1 Wakatangisa lebeleka nabo nezwifananidzo eti, "Umwe nlume wakalima minda yemahhambi. Akayihoha, akatsha gomba leswinila wayini, kakale akabaka dumba lefulefu lebalindi. Wakabva eyisayidza bamwe balimi, akabe eyenda kuyimwe hango. 2 Kwakati kwaswika lubaka gwemahhambi akabe etuma nlanda uwe kuna baakasayidza minda kuti anopiwa gobe lemitjelo yeminda. 3 Koga bakawumbhata bakawunloba, bakawuntata besina tjabawumpa. 4 Akatuma umwe webalanda babe kubali kakale, bakaswika bewumphobola mun'holo, bakawumbhata nezila inobhatisa honi. 5 Akatuma umwe kakale, iwhoyo bakaswika bewumbulaya; nebamwe banjinji, bamwe bakaswika bebaloba, bamwe bakaswika bebabulaya. 6 Waka atjisaligwa newun'ompela waangatuma, nkololo uwe waaka eda. Wakaba iye webupelo waakatuma, eti, ‘Swiyo banowhoba nemazwibhato kunkololo wangu.’ 7 Koga ibabo baka basayidziwa minda bakati umwe kuwumwe, ‘Iwhoyu ndiye nghalinhaka uwe. Buyani, tiwumbulaye, nhaka ibe yedu.’ 8 Ndizo bakawuntola bakawumbulaya, bakawumposela kuhhe kweminda yemahhambi."

9 "Mweni weminda unowhothamani? Unowhohha ebapaladza bose, etola minda epa bamwe. 10 Amuzotongobala lukwalo igogu.

" ‘Bgwe ilo tjekwalo lakalambiwa nebabaki

ndilo latjiba bgwe linotambunudza mbako.

11 Ikoku kwaka kuli thama kwaHe,

kakale kohanhisa mumeho edu’?"

12 Bakayedza wunsunga, ngobe beziba kuti tjifananidzo tjaayeleba wayebva ibo. Koga bakabehla mbunga webanhu, ndizo bakawunsiya bekayenda.

13 Bakawuntumila Bafarisi nebanhu baHherodi, kuti bawumbhatshile muzwilebo zwizwe. 14 Bakahha kuwunli bakati, "Ndhiyi toziba kuti imwi mumulebeswa. Amuna hanya kuti nhu ndiyani, ngobe amuneni netjigalo tjenhu; koga modiya zila yeNdzimu ngelebeswa. Kumunlayo lipa luketo kuna Khesari kene akuta munlayo? Tikete kene tisikete?"

15 Koga iye eziba kuzwitisa kwabo. Wakababhuzwa eti, "Mondilikilani? Hhisani ngeno loso, ndibone."

16 Bakawumpa, eba eti kubali, "Ibuso gwani igogu, kakale kwakakwagwa ngekwayani mulili?"

Beba behandula beti, "NdegwaKhesari."

17 Yesu eba eti kubali, "Ipani Khesari kwaKhesari neNdzimu kweNdzimu."

Bakakaabala mbeli kukwe.

18 Kwakakotjihha kuwunli baSadusi, ibo banoti akuna muka kubafi; bakawumbhuzwa mbhuzo, beti, 19 "Ndhiyi, Mozisi wakatikwalila nlayo kuti hapa nkadzi efigwa nenlume besina mwana, nun'una wenlume wakafanila ngina nkadzi iwhoyo, azwalile nkuluyi bana. 20 Ndizo kwakakuna bakololo benhu un'ompela bali kutondeka. Mbano yakatola nkadzi ikakotjinyika basina bana. 21 Webubili wakangina nkadzi iwhoyo, koga wakafa bo besina bana. Ndiko zwako kwakayetikala kuna webutatu. 22 Bose beli kutondeka, akuna wakaba nemwana nayiwhoyo nkadzi. Iwhoyo nkadzi wakapedzisila afa bo. 23 Ngono pakumuka kubafi, nkadzi iwhoyo unowhobe wani? Ngobe bose bali kutondeka wakaba nkadzi wabo."

24 Yesu wakati kubali, "Saziba whalo kene masimba eNdzimu ateyiko kunota mukalahika wali? 25 Ngobe hapa bakafa bemuka, abatjalobola kene lobogwa; koga beenga batumwa kudzimu. 26 Ngono ngekwemusiwa kwebafi, amuzobala mulukwalo gwaMozisi, panolebgwa nekwedenje lemhiwa, kuti Ndzimu wakati kuwunli, ‘NdiNdzimu waAbhurahhamu, Ndzimu wa Isaka, Ndzimu waJakobe’? 27 Haata Ndzimu webanhu bakafa, koga ndiNdzimu webanhu bapenyu. Makalahika kwazo!"

28 Umwe webakwali wakaswika akabawha bekakabadzana. Ebona kuti Yesu wabapa n'handulo yakanaka, wakabhuzwa Yesu eti, "Ndiwupi nlayo unkulu kupinda yose?"

29 Yesu wakahandula eti, "Nlayo unkulu kuyimwe yose ndiwhoyu unoti, ‘Whilila Isirayeli, He Ndzimu wedu, ndiye yega He. 30 Ude He Ndzimu uwo ngemoyo uwo wose, nange meya iyo yose, nange nkumbulo uwo wose kakale ngemasimba awo wose.’ 31 Webubili ndiwhoyu, ‘Ida mbakidzani uwo nezila yawunozwida iwe.’ Akuna nlayo unopinda iyeyi milayo."

32 Nkwali wakahandula eti, "Maleba zwakanaka, Ndhiyi. Ilebeswa kuti Ndzimu un'ompela, akuna umwe kuhhe kukwe. 33 Wundha ngemoyo uwo wose, nange whisisa kuko kose, nange masimba awo wose, neda mbakidzani uwo nezila yawunozwida iwe, kopinda yose mipilo inopisiwa nezwibhayilo zose."

34 Yesu wakati ebona kuti wahandula zwakanaka akati kuwunli, "Awuta uli kulekule nebumambo gweNdzimu."

Hule kwayipapo akuna wakatongoda wumbhuzwa mibhuzo kakale.

35 Yesu ediya eli muthempeli wakabhuzwa eti, "Nentha yeni bakwali beti Khirisitu unkololo waDavida? 36 Davida tjekukwe, eleba ngeMeya Yakayengemala, wakati.

" ‘He wakati kuna He wangu.

Gala kuluboko gwangu gweludli

ndidze ndilonge zwita zwizo kusi kwemakumbo awo.’

37 Davida nekukwe unowundhana eti He; koyetikala tjini ngono kuti abe nkololo uwe?"

Lukawu gwebanhu gwakawuwhilila nekuhanha. 38 Muzwidiyo zwizwe wakati, "Mutjenjelele bakwali, banoda yendayenda bakambala zwiyambalo zwilefulefu nebuyisiwa munhanga dzetengesela, 39 kakale banoda piwa zwigalo zwakanaka mumasinagogu nebugalo gwebanhu banagudzo panobe pedliwa. 40 Banotjebela njhilikadzi bedzitolela nhundu nezwimun'umba dzadzo, beyeta mahonga ndibon'we ngemitembezelo milefulefu. Banowhowanikwa nlandu nkulunkulu."

41 Yesu wakagala ntome kwayipapo paka pesiwa zwipo akalinga kuti banhu banopa mari tjini museme. Bakafuma banjinji baka beposela mari njinji. 42 Kwakabuya umwe n'hayi wetjilikadzi akaswika eposela madlanyana mbili dzinolizana nemaloso ekhopa. 43 Wakadana badiyiwa babe akati, "Lebeswa, ndoti kumuli, n'hayi wetjilikadzi iwhoyu wasa museme kunopinda kwebamwe banhu bose. 44 Ngobe bose ibaba banokola mufumwa yabanayo bakasa museme, koga iye mubuhayi gugwe, wasa yose mari yaanayo mubutjilo gugwe gose."