BaRoma 13

Zwisa pasi kuButungamili gweTjaba

1 Wose nhu ngaabe pasi kwesimba lebutungamili gupehhugwi kukwe, ngobe akuna butungamili kuhhe kwegunobva kuNdzimu; kakale igogo guyapo gwakahagwa ndiNdzimu. 2 Ndizo ke, kene yani unomilana nebutungamili, unomilana netjakahagwa ndiNdzimu, kakale ibabo banomilana nago banowhotongewa. 3 Ngobe batungamili abatohlisa kubakalulama, banohlisa kuna banothama zwakayipa. Ngono awusingahake hla butungamili thama tjakalulama, gowhokulumbidza, 4 ngobe ntungamili un’hingi weNdzimu unohingila kuti kukululamile. Koga hapa uthama tjakayipa, ihla; ngobe simba lelanga lebutungamili lohinga; ngobe gun’hingi weNdzimu, unolanga batjinyi. 5 Ndizo umwe newumwe wakafanila ba pasi kwenlayo, kusi ngentha yekuti angalangiwa koga, koga nangentha yehana.

6 Ndizo nentha yayikoku lipani luketo; ngobe batungamili bahingi beNdzimu, banohinga n’hingo wabo lubaka gose. 7 Lipani kose kwakafanila lipiwa, lipani luketo kubaketisi, ibani nemazwibhato kuna ibabo bamubugalo gweyetigwa mazwibhato, lemekedzani ibabo bamubugalo gwelemekedzewa.