1 ହକଲିୟ ମୀର୍‌ଏସି ନିହିଁମିୟାତି ବ଼ଲୁ। କଡ଼େ ବାର୍ସାତି କିସ୍‌ଲେବ୍‌* ଲେ଼ଞ୍ଜୁ ନା଼ନୁ ସୁସନ୍‌ ରାଜା ଗା଼ଡ଼ାତା ମାଚେଏଁ। 2 ଏଚେଟିଏ ହନାନି ଦ଼ରୁଗାଟି ନା଼ ତାୟିୟାଁ ବିତ୍ରାଟି ରଅସି ଅ଼ଡ଼େ ଜୀହୁଦାଟି ଏଚେକା ଲ଼କୁ ୱା଼ତେରି; ଏଚେଟିଏ ନା଼ନୁ ଏ଼ୱାରାଇଁ ବାବିଲତା ଅ଼ୱି ଆ଼ନି ତା଼ଣାଟି ଗେଲ୍‌ପି ଆ଼ହାମାନି ଜୀହୁଦି ଲ଼କୁତି କାତା ଅ଼ଡ଼େ ଜିରୁସାଲମ କାତା ୱେଚେଏଁ। 3 ଏଚିବେ଼ଲା ଏ଼ୱାରି ନାଙ୍ଗେ ଏଲେଇଞ୍ଜାତେରି, "ବାବିଲତା ଅ଼ୱି ଆ଼ନି ତା଼ଣାଟି ଗେଲ୍‌ପି ଆ଼ହାମାନି ଏ଼ ରା଼ଜିତା ମାନି ଲ଼କୁ ହା଼ରେକା ଦୁକୁ ଅ଼ଡ଼େ କସ୍ତ ତଲେ ମାନେରି; ଇଚିହିଁ ଜିରୁସାଲମତି କ଼ଟା ଡୀହାଁ ରିହାମାନେ ଅ଼ଡ଼େ ଦୁୱେରିକା ବାରେ ହିଚୁ ତଲେ ୱେହାମାନୁ।"

4 ଏଚେଟିଏ ନା଼ନୁ ଈ କାତା ୱେଣ୍‌ମ୍ବନିଏ କୁଗାହାଁ ଡ଼ୀତେଏଁ ଅ଼ଡ଼େ ଏଚର ଦିନା ପାତେକା ଅଣ୍‌ପିହିଁ ଦୁକୁ କିତେଏଁ; ଇଞ୍ଜାଁ ଲାକପୂରୁତି ମାହାପୂରୁ ନ଼କିତା ନା଼ନୁ ଉପାସା ଅ଼ଡ଼େ ପ୍ରା଼ତାନା କିହିଁ ଏଲେଇଚେଏଁ, 5 "ହେ଼ ଲାକପୂରୁତି ପ୍ରବୁ ମାହାପୂରୁ, ନା଼ନୁ ବାତିମା଼ଲି ମାଞ୍ଜାଇଁ, ନୀନୁ ବାରେକିହାଁ କାଜାତି ଅ଼ଡ଼େ ଆଜିହ଼ପେତି ମାହାପୂରୁ, ଆମ୍ବାଆରି ନିଙ୍ଗେ ଜୀୱୁ ନୟାଁନେରି ଅ଼ଡ଼େ ନୀ ବାରେ ହୁକୁମି ମା଼ନୱି ଆ଼ନେରି, ଏ଼ୱାରି ତଲେ ନୀନୁ ରା଼ଜିମା଼ନା ଅ଼ଡ଼େ କାର୍ମା ଆ଼ନାତି; 6 ନା଼ନୁ ନୀ କ଼ପାଟି ମା଼ ଇସ୍ରାୟେଲ ମୀର୍‌କା କିହାମାନି ପା଼ପୁ ୱେ଼କ୍‌ହାନା ନୀ ହ଼ଲେଏସି ଇସ୍ରାୟେଲ ମୀର୍‌କା ୱାକିଟି ଲା଼ଆଁ ମାଦେନା ଈ ବେ଼ଲାତା ନୀ ନ଼କିତା ଏମିନି ପ୍ରା଼ତାନା କିହିମାଇଁ, ନୀ ହ଼ଲେଏଣା ପ୍ରା଼ତାନା ୱେଞ୍ଜାଲି ନୀ କୀର୍କା ଅଡାପୁ ଅ଼ଡ଼େ ନୀ କାଣ୍‌କା ଦେପି ଆ଼ପୁ; ନା଼ନୁ ଅ଼ଡ଼େ ନା଼ ତାଞ୍ଜିତି କୂଡ଼ା ପା଼ପୁ କିହାମାନମି। 7 ମା଼ମ୍ବୁ ନୀ କ଼ପାଟି ହା଼ରେକା ଲାଗେଏତି କାମା କିହାମାନମି ଅ଼ଡ଼େ ନୀନୁ ନୀ ହ଼ଲେଏସି ମ଼ସାକି ଏମିନି ହୁକୁମି, ମେ଼ରା ଅ଼ଡ଼େ ସା଼ଲୱି କିନାଣି ହୁକୁମି ହୀହାମାଚି, ଏ଼ ବାରେ ମା଼ମ୍ବୁ ମା଼ନୱି ଆ଼ହା ହିଲଅମି। 8 ନୀନୁ ନୀ ହ଼ଲେଏସି ମ଼ସାକି ହୁକୁମି ହୀହାଁ ଏଲେଇଞ୍ଜାମାଚି, ‘ମୀରୁ ସାତାତି ଊରିସାରେ ନା଼ନୁ ମିଙ୍ଗେ ହା଼ରେକା କୂଲୁତା ସିନାସାତ୍ରା କିୟାଇଁ; 9 ସାମା ମୀରୁ ଏଚେ଼ତା ନା଼ ୱାକି ୱେଣ୍ତାଦେରି ଅ଼ଡ଼େ ନା଼ ହୁକୁମି ମା଼ନୱି ଆ଼ହାଁ ଏଲେକିହିଁ କାମା କିଦେରି, ଆତିହିଁ ମୀ ପିସ୍‌ପି ଆ଼ହାମାନି ଲ଼କୁ ହା଼ଗୁ ଆତାଲା ହାନ୍ଦିତା ମାଚିହିଁ ଜିକେଏ ନା଼ନୁ ଏମ୍ବାଟି ଏ଼ୱାରାଇଁ କୂଡ଼ିକିଇଁ ଅ଼ଡ଼େ ନା଼ନୁ ନା଼ ଦ଼ରୁ ଇଟାଲି ତାକି ଏମିନି ଟା଼ୟୁ ଆ଼ଚାମାଇଁ ଏ଼ ଟା଼ୟୁତା ଏ଼ୱାରାଇଁ ତାଇଁ।’ ବାତିମା଼ଲି ମାଞ୍ଜାଇଁ ଈ କାତାତି ନୀନୁ ଅଣ୍‌ପାମୁ।"

10 "ଈୱାରି ନୀ ହ଼ଲିୟାଙ୍ଗା ଅ଼ଡ଼େ ନୀ ଲ଼କୁ, ନୀନୁ ଈୱାରାଇଁ ନୀ କାଜା ବା଼ଡ଼୍‌ୟୁ ତଲେ ଅ଼ଡ଼େ ନୀ ବା଼ଡ଼୍‌ୟୁଗାଟି କେୟୁ ତଲେ ଗେଲ୍‌ପାମାଞ୍ଜି। 11 ହେ଼, ପ୍ରବୁ, ବାତିମା଼ଲି ମାଞ୍ଜାଇଁ, ଏମିନିଗାଟାରି ନୀ ଦ଼ରୁତି ଆଜାଲି ରା଼ହାଁ ଆ଼ନେରି, ଇଲେତି ନୀ ହ଼ଲେଏଣା ପ୍ରା଼ତାନା ଅ଼ଡ଼େ ନୀ ହ଼ଲିୟାଙ୍ଗା ପ୍ରା଼ତାନାତା ନୀ କିର୍ୟୁଁ ଅଡାପେ; ନୀଞ୍ଜୁ ନୀ ହ଼ଲେଏଣା କାମା ପୂରା କିମୁ, ଇଞ୍ଜାଁ ଈ ମାଣ୍‌ସିତି ନ଼କିତା ଏ଼ୱାଣାଇଁ କାର୍ମା ବେଟାଆ଼ହାଲି ହୀମୁ।" ଏଚିବେ଼ଲା ନା଼ନୁ ରାଜାତି ଗହ୍‌ନାଆଁ ହୀନାତେଏ ମାଚେଏଁ।