1 Kwakati Sabatha lapinda, Mariya wekuMagadala naMariya mayi baJakobe, naSalome, bakatenga mhoza kuti bayende banohhodza mbili waYesu. 2 Mangwanana ngwanana, muhhuba lekutanga letshipi bekayenda kukumbu, hhuba libhuda. 3 Baka bebhuzwana beti, "Ndiyani unowhotikunguludzila hongwe ipa nkoba wekumbu kene?" 4 Bakati belinga, bakabona hongwe yakunguludzigwa kutjena nekene yaka ili whuluwhulu. 5 Bakati bengina mukumbu, bakabona nhhuhha aligele kuludli akambala tjiyambalo tjilefu tjitjena. Bakatjenama kwazo.

6 Wakati kubali, "Musitjename; mohaka Yesu wekuNazaretha wakakowhomegwa. Wamuka, atapo pano; lingani pababakawuladzika. 7 Koga yendani, munobudza badiyiwa babe kose naPhethiro, kuti, ‘Unowhoba mbeli kwenyu kuyenda kuGalile; monhowumbona ikweno, sekwaakamubudza.’ "

8 Bakabhuda mukumbu betihha; nentha yetetema netjenama kwaka kwabaswikila; lebeswa abazotongobudza iyenhu, ngoba bakabehla.

[9 Yesu wakati amuka kubafi mangwanana muhhuba lekutanga letshipi, wakatanga zwilakidza kuna Mariya wekuMagadala waaka adusa meyambi dzili kutondeka. 10 Wakamilika, akanobabudza ibabo baka batongoba naYesu, kuli kuti babetjalila bekuwa. 11 Bakati batjiwha kuti Yesu unotjila, kakale wawumbona, bakasikugalemoyo.

12 Hule kwayikoko wakazwilakidza ali tjimwe tjimo kububili gwabo belimuzila beyenda kuminda. 13 Bakayenda bakanobudza bamwe bose, nayibabo bo abazobagalamoyo.

14 Hule kwayikoko wakazwilakidza kubaligumi ne un'ompela, bose beligele bedla, wakan'un'una nesagalamoyo kwabo nemimoyo yabo mikukutu, ngobe besagalamoyo bebudziwa nebakawumbona hule kwemuka kukwe. 15 Wakati kubali, "Yendani muhango yose, musumikile ndebo mbuya kutjaba tjose. 16 Iwhoyo unogalamoyo akabvubikiwa unowhotjidziwa; koga usingagalemoyo unowhowan'wa nlandu. 17 Zwilakidzilo izwezwi zowhotobela banogalamoyo. Ngezina langu banowhotata meyambi; banowholebeleka nendimi ndzwa; 18 banowhobhata nyoka nemaboko nehapaya ben'wa tjinobulaya, atjitowhobakubadza, banowhobiga maboko banogwala bakatjila."

19 Hule kwayikoko He Yesu alebeleka nabo, wakamilidzigwa pehhugwi kudzimu, akanogala pasi kuluboko gweludli gweNdzimu. 20 Bakayenda bakasumikila ntha dzose, He ehinga nabo, ehhadzisa whi ngezwilakidzilo zwakazwiyetikala. Akujalo.]

[9 Bafumakadzi bakayenda kuna Phethiro nebakwinya babe, bakababudza kose kwababudziwa. 10 Hule kwayipapo, Yesu tjekukwe, ehingisa badiyiwa babe, wakayendisa ndebo mbuya yebupenyu, gwejidzo lisingapele kubvila kunobhuda hhuba kunoti kunongina hhuba.]