1 ଗାଡି ଦାରାଗାଟି ନିୟୁଁ କିହାଁ ନେହିଁ ଦ଼ରୁ ନେହେଁ ଅ଼ଡ଼େ ଜାର୍ନା ଦିନା କିହାଁ ହା଼ନି ଦିନା ନେହେଁ।

2 ବ଼ଜି ଇଜ ହାନି କିହାଁ ଦୁକୁ ଇଜ ହାନାୟି ନେହେଁ; ଇଚିହିଁ ଏ଼ଦି ବାରେ ମାଣ୍‌ସିତି ରା଼ନି ଜିରୁ ଅ଼ଡ଼େ ଜୀୱୁଗାଟି ଲ଼କୁ ଏମ୍ବାଆଁ ମ଼ନ ହୀନେରି।

3 କାକ୍‌ନି କିହାଁ ଦୁକୁ ନେହେଁ ଇଚିହିଁ ମୂମ୍ବୁ ୱା଼ଡ଼ି କିନାଣି ତଲେ ହିୟାଁ ପାର୍‌ସାଡ଼ା ଆ଼ନେ।

4 ବୁଦିଗାଟାରି ହିୟାଁ ଦୁକୁତି ଇଜ ଡ଼ୟିନେ, ସାମା ବୁଦି ହିଲାଆଗାଟାରି ହିୟାଁ ରା଼ହାଁ ଇଜ ଡ଼ୟିନେ।

5 ବୁଦି ହିଲାଆଗାଟାରି ପା଼ଚୁ ୱେନିକିହାଁ ବୁଦିଗାଟାରି ଲା଼ଗି ୱେନାୟି ନେହେଁ।

6 ଇଚିହିଁ ଡ:କା ଡ଼଼ଇ ହିଚୁତା ୱେହିମାନି ହା଼ପ୍‌କା ହା଼ଡା ଏ଼ନିକିଁ ପିର୍‌ଡ଼ି ପାର୍‌ଡ଼ା, ବୁଦି ହିଲାଆଗାଟାରି କାକ୍‌ନାୟି ଏ଼ନିକିହିଁ; ଈଦି ଆ଼ହିମାନେ ଉଜେଏତାୟି।

7 ସାତେଏ ଲାଗେଏତି ଦ଼ନ ଅ଼ନାୟି ବୁଦିଗାଟି ଲ଼କୁଇଁ ବୁଦି ହିଲାଆଗାଟାସି କିନେ ଅ଼ଡ଼େ ଲା଼ଞ୍ଚା ହିୟାଁତି ନା଼ସା କିନେ।

8 କାମା ମା଼ଟ୍‌ନି କିହାଁ କାମାତି ରା଼ପ୍‌ନାୟି ନେହେଁ; ଇଞ୍ଜାଁ, ଜୀୱୁତା ବଡପଣ ଆ଼ନି କିହାଁ ଜୀୱୁତା ସାପି ଆ଼ନାୟି ନେହେଁ।

9 କାର୍‌ବି ଆ଼ହାଲି ଜାହାରା ଜୀୱୁତା ପାର୍‌ସାଡ଼ା ଆ଼ଆଦୁ; ଇଚିହିଁ ବୁଦି ହିଲାଆ ଲ଼କୁ ହିୟାଁତା କାର୍‌ବି ବାସା କିନେ।

10 "ନୀଏଁତି କା଼ଲା କିହାଁ ପୁର୍ବେ କା଼ଲା ନେହିଁ ଡ଼ୟାମାନାୟି ଏ଼ନାୟି," ଈ କାତା ଏଲେଇନାଆଦୁ, ଇଚିହିଁ ନୀନୁ ଈ କାତା ବୁଦିତଲେ ୱେଞ୍ଜି ହିଲଅତି।

11 ବୁଦି ଆକୁୟାଁତି ଅଦିକାରା ଲେହେଁ ନେହେଁ; ସାମା ନୀଡାମାନି ଲ଼କୁ ତାକି ଏ଼ଦି ହା଼ରେକା ଲା଼ବା। 12 ଇଚିହିଁ ଦ଼ନ ଏ଼ନିକିଁ ଆ଼ସା ଅ଼ଡ଼େ ବା଼ର୍ସୁ ଲେହେଁ, ବୁଦି ଜିକେଏ ଏଲେକିଁ ଆ଼ସା ଅ଼ଡ଼େ ବା଼ର୍ସୁ ଲେହେଁ; ସାମା ବୁଦିତି କାଜାୟି ଈଦି, ବୁଦି ତଲେ ଏ଼ ଅଦିକାରା ଗାଟାଣା ଜୀୱୁ ଗେଲ୍‌ପିଆ଼ନେ।

13 ମାହାପୂରୁତି କାମା ଅଣ୍‌ପାଦୁ; ଇଚିହିଁ ଏ଼ୱାସି ଏ଼ନାଆଁ ଡ:କ୍‌ହା ମାନେସି, ଏ଼ଦାଆଁ ଆମ୍ବାଆସି ତିୟି କିହାଲି ଆ଼ଡିନେସି ? 14 ସୁକୁ ବେ଼ଲାତା ରା଼ହାଁ ଆ଼ଦୁ ଅ଼ଡ଼େ ଦୁକୁ ବେ଼ଲାତା ଅଣ୍‌ପାଦୁ; ମାଣ୍‌ସିକି ନ଼କିତା ଏ଼ନାଆଁ ଗଟୱି ଆ଼ନେ, ଏ଼ୱାସି ଏ଼ଦାଆଁ ଏ଼ନିକିଁ ପୁଞ୍ଜାଲି ଆ଼ଡଅସି, ଏ଼ଦାଆଁତାକି ମାହାପୂରୁ ସୁକୁ ଅ଼ଡ଼େ ଦୁକୁ ଡାଗେ ଡାଗେ ଇଟାମାନେସି।

15 ନା଼ନୁ ନା଼ ଉଜେଏତି ବେ଼ଲାତା ଈ ବାରେ ମେସାମାଇଁ; ଦାର୍ମୁଗାଟାସି ଏଚେ ଏଚେଲା ତାନି ଦାର୍ମୁତା ନା଼ସା ଆ଼ନେସି, ଇଞ୍ଜାଁ ଲାଗେଏତି ଲ଼କୁ ତାନି ଲାଗେଏତି କାମାତା ହା଼ରେକା ବାର୍ସା ନୀଡିନେସି। 16 ଏ଼ଦାଆଁତାକି ଗାଡି ଦାର୍ମୁଗାଟାତେରି ଆ଼ଆଦୁ; କି ଜାହାରାଇଁ ହା଼ରେକା ବୁଦି ଗାଟାତେଏଁ ଇଞ୍ଜିଁ ତ଼ସା କଡାଆଦୁ; ଏ଼ନାଆଁତାକି ନୀନୁ ଜାହାରାଇଁ ନା଼ସା କିଦି ? 17 ମୀରୁ ଗାଡି ଲାଗେଏ ଆ଼ଆଦୁ, କି ବୁଦି ହିଲାଆ ଗାଟାତେରି ଆ଼ଆଦୁ; ନୀ କା଼ଲା ୱା଼ଆ ନ଼କେଏ ଏ଼ନାଆଁତାକି ହା଼ଦି ? 18 ଈଦାଆଁ ଆସା ଇଟିନାୟି, ଆ଼ତିଜିକେଏ ଏ଼ୱାଣି ତା଼ଣାଟି କେୟୁ ପେର୍‌ହା ଅ଼ଆଗାଟାୟି ନୀ ନେହେଁ; ଇଚିହିଁ ଆମ୍ବାଆସି ମାହାପୂରୁଇଁ ଆଜିନେସି, ଏ଼ୱାସି ଈ ବାରେ ତା଼ଣାଟି ଜୀଣା ଆ଼ନେସି।

19 ବୁଦିଗାଟି ଲ଼କୁ ତାକି ଗା଼ଡ଼ାତି ଦସଜା଼ଣା ସା଼ଲୱି କିନାରି କିହାଁ ବୁଦି ଗାଡି ବପୁ ଲେହେଁ ଆ଼ନେ।

20 ପା଼ପୁ କିଆନା ସାତା କାମା କିନେସି, ଇଲେତି ର଼ ଦାର୍ମୁଗାଟାସି ସାତେଏ ଦାର୍‌ତିତା ହିଲଅସି।

21 ଅ଼ଡ଼େ ଏଚେକା କାତା ୱେସ୍‌ପିଆ଼ନେ, ଏ଼ ବାରେ କାତା ମ଼ନ ହୀଆନି; ମ଼ନ ହୀତିସାରେ ଏଚେ଼ତା ନୀ ହ଼ଲେଏସି ନିଙ୍ଗେ ବା଼କା ହୀନାଣି ୱେଞ୍ଜି; 22 ଇଚିହିଁ ନୀ ମ଼ନ ପୁନେ, ନୀନୁ ଜିକେଏ ଏଟ୍‌କାତାରାଇଁ ଏଲେକିହିଁ ଅଲେ ଅଲେ ବା଼କା ହୀହାମାଞ୍ଜି।

23 ନା଼ନୁ ବୁଦିତଲେ ଈ ବାରେ ତାୟିପାରି କିହାମାଇଁ। ନା଼ନୁ ଏଲେଇଚେଏଁ, "ନା଼ନୁ ବୁଦି ଗାଟାତେଏଁ ଆ଼ଇଁ," ସାମା ଏ଼ଦି ନା଼ ତା଼ଣାଟି ହେକ ମାଚେ। 24 ଏ଼ନାୟି ମାନେ, ଏ଼ଦି ହେକ ମାନେ ଅ଼ଡ଼େ ଗାଡି ବିତ୍ରା ମାନେ ଏ଼ଦାଣି ଆମ୍ବାଆସି ବେଟାଆ଼ନେସି ? 25 ବୁଦି ଅ଼ଡ଼େ କାତାତି ଅର୍ତ ପୁଞ୍ଜାଲି, ଇଞ୍ଜାଁ ଲାଗେଏତାସି ଆମ୍ବାଆସି ବୁଦି ହିଲାଆଗାଟାୟି ଅ଼ଡ଼େ ମୁର୍କୁ ଆମ୍ବାଆସି ସେତ୍‌ନା ହିଲାଆଗାଟାସି*7:25 ସେୟାଁଣା ହିଲାଆଗାଟାସି/ପୁଞ୍ଜି ପୁଞ୍ଜି କିଆଗାଟାଣି କିନାସି ଅ଼ଡ଼େ କିନାଣି କିଆଗାଟାସି, ଈ କାତା ପୁଞ୍ଜାଲି ନା଼ନୁ ୱା଼ତେଏଁ ଅ଼ଡ଼େ ନା଼ ମ଼ନ ଏ଼ଦାଆଁ ପାରାଲି ତେଗିତେ।

26 ଅ଼ଡ଼େ, ନା଼ନୁ ମେସିମାଇଁ କି, ଏମିନି ଆୟାନି ହିୟାଁ ପା଼ନ୍ଦା ଅ଼ଡ଼େ ଜା଼ଲା ଲେହେଁ ଅ଼ଡ଼େ କେସ୍କାତି ହିକ୍‌ଣିୟାଁ ସମାନା, ଏ଼ଦି ହା଼କି କିହାଁ ହା଼ରେକା ଦୁକୁ ଗାଟାୟି; ଆମ୍ବାଆସି ମାହାପୂରୁଇଁ ରା଼ହାଁ କିନେସି, ଏ଼ୱାସି ଏ଼ୱାଣି ତା଼ଣାଟି ଗେଲ୍‌ପି ଆ଼ନେସି; ସାମା ପା଼ପୁଗାଟାସି ଏ଼ଦାଣି ତଲେ ଆସ୍‌ପି ଆ଼ନେସି। 27 ବୁଦିତି କାତା ଜା଼ପ୍‌ନାସି ଏଲେଇନେସି, ମେହ୍‌ଦୁ, ନା଼ନୁ ବୁଦିତି କାତା ପୁଞ୍ଜାଲି ର଼ କାତା ଅ଼ର କାତା ତଲେ କାଲ୍‌ହେଏଁ ଇଞ୍ଜାଁ ଏ଼ କାତା ବେଟାଆ଼ତେଏଁ। 28 ନା଼ ଜୀୱୁ ନୀଞ୍ଜୁ ପାତେକା ପାରିମାନେ, ସାମା ନା଼ନୁ ଏ଼ଦାଆଁ ବେଟାଆ଼ହାହିଲଅଁ; ମା଼ଣା ମା଼ଣା ବିତ୍ରା ନା଼ନୁ ର଼ ଆ଼ବାଇଁ ବେଟାଆ଼ହାମାଇଁ; ସାମା ଏ଼ ବାରେ ଜା଼ଣା ବିତ୍ରାଟି ନା଼ନୁ ର଼ ଆୟାନି ବେଟାଆ଼ହାହିଲଅଁ। 29 ମେହ୍‌ଦୁ, ନା଼ନୁ ଇଚେକା ବେଟାଆ଼ହାମାଇଁ, ମାହାପୂରୁ ମାଣ୍‌ସିଇଁ ସ଼ଜେ ତଲେ ତିୟାରା କିତେସି; ସାମା ଏ଼ୱାରି ହା଼ରେକା ତିୟାରା କିନାଣି ପାରିମାନେରି।