Neemias 4

ତିୟାରା କିନି ତା଼ଣା ଗଡ଼୍‌ହା

1 ସାମା ମା଼ମ୍ବୁ କ଼ଟା ତିୟାରା କିହିମାନମି ଇଞ୍ଜିଁ ୱେଞ୍ଜାହାଁ ସନ୍‌ବଲଟ ହା଼ରେକା କ଼ପା ଅ଼ଡ଼େ କାର୍‌ବି ଆ଼ହାଁ ଜୀହୁଦି ଲ଼କୁଣି କାକ୍‌ହେସି। 2 ଅ଼ଡ଼େ ଏ଼ୱାସି ତାନି ତାୟିୟାଁ ଅ଼ଡ଼େ ସମରିୟା ରିଜାରି କ଼ସ୍‌କା ନ଼କିତା ଈ କାତା ଏଲେଇଚେସି, "ଈ ବା଼ଡ଼୍‌ୟୁ ହିଲାଆ ଜୀହୁଦି ଲ଼କୁ ଏ଼ନାଆଁ କିହିମାନେରି ? ଏ଼ୱାରି ଏ଼ନାଆଁ କ଼ଟା ବିତ୍ରା ସୁଣ୍ତା କଡାହାଁ ଡ଼ୟିନେରି ? ଏ଼ୱାରି ଏ଼ନାଆଁ ପୂଜା କିନେରି ? ଏ଼ୱାରି ଏ଼ନାଆଁ ର଼ ଦିନାଟିଏ ରା଼ପ୍‌ନେରି ? ଏ଼ୱାରି ଏ଼ନାଆଁ କାତିତା ୱେହାମାନି ୱାଲିତି ଡ଼େୱାନା ୱେଣ୍ତେ ଜୀୱୁ କିନେରି ?" 3 ଏଚିବେ଼ଲା ଅମନିୟ ଟବିୟ ଏ଼ୱାଣି ଦାରିତା ମାଚେସି, ଅ଼ଡ଼େ ଏ଼ୱାସି ଏଲେଇଚେସି, "ଏ଼ୱାରି ଏ଼ନାଆଁ ତିୟାରା କିହିମାନେରି କଲିୟା ତା଼କିତିହିଁ ଏ଼ୱାରି ୱାଲ୍‌କା କାତି ରିହାହାନେ।" 4 ହେ଼, ମା଼ ମାହାପୂରୁ, ମା଼ କାତା ୱେନାମୁ, ମା଼ମ୍ବୁ ହୀଣି ଆ଼ହାମାନମି; ଏ଼ୱାରି ହୀଣି କିହିମାନାୟି ଏ଼ୱାରି ମୁହେଁ ଆ଼ପେ, ଅ଼ଡ଼େ ଏଟ୍‌କା ଦେ଼ସାତାରି ଏ଼ୱାରାଇଁ ଦସା ଅ଼ହାଁ ବାରେ ମୀଞ୍ଜାପେରି; 5 ଅ଼ଡ଼େ ଏ଼ୱାରି ପା଼ପୁତି ପ୍ଡିକ୍‌ଆନି ଅ଼ଡ଼େ ନୀ ନ଼କିତା ଏ଼ୱାରି ପା଼ପୁ ମେଣ୍‌ଙ୍ଗାଆପେ; ଇଚିହିଁ ତିୟାରା କିହିମାନାରି ନ଼କିତା ଏ଼ୱାରି ନିଙ୍ଗ କାର୍‌ବି କିହାମାଞ୍ଜାନେରି। 6 ଇଲେକିହିଁ ମା଼ମ୍ବୁ କ଼ଟା ତିୟାରା କିତମି ଅ଼ଡ଼େ କ଼ଟାତି କାତି ଆଦା ପାତେକା କିୱିଆ଼ତେ ଇଚିହିଁ ଲ଼କୁତି କାମା କିହାଲି ମ଼ନ ମାଚେ। 7 ସାମା ଜିରୁସାଲମ କ଼ଟା ତିୟାରା କିନି କାମା ନ଼କିତା ହାଜିମାନେ ଅ଼ଡ଼େ ଡୀହାମାନି ଟା଼ୟୁ ବାରେ ସୁଣ୍ତ୍‌କି ଆ଼ହିମାନେ, ଈ କାତା ୱେଞ୍ଜାହାଁ ସନ୍‌ବଲଟ ଅ଼ଡ଼େ ଟବିୟ ଇଞ୍ଜାଁ ଆରବିୟ, ଅମନିୟ ଅ଼ଡ଼େ ଅସ୍‌ଦଦିୟ ଲ଼କୁ ହା଼ରେକା କାର୍‌ବି ଆ଼ତେରି। 8 ଇଞ୍ଜାଁ ଏ଼ ବାରେ ଜା଼ଣା ଜିରୁସାଲମତା ହାଜାହାଁ ଏ଼ୱାରି କ଼ପାଟି ଜୁଜୁ କିହାଲି ଅ଼ଡ଼େ ଏ଼ ବିତ୍ରା ଗଡ଼୍‌ହା କିହାଲି ରହେଁଏ କାତା ଆ଼ତେରି। 9 ସାମା ମା଼ମ୍ବୁ ଏ଼ୱାରି ତାକି ମା଼ ମାହାପୂରୁ ନ଼କିତା ପ୍ରା଼ତାନା କିତମି, ଅ଼ଡ଼େ ଲା଼ଆଁୟାଁ ମାଦେନା ଏ଼ୱାରି କ଼ପାଟି କା଼ଚାହାଁ ଡ଼ୟିତମି। 10 ଏଚିବେ଼ଲା ଜୀହୁଦା ଏଲେଇଚେସି, "ବ଼ଜୁ ଡେ଼କିନାରା ବା଼ଡ଼୍‌ୟୁ ଊଣା ଆ଼ହାମାନେ, ଅ଼ଡ଼େ ହା଼ରେକା ଡୀତି କାତିୟାଁ ମାନୁ; ଏ଼ଦାଆଁତାକି ମା଼ର କ଼ଟାତି ତିୟାରା କିହାଲି ଆ଼ଡାଆୟି।" 11 ଇଞ୍ଜାଁ ମା଼ ସାତ୍ରୁୟାଁ ଏଲେଇଞ୍ଜାତେରି, "ମା଼ମ୍ବୁ ଏ଼ୱାରି ତା଼ଣା ହାଜାହାଁ ଏ଼ୱାରାଇଁ ପା଼ୟାହାଁ ଅ଼ଡ଼େ ଏ଼ୱାରି କାମା ପିସ୍‌ପି କିନି ପାତେକା ଏ଼ୱାରି ପୁନଅରି କି ମେହ୍‌ଅରି।" 12 ଅ଼ଡ଼େ ଏ଼ୱାରି ଦାରି ବାସା କିହାମାନି ଜୀହୁଦି ଲ଼କୁ ବାରେ ଟା଼ୟୁଟି ୱା଼ହାଁ ଦସ ପା଼ଲି ମାଙ୍ଗେ ଏଲେଇଞ୍ଜାତେରି, "ମୀରୁ ମା଼ ତା଼ଣା ୱେଣ୍ତା ୱା଼ନାୟି ମାନେ।" 13 ଏ଼ଦାଆଁତାକି ନା଼ନୁ କାତି ଡା଼ୟୁୱାକି ଡ଼଼ଇତି ମେ଼ଲା ଟା଼ୟୁତା ଲ଼କୁଣି ତାମି କୁଟମିତି ଲେକା ତଲେ ଏ଼ୱାରାଇଁ କାଣ୍ତା, ବା଼ଲା ଅ଼ଡ଼େ ଆପ୍‌କା ତଲେ କା଼ପି କିତେଏଁ। 14 ଏଚେଟିଏ ନା଼ନୁ ସିନିକିତେଏଁ ଅ଼ଡ଼େ ନିଙ୍ଗାହାଁ ମା଼ନିଗାଟି କାଜାରାଇଁ ଅ଼ଡ଼େ ସା଼ଲୱି କିନାରାଇଁ ଅ଼ଡ଼େ ଏଟ୍‌କାତି ଲ଼କୁଣି ଏଲେଇଚେଏଁ, "ମୀରୁ ଏ଼ୱାରି ତାକି ଆଜାଆଦୁ; ପ୍ରବୁଇଁ ଅଣ୍‌ପାଦୁ, ଏ଼ୱାସି କାଜାସି ଅ଼ଡ଼େ ଆଜିହ଼ପେତାସି, ଅ଼ଡ଼େ ମୀରୁ ମୀ ତାୟିୟାଁ, ମୀର୍‌କା ମା଼ସ୍‌କା ମୀ ଡକ୍ରିସିକା ଇଞ୍ଜାଁ ଇଲୁ ତାକି ଜୁଜୁ କିଦୁ।"

କାମା ୱେଣ୍ତେ କିନାୟି

15 ଡା଼ୟୁ ମା଼ ସାତ୍ରୁୟାଁ କାତା ମାଙ୍ଗେ ପୁଣ୍‌ମ୍ବି ଆ଼ତେ ଅ଼ଡ଼େ ମାହାପୂରୁ ଏ଼ଦାଆଁ ତୀରି କିଆତେସି, ଈ କାତା ଏ଼ୱାରି ୱେଞ୍ଜାଲିଏ, ମା଼ମ୍ବୁ ବାରେତମି ଜାହା ଜାହାରା କ଼ଟାକାତି ଇଟିନି କାମାତା ୱେଣ୍ତା ହାଚମି। 16 ଏ଼ ଦିନାଟିଏ ମା଼ ଆଦା ହ଼ଲିୟାଙ୍ଗା କାମା କିତେରି ଅ଼ଡ଼େ ଆଦା ବା଼ଲାୟାଁ, ଆଡୁ ପା଼ଟା, ଆପ୍‌କା ବକ ପା଼ଟା ଆସାହାଁ ଡ଼ୟିତେରି; ଇଞ୍ଜାଁ ସା଼ଲୱି କିନାରି ଜୀହୁଦାତି ବାରେ କୂଡ଼ାତି ଜେ଼ଚ ଡ଼ୟିତେରି। 17 ଆମିନିଗାଟାରି କ଼ଟାତି କାମା କିତେରି ଅ଼ଡ଼େ ଆମିନିଗାଟାରି ବ଼ଜୁ ଡେ଼କିତେରି ଏ଼ୱାରି ତା଼ମ୍ବୁଏ ବ଼ଜୁ ଡେ଼କିତେରି, ଅ଼ଡ଼େ ବାରେ ଜା଼ଣା ର଼ କେୟୁଟି କାମା କିତେରି ଅ଼ଡ଼େ ର଼ କେୟୁଟି ଆ଼ସ୍ତି ଆସ୍ତେରି।

ଅ଼ଡ଼େ ତିୟାରା କିନାରି ବାରେ ଜା଼ଣା ଜାହା ଜାହାରା ଟେଡେଲିତା କାଣ୍ତା ଦସାହାଁ ଏଲେକିହିଁଏ କାମା କିତେରି। ଇଞ୍ଜାଁ ତୀତ୍ରି ଊକିନାରି ମା଼ ଦାରିତା ଡ଼ୟିତେରି।

ଏଚେଟିଏ ମା଼ମ୍ବୁ କାଜା ଲ଼କୁଣି ଅ଼ଡ଼େ ସା଼ଲୱି କିନାରି ଅ଼ଡ଼େ ଏଟ୍‌କାତି ଲ଼କୁଣି ଏଲେଇଚମି, "କାମା ହା଼ରେକା ବ଼ଜୁ ଅ଼ଡ଼େ ଗାଡି ମାନେ, ଇଞ୍ଜାଁ ମା଼ର କାତି ଲାକ ରଅଣି ତା଼ଣାଟି ହେକ ଡ଼ୟାମାନାୟି।

ଏ଼ଦାଆଁତାକି ଏମିନି ଟା଼ୟୁତା କମୁ ହା଼ଡା ୱେଞ୍ଜେରି, ଏ଼ ଟା଼ୟୁଟି ମା଼ ତା଼ଣା ୱା଼ଦେରି; ମା଼ ମାହାପୂରୁ ମା଼ ୱାକିଟି ଜୁଜୁ କିନେସି।"

ଇଲେକିହିଁ ମା଼ମ୍ବୁ ଏ଼ କାମାତା କସ୍ତ କିତମି, ଇଞ୍ଜାଁ ଲା଼ଇ ୱେ଼ୟିନି ବେ଼ଲାଟିଏ ହୁକାୟାଁ ତ଼ଞ୍ଜାଆ଼ନି ପାତେକା ଏ଼ୱାରି ଆଦା ଲ଼କୁ ବା଼ଲାୟାଁ ଆସ୍ତେରି।

ଏଚିବେ଼ଲାତା ମା଼ମ୍ବୁ ଅ଼ଡ଼େ ଲ଼କୁଣି ଏଲେଇଚମି, "ବାରେ ଲ଼କୁ ଲା଼ଆଁୟାଁ ବେ଼ଲା ଜାହା ଜାହାରା ହ଼ଲେଏଣା ତଲେ ଜିରୁସାଲମ ବିତ୍ରା ଡ଼ୟାପେରି, ଏଚେଟିଏ ଏ଼ୱାରି ଲା଼ଆଁୟାଁ ମାଙ୍ଗେ କା଼ତାନେରି ଅ଼ଡ଼େ ମାଦେନା କାମା କିହାଲି ଆ଼ଡିନେରି।"

ଇଲେକିହିଁ ମା଼ମ୍ବୁ କି ମା଼ ତାୟିୟାଁ କି ମା଼ ହ଼ଲିୟାଙ୍ଗା କି ମା଼ ଜେ଼ଚ ମାନି କା଼ଃନାରି ଆମ୍ବାଆରି ଜାହାରା ଆଙ୍ଗାଟି ହିମ୍ବରି ହୁକ୍‌ଆତମି, ଅ଼ଡ଼େ ବାରେ ଜା଼ଣାତମି ଜାହା ଜାହାରା ସାଜୁ ତଲେ ଏ଼ୟୁ ଦାରିତା ହାଚମି।