1 ନା଼ନୁ ଈ ବାରେ କାତାତା ମ଼ନ ହୀହାଁ ପାରିତେଏଁ; ଦାର୍ମୁଗାଟାସି ଅ଼ଡ଼େ ବୁଦିଗାଟାସି, ଅ଼ଡ଼େ ଏ଼ୱାରି କାମା ମାହାପୂରୁ କେୟୁତା ମାନେ; ଈଦି ଜୀୱୁ ନ଼ନାୟି କି ଅ଼ପାଆଗାଟାୟି, ଏ଼ଦାଆଁ ମାଣ୍‌ସି ପୁନଅସି; ବାରେ ଏ଼ୱାରି ନ଼କିତା ଡ଼ୟିନେ। 2 ବାରେ କାତା ବାରେ ତାକି ସମାନା ଗଟୱି ଆ଼ନେ; ଦାର୍ମୁଗାଟାସି ଅ଼ଡ଼େ ଲାଗେଏତାସି, ନେହାସି, ଇଞ୍ଜାଁ ଅଟ୍‌ହାସି ଅ଼ଡ଼େ ଅଟ୍‌ଆତାସି; ପୂଜା କିନାସି ଅ଼ଡ଼େ ପୂଜା କିଆଗାଟାସି, ବାରେ ତାକି ରଣ୍ତିଏ ସମାନା ଗଟୱି ଆ଼ନେ; ନେହାସି ଏ଼ନିକିଁ, ପା଼ପୁ ଗାଟାସି ଏଲେକିହିଁଏ, ଇଞ୍ଜାଁ, ପାର୍‌ମାଣା କିନାସି ଏ଼ନିକିଁ, ପାର୍‌ମାଣା କିହାଲି ଆଜିନାସି ଜିକେଏ ଏଲେକିହିଁଏ। 3 ୱେ଼ଡ଼ାତି ଡ଼଼ଇକା ଏଚେକା କାମା କିୱିଆ଼ନେ, ଏ଼ ବିତ୍ରା ଦୁକୁତି କାତା ଈଦି, ବାରେତାକି ରଣ୍ତିଏ ସମାନା ଗଟୱି ଆ଼ନେ; ଅ଼ଡ଼େ ଜିକେଏ ମାଣ୍‌ସି ମୀର୍‌କାତି ହିୟାଁ ଲାଗେଏତାୟି ନେଞ୍ଜାମାନେ ଅ଼ଡ଼େ ନୀଡାମାନି ପାତେକା ଏ଼ୱାରି ହିୟାଁତା ସେୟାଁଣା ହିଲାଆଗାଟାୟି ଡ଼ୟିନେ, ଅ଼ଡ଼େ ଏ଼ ଡା଼ୟୁ ଏ଼ୱାରି ହା଼ତାରି ତା଼ଣା ହାନେରି। 4 ଇଚିହିଁ ଏମିନି ଲ଼କୁ ନୀଡାମାନି ଲ଼କୁ ବିତ୍ରା ଆଣ୍ତାମାନେରି, ଏ଼ୱାଣି ବା଼ର୍ସୁ ଡ଼ୟିନେ; ଇଚିହିଁ ହା଼ତି ସିହଁ କ୍ଡାଃନି କିହାଁ ଜୀୱୁତି ନେଃଉଡ଼ି ନେହେଁ। 5 ଜୀୱୁଗାଟି ଲ଼କୁ ହା଼ନାୟି ଇଞ୍ଜିଁ ପୁଞ୍ଜାମାନେରି; ସାମା ହା଼ତି ଲ଼କୁ ଏ଼ନାଆଁ ପୁନଅରି, କି ଏ଼ୱାରି ଏ଼ନି ପା଼ଡ଼େୟି ବେଟାଆ଼ଅରି; ଏ଼ୱାରି ଅଣ୍‌ପୁ ମେଣ୍‌ଙ୍ଗା ହାନେ। 6 ଏ଼ନିକିଁ ଏ଼ୱାରି ଜୀୱୁ ନ଼ନାୟି, ଏଲେକିଁ ଏ଼ୱାରି ଅ଼ପାଆଗାଟାୟି ଅ଼ଡ଼େ ଡା଼ହାରା ନସ୍ତ ଆ଼ନେ; ଆ଼ଆତିଁ ୱେ଼ଡ଼ା ଡ଼଼ଇ ଏ଼ନାଆଁ କିୱିଆ଼ନେ, ଏମ୍ବାଆଁ କା଼ଲାକା଼ଲା ତାକି ଏ଼ୱାରି ଏ଼ନି ବା଼ଗା ଡ଼ୟେଏ।

7 ମୀରୁ ମୀ ଜିରୁତା ହାଜୁ, ରା଼ହାଁ ତଲେ ମୀ କା଼ଦି ତିଞ୍ଜୁ ଅ଼ଡ଼େ ରା଼ହାଁ ହିୟାଁ ତଲେ ମୀ ଅଙ୍ଗୁରି ରାସା ଗହ୍‌ଦୁ; ଇଚିହିଁ ମାହାପୂରୁ ମୀ କାମାତି ଆବାମାନେସି। 8 ମୀ ବାସ୍ତେରି କା଼ଲେଏ ଅପ୍‌ହା ଡ଼ୟାପେ ଅ଼ଡ଼େ ନୀ ତା଼ର୍ୟୁଁତା ନିୟୁଁ ଊଣା ଆ଼ଆପେ। 9 ୱେ଼ଡ଼ା ଡ଼଼ଇ ମାହାପୂରୁ ନିଙ୍ଗେ ଉଜେଏତି ଏଚେକା ଦିନା ହୀହାମାଞ୍ଜାନେସି, ନୀ ଏ଼ ଉଜେଏ ବାର୍ସାତି ବାରେ ଦିନା ନୀନୁ ନୀ ଜୀୱୁ ନ଼ହିମାନି ଡକ୍ରିନି ତଲେ ରା଼ହାଁଟି ବାସା କିମୁ; ଇଚିହିଁ ନୀ ନୀଡାମାନାଟି ୱେ଼ଡ଼ା ଡ଼଼ଇ ନୀନୁ ଏମିନି କସ୍ତ କିହାମାଞ୍ଜି, ଏ଼ କସ୍ତ ବିତ୍ରା ଏ଼ଦିଏ ନୀ ବା଼ଗା। 10 ନୀ କେୟୁ ଏ଼ନି କାମା କିହାଲି ବେଟାଆ଼ନେ, ଏ଼ଦାଆଁ ନୀ ବା଼ଡ଼୍‌ୟୁ ତଲେ କିମୁ; ଇଚିହିଁ ନୀନୁ ଏମିନି ଟା଼ୟୁତା ହାଜିମାଞ୍ଜି, ଏ଼ ମାହ୍‌ଣି ମାଣ୍ତାତା ଏ଼ନି କାମା, କି ଅଣ୍‌ପୁ, କି ଜା଼ପିନାୟି, କି ବୁଦି ହିଲେଏ।

11 ନା଼ନୁ ୱେଣ୍ତେ ୱେ଼ଡ଼ା ଡ଼଼ଇ ମେସ୍ତେଏଁ, ଗାଡି ହଣ୍‌ନାରାଇଁ ବା଼ଦ୍‌ହାରା, କି ବା଼ଡ଼୍‌ୟୁ ଗାଟାରାଇଁ ଜୀଣା ଆ଼ନାୟି, କି ବୁଦିଗାଟାରାକି କା଼ଦି, କି ତେଲ୍‌ହାଲି ଆ଼ଡିନାରାକି ବାତ୍‌କୁ, କି ଗାଡି ବୁଦି ଗାଟାରାକି କାର୍ମା ମେ଼ଡ଼ା ଆ଼ଏ, ସାମା ବାରେ ତାକି କା଼ଲା ଅ଼ଡ଼େ ଦେବୁଣିଏ ଗଟୱି ଆ଼ନେ। 12 ଇଚିହିଁ ମାଣ୍‌ସି ଜିକେଏ ତାନି ହା଼କିତି ଦିନା ପୁଞ୍ଜାଲି ଆ଼ଡଅସି; ଏ଼ନିକିଁ ମୀଣ୍‌କା କସ୍ତ ହୀନି ଜା଼ଲାତା ହେର୍‌ନୁ ଅ଼ଡ଼େ ଏ଼ନିକିଁ ପଟାୟାଁ ହୁରୁ ପା଼ହାଁତା ହେର୍‌ୱିନୁ, ଏଲେକିଁ ମାଣ୍‌ସି ମୀର୍‌କା ଦେବୁଣିଏ ୱା଼ନି କସ୍ତ ବେ଼ଲାତା ହେର୍‌ୱି ଆ଼ନେରି।

13 ନା଼ନୁ ୱେ଼ଡ଼ା ଡ଼଼ଇ ଇଲେତି ବୁଦି ମେସାମାଇଁ, ଅ଼ଡ଼େ ଏ଼ଦି ନା଼ ନ଼କିତା ହା଼ରେକା କାଜାୟି ତ଼ଞ୍ଜାଆୟାତେ; 14 ଇଚିହିଁ ଇଚରା ଲ଼କୁଗାଟି ର଼ ଊଣା ଗା଼ଡ଼ା ମାଚେ; ଅ଼ଡ଼େ, ର଼ ରାଜା ଏ଼ଦାଣି କ଼ପାଟି ୱା଼ହାଁ ଏ଼ ସା଼ରିୱାକି ମୁଚି‌ତେସି ଅ଼ଡ଼େ ଏ଼ଦାଣି କ଼ପାଟି କାଜା କାଜା କ଼ଟା ଇଲ୍‌କା ତିୟାରା କିତେସି। 15 ଇଲେତି ବେ଼ଲାତା ଏ଼ ବିତ୍ରା ର଼ ବୁଦିଗାଟି ହାକି କା଼କୁଲି ଗାଟାସି ତ଼ଞ୍ଜାଆ଼ତେସି, ଇଞ୍ଜାଁ ଏ଼ୱାସି ତାନି ବୁଦି ତଲେ ଏ଼ ଗା଼ଡ଼ା ଗେଲ୍‌ପିତେସି; ଆ଼ତିଜିକେଏ ଏ଼ ହାକି କା଼କୁଲି ଗାଟାଣାଇଁ ଆମ୍ବାଆରି ଅଣ୍‌ପାଆତେରି। 16 ଏ଼ଦାଆଁତାକି ନା଼ନୁ ଏଲେଇଚେଏଁ, "ବା଼ଡ଼୍‌ୟୁ କିହାଁ ବୁଦି ନେହେଁ; ଆ଼ତିଜିକେଏ କାର୍ମା ଗାଟାଣି ବୁଦି ହୀଣି କିୱିଆ଼ନେ ଅ଼ଡ଼େ ଏ଼ୱାଣି ବ଼ଲୁ ୱେଣ୍‌ମ୍ବିଆ଼ଏ।" 17 ବୁଦି ହିଲାଆଗାଟାଣି ବିତ୍ରା ସା଼ଲୱି କିନାଣି କା଼ଲୱି କିହାଁ ହିତ୍‌ଡ଼ି ତଲେ ଜ଼ଲିନି ବୁଦି ଗାଟାଣି ବ଼ଲୁ ଗାଡି ୱେ଼ଙ୍ଗିନେ। 18 ଜୁଜୁତି ଆ଼ସ୍ତି କିହାଁ ବୁଦି ନେହେଁ; ସାମା ର଼ ପା଼ପୁଗାଟାସି ହା଼ରେକା ନେହାଣି ନା଼ସା କିନେସି।