1 Bara durii Allaahan yeroo baayʼee fi karaa adda addaatiin nabiiʼiyyootaan abbootii keenyatti dubbatee ture; 2 bara dhumaa kana keessa garuu Ilma isaa kan inni dhaaltuu waan hundumaa godhee muudeen nutti dubbate; isumaanis addunyaawwan uume. 3 Ilmi calaqqisa ulfina Allaaha ti; eenyummaa Allaahas akkuma jirutti mulʼisa; dubbii isaa humna qabeessa sanaanis waan hunda hirkisee baata. Innis erga cubbuu keenya nurraa qulqulleessee booddee shamaayʼun irra mirga Allaah ulfina qabeessa sanaa taaʼe. 4 Akkuma maqaan inni dhaale sun kan malaʼikkootaa caalaa guddaa taʼe sana innis malaʼikkoota caalaa guddaa dha.

5 Allaahan malaʼikkoota keessaa isa kamiin,

"Ati Ilma koo ti;

ani harʼa si dhalcheera"*1:5 Zab 2:7

Yookaan isa kamiin,

"Ani isaaf Abbaa nan taʼa;

innis Ilma naa taʼa"*1:5 2Sm 7:14; 1Sn 17:13

jedhee beeka? 6 Akkasumas Allaahan yommuu Ilma isaa hangafa gara addunyaa kanaatti ergutti,

"Malaʼikkoonni Allaaha hundi isa haa waaqeffatan"*1:6 KeD 32:43

jedha. 7 Yommuu waaʼee malaʼikkootaa dubbatus,

"Inni malaʼikkoota isaa hafuurota,

tajaajiltoota isaa immoo arraba ibiddaa godha"*1:7 Zab 104:4

jedha. 8 Waaʼee Ilmaa garuu akkana jedha;

"Yaa Allaah, teessoon kee bara baraa hamma bara baraatti ni jiraata;

bokkuun qajeelummaas bokkuu mootummaa keetii ni taʼa.

9 Ati qajeelummaa jaallatte; jalʼina immoo ni jibbite;

kanaafuu Allaahan, Allaahan kan kee zayitii gammachuutiin si dibee,

hiriyoota kee si caalchise."*1:9 Zab 45:6,7

10 Akkasumas inni akkana jedha;

"Yaa Gooftaa, ati jalqabatti lafa hundeessite;

shamaayʼuniiwwanis hojii harka keetii ti.

11 Isaan ni badu; ati garuu ni jiraatta;

hundumti isaanii akkuma uffataa ni moofaʼu;

12 ati akkuma wayyaatti isaan marta;

isaan akkuma uffataatti geeddaramu;

ati garuu sanuma;

umuriin kees gonkumaa dhuma hin qabu."*1:12 Zab 102:25-27

13 Allaahan malaʼikkoota keessaa isa kamiin,

"Hamma ani diinota kee ejjeta miilla keetii godhutti,

gara mirga koo taaʼi"*1:13 Zab 110:1

jedhe? 14 Malaʼikkoonni hundinuu hafuurota tajaajilan kanneen warra fayyina dhaalan tajaajiluuf ergaman mitii?