ନିହିଁ 5

ନିହିଁମିୟ କା଼କୁଲି ଗାଟାରାଇଁ ସା଼ୟେମି କିନାୟି

1 ଏଚେଟିଏ ଜୀହୁଦି ତାୟିୟାଁ କ଼ପାଟି ଲ଼କୁ ଅ଼ଡ଼େ ତାମି ଡକ୍ରିସିକା ନିନ୍ଦାକିହିଁ କା଼ଲୱି ଆ଼ତୁ। 2 ଇଚିହିଁ ଆମ୍ବା ଆମ୍ବାଆରି ଏଲେଇଚେରି, "ମା଼ମ୍ବୁ ମା଼ ମୀର୍‌କା ଅ଼ଡ଼େ ମା଼ସ୍‌କା ତଲେ ହା଼ରେକା ଲ଼କୁତମି; ଏ଼ଦାଆଁତାକି ମା଼ମ୍ବୁ ଆର୍ନା ଅ଼ହାଁ ତିଞ୍ଜାହାଁ ନୀଡିନମି।" 3 ଅ଼ଡ଼େ ଜିକେଏ ଆମ୍ବା ଆମ୍ବାଆରି ଏଲେଇଚେରି, "ମା଼ମ୍ବୁ ମା଼ ଆର୍ନା ଗୁଡିୟା ଅ଼ଡ଼େ ଅଙ୍ଗୁରି ବା଼ଡ଼ା ଇଞ୍ଜାଁ ଇଲୁ ବାନ୍ଦା ଇଟାମାନମି, ଏ଼ନିକିଁ କାର୍‌ୱୁ ବେ଼ଲାତା ମାଙ୍ଗେ ଆର୍ନା ମେ଼ଡ଼ା ଆୟାନେ।" 4 ଅ଼ଡ଼େ କଚେକା ଏଲେଇଚେରି, "ମା଼ମ୍ବୁ ରାଜା ସିସ୍ତୁ ଦସାଲି ତାକି ମା଼ ଆର୍ନା ଗୁଡିୟା ଅ଼ଡ଼େ ଅଙ୍ଗୁରି ବା଼ଡ଼ା ବାନ୍ଦା ଇଟାହାଁ ୱାଡି ଅ଼ହାମାନମି। 5 ସାମା ମା଼ ଆଙ୍ଗା ମା଼ ତାୟିୟାଁ ଆଙ୍ଗା ସମାନା, ମା଼ ମୀର୍‌କା ଏ଼ୱାରି ମୀର୍‌କା ସମାନା, ଆ଼ତିଜିକେଏ ମେହ୍‌ଦୁ ମା଼ମ୍ବୁ ମା଼ ମୀର୍‌କା ମା଼ସ୍‌କାଣି ହ଼ଲିୟା ଆ଼ହାଲି ତାକି ପା଼ର୍‌ଚା ମାନମି, ଇଞ୍ଜାଁ ମା଼ ମା଼ସ୍‌କା ବିତ୍ରାଟି ଆମ୍ବା ଆମ୍ବାଆୟି ହ଼ଲେଣି ଆ଼ହା ରା଼ତୁଏ; ମା଼ମ୍ବୁ ଅ଼ଡ଼େ ଏ଼ନାଆଁ କିହାଲି ଆ଼ଡିହିଲଅମି; ଇଚିହିଁ ଏଟ୍‌କାତି ଲ଼କୁ ମା଼ ଆର୍ନା ଗୁଡିୟା ଅ଼ଡ଼େ ଅଙ୍ଗୁରି ବା଼ଡ଼ା ଅଦିକାରା କିହାମାନେରି।"

6 ଏଚେଟିଏ ନା଼ନୁ ଏ଼ୱାରି ଡ଼ୀକି ଅ଼ଡ଼େ ଈ ବାରେ କାତା ୱେଞ୍ଜାହାଁ ହା଼ରେକା କାର୍‌ବି ଆ଼ତେଏଁ। 7 ଇଞ୍ଜାଁ ନା଼ନୁ ନା଼ ମ଼ନତା ଅଣ୍‌ପିତେଏଁ, ଇଞ୍ଜାଁ କାଜାରି ଅ଼ଡ଼େ ସା଼ଲୱି କିନାରି ତଲେ ବା଼ଦିବା଼ଦା କିହାଁ ଏ଼ୱାରାଇଁ ଏଲେଇଚେଏଁ, "ମୀରୁ ବାରେ ଜାହାରା ତାୟି ତା଼ଣାଟି ଅଡି ଅ଼ହିମାଞ୍ଜେରି।" ଏ଼ଦାଆଁତାକି ନା଼ନୁ ଏ଼ୱାରି କ଼ପାଟି ଦାୱା କିତେଏଁ। 8 ଅ଼ଡ଼େ ନା଼ନୁ ଏ଼ୱାରାଇଁ ଏଲେଇଚେଏଁ, "ମା଼ ଜୀହୁଦି ତାୟିୟାଁ ଏଟ୍‌କା ଦେ଼ସାତି ଲ଼କୁ ତା଼ଣା ପା଼ର୍‌ପି ଆ଼ହାମାଚେରି, ମା଼ମ୍ବୁ ଏ଼ୱାରାଇଁ ଜାହାରା ବା଼ଡ଼୍‌ୟୁ ତଲେ ଗେଲ୍‌ପାମାନମି, ନୀଏଁ ଏ଼ନାଆଁ ମୀରୁ ମୀ ତାୟିୟାଁଇଁ ପା଼ର୍‌ଦେରି ? ଅ଼ଡ଼େ ଏ଼ୱାରି ଏ଼ନାଆଁ ମା଼ ନ଼କିତା ପା଼ର୍‌ପି ଆ଼ନେରି ?" ଏଚେଟିଏ ଏ଼ୱାରି ପାଲେଏ ଆ଼ତେରି, ଇଚାଣି ଜିକେଏ ଜ଼ଲାଲି ଆ଼ଡାଆତେରି।

9 ଅ଼ଡ଼େ ନା଼ନୁ ଏଲେଇଚେଏଁ, "ମୀରୁ ଏମିନି କାମା କିହିମାଞ୍ଜେରି, ଏ଼ଦି ନେହେଁ ଆ଼ଏ, ମା଼ ସାତ୍ରୁ ଏଟ୍‌କା ଦେ଼ସାତାରି ଅ଼ପାଆଗାଟାଣି ଆ଼ଙ୍ଗାଲି ତାକି ମା଼ ମାହାପୂରୁଇଁ ଆଜାହାଁ ତା଼କିନାୟି ଏ଼ନାଆଁ ମୀ ନେହେଁ ଆ଼ଏ କି ? 10 ନା଼ନୁ, ନା଼ ତାୟିୟାଁ ଅ଼ଡ଼େ ନା଼ ହ଼ଲିୟାଙ୍ଗା ଅଡି ତଲେ ଏ଼ୱାରାକି ଡାବୁୟାଁ ଅ଼ଡ଼େ ଆର୍ନା ୱାଡି ହୀହାମାନମି। ସାମା ମା଼ର ଈ ୱାଡି ତାକି ଅଡି ରୀସାଲି ପିହ୍‌ନାୟି ମାନେ। 11 ମୀରୁ ଏ଼ୱାରି ଆର୍ନା ଗୁଡିୟା, ଏ଼ୱାରି ଅଙ୍ଗୁରି ବା଼ଡ଼ା, ଏ଼ୱାରି ଜୀତ ବା଼ଡ଼ା ଅ଼ଡ଼େ ଏ଼ୱାରି ଇଲୁ ଜିକେଏ ଏ଼ୱାରି ତା଼ଣାଟି ଟାକାୟାଁ ଅ଼ଡ଼େ ଆର୍ନା, ଅଙ୍ଗୁରି ରାସା ଅ଼ଡ଼େ ନିୟୁଁତି ଏମିନି ଅଡି ମୀରୁ ଅ଼ହାମାଞ୍ଜେରି, ଏ଼ଦାଆଁ ନୀଞ୍ଜୁ ୱେଟ୍‌ହାତୁହ୍‌ଦୁ।"

12 ଏଚେଟିଏ ଏ଼ୱାରି ଏଲେଇଚେରି, "ମା଼ମ୍ବୁ ଏ଼ନାଆଁ ଅ଼ହାମାଚମି ଏ଼ଦାଆଁ ୱେଟ୍‌ହାତୁହ୍‌ନାମି ଅ଼ଡ଼େ ଏ଼ୱାରାଇଁ ଇଚାଣି ରୀହ୍‌ଅମି; ନୀନୁ ଏ଼ନିକିଁ ୱେସିମାଞ୍ଜି, ମା଼ମ୍ବୁ ଏଲେକିଁ କିନମି।" ଏଚେଟିଏ ନା଼ନୁ ପୂଜେରାଙ୍ଗାଣି ହା଼ଟାହାଁ ଈ କାତା ତଲେ ଏ଼ୱାରି ଏ଼ନିକିଁ କାମା କିନେରି ଈଦାଆଁତାକି ଏ଼ୱାରାଇଁ ପାର୍‌ମାଣା କିୱିକିତେଏଁ। 13 ଇଞ୍ଜାଁ ନା଼ନୁ ନା଼ ଅଟଡ଼ି ହାଣ୍‌ହାଁ ଏଲେଇଚେଏଁ, "ଆମ୍ବାଆସି ଈ କାତାତି ମା଼ନୱି ଆ଼ଅସି, ମାହାପୂରୁ ଏ଼ୱାଣି ଇଲୁ କସ୍ତ ତଲେ କିହାମାନି ପା଼ଡ଼େୟିଟି ଏ଼ୱାଣାଇଁ ଇଲେକିହିଁ ହାଣ୍‌ପେସି; ଏ଼ୱାସି ଇଲେକିଁ ହାଣ୍‌ୱି ଆ଼ପେସି ଅ଼ଡ଼େ ୱାର୍‌ଆସି ଆ଼ପେସି।" ଏଚେଟିଏ ବାରେ କୁଲମି ଏଲେଇଚେରି "ଆ଼ମେନ୍‌"*5:13 ଆ଼ମେନ୍‌/ଏଲେକିହିଁଏ ଆ଼ପେ ଅ଼ଡ଼େ ପ୍ରବୁତି ଜହରା କିତେରି। ଏଚେଟିଏ ଲ଼କୁ ଈ କାତା ତଲେ କାମା କିତେରି।

ଏଟ୍‌କା ତାରାକି ନିହିଁମିୟା ଅଣ୍‌ପିନାୟି

14 ଅ଼ଡ଼େ ନା଼ନୁ ଜୀହୁଦା ଦେ଼ସାତି କାଜା ପା଼ଣାତା ମାନି ବେ଼ଲାଟିଏ, ଇଚିହିଁ ଅର୍ତକ୍ୟସ୍ତ ରାଜା ରା଼ଜିତି କଡ଼େ ବାର୍ସାଟିଏ କଡ଼େ ବା଼ର ବାର୍ସା ପାତେକା ବା଼ର ବାର୍ସା ନା଼ନୁ ଅ଼ଡ଼େ ନା଼ ତାୟିୟାଁ ଦେ଼ସା ସା଼ଲୱି କିନି କା଼ଦି ତିନାଆତମି। 15 ସାମା ନା଼ ନ଼କେଏ ମାଚି ଦେ଼ସାତି କାଜା ପା଼ଣା ଗାଟାରି ହୀତି ବ଼ଜୁ ଲ଼କୁ ତାକି ଡେ଼କାଲି ଆ଼ତେ, ଅ଼ଡ଼େ ଏ଼ୱାରି ରୀ କ଼ଡ଼ି ସେକଲ ୱେଣ୍ତି ପିସ୍‌ପେ ଲ଼କୁ ତା଼ଣାଟି କା଼ଦି ଅ଼ଡ଼େ ଅଙ୍ଗୁରି ରାସା ଅ଼ତେରି; ୱାର୍‌ଇ ଏଚେକା ଆ଼ଏ, ଏ଼ୱାରି ହ଼ଲିୟା ଲ଼କୁଣି ଲାଗେଏ କିତେରି; ସାମା ମାହାପୂରୁ ଆଜି ତାକି ନା଼ନୁ ଏଲେ କିଆତେଏଁ। 16 ଅ଼ଡ଼େ ନା଼ନୁ ଈ କ଼ଟାକାତି କାମାତା ଡ଼ୟିତେଏଁ ଅ଼ଡ଼େ ମା଼ମ୍ବୁ ଏ଼ନି ବୂମି କଡାଆତମି; ଇଞ୍ଜାଁ ନା଼ ହ଼ଲିୟାଙ୍ଗା ବାରେ ଏମ୍ବାଆଁ କାମାତା ଡ଼ୟିତେରି। 17 ଆ଼ତିଜିକେଏ ମା଼ ସା଼ରିୱାକିଟି ଏଟ୍‌କା ଦେ଼ସାତାରି ବିତ୍ରାଟି ମା଼ ତା଼ଣା ୱା଼ହାମାନି ଲ଼କୁ ପିସ୍‌ପେ ଜୀହୁଦି ଲ଼କୁ ଅ଼ଡ଼େ ପା଼ଣାତି କାଜାରି ସା଼ତାକ଼ଡ଼ି ଦସ ଜା଼ଣା ନା଼ ତଲେ ତିଞ୍ଜାଲି କୁଗିତେରି। 18 ଏଚିବେ଼ଲାତା ବାରେ ଦିନା ର଼ ଡ଼ୁକି କ଼ଡି ଅ଼ଡ଼େ ସ଼ଗଟା ନେହିଁ ମେ଼ଣ୍ତାୟାଁ ୱାଜିୱି ଆ଼ତୁ; ଅ଼ଡ଼େ ନା଼ ତାକି ଏଚେକା ପଟାୟାଁ ୱାଜିୱି ଆ଼ତୁ, ଅ଼ଡ଼େ ଦସ ଦିନାତାକି ର଼ ପା଼ଲି ବାରେ କୂଡ଼ାତି ଅଙ୍ଗୁରି ରାସା କିୱିଆ଼ତେ; ଆ଼ତିଜିକେଏ ନା଼ନୁ ଈ ବାରେ ତାକି ଦେ଼ସା ସା଼ଲୱି କିନାରି କା଼ଦି ମ଼ନ କିଆତେଏଁ, ଇଚିହିଁ ଈ ଲ଼କୁତି ମୁହେଁ ହ଼ଲିୟାତି ବ଼ଜୁ ହା଼ରେକା ମାଚେ। 19 ହେ଼ ନା଼ ମାହାପୂରୁ ନା଼ନୁ ଈ ଲ଼କୁ ତାକି ଏମି ଏମିନି କାମା କିହାମାଇଁ, ନା଼ ନେହେଁ ତାକି ଏ଼ ବାରେ ଅଣ୍‌ପାମୁ।