ନିହିଁ 10

ବୁଟୁ ମୁଦ୍ରାତି ରା଼ଜିମା଼ନା

1 ଏ଼ ବାରେ ଆ଼ତି ଜିକେଏ ମା଼ମ୍ବୁ ର଼ ସାତା ରା଼ଜିମା଼ନା କିହାଁ ଏ଼ଦାଆଁ ରା଼ଚିମାନମି; ଅ଼ଡ଼େ ମା଼ କାଜାରି, ମା଼ ଲେ଼ବିୟ ଲ଼କୁ ଅ଼ଡ଼େ ମା଼ ପୂଜେରାଙ୍ଗା ଏ଼ଦାଆଁ ସୀଲି ୱେ଼ଚାମାନେରି। 2 ବୁଟୁ ମୁଦ୍ରା କିହାମାନାରି ଦ଼ର୍‌କା ଈୱି, ହକଲିୟ ମୀର୍‌ଏସି ନିହିଁମିୟା ସା଼ଲୱି କିନାସି ଅ଼ଡ଼େ ସିଦିକିୟ; 3 ସରାୟ, ଅସରିୟ, ଜିରିମିୟ; 4 ପସ୍‌ହୁର, ଅମରିୟ, ମଲ୍‌କିୟ; 5 ହଟୁସ୍‌, ସବନିୟ, ମଲୁକ; 6 ହାରିମ, ମରେମତ୍‌, ଅବଦିୟ; 7 ଦାନିୟେଲ, ଗିନ୍‌ନତନ, ବାରୁକ; 8 ମସୁଲମ୍‌, ଅବିୟ, ମିୟାମିନ୍‌; 9 ମାସିୟ, ବିଲ୍‌ଗୟ, ସମୟିୟ ଈୱାରି ପୂଜେରା ମାଚେରି।

10 ଅ଼ଡ଼େ ଲେ଼ବିୟ ଲ଼କୁ, ଅସନିୟ ମୀର୍‌ଏସି ଜେସୁୟ; ହେନାଦଦ ମୀର୍‌କା ବିତ୍ରାଟି ବିନୁୟି ଅ଼ଡ଼େ କଦ୍‌ମିୟେଲ। 11 ଇଞ୍ଜାଁ ତାମି ତାୟିୟାଁ, ସବନିୟ, ହଦିୟ, କଲିଟ, ପଲାୟ, ହାନନ୍‌; 12 ମିକା, ରହବ, ହସବିୟ; 13 ସକ୍‌କୁର, ସେରେବିୟ, ସବନିୟ; 14 ହଦିୟ, ବାନି, ବନିନୁ।

15 ଲ଼କୁତି କାଜାରି, ପରିୟସ, ପହତ୍‌-ମୟାବ, ଏଲମ୍‌, ସତୁ, ବାନି; 16 ବୁନ୍‌ନି, ଅସ୍‌ଗଦ, ବେବୟ; 17 ଅଦନିୟ, ବିଗ୍‌ବୟ, ଆଦିନ; 18 ଆଟେର, ହିଜକିୟ, ଅସୁର; 19 ହଦିୟ, ହସୁମ, ବେତ୍‌ସୟ; 20 ହାରିପ, ଅନାତତ୍‌, ନବୟ; 21 ମଗ୍‌ପିୟସ୍‌, ମସୁଲମ୍‌, ହେସିର; 22 ମସେସବେଲ୍‌, ସାଦକ, ଜଦ୍‌ଦୁୟ; 23 ପଲତିୟ, ହାନନ୍‌, ଅନାୟ; 24 ହସେୟ, ହନାନିୟ, ହସୁବ; 25 ହଲହେସ, ପିଲହ, ସବେକ; 26 ରହୁମ୍‌, ହସବ୍‌ନା, ମାସେୟ, 27 ଇଞ୍ଜାଁ ଅହିୟ, ହାନନ୍‌, ଅନାନ୍‌; 28 ମଲୁକ ହାରିମ ଅ଼ଡ଼େ ବାନା।

ରା଼ଜିମା଼ନାତି ଦାୟିପତି

29 ଇଞ୍ଜାଁ ଡ଼ୟାମାଚି ଲ଼କୁତି, ପୂଜେରାଙ୍ଗା, ଲେ଼ବିୟ ଲ଼କୁ, ଦୁୱେରିତା କା଼ଃନାରି, ପା଼ଚିନାରି, ମାହାପୂରୁ ଇଲୁ ସେ଼ବା କିନାରି ଅ଼ଡ଼େ ଏଚେକା ଲ଼କୁ ହା଼ରେକା ଦେ଼ସାତି କୂଲୁଟି ଜାହାରାଇଁ ଏଟ୍‌କା କିହାଁ ମାହାପୂରୁତି ମେ଼ରା ୱାକିଟି ଆ଼ହାମାଚେରି, ଏ଼ୱାରି ଅ଼ଡ଼େ ତାମି ଡକ୍ରିସିକା, ଇଞ୍ଜାଁ ଏ଼ୱାରି ମୀର୍‌କା ମା଼ସ୍‌କା, ଅ଼ଡ଼େ ବାରେ ବୁଦିଗାଟି ଲ଼କୁ; 30 ଏ଼ୱାରି ତାମି ତାୟିୟାଁ ଅ଼ଡ଼େ ତାମି କାଜାରି ତଲେ ଆଣ୍ତାହାଁ ମାହାପୂରୁତି ହ଼ଲେଏସି ମ଼ସା ତା଼ଣାଟି ହୀହାମାନି ମାହାପୂରୁତି ମେ଼ରା ତଲେ ତା଼କାଲି ଅ଼ଡ଼େ ମା଼ ପ୍ରବୁ ମାହାପୂରୁତି ବାରେ ହୁକୁମି ଅ଼ଡ଼େ ସା଼ଲୱି କିନାୟି ମେ଼ରା ମ଼ନ ହୀହାଁ ମା଼ନୱି ଆ଼ହାଲି ପାର୍‌ମାଣା କିହାଁ ଆ଼ଞ୍ଜିତେରି; 31 ଅ଼ଡ଼େ ଏଲେଇଚେରି, "ମା଼ମ୍ବୁ ଏଟ୍‌କା ଦେ଼ସାତି ଲ଼କୁକି ମା଼ ମା଼ସ୍‌କା ହୀଅମି, କି ମା଼ ମୀର୍‌କା ତାକି ଏ଼ୱାରି ମା଼ସ୍‌କାଣି ତାଅମି।"

32 "ଅ଼ଡ଼େ ଦେ଼ସାତି ଲ଼କୁ ଜ଼ମିନି ଦିନାତା ଏ଼ନି ଆ଼ସ୍ତି କି କା଼ଦିକଣ୍ତା ପା଼ର୍‌ଚାଲି ତାତିହିଁ, ମା଼ମ୍ବୁ ଜ଼ମିନି ଦିନାତା କି ଏଟ୍‌କାତି ସୁଦୁତି ଦିନାତା ଏ଼ୱାରି ତା଼ଣାଟି ଏ଼ଦାଆଁ କଡଅମି; ଅ଼ଡ଼େ ସା଼ତା ବାର୍ସାତା ବାରେ ରୀଣା କଡିନାଣି ପିହ୍‌ନମି ଅ଼ଡ଼େ ବୂମିତା ତା଼ସା କାମା କିଅମି।"

33 ଅ଼ଡ଼େ ମା଼ମ୍ବୁ ଇଲେତି ମେ଼ରା କିହାମାନମି, ମା଼ମ୍ବୁ ମାହାପୂରୁ ଇଲୁତି ସେ଼ବା କାମା ତାକି, 34 ଇଚିହିଁ ଦା଼ନା ହୀନି ରୂଟିତି କା଼ଲେଏତି କା଼ଦି ଦା଼ନା ଅ଼ଡ଼େ କା଼ଲେଏ ହିଚୁତା ହୂଡିନି ପୂଜା, ଜ଼ମିନି ଦିନା, କା଼ଡ଼କିତା ତୀରି କିହାମାନି ପାର୍ବୁତି ପୂଜା ଅ଼ଡ଼େ ସୁଦୁ ଆ଼ସ୍ତିତି ଦା଼ନା, ଇସ୍ରାୟେଲ ହେର୍‌ପିନି ପା଼ପୁତି ପୂଜା ତାକି, ଇଚିହିଁ ମାହାପୂରୁ ଇଲୁତି ବାରେ କାମା ତାକି ବାରେ ବାର୍ସା ର଼ ର଼ ସେକଲତି ତୀନି ବା଼ଗା ହୀହାଲି ମେ଼ରା କିହାମାନମି।

35 ଇଞ୍ଜାଁ ମେ଼ରାତି ରା଼ଚାମାନି ଲେହେଁ ପ୍ରବୁ ମା଼ ମାହାପୂରୁତି ପୂଜା ପିଣ୍ତା ଲାକ ହୂଡାଲି ତାକି ମା଼ ତାଞ୍ଜି କୂଡ଼ାତି ଲେକା ତଲେ ବାର୍ସା ତାକି ବାର୍ସା ତୀରି କିହାମାନି ବେ଼ଲାତା ମା଼ ମାହାପୂରୁ ଇଲୁତା ୱେସ୍‌କା ତାଚାଲି ତାକି ମା଼ମ୍ବୁ, ଇଚିହିଁ, ପୂଜେରାଙ୍ଗା, ଲେ଼ବିୟ ଲ଼କୁ ଅ଼ଡ଼େ ବାରେ ଲ଼କୁ ୱେସ୍‌କା ହୀହାଲି ତାକି ଆ଼କୁ ରା଼ଚାହାଁ ପାଦି କିତମି।

36 ଅ଼ଡ଼େ ମା଼ ବୂମିତି ମୂଲୁ ଆର୍ନା ଅ଼ଡ଼େ ବାରେ କୂଡ଼ାତି ମୂଲୁ ପା଼ଡ଼େୟି ବାର୍ସା ତାକି ବାର୍ସା ମାହାପୂରୁ ଇଲୁତା ତାଚାଲି, 37 ଅ଼ଡ଼େ ମେ଼ରାତା ରା଼ସ୍‌କି ଆ଼ହାମାନି ଲେହେଁ ମା଼ ମୀର୍‌କା ଅ଼ଡ଼େ ଜ଼ନ୍ତଜିୱେଡ଼ି ପା଼ଣ୍‌ୱା ଅ଼ଡ଼େ ମା଼ କ଼ଡି ଗରି ମୂଲୁ ବେତାତାଣି ମା଼ ମାହାପୂରୁ ଇଲୁତା, ମା଼ ମାହାପୂରୁ ଇଲୁତା ସେ଼ବା କିନି ପୂଜେରାଙ୍ଗା ତା଼ଣା ତାଚାଲି, 38 ଇଞ୍ଜାଁ ମା଼ ୱୀସ୍‌କାମାନି ଗ଼ହଁୟାଁ ଗୁଣ୍ତାତି ମୂଲୁ ବା଼ଗା ଅ଼ଡ଼େ ମା଼ ଊପ୍‌ହି ଦା଼ନା ଅ଼ଡ଼େ ବାରେ ମା଼ର୍‌କାତି ପା଼ଡ଼େୟି, ଅଙ୍ଗୁରି ରାସା ଅ଼ଡ଼େ ଜୀତ ନିୟୁଁ ପୂଜେରାଙ୍ଗା ତା଼ଣା ମା଼ ମାହାପୂରୁ ଇଲୁତି ବାକ୍ରାତା ତାଚାଲି ତାକି, ଅ଼ଡ଼େ ବୂମିତା କାମ୍ବିତି ଆ଼ସ୍ତିତି ଦସ ବା଼ଗାଟି ର଼ ବା଼ଗା ଲେ଼ବିୟ ଲ଼କୁ ତା଼ଣା ତାଚାଲି ତାକି ତୀରି କିତମି; ଇଚିହିଁ ଏ଼ ଲେ଼ବିୟ ଲ଼କୁ ମା଼ ବାରେ ତା଼ସା କିନି ଗା଼ଡ଼ାୟାଁଣା ଦସ ବା଼ଗାଟି ର଼ ବା଼ଗା ଅ଼ନେରି। 39 ସାମା ଲେ଼ବିୟ ଲ଼କୁ ଦସ ବା଼ଗାଟି ର଼ ବା଼ଗା ଅ଼ନାଟି ହାରଣତି ମୀର୍‌ଏସି ପୂଜେରା ଲେ଼ବିୟଙ୍ଗା ତଲେ ଡ଼ୟିନେସି; ଅ଼ଡ଼େ ଲେ଼ବିୟ ଲ଼କୁ ମାହାପୂରୁ ଇଲୁତି ଗା଼ଦେୟିତା ଦସ ବା଼ଗାତି ର଼ ବା଼ଗା ତାନେସି। 40 ଇଚିହିଁ ସୁଦୁ ଟା଼ୟୁତି ଆ଼ସ୍ତି ବାରେ ଅ଼ଡ଼େ ସେ଼ବା କିନି ପୂଜେରାଙ୍ଗା, ଅ଼ଡ଼େ ଦୁୱେରିତା କା଼ଃନାରି ଅ଼ଡ଼େ ପା଼ଚିନାରି ଏମିନି ବାରେ ବାକ୍ରାତା ମାନେରି, ଏମ୍ବାଆଁ ଇସ୍ରାୟେଲ ମୀର୍‌କା ଅ଼ଡ଼େ ଲେ଼ବିୟ ମୀର୍‌କା ଆର୍ନା, ଅଙ୍ଗୁରି ରାସା ଅ଼ଡ଼େ ଜୀତ ନିୟୁଁତି ପେର୍‌ୱିଆ଼ତି ଦା଼ନା ତାନେରି; ଇଞ୍ଜାଁ ମା଼ମ୍ବୁ ମା଼ ମାହାପୂରୁ ଇଲୁତି ପିହ୍‌ଅମି।