1 ଇଞ୍ଜାଁ ବାରେ ଲ଼କୁ ରଣ୍ତିଏ ମ଼ନ ତଲେ ଏ଼ୟୁ କୁଣ୍ତି ଦୁୱେରି ଦାରିତା ରୁଣ୍ତା ଆ଼ତେରି; ଅ଼ଡ଼େ ପ୍ରବୁ ଇସ୍ରାୟେଲକି ମ଼ସାତି ଏମିନି ମେ଼ରା ପତି ହୁକୁମି କିହାମାଚେସି, ଏ଼ଦାଆଁ ତାଚାଲି ତାକି ଏ଼ୱାରି ମେ଼ରା ଜା଼ପ୍‌ନି ଏଜ୍ରାଇଁ ଏଲେଇଚେରି। 2 ଏଚେଟିଏ ସା଼ତା ଲେ଼ଞ୍ଜୁତି ମୂଲୁ ଦିନାତା, ଏଜ୍ରା ପୂଜେରା ଆ଼ବାୟାଁ ଅ଼ଡ଼େ ଆୟାସିକା ଏଚେକା ଲ଼କୁ ୱେଞ୍ଜାହାଁ ତେଲ୍‌ହାଲି ଆ଼ଡିନେରି, ଏ଼ ବାରେ କୁଲମି ନ଼କିତା ଏ଼ ମେ଼ରା ପତି ତାତେସି। 3 ଏଚେଟିଏ ଏ଼ୱାସି ଏ଼ୟୁ କୁଣ୍ତି ଦୁୱେରି ଦାରିତା ଆ଼ବାୟାଁ ଅ଼ଡ଼େ ଆୟାସିକା ଏଚେକା ତେଲ୍‌ହାଲି ଆ଼ଡିନେରି, ଏ଼ ବାରେତି ନ଼କିତା ଲା଼ଇଟିଏ ମାଦେନା ପାତେକା ଏ଼ ପତିତି ପ଼ଡ଼ୱି ଆ଼ତେସି; ଅ଼ଡ଼େ ବାରେ ଲ଼କୁତି କୀର୍କା ଏ଼ ମେ଼ରା ପତିତା ଅଡାହାଁ ଡ଼ୟିତେରି।

4 ଅ଼ଡ଼େ ମେ଼ରା ଜା଼ପ୍‌ନି ଏଜ୍ରା ଏ଼ କାମା ତାକି ତିୟାରା ଆ଼ହାମାନି ମା଼ର୍‌କା ପିଣ୍ତା ଲାକ ନିତେସି; ଅ଼ଡ଼େ ତାନି ଟିଃନି ୱାକି ମତତିୟ, ସେମା, ଅନାୟ, ଉରିୟ, ହିଲ୍‌କିୟ ଅ଼ଡ଼େ ମାସେୟ ନିତେରି; ଇଞ୍ଜାଁ ତାନି ଟେ଼ବ୍ରି ୱାକି ପଦାୟ, ମିସାୟେଲ, ମଲ୍‌କିୟ, ହସୁମ, ହସ୍‌ବଦାନା, ଜିକରିୟ, ଅ଼ଡ଼େ ମସୁଲମ୍‌ ନିତେରି।

5 ଏଚେଟିଏ ଏଜ୍ରା ବାରେ ଲ଼କୁତି ନ଼କିତା ଏ଼ ପତି ଦେତେସି; ଇଚିହିଁ ଏ଼ୱାସି ବାରେ ଲ଼କୁତି ଲାକ ନିଚାମାଚେସି; ଏ଼ୱାସି ପତି ଦେଚାଲିଏ ବାରେ ଲ଼କୁ ନିତେରି। 6 ଏଚେଟିଏ ଏଜ୍ରା କାଜା ମାହାପୂରୁ ପ୍ରବୁତି ଜହରା କିତେସି। ଇଞ୍ଜାଁ ବାରେ ଲ଼କୁ ଜାହା ଜାହାରା କେୟୁ ପେର୍‌ହାଁ "ଆ଼ମେନ୍‌*, ଆ଼ମେନ୍‌" ଇଚେରି; ଅ଼ଡ଼େ ଏ଼ୱାରି ମୁନୁ କୁତାହାଁ ପ୍ରବୁଇଁ ଜହରା କିତେରି।

7 ଅ଼ଡ଼େ ଜେସୁୟ ଇଞ୍ଜାଁ ବାନି, ସେରେବିୟ, ଜାମିନ୍‌, ଅକ୍‌କୁବ, ସବତୟ, ହଦିୟ, ମାସେୟ, କଲିଟ, ଅସରିୟ, ଜସାବଦ୍‌, ହାନନ୍‌, ପଲାୟ ଅ଼ଡ଼େ ଲେ଼ବିୟ ଲ଼କୁ ବାରେ ଲ଼କୁଣି ମେ଼ରା ତେଲ୍‌ହି କିତେରି; ଅ଼ଡ଼େ ଲ଼କୁ ଜାହାରା ଟା଼ୟୁତା ନିଚାହାଁ ଡ଼ୟିତେରି। 8 ଇଞ୍ଜାଁ ଏ଼ୱାରି ତୀର୍‌ପୁ ତଲେ ମାହାପୂରୁ ମେ଼ରା ପତି ପ଼ଡ଼ୱି ଆ଼ତେରି ଅ଼ଡ଼େ ଏ଼ୱାରି ଏମ୍ବାତି ଅଣ୍‌ପୁ ତେଲ୍‌ହି କିତେରି, ଏଚେଟିଏ ଏ଼ ଲ଼କୁ ପ଼ଡ଼ୱି ଆ଼ତାଣି ତେଲ୍‌ହିତେରି।

9 ଇଞ୍ଜାଁ ସା଼ଲୱି କିନି ନିହିଁମିୟା ଅ଼ଡ଼େ ମେ଼ରା ଜା଼ପ୍‌ନି ଏଜ୍ରା ପୂଜେରା ଅ଼ଡ଼େ ଲ଼କୁଣି ଜା଼ପ୍‌ନି ଲେ଼ବିୟ ଲ଼କୁ ବାରେତି ଏଲେଇଚେରି, "ନୀଞ୍ଜୁତି ଦିନା ପ୍ରବୁ ମୀ ମାହାପୂରୁ ତାକି ସୁଦୁ; ଦୁକୁ କିଆଦୁ କି ଡ଼ୀଆଦୁ।" ଇଚିହିଁ ମେ଼ରାତି କାତା ୱେଞ୍ଜାଲିଏ ବାରେ ଲ଼କୁ ଡ଼ୀତେରି। 10 ଅ଼ଡ଼େ ନିହିଁମିୟା ଏ଼ ଲ଼କୁଣି ଏଲେଇଚେସି, "ମୀ ଜିରୁତା ହାଜୁ ନେହିଁ କା଼ଦି ତିଞ୍ଜୁ ଅ଼ଡ଼େ ଡ଼ାକ୍‌ହି ଦିଣ୍‌ସୁ ଗହ୍‌ଦୁ ଅ଼ଡ଼େ ଆମ୍ବାଆରାକି ଏ଼ନାୟି ହିଲେଏ ଏ଼ୱାରାକି ଇଚାଣି ପାଣ୍ତାଦୁ; ଇଚିହିଁ ନୀଞ୍ଜୁତି ଦିନା ମା଼ ପ୍ରବୁତି କ଼ସମି ସୁଦୁତି ଦିନା, ମୀରୁ ଦୁକୁ ଆ଼ଆଦୁ; ଇଚିହିଁ ପ୍ରବୁତି ରା଼ହାଁ ମୀ ବା଼ଡ଼୍‌ୟୁ।"

11 ଇଲେକିହିଁ ଲେ଼ବିୟ ଲ଼କୁ ବାରେ ଲ଼କୁଣି ସାପି କିହାଁ ଏଲେଇଚେରି, "ସାପି ଆ଼ଦୁ, ନୀଞ୍ଜୁ ସୁଦୁତି ଦିନା! ମୀରୁ ଦୁକୁ ଆ଼ଆଦୁ।" 12 ଏଚେଟିଏ ଲ଼କୁ ତାମ୍‌ଙ୍ଗେ ୱେ଼କ୍‌ହାମାନି କାତା ବାରେ ତେଲ୍‌ହାଲିଏ ଏ଼ୱାରି ବାରେ ତିଞ୍ଜାଲି ଉଣ୍ତାଲି ଅ଼ଡ଼େ ଇଚାଣି ପାଣ୍ତାଲି ଅ଼ଡ଼େ ହା଼ରେକା ରା଼ହାଁ କିହାଲି ଜାହାରା ଜାହାରା ଜିରୁତା ହାଚେରି।

13 ତାନି ଅ଼ର ଦିନା ବାରେ ଲ଼କୁତି ତାଞ୍ଜି କୂଡ଼ାତି କାଜାରି ପୂଜେରାଙ୍ଗା ଅ଼ଡ଼େ ଲେ଼ବିୟ ଲ଼କୁ ମେ଼ରାତି ବ଼ଲୁ ଅଣ୍‌ପାଲି ତାକି ଜା଼ପ୍‌ନି ଏଜ୍ରା ତା଼ଣା ରୁଣ୍ତା ଆ଼ତେରି। 14 ଏ଼ୱାରି ମ଼ସା ତା଼ଣାଟି ହୀହାମାନି ପ୍ରବୁତି ଈ ହୁକୁମି ମେ଼ରାତା ରା଼ସ୍‌କି ଆ଼ହାମାନାଣି ମେସ୍ତେରି, ସା଼ତା ଲେ଼ଞ୍ଜୁତି ପାର୍ବୁ ବେ଼ଲାତା ଇସ୍ରାୟେଲ ମୀର୍‌କା ଗଚାୟାଁ ଗୂଡ଼ାତା ଏ଼ନିକିଁ ବାସା କିନେରି; 15 ଇଞ୍ଜାଁ ଏ଼ୱାରି ତାମି ବାରେ ଗା଼ଡ଼ା ଅ଼ଡ଼େ ଜିରୁସାଲମତା ଈ କାତା ୱେ଼କ୍‌ହାନା ୱେହ୍‌ନେରି, "ମୀରୁ ରା଼ସ୍‌କି ଆ଼ହାମାନି ଲେହେଁ ଗଚାୟାଁ ଗୂଡ଼ା ତିୟାରା କିହାଲି ହ଼ରୁତା ହାଜାହାଁ ଜୀତ ଗମାୟାଁ ଅ଼ଡ଼େ ଜା଼ଡ଼ା ଜୀତ ଗମାୟାଁ ବେତ୍‌ଲା ଗମାୟାଁ କାଜୁରି ମାଟାୟାଁ ଅ଼ଡ଼େ ଗୁୟେଡ଼ି ମା଼ର୍‌ନୁତି ଗମାୟାଁ ତାଦୁ।"

16 ଏଚେଟିଏ ଲ଼କୁ ପାଙ୍ଗାତା ହାଜାହାଁ ଏ଼ ବାରେ ତାଚାହାଁ ଜାହାରା ତାକି ଗଚାୟାଁ ଗୂଡ଼ା ତିୟାରା କିତେରି, ବାରେ ଜା଼ଣା ଜାହାରା ଜାହାରା ଇଲୁ ଲାକ ଅ଼ଡ଼େ ଆଂଗେଣିତା ଅ଼ଡ଼େ ମାହାପୂରୁ ଇଲୁତି ଆଂଗେଣିତା ଏ଼ୟୁ ଦେନି ଡେ଼ଡ଼ାତା ଅ଼ଡ଼େ ଇପ୍ରୟିମ ଦୁୱେରି ଡେ଼ଡ଼ାତା ତିୟାରା କିତେରି। 17 ଇଞ୍ଜାଁ ବାବିଲଟି ୱେଣ୍ତା ୱା଼ହାମାନି ଲ଼କୁତି ବାରେ କୁଲମି ଗଚାୟାଁ ଗୂଡ଼ା ତିୟାରା କିହାଁ ଏମ୍ବାଆଁ ବାସା କିତେରି; ନୂନତି ମୀର୍‌ଏସି ଜେସୁୟ ବେ଼ଲାଟିଏ ଏ଼ ଦିନା ପାତେକା ଇସ୍ରାୟେଲ ମୀର୍‌କା ଇଲେକିଁ ରା଼ହାଁ କିହା ହିଲାଆତେରି। ଏ଼ଦାଆଁତାକି ହା଼ରେକା ଗାଡି ରା଼ହାଁ ଆ଼ତେ। 18 ଅ଼ଡ଼େ, ଏଜ୍ରା ମୂଲୁ ଦିନାଟିଏ ରା଼ନି ଦିନା ପାତେକା ବାରେ ଦିନା ମାହାପୂରୁତି ମେ଼ରା ପତି ପ଼ଡ଼ୱି ଆ଼ତେସି। ଇଞ୍ଜାଁ ଲ଼କୁ ସା଼ତା ଦିନା ପାତେକା ପାର୍ବୁ କିତେରି; ଅ଼ଡ଼େ ମେ଼ରା ତଲେ ଆ଼ଟା ଦିନାତା ହା଼ରେକା କୁଟମି ରୁଣ୍ତା ଆ଼ତେରି।