1 ଏଚେଟିଏ ନା଼ନୁ କ଼ଟାକାତି କିହାମାଇଁ ଅ଼ଡ଼େ ଏମ୍ବାଆଁ ଡୀହାମାନି ଟା଼ୟୁ ହିଲେଏ, ଈ କାବ୍ରୁ ସନ୍‌ବଲଟ ଅ଼ଡ଼େ ଟବିୟ ଅ଼ଡ଼େ ଆରବତି ଗେସମ୍‌ ଅ଼ଡ଼େ ମା଼ ଏଟ୍‌କାତି ସାତ୍ରୁୟାଁ ପୁଚେରି; ଏଚିବେ଼ଲାତା ନା଼ନୁ ଗା଼ଡ଼ା ଦୁୱେରିତି ଦା଼ରାୟାଁ ବାରେ କିହା ହିଲାଆତେଏଁ। 2 ଏଚିବେ଼ଲା ସନ୍‌ବଲଟ ଅ଼ଡ଼େ ଗେସମ୍‌ ନା଼ ତା଼ଣା ଲ଼କୁଣି ପାଣ୍ତାହାଁ ଏଲେଇଚେସି, "ୱା଼ଦୁ ମା଼ର ଅନ ଗୁଡିୟାତି ର଼ ନା଼ୟୁଁତା ରୁଣ୍ତା ଆ଼ନ।" ସାମା ଏ଼ୱାରି ନା଼ ଲାଗେଏ କିହାଲି କାତା ଆ଼ହାମାଚେରି। 3 ଏଚେଟିଏ ନା଼ନୁ ଏ଼ୱାରି ତା଼ଣା ଦୂତୁ ପାଣ୍ତାହାଁ ଏଲେଇଚେଏଁ, "ନା଼ନୁ ର଼ କାଜା କାମା କିହିମାଇଁ, ଏ଼ଦାଆଁତାକି ରେ଼ଚା ୱା଼ହାଲି ଆ଼ଡଅଁ; ମୀ ତା଼ଣା ରେ଼ଚା ୱା଼ହାଁ ଏ଼ନାଆଁତାକି କାମା ପିହ୍‌ଇଁ ?" 4 ଇଲେକିହିଁ ଏ଼ୱାରି ସା଼ରି ପା଼ଲି ନା଼ ତା଼ଣା ଲ଼କୁଣି ପାଣ୍ତାତେରି; ସାମା ନା଼ନୁ ଏ଼ୱାରାଇଁ ଏଲେକିହିଁଏ ୱେସା ପାଣ୍ତିତେଏଁ।

5 ଏଚେଟିଏ ଡା଼ୟୁ ସନ୍‌ବଲଟ ତାନି ହ଼ଲେଏଣା କେୟୁତା ଇଚାଣି ଆ଼କୁ ରା଼ଚାହାଁ ଏଲେକିହିଁଏ ପା଼ସା ପା଼ଲି ତାକି ନା଼ ତା଼ଣା ପାଣ୍ତାତେସି। 6 ଏମ୍ବାଆଁ ଇଲେକିଁ ରା଼ସ୍‌କି ଆ଼ହାମାଚେ, "କୂଡ଼ା କୂଡ଼ାତି ଲ଼କୁ ବିତ୍ରା ଇଲେତି କାତା ଆ଼ହାମାନେ, ଗେସମ୍‌ ଏଲେଇଞ୍ଜି ମାନେସି, ‘କି ନୀନୁ ଅ଼ଡ଼େ ଜୀହୁଦି ଲ଼କୁ ରା଼ଜି ବା଼ଗା କିହାଲି ଅଣ୍‌ପି ମାଞ୍ଜେରି; ଏ଼ଦାଆଁତାକି କ଼ଟାକାତି ତିୟାରା କିହିମାଞ୍ଜେରି; ଈ ଲ଼କୁତି କାତା ଲେହେଁ ନୀନୁ ଏ଼ୱାରି ରାଜା ଆ଼ହାଲି ମ଼ନ କିହିମାଞ୍ଜି। 7 ଅ଼ଡ଼େ ଜୀହୁଦାତି ର଼ ରାଜା ମାନେସି ଇଞ୍ଜିଁ ନୀ କାତା ଜିରୁସାଲମତା ୱେ଼କ୍‌ହାଲି ତାକି ନୀନୁ ନ଼କିତା ଆ଼ନି କାତା ୱେ଼କ୍‌ନାରାଇଁ ଆ଼ଚାମାଞ୍ଜି; ଈ ଲ଼କୁତି କାତା ରାଜା ତା଼ଣା ଏଗାହାନେ ଏ଼ଦାଆଁତାକି ନୀଏଁ ୱା଼ମୁ ମା଼ର ରହେଁଏ ବିଚାରା କିନ।’"

8 ଏଚେଟିଏ ନା଼ନୁ ଏ଼ୱାଣି ତା଼ଣା ୱେଣ୍ତେ ୱେସା ପାଣ୍ତିତେଏଁ, "ନୀନୁ ଏ଼ନାଆଁ ୱେସିମାଞ୍ଜି, ଏଲେତି ଏ଼ନି କାମା କିୱି ଆ଼ହିହିଲେଏ; ନୀନୁ ୱାର୍‌ଇ ନୀ ମ଼ନଟି ଏ଼ ବାରେ ଅଣ୍‌ପାମାଞ୍ଜି।"

9 ଈ କାମାତା ଏ଼ୱାରି କେୟୁ ହୀଣି ଆ଼ତିସାରେ ଏ଼ଦି ରା଼ହାଲି ଆ଼ଡେଏ ଇଞ୍ଜିଁ ଏ଼ ବାରେ ମାଙ୍ଗେ ଆଜି କିହାଲି ମ଼ନ କିୟାତେରି; "ଏ଼ଦାଆଁତାକି ହେ଼ ନା଼ ମାହାପୂରୁ ନା଼ କେୟୁ ବା଼ଡ଼୍‌ୟୁ କିୟାମୁ।"

10 ଏ଼ ଡା଼ୟୁ ମହେଟବେଲ ତାଙ୍ଗା ମୀର୍‌ଏସି ଦଲୟିୟ ମୀର୍‌ଏସି, ଏମିନି ସମୟିୟ ଇଜ ମାଚେସି, ନା଼ନୁ ଏ଼ୱାଣି ଇଜ ହାଚେଏଁ, ଏଚେଟିଏ ଏ଼ୱାସି ଏଲେଇଞ୍ଜାତେସି, "ମା଼ର ମାହାପୂରୁ ଇଲୁ ବିତ୍ରା ରୁଣ୍ତା ଆ଼ନ ଅ଼ଡ଼େ ଇଲୁତି ଦା଼ରାୟାଁ ସୁଣ୍ତିନ; ଇଚିହିଁ ଏ଼ୱାରି ନିଙ୍ଗେ ପା଼ୟାଲି ୱା଼ନେରି; ଲା଼ଆଁୟାଁ ଏ଼ୱାରି ନିଙ୍ଗେ ପା଼ୟାଲି ୱା଼ନେରି।"

11 ଏଚେଟିଏ ନା଼ନୁ ଏଲେଇଚେଏଁ, "ନା଼ ଲେହେଁତି ଲ଼କୁ ଏ଼ନାଆଁ ହଣ୍‌ନେସି ? ନା଼ ଲେହେଁକି ଆ଼ହାଁ ଜୀୱୁ ନୀଟ୍‌ହାଲି ମାହାପୂରୁ ଇଲୁ ବିତ୍ରା ହାନେସି, ଇଲେକିଁ ଆମ୍ବାଆସି ମାନେସି ? ନା଼ନୁ ବିତ୍ରା ହାଲଅଁ।" 12 ସାମା ନା଼ନୁ ପୁଚେଏଁ, ମାହାପୂରୁ ଏ଼ୱାଣାଇଁ ପାଣ୍ତା ମାଞ୍ଜାଆତେସି; ଆ଼ତିଜିକେଏ ଏ଼ୱାସି ନା଼ କ଼ପାଟି ଈ ନ଼କିତା ଆ଼ନି କାତା ୱେ଼କ୍‌ହେସି; ଇଚିହିଁ ଟବିୟ ଅ଼ଡ଼େ ସନ୍‌ବଲଟ ଏ଼ୱାଣାକି ଟାକାୟାଁ ହୀହାମାଚେରି। 13 ନା଼ନୁ ଏ଼ନିକିଁ ଆଜିଇଁ ଅ଼ଡ଼େ ଏ଼ କାମା କିହାଁ ପା଼ପୁ କିଇଁ, ଇଞ୍ଜାଁ ଏ଼ୱାରି ଏ଼ନିକିଁ ନାଙ୍ଗେ ପିସାଲି ତାକି ନା଼ ଲାଗେଏତି କାମା ବେଟାଆ଼ନେରି, ଈଦାଆଁତାକି ଏ଼ୱାଣାକି ଟାକାୟାଁ ହୀପ୍‌କି ଆ଼ହାମାଚୁ।

14 ହେ଼ ନା଼ ମାହାପୂରୁ ଟବିୟ ଅ଼ଡ଼େ ସନ୍‌ବଲଟତି ଈ ବାରେ କାମାତି ଲେକା ତଲେ ଏ଼ୱାରାଇଁ ଅ଼ଡ଼େ ନାଙ୍ଗେ ଆଜି କିହାଲି ମ଼ନ କିତେରି କି ନୟଦିୟ ନ଼କିତା ଆ଼ନି କାତା ୱେହ୍‌ନାୟି ଅ଼ଡ଼େ ଏଟ୍‌କାତି ନ଼କିତା ଆ଼ନି କାତା ୱେହ୍‌ନାରି ଏ଼ୱାରାଇଁ ଅଣ୍‌ପାଦୁ।

15 ଏଚେଟିଏ ରୀ କ଼ଡ଼ି ବା଼ର ଦିନା ବିତ୍ରା ଇଲୁଲ* ଲେ଼ଞ୍ଜୁତି କଡ଼େ ପା଼ସା ଦିନାତା କ଼ଟା କାମା ରା଼ତେ। 16 ଇଞ୍ଜାଁ ମା଼ ବାରେ ସାତ୍ରୁୟାଁ ଈ କାତା ୱେଞ୍ଜାଲିଏ ଇଲେ ଆ଼ତେ କି ମା଼ ସା଼ରିୱାକିତି ଏଟ୍‌କା ଦେ଼ସାତି ଲ଼କୁ ବାରେ ଆଜିତେରି, ଅ଼ଡ଼େ ମା଼ ନ଼କିତା ଲାଜା ଆ଼ତେରି, ଇଚିହିଁ ଈ କାମା ମା଼ ମାହାପୂରୁ ତା଼ଣାଟି ଆ଼ହାମାନେ ଈ କାତା ଏ଼ୱାରି ପୁଚେରି। 17 ଅ଼ଡ଼େ ଏଚିବେ଼ଲାତା ଜୀହୁଦାତି ହା଼ରେକା କାଜାରି ଟବିୟ ତା଼ଣା ହା଼ରେକା ଆ଼କୁ ରା଼ଚାହାଁ ପାଣ୍ତିତେରି, ଅ଼ଡ଼େ ଟବିୟତି ହା଼ରେକା ଆ଼କୁ ଏ଼ୱାରି ତା଼ଣା ୱା଼ତେ। 18 ଇଚିହିଁ ଏ଼ୱାସି ଆରହ ମୀର୍‌ଏସି ସକନିୟ ହନେଏସି ଆ଼ତାକି ଅ଼ଡ଼େ ତାନି ମୀର୍‌ଏସି ଜିହହାନନ୍‌ ବେରିକିୟ ମୀର୍‌ଏସି ମସୁଲମ୍‌ ମା଼ଙ୍ଗାନି ବୀହା ଆ଼ହାମାନାକି ଜୀହୁଦା ବିତ୍ରା ହା଼ରେକା ଏ଼ୱାଣି ୱାକିଟି ପାର୍‌ମାଣା କିହାମାଚେରି। 19 ଅ଼ଡ଼େ ଏ଼ୱାରି ଏ଼ୱାଣି ନେହିଁ କାମାତି କାତା ନାଙ୍ଗେ ୱେସ୍ତାତେରି, ଅ଼ଡ଼େ ନା଼ କାତା ବାରେ ଏ଼ୱାଣାଇଁ ୱେସ୍ତେରି। ଅ଼ଡ଼େ ନାଙ୍ଗେ ଆଜି କିହାଲି ତାକି ଟବିୟ ହା଼ରେକା ଆ଼କୁ ରା଼ଚାହାଁ ପାଣ୍ତାତେସି।