ମାହାପୂରୁ ତା଼ଣାଟି ଆ଼ହିମାନେ। 25 ଇଚିହିଁ ନା଼ ପିସ୍‌ପେ ଆମ୍ବାଆସି ତିଞ୍ଜାଲି ଉଣ୍ତାଲି ଆ଼ଡିନେସି ଅ଼ଡ଼େ ସୁକୁ ବେଟାଆ଼ହାଲି ଆ଼ଡିନେସି ? 26 ଆମିନି ମାଣ୍‌ସି ମାହାପୂରୁଇଁ ରା଼ହାଁ କିନେସି, ଏ଼ୱାସି ଏ଼ୱାଣାକି ବୁଦି, ତେଲ୍‌ହିନାଣି ଅ଼ଡ଼େ ରା଼ହାଁ ହୀନେସି; ସାମା ପା଼ପୁ ଗାଟାଣାକି ଏ଼ୱାସି ଦୁକୁତି କାମା ହୀନେସି କି ଏ଼ୱାସି ଏ଼ୱାଣାକି ହୀହାଲି ଅର୍ଜିକିହାଁ କୂଡ଼ି କିନେସି, ଏମିନାୟି ମାହାପୂରୁ ନ଼କିତା ନେହାୟି। ଏ଼ଦି ଜିକେଏ ଉଜେଏତାୟି ଅ଼ଡ଼େ ଗା଼ଲି ଜେ଼ଚ ହାନାୟି।