1 ଏ଼ ଦିନା ଏ଼ୱାରି ଲ଼କୁ ନ଼କିତା ମ଼ସାତି ପତି ପ଼ଡ଼ୱି ଆ଼ତେରି; ଇଞ୍ଜାଁ ଏମ୍ବାଆଁ ରା଼ଚାମାନି ଈ କାତା ତ଼ଞ୍ଜାଆ଼ତେ, କି ଅମନିୟ ଅ଼ଡ଼େ ମୟାବିୟ ଲ଼କୁ କା଼ଲେଏ ତାକି ମାହାପୂରୁ କୁଲମିତା ହ଼ଡ଼୍‌ଅରି, 2 ଇଚିହିଁ ଏ଼ୱାରି କା଼ଦି ଅ଼ଡ଼େ ଏ଼ୟୁ ହୀଆତେରି, ସାମା ଏ଼ୱାରାଇଁ ବା଼କା ହୀହାଲି ତାକି ଏ଼ୱାରି କ଼ପାଟି ବିଲିୟମଇଁ କୂଲି ହୀତେରି; ଆ଼ତିଜିକେଏ ମା଼ ମାହାପୂରୁ ଏ଼ ବା଼କାତି ବ଼ରତା ତିରିମ୍ଣିପ୍‌ହେସି। 3 ଏଚିବେ଼ଲା ଏ଼ୱାରି ଈ ମେ଼ରା ୱେଞ୍ଜାହାଁ ଇସ୍ରାୟେଲ ବିତ୍ରା ବାରେ ଆଣ୍ତିତି ଲ଼କୁଣି ଏଟ୍‌କା କିତେରି।

4 ଏଚିବେ଼ଲା ଇଲିୟାସିବ ପୂଜେରା ମା଼ ମାହାପୂରୁ ଇଲୁତି ବାରେ ବାକ୍ରାୟାଁ ତାକି କାଜାସି ଆ଼ହାଁ ଆ଼ଚ୍‌ୱି ଆ଼ତେସି ଅ଼ଡ଼େ ଏ଼ୱାସି ଟବିୟ କୁଟମି ମାଚେସି, 5 ଇଲିୟାସିବ ଟବିୟକି ର଼ କାଜା ବାକ୍ରା ତିୟାରା କିହାମାଚେସି, ସାମା ଲ଼କୁ ନ଼କେଏ ଏ଼ ଟା଼ୟୁତା କା଼ଦି ପୂଜା, ହା଼ରେକା ଗାନ୍ଦା ଦୁପା ଦୁପ୍‌ଣି ଅ଼ଡ଼େ ଗିନାସିପା ଅ଼ଡ଼େ ହୁକୁମିତି ଲେକା ତଲେ ଲେ଼ବିୟ ଲ଼କୁ, ପା଼ଚିନାରାକି ଅ଼ଡ଼େ ଦୁୱେରିତା କା଼ଃନାରାକି ଦସ ବା଼ଗାଟି ର଼ ବା଼ଗା ହୀନି ଆର୍ନା, ପୁଃନି ଅଙ୍ଗୁରି ରାସା, ନିୟୁଁତି ଦସ ବା଼ଗାଟି ର଼ ବା଼ଗା; ଅ଼ଡ଼େ ପୂଜେରାଙ୍ଗାକି ପେର୍‌ହା ହୀନି ଦା଼ନା ଇଟିମାଚେରି। 6 ସାମା ନା଼ନୁ ଏ଼ ବାରେ କିତାଟି ଜିରୁସାଲମତା ହିଲାଆତେଏଁ, ଇଚିହିଁ ବାବିଲତି ଅର୍ତକ୍ୟସ୍ତ ରାଜାତି ରା଼ଜି କିହିମାଚି କଡ଼େ ବା଼ର ବାର୍ସାତା ନା଼ନୁ ରାଜା ତା଼ଣା ହାଚେଏଁ ଅ଼ଡ଼େ ଏଚର ଦିନା ଡା଼ୟୁ ରାଜାଇଁ ହାଜାଲି ତାକି ହେଲ ରୀସ୍ତେଏଁ; 7 ଏଚେଟିଏ ନା଼ନୁ ଜିରୁସାଲମତା ୱା଼ହାଁ ଇଲିୟାସିବ, ଟବିୟକି ମାହାପୂରୁ ଇଲୁତି ଆଂଗେଣିତା ର଼ ବାକ୍ରା କିହାଁ ଏମିନି ଲାଗେଏ କିହାମାଚେସି, ଏ଼ଦାଆଁ ତେଲ୍‌ହିତେଏଁ। 8 ଏଚେଟିଏ ନା଼ନୁ ହା଼ରେକା କାର୍‌ବି ଆ଼ହାଁ ଏ଼ ବାକ୍ରାଟି ଟବିୟତି ବାରେ ଇଲୁତି ଆ଼ସ୍ତି ପାଙ୍ଗାତା କୁତିତେଏଁ। 9 ଏଚେଟିଏ ନା଼ନୁ ହୁକୁମି ହୀହାଲିଏ, ଏ଼ୱାରି ବାରେ ବାକ୍ରା ସୁଦୁ କିତେରି; ଏଚେଟିଏ ନା଼ନୁ ଏମ୍ବାଆଁ ୱେଣ୍ତେ ମାହାପୂରୁ ଇଲୁତି ଗିନାସିପା ଅ଼ଡ଼େ ତିନି କା଼ଦିତି ଦା଼ନା ଅ଼ଡ଼େ ଦୁପା ଦୁପ୍‌ଣି ତାତେଏଁ।

10 ଅ଼ଡ଼େ ନା଼ନୁ ମେସ୍ତେଏଁ ଲେ଼ବିୟ ଲ଼କୁତି ବା଼ଗା ଏ଼ୱାରାକି ହୀପ୍‌କି ଆ଼ହି ହିଲାଆତେ; ଏ଼ଦାଆଁତାକି ବାରେ କାମା କିନି ଲେ଼ବିୟ ଲ଼କୁ ଅ଼ଡ଼େ ପା଼ଚିନାରି ମାହାପୂରୁ ଇଲୁ ପିସାହାଁ ଜାହା ଜାହାରା ତା଼ସା ବୂମିତା ହାଚେରି। 11 ଏଚେଟିଏ ଏ଼ନାଆଁତାକି ମାହାପୂରୁ ଇଲୁ ପିସ୍‌ପି ଆ଼ହାମାନେ ? ଏଲେଇଞ୍ଜାହାଁ ନା଼ନୁ କାଜାରି ତଲେ ବା଼ଦିବା଼ଦା କିତେଏଁ, ଇଞ୍ଜାଁ ନା଼ନୁ ଏ଼ୱାରାଇଁ ରୁଣ୍ତା କିହାଁ ଜାହା ଜାହାରା ପା଼ଣାତା ଏ଼ୱାରାଇଁ ନିପ୍‌ହେଏଁ। 12 ଏଚେଟିଏ ବାରେ ଜୀହୁଦାତାରି ଆର୍ନା ଅ଼ଡ଼େ ଅଙ୍ଗୁରି ରାସା ଅ଼ଡ଼େ ନିୟୁଁତି ଦସ ବା଼ଗାଟି ର଼ ବା଼ଗା ମାହାପୂରୁ ଇଲୁତା ତାତେରି। 13 ଏଚେଟିଏ ନା଼ନୁ ସେଲିମିୟ ପୂଜେରାଇଁ ଅ଼ଡ଼େ ସାଦକ ଜା଼ପ୍‌ନାଣାଇଁ ଅ଼ଡ଼େ ଲେ଼ବିୟ ଲ଼କୁ ବିତ୍ରାଟି ପଦାୟଇଁ ଏ଼ ଇଲୁତି କାଜାସି କିତେଏଁ; ଏ଼ୱାରି ଡ଼଼ଇକା ମତନିୟ ତାଙ୍ଗା ମୀର୍‌ଏସି ସକ୍‌କୁର ମୀର୍‌ଏସି ହାନନ୍‌ ଡ଼ୟିତେସି; ଇଚିହିଁ ଏ଼ୱାରି ଟିକାଣାତାରି ମାଚେରି, ଏ଼ଦାଆଁତାକି ତାମି ତାୟିୟାଁକି ହା଼ସ୍‌ପିନି କାମା ଏ଼ୱାରିୱାୟି ଆ଼ତେ।

14 ହେ଼ ନା଼ ମାହାପୂରୁ, ଈ କାତାତାକି ନାଙ୍ଗେ ଅଣ୍‌ପାମୁ, ନା଼ନୁ ନା଼ ମାହାପୂରୁତି ଇଲୁ ଅ଼ଡ଼େ ଏମ୍ବାତି ମା଼ନୱି ଆ଼ହାଲି ତାକି ଏ଼ନାଆଁ କିହାମାଇଁ, ନା଼ କିହାମାନି ଏ଼ କାମା ବ୍ଡିପ୍‌ଆନି।

15 ଏଚିବେ଼ଲା ନା଼ନୁ ଜୀହୁଦା ବିତ୍ରା ଏଚେକା ଲ଼କୁଣି ଜ଼ମିନି ଦିନାତା ଅଙ୍ଗୁରି ୱିହ୍‌ନାଣି ଅ଼ଡ଼େ ପେ଼ଣ୍ତାୟାଁ ବିତ୍ରା ତାଚିମାନାଣି ଅ଼ଡ଼େ ଗା଼ଡ଼୍‌ଦେ ଲାକ ଏକ୍‌ହାମାନାଣି, ଅ଼ଡ଼େ ଜିକେଏ ଜ଼ମିନି ଦିନାତା ଅଙ୍ଗୁରି ରାସା, ଅଙ୍ଗୁରି ପା଼ଡ଼େୟି ଅ଼ଡ଼େ ତ଼ୟା ପା଼ଡ଼େୟି ଅ଼ଡ଼େ ବାରେ କୂଡ଼ାତି ଆ଼ସ୍ତି ଜିରୁସାଲମତା ତାଚିମାଚାଣି ମେସ୍ତେଏଁ; ଇଞ୍ଜାଁ ଏମିନି ଦିନା ଏ଼ୱାରି ତିନି ଆ଼ସ୍ତି ପା଼ର୍‌ତେରି, ଏ଼ ଦିନା ନା଼ନୁ ଏ଼ୱାରାଇଁ ଜାଗ୍ରାତା କିତେଏଁ। 16 ଅ଼ଡ଼େ ଜିକେଏ ଗା଼ଡ଼ାତା ସରିୟ ଲ଼କୁ ବାସା କିହିମାଚେରି, ଏ଼ୱାରି ମୀଣ୍‌କା ଅ଼ଡ଼େ ବାରେ କୂଡ଼ାତି ଆ଼ସ୍ତି ତାଚାହାଁ ଜ଼ମିନି ଦିନାତା ଜୀହୁଦାତି ମୀର୍‌କା ନ଼କିତା ଅ଼ଡ଼େ ଜିରୁସାଲମତା ପା଼ର୍‌ତେରି। 17 ଏଚେଟିଏ ନା଼ନୁ ଜୀହୁଦାତି କାଜାରି ତଲେ ବା଼ଦିବା଼ଦା କିହାଁ ଏ଼ୱାରାଇଁ ଏଲେଇଚେଏଁ, "ମୀରୁ ଜ଼ମିନି ଦିନା ଲାଗେଏ କିହାଁ ଏ଼ନିକିଁ ଲାଗେଏତି କାମା କିହିମାଞ୍ଜେରି ? 18 ମୀ ଆକୁ ଆ଼ବାୟାଁ ଏ଼ନାଆଁ ଇଲେତି କାମା କିଆତେରି ? ଅ଼ଡ଼େ ଏ଼ଦାଆଁତାକି ମା଼ ମାହାପୂରୁ ମା଼ ଲାକ ଅ଼ଡ଼େ ଈ ଗା଼ଡ଼ା ଲାକ ଈ ବାରେ ଲାଗେଏତାଣି କିହାହିଲଅସି ? ଆ଼ତିଜିକେଏ ମୀରୁ ଜ଼ମିନି ଦିନାତି ଲାଗେଏ କିହାଁ ଇସ୍ରାୟେଲ ମୁହେଁ ଅ଼ଡ଼େ କ଼ପା ତାଚିମାଞ୍ଜେରି।"

19 ଏଚେଟିଏ ଜ଼ମିନି ଦିନା ନ଼କେଏ ଜିରୁସାଲମତି ଦୁୱେରିକା ବାରେ ଆନ୍ଦେରି ଆ଼ନି ନ଼କେଏ ନା଼ନୁ ଦା଼ରାୟାଁ ବାରେ ସୁଣ୍ତାଲି ହୁକୁମି ହୀତେଏଁ, ଅ଼ଡ଼େ ଜ଼ମିନି ଦିନା ହାଲାଆ ପାତେକା ଦେଆଦୁ ଇଞ୍ଜିଁ ହୁକୁମି ହୀତେଏଁ; ଇଞ୍ଜାଁ ଜ଼ମିନି ଦିନା ଏ଼ନି ବ଼ଜୁ ବିତ୍ରା ତାଆପାରି ଇଞ୍ଜିଁ ନା଼ନୁ ନା଼ ହ଼ଲିୟାଙ୍ଗା ବିତ୍ରାଟି ଏଚର ଜା଼ଣାତି ଦୁୱେରିକାଣା ନିପ୍‌ହେଏଁ। 20 ଏଚେଟିଏ ବେ଼ବାରାଗାଟାରି ଅ଼ଡ଼େ ବାରେ କୂଡ଼ାତି ଆ଼ସ୍ତି ପା଼ର୍‌ନାରି ର଼ ପା଼ଲି ରୀ ପା଼ଲି ଜିରୁସାଲମ ପାଙ୍ଗାତା ଲା଼ଆଁୟାଁ ଡ଼ୟିତେରି। 21 ଏଚେଟିଏ ନା଼ନୁ ଏ଼ୱାରାଇଁ ଜାଗ୍ରାତା କିହାଁ ଏଲେଇଚେଏଁ, "ମୀରୁ ଏ଼ନାଆଁତାକି କ଼ଟା ଦାରିତା ଲା଼ଆଁୟାଁ ଡ଼ୟିମାଞ୍ଜେରି ? ମୀରୁ ଅ଼ଡ଼େ ୱେଣ୍ତେ ଇଲେକିଁ କିତିହିଁ ନା଼ନୁ ମିଙ୍ଗେ ଆସ୍ତାଇଁ।" ଏ଼ ବେ଼ଲାଟିଏ ଏ଼ୱାରି ଅ଼ଡ଼େ ଜ଼ମିନି ଦିନାତା ୱା଼ଆତେରି। 22 ଏଚେଟିଏ ନା଼ନୁ ଲେ଼ବିୟ ଲ଼କୁଣି ଜ଼ମିନି ଦିନା ସୁଦୁ କିହାଲି ତାକି ଜାହା ଜାହାରାଇଁ ସୁଦୁ କିହାଲି ଅ଼ଡ଼େ ୱା଼ହାଁ ଦୁୱେରିକାଣା କା଼ଚାଲି ହୁକୁମି ହୀତେଏଁ। ହେ଼ ନା଼ ମାହାପୂରୁ ନା଼ ତାକି ଈଦାଆଁ ଜିକେଏ ଅଣ୍‌ପାମୁ ଅ଼ଡ଼େ ନୀ ହା଼ରେକା କାର୍ମାଟି ନାଙ୍ଗେ ଗେଲ୍‌ପାମୁ।

23 ଏଚିବେ଼ଲାତା ଜିକେଏ ଏମିନି ଜୀହୁଦି ଲ଼କୁ ଅସ୍‌ଦଦ, ଅମନ ଅ଼ଡ଼େ ମୟାବ ଦେ଼ସାତି ଇୟାସିକାଣି ବୀହା ଆ଼ହାମାଚେରି, ଏ଼ୱାରାଇଁ ନା଼ନୁ ମେସ୍ତେଏଁ; 24 ଇଞ୍ଜାଁ ଏ଼ୱାରି କକାରି ପ଼ଦାୟାଁ ଆଦା ଅସ୍‌ଦଦ ହା଼ଡା ତଲେ କାତା ଆ଼ତେରି ଇଞ୍ଜାଁ ଜୀହୁଦି ହା଼ଡା ତଲେ କାତା ଆ଼ହାଲି ଆ଼ଡାଆତେରି, ସାମା ବାରେ କୂଲୁତି ହା଼ଡା ତଲେ କାତା ଆ଼ତେରି। 25 ଏଚେଟିଏ ନା଼ନୁ ଏ଼ୱାରି ତଲେ ବା଼ଦିବା଼ଦା କିତେଏଁ ଅ଼ଡ଼େ ଏ଼ୱାରାଇଁ ବା଼କା ଇଟିତେଏଁ ଅ଼ଡ଼େ ଆମ୍ବା ଆମ୍ବାଆରାଇଁ ୱେ଼ତେଏଁ ଇଞ୍ଜାଁ ଆମ୍ବା ଆମ୍ବାଆରି ତା଼ର୍ୟୁଁ ବା଼ଣାୟାଁ ରେଚେଏଁ, ଅ଼ଡ଼େ ଏ଼ୱାରାଇଁ ମାହାପୂରୁ ଦ଼ରୁଟି ପାର୍‌ମାଣା କିୱିକିହାଁ ଏଲେଇଚେଏଁ, "ମୀରୁ ଏ଼ୱାରି ମୀର୍‌କାକି ମୀ ମା଼ସ୍‌କା ହୀଆଦୁ ଅ଼ଡ଼େ ମୀ ମୀର୍‌କାକି ଏ଼ୱାରି ମା଼ସ୍‌କାଣି ତାଆଦୁ। 26 ଇସ୍ରାୟେଲତି ରାଜା ସଲମନ ଈ ବାରେ କାମା ତଲେ ପା଼ପୁ କିହା ହିଲାଆତେସି ? ବାରେ କୂଡ଼ାତା ଏ଼ୱାଣି ଲେହେଁତି ରାଜା ଆମ୍ବାଆସି ହିଲାଆତେସି, ଅ଼ଡ଼େ ଏ଼ୱାସି ମାହାପୂରୁତି ଜୀୱୁ ନ଼ନାସି ମାଚେସି, ଇଞ୍ଜାଁ ମାହାପୂରୁ ଏ଼ୱାଣାଇଁ ବାରେ ଇସ୍ରାୟେଲ ମୁହେଁ ରାଜା କିତେସି; ଆ଼ତିଜିକେଏ ଏଟ୍‌କା ଦେ଼ସାତି ଆୟାସିକା ଏ଼ୱାଣାଇଁ ପା଼ପୁ କିୱିକିତୁ। 27 ଆତିହିଁ ଏଟ୍‌କା ଦେ଼ସାତି ଆୟାସିକାଣି ବୀହା ଆ଼ହାଁ ମା଼ ମାହାପୂରୁ କ଼ପାଟି ସାତା ଊରାହାଁ ଈ ବାରେ କାଜା ପା଼ପୁ କିହାଲି ମା଼ମ୍ବୁ ମୀ କାତା ୱେନମି କି ?"

28 ଏଚେଟିଏ ଇଲିୟାସିବ କାଜା ପୂଜେରା ତାଙ୍ଗା ମୀର୍‌ଏସି ଜିହୟାଦାତି ର଼ ମୀର୍‌ଏସି ହରଣତି ସନ୍‌ବଲଟ ହନେଏସି ମାଚେସି; ଏ଼ଦାଆଁତାକି ଏ଼ୱାଣାଇଁ ନା଼ ନ଼କିଟି ପେ଼ର୍‌ହା ପାଣ୍ତିତେଏଁ।

29 ହେ଼ ନା଼ ମାହାପୂରୁ, ଏ଼ୱାରାଇଁ ଅଣ୍‌ପାମୁ, ଇଚିହିଁ ଏ଼ୱାରି ପୂଜେରା ପା଼ଣା ଅ଼ଡ଼େ ପା଼ଣାତି ଲେ଼ବିୟ ଲ଼କୁତି ରା଼ଜିମା଼ନାତି ଲାଗେଏ କିହାମାନେରି।

30 ଇଲେକିହିଁ ନା଼ନୁ ଏ଼ୱାରାଇଁ ଏଟ୍‌କା ଦେ଼ସାତି ବାରେ ତା଼ଣାଟି ନର୍‌ହାଁ ସୁଦୁ କିତେଏଁ ଅ଼ଡ଼େ ବାରେତି କାମାତି ଲେକା ତଲେ ପୂଜେରାଙ୍ଗା ଅ଼ଡ଼େ ଲେ଼ବିୟ ଲ଼କୁତି କାମା ତୀରି କିତେଏଁ; 31 ଅ଼ଡ଼େ ତୀରି କିହାମାନି ବେ଼ଲାତା ୱେସ୍‌କା ଅ଼ଡ଼େ ମୂଲୁ ପା଼ଡ଼େୟିତି ଦା଼ନା ତାକି ଲ଼କୁଣି ନିପ୍‌ହେଏଁ। ହେ଼ ନା଼ ମାହାପୂରୁ ନେହିଁ କାମା ତାକି ନାଙ୍ଗେ ଅଣ୍‌ପାମୁ।