1 Wakabva ipapo akayenda kuhango yakanyi kwabo; badiyiwa babe bakawuntobela. 2 Hhuba lesabatha lakati laswika, akatangisa diya musinagogu; banjinji bakawha ediya bakatjenama, beti, "Iwhoyu nlume wakakuwana poni kose ikoku?" Ibutjenjebvu ludzini gwaakapiwa? Mihingo mikulukulu yakajali ngemaboko awe! 3 Haata ali iye mbehhi iwhoyu, nkololo waMariya, nkulu waJakobe naJosesi naJuda naSimoni? Hazwadzi dzidze atayidzo dzatinadzo pano? Bakawugwadziligwa.

4 Koga Yesu wakati kubali "Nlebesambeli haana lukudzo muhango yakanyi kwabo, nemuhama dzidze, nemun'umba yakanyi kwabo."

5 Ipapo haazotubula thama mihingo mikulu, kuhhe kwekuti wakabiga maboko bahomanana baka begwala akabatjidza. 6 Wakatjenamisiwa nesagalamoyo kwabo. Akayenda epoteleka nemizi ediya.

7 Wakadana badiyiwa bali gumi nebabili akatangisa batuma, beyenda bali babili babili, akabapa masimba pehhugwi kwemeyambi. 8 Wakabalaya eti basisenge kene tjinhu hapa beli mugwendo, kene iyo whomo, kene tjinkwa, kene mari mumamwandabula abo, kuhhe kweludozo koga. 9 Koga bambale mbhatata, basimbale zwiyambalo zwibili. 10 Wakati kubali, "Munzi wamunoswikila, galani muwunli mudza mumilika. 11 Kukaba nentunhu usingowhomuwamutjila kakale belamba muwhilila, hapa mobhuda mo mupule whuluba ipamakumbo enyu kuti gube busupi pehhugwi kwabo."

12 Bakabhuda, bakayenda bakasumikila kuti banhu bahanduke. 13 Bakatata meyambi njinji, bakahhodza banjinji baka begwala mafuta, bakanaya.

14 Mambo Hherodi wakawha nekukwe; nentha yekuti zina laYesu lakalozibgwa pose pose. Bamwe bakati, "Johane mbvubiki wamuka kubafi; ndizo wali masimba iyawa ehinga muwunli."

15 Bamwe bakati, "ndi Elija."

Bamwe bakati, "Unlebesambeli, se umwe bo webalebesambeli."

16 Koga Hherodi, paakakuwha wakati, "NdiJohane wandakathubula n'holo, wamuka." 17 Ngobe Hherodi waka atumila banhu bakabhata Johane, bakawumposela mujele, ngentha yaHherodiyasi nkadzi wenkulu uwe Filiphi; ngobe waka atjiwuntola abe nkadzi uwe. 18 Kana Johane waka ati kuna Hherodi, "Akutamunlayo kuti utole nkadzi wenkulu uwo."

19 Hherodiyasi wakabe ne lubengo naye, akayemula kuti awumbulaye; koga haazotubula; 20 ngobe Hherodi waka ehla Johane, eziba kuti waka ali nhu wakalulama kakale wakayengemala, akawuntjengeta zwakanaka. Wakati hha ewha elebeleka, ehangana n'holo; koga ehanhila wuwhilila.

21 Koga nkoba ukabeyapo hhuba Hherodi paakathama nzano wehhuba lezwagwa kukwe, etila babhatshi babe nebatungamili bengwa nebalume bapehhugwi beGalile. 22 Nkololokadzi waHherodiyasi paakangina akazana, wakahanhisa Hherodi nebezi babe; mambo akati kunsikana, "Undikumbile kene ini tjawunoyemula, ndowhokupa." 23 Akatuna kuwunli eti, "Kene ini tjawunondikumbila, ndowhokupa itjo, kene ukati ndikupalulile pakati bumambo gwangu."

24 Wakabhuda, akanobhuzwa kuna meyabe eti, "Ndi kumbileni?"

Ibo bakati, "N'holo waJohane mbvubiki."

25 Wakahanduka nekulibilidza kuna mambo, akakumbila eti, "Ndohaka kuti mundipe n'holo waJohane mbvubiki ngwenuwali uli mundilo."

26 Mambo wakabhakhwa nebuyendasi kwazo; koga nentha yekuti waka awunghadzabgwe kakale nentha yebezi babe haazotubula kuti awunlambile. 27 Tjinyolotjo mambo wakatuma nlume wengwa akalaya kuti abuye nen'holo uwe. Wakayenda akanowunthubula mujele, 28 akahhisa n'holo uwe uli mundilo akapa nsikana; nsikana akano swiswa meyabe. 29 Badiyiwa babe (Johane) bakati bekuwha ikoku, bakabuya bakawhotola mbili uwe, bakanowumbiganya mukumbu.

30 Bapositoli bakahanduka kuna Yesu, bakawumbudza zwinhu zose zwabathama nezwabadiya. 31 Iye akati kubali, "Buyani moga ngeno ku tjilambanyika mutongo nyaluluka kwelubakanyana." Nentha yekuti kwaka kuna banjinji baka bebuya bamwe beyenda, bakahaya lubaka gwenyaluluka kene iko kuti badle zodliwa. 32 Bakamilika bakayenda nekepe baliboga kubugalo gwakanyalala.

33 Koga banhu bakababona bemilika, banjinji bakawunziba bakalabuka bebhuda mumizi-mikulu yose bakabatangila bakawunkubunganila. 34 Yesu wakati ebhuda mugungwa akabona mbunga webanhu banjinji, akabawhila ngoni nentha yekuti baka benga mhwizi dzisina nlisi; akatangisa badiya zwinhu zwinjinji. 35 Hhuba lakati lohwa, badiyiwa babe bakabuya kuwunli bakati, "Pano ihango, kakale hhuba lahwa; 36 paladzani banhu, bayende kumizi nekubugalo gupedlo banozwitengela tjabangadla."

37 Wakabahandula eti, "Mubapeni tjabangadla." Badiyiwa bakati kuwunli, "Tingayenda tinotenga zodliwa zwemari ingapa madinari* ali makhulu mabili tibape badle?"

38 Wakati kubali, "Muna zwinkwa zwingana? Yendani munohola."

Bakati baziba bakati, "Tina zwinkwa zwihanu newhobe mbili."

39 Wakababva kuti bagadze banhu pasi bali mabunga pabuhwa gunyolo. 40 Bakagala pasi bali mabunga, amwe mabunga bali gulu amwe bali makumi mahanu.

41 Wakati atola zwinkwa zwihanu newhobe mbili akalinga pehhugwi kudzimu, akakombolela, akapemula zwinkwa, akazwipa badiyiwa babe kuti bazwigadzike mbeli kwebanhu; akabakobela bose whobe mbili. 42 Bakadla bose bakaguta. 43 Bakanunga zwitundu gumi nezwibili zwezwipemu zwakasala zwezwinkwa newhobe. 44 Bakadla zwinkwa baka bali zwiwulu zwihanu, kubagwa banhu betjilume koga.

45 Tjinyolotjo wakatjimbidzisa badiyiwa babe kuti bangine mukepe bayende seli, kuBhethisayida, iye akasala epaladza banhu. 46 Wakati atjipaladza banhu, akamilika akayenda kudombo enotembezela. 47 Kwakati kwatjibe madekwana, kepe tjaka tjili mugungwa, iye waka aliyega muhango. 48 Wakabona kuti banohinga zwakabangalala kudze bandise kepe nentha yekuti mhepo njinji yaka igwisana nabo, kukati mahhakuyedza akaswika kubali enangayila pehhugwi kwevula, enga unoyi unopindazwe. 49 Koga ibo bakati bebona eyenda pehhugwi kwegungwa bakakumbulila kuti ipuku bakabe bemimila; 50 nekuti bakawumbona bose, bakahla.

Koga tjinyolotjo wakalebeleka eti kubali, "Gadzikanani, ndimi, musihle!" 51 Wakangina mukepe pabaka balipo. Mhepo ikanyalala, bakatjenama kwazo, 52 ngobe abazowhisisa jenamiso lezwinkwa, mimoyo yabo yaka yakasima.

53 Bakati batjuluka batjiba seli yeya, bakaswika muhango yeGenesareti, bakasungilila kepe pansumho wegungwa. 54 Bakati babhuda mukepe, banhu bakabva bawunziba, 55 bakatjimbidza bakahhala hangwanyana yose iyeyo, bakatangisa hhisa bagwele bali panhobo pose pose pabaka bawha kuti ndipo paayako. 56 Kose kwaaka eswika, mumizi, mumizi-mikulu nemumitunhu baka beladzika bagwele pantha dzetengesela, bewunkumbilisisa kuti babvumigwe kunha mpeto wetjiyambalo tjitje; banhu nebunji bakawunkunha bakanaya.