1 Kwaka kwasala mahhuba mabili kuti kube Phasika nenzano weTjinkwa Tjisina Mbidzo, baphirisiti bakulu nebakwali baka behaka zila yakasumbikala yabangabhata nayo Yesu, bawumbulaye; 2 bakati, "Kusibe palubaka gwenzano, ngobe banhu bangabva bemusa hhoba."

3 Kwakati ali muBhethani mun'umba yaSimoni wakatongoba nebugwele gwemapele, atjigele akapeyama* edla, kukaswika nkadzimayi akasenga kumbwana tjakatiwa nebgwe linoyi alabhasita, tjemafuta enadi akwako, anantengo upehhugwi, akahha akatjihhula, akaadululila pan'holo waYesu. 4 Kuna bamwe bakamon'wa bakalebelesana, beti, "Mafuta iyawa azanisigwani wali? 5 Ngobe mafuta iyawa aangatengesewa nentengo unopinda madinari ali makhulu matatu* kukapiwa bahayi." Bakan'un'una nekwayetiwa nenkadzimayi iwhoyu.

6 Koga Yesu wakati, "Siyanani naye; mowundziyidzilani wali? Wathama tjinhu tjakanaka kundili. 7 Kana bahayi mogala munabo lubaka gose, hapa muda mungabatila tjakanaka kene gupi lubaka; koga imi atitowhogala tili tose lubaka gose. 8 Iye wathama tjaanotubula; wahhodza mbili wangu mafuta kutjina lubaka, ewululamisila biganyiwa. 9 Lebeswa, ndoti kumuli, kene poni panowhosumikigwa ndebo mbuya muhango yose, ikoku kwayetiwa nenkadzimayi iwhoyu kowholebgwa nekwako, kuli tjikumbuludzo nekukwe."

10 Judasi Isikariyoti, umwe webaligumi nebabili, wakayenda kubaphirisiti bakulu kuti abatengesele Yesu. 11 Bakati bekuwha bakahanha, bakawunghadzabgwe kuti banowhowumpa mari. Judasi wakahaka zila yakalulama kuti atengese Yesu.

12 Muhhuba lekutanga lenzano weTjinkwa Tjisina Mbidzo, lilihhuba laka libhayiwa mhwizana yephasika, badiyiwa baYesu bakati kuwunli, "Mohaka kuti tinomubaakanyila poni kuti mudlile Phasika?"

13 Wakatuma badiyiwa babe babili, eti kubali, "Yendani kunzi-nkulu, mowhohangana nenlume wakasenga tjilongo tjevula, muwuntobele, 14 paanowhongina, muti kumweni wenzi, ‘Ndhiyi wati, iponi n'umba yebezi, pandinowhodlila Phasika ndina badiyiwa bangu?’ 15 Unowhomulakidza n'umba whulu ipehhugwi, ina zwidla zose yakalinda hingisiwa; mutibaakanyile muyili."

16 Badiyiwa bakayenda, bakangina munzi-nkulu, bakawana kuli sekwaababudza; baka baakanya zodliwa zwePhasika.

17 Kwakati kwatjibe madekwana akabuya nebadiyiwa babe bali gumi nebabili. 18 Bakati baligele bedla, Yesu akati, "Lebeswa, ndoti kumuli, umwe wenyu unowhonditengesa, iye unodla nami."

19 Bakahhigwa nebuyendasi, umwe newumwe akati kuwunli, "Kungaba imi?"

20 Wakati kubali, "Uwumwe webali gumi nebabili, unoseba nami mundilo. 21 Ngoba Nkololo wenhu unoyenda sekwakwaka kwagwa nekukwe, koga ndoti kwakawubangalalila iwhoyo nlume unowhotengesa Nkololo wenhu! Kwakowhoba kuhine hapa aasakazwagwa."

22 Bakati betjadla, Yesu akatola tjinkwa, akaboka kuNdzimu, akatjipemula akabapa eti, "Tolani; umbili wangu iwhoyu."

23 Akatola nkombe, akaboka, akabapa, bakan'wa bose. 24 Akati kubali, "Malopa angu etjibvumilano iyawa, malopa anotebuligwa banjinji. 25 Lebeswa, ndoti kumuli, anditjowhon'wa kakale kwemitjelo yemahhambi, kudza kuba ilelo hhuba landinowhokun'wa kuli kutshwa mubumambo gweNdzimu."

26 Bakati batjimba lumbo gwakakwagwa, bakabhuda bakayenda kuDombo leMitoba.

27 Yesu wakati kubali, "Mose mowhopalala; ngobe kwakakwagwa kuti, ‘Ndowhobulaya nlisi, mhwizi dzikapalala.’ 28 Hule kwemusiwa kwangu, ndowhobambeli kwenyu kuyenda kuGalile."

29 Phethiro wakati kuwunli, "Nekene bose bepalala, imi andingamusiye."

30 Koga Yesu wakati kuwunli, "Lebeswa, ndoti kukuli, igogu busiku gwanasi, gukurume lisanhu lalila kabili, nowhoba watjindilandula katatu."

31 Koga Phethiro akaleba nemasimba ose eti, "Kene kulifa namwi, anditowhomulandula."

Bose bakajalo bo.

32 Bakaswika pabugalo gunoyi Getshemani; akati kubadiyiwa babe, "Galani pano, nditjanotembezela." 33 Wakatola Phethiro, naJakobe naJohane akayenda nabo, akatangisa hhigwa nebuyendasi nedziyidzika kwazo. 34 Akaba eti kubali, "Meya yangu ihhele buyendasi kwazo, kwandingafa; galani pano, mulinde."

35 Wakayenda mbedlanyana, akawila pasi, akatembezela kuti hapa kuyetikala, lubaka igogu ngaguwumpinde. 36 Wakati, "Abha*, Tate! Zose zwinhu kumuli zoyetikala; dusani nkombe iwhoyu kundili; koga kusibe ngekuda kwangu, koga kube ngekuda kwenyu."

37 Wakahanduka akabawana bakayizela, akaba eti kuna Phethiro, "Simoni, wakayizela? Wakonegwa linda kwe awa in'ompela? 38 Lindani, mutembezele kudze musingine mukulikwa; meya inoda, koga nyama ayina masimba."

39 Wakabgwilila akanotembezela kakale epamha matama iwo zwawo. 40 Wakahanduka kakale, akabawana balilele, ngobe bakabekuligwa newhope; baka besingatjazibe kuti bawun'handule betini.

41 Wakahanduka gwebutatu, akati kubali, "Mutjilele munyaluluka zwenyu? Kwakwana; lubaka gwatjiswika; Nkololo wenhu unotengesewa mumaboko ebatjinyi. 42 Milikani, ayindeni; lingani, ntengesi wangu waswika."

43 Ipapo etjalebeleka, kwakaswika Judasi, umwe webaligumi nebabili, ehha nembunga webanhu bakasenga mabhangatjeke nedziswimbo; bebva kubaphirisiti bakulu nebakwali nebawhola. 44 Ntengesi waka abapa tjilakidzilo, eti, "Iwhoyo wandinowhoputa ndiye; muwumbhate, muyende naye makawunlisa."

45 Wakati eswika akayenda kuwunli nekulibilidza, akati, "Ndhiyi!" Akawumputa. 46 Bakawumbhata, bakayenda naye. 47 Koga umwe webaka balimile ipapo wakahomola bhangatjeke, akatema nlanda wemphirisiti upehhugwi akawunthubula zebe. 48 Yesu wakati kubali, "Mabhuda makasenga mabhangatjeke nedziswimbo kunga kunoyi monobhata hhibava koga muwhobhata imi? 49 Hhuba nehhuba tatili toseni muthempeli ndidiya, koga amuzotongondibhata. Koga ke whalo ngadzihhadzisike."

50 Bose bakawunsiya, bakatihha.

51 Umwe nhhuhha waka ewuntobela, akapombela jila lelineni esakambala tjimwe kusi; bakawumbhata, 52 koga wakasubvunuka, akasiya jila lelineni, akatihha elimbudlo.

53 Bakayendisa Yesu kumphirisiti upehhugwi; nebaphirisiti bakulu nebawhola nebakwali bose baka bakakubungana. 54 Phethiro wakawuntobela eli tjakulenyana, ekadza akanongina mun'ha wemphirisiti upehhugwi; waka aligele nebalindi, bedziya moto. 55 Baphirisiti bakulu nelubahhe gose bakahaka busupi gwaka gungathama kuti Yesu abulawe; koga bakaguhaya. 56 Ngobe banjinji bakapa busupi gwemanyepwa nekukwe, kakale zwilebo zwabo zwaka zwisingayendilane.

57 Bamwe bakamilika beleba busupi gwemanyepwa, beti, 58 "Takawha eti, ‘Ndowhokolomola thempeli ileli lakabakiwa nemaboko, ndikabaka limwe mumahhuba matatu, lisakabakiwa nemaboko.’ " 59 Kene ibabo, busupi gwabo aguzoyendilana.

60 Kukaba kumilika mphirisiti upehhugwi pakati kwabo ekabhuzwa Yesu, eti, "Awuna n'handulo? Ini ikoku kunolebgwa nebalume ibaba nekuko?"

61 Koga wakanyalala, azohandula tjimwe. Mphirisiti upehhugwi akabva ewumbhuzwa kakale eti, "Ndiwe Khirisitu, Nkololo weWakakombolegwa?"

62 Yesu wakahandula eti, "Ndi iye. Mowhobona Nkololo wenhu aligele kuludli gweMasimba, ehha nemakole ekudzimu."

63 Mphirisiti upehhugwi wakapalula zwiyambalo zwizwe, akati, "Titjahakilani basupi? 64 Mawha tuka Ndzimu kwaathama, motini nekukwe?"

Bose bakati unanlandu wakafanila fa.

65 Bamwe bakatangisa wumpfila, bakawunzwina kubuso, bewunloba, beti, "Lebesambeli" Nebalindi bakawuwamutjila ngekuwunloba.

66 Phethiro waka alipasi mun'ha, kukaswika umwe webahingikadzi bemphirisiti upehhugwi; 67 ebona Phethiro aligele edziya moto, wakawunlingisisa, eba eti, "Iwe bo, wawuna Yesu wekuNazaretha."

68 Koga Phethiro wakalandula eti, "Anditowunziba, kakale anditowhisisa tjawunoleba." Eba ebhudila kuhhe eyenda kugutukutu. Gukurume liba lilila.

69 N'hingikadzi iwhoya akawumbona, akatangisa kakale budza bamwe baka belimile ipapo, eti, "Iwhoyu nlumetate uwumwe wabo." 70 Koga Phethiro akalandula kakale.

Hule kwelubakanyana ibabo baka belimile ipapo bakati kuna Phethiro, "Ilebeswa uwumwe wabo; ngobe uNghalile."

71 Akatangisa tukana, netuna eti, "Anditowunziba iwhoyu nhu wamunoleba nekukwe."

72 Tjinyolotjo gukurume liba lilila gwebubili. Phethiro eba ekumbula matama alebgwa naYesu kuti, "Gukurume lisanhu lalila kabili unowhoba wandilandula katatu." Wakati ekumbula matama iyawo akalila.