1 Bakaswika seli yegungwa, kuhango yebaGerasini. 2 Akati abhuda mukepe, akahanganidziwa nenlume ugegwe nemeyambi ebva mumakuwhu aka ali zwikumbu. 3 Nlume iwhoyo waka egala kuzwikumbu; kakale akuna nhu waka angatjawunsunga, kene nange miketane. 4 Waka etongosungwa nemitjili nemiketane, ethubulazwe kose, akuna nhu waka etubula wuntebamisa. 5 Lubaka gose siku nesikati waka ali kumatombo nekuzwikumbu emimila ezwitjeka nemabgwe.

6 Wakati ebona Yesu atjikulekule akawuntihhilila akaswika akawunamata; 7 emimila newhi lipehhugwi eti, "Yesu Nkololo weNdzimu upehhugwihhugwi muneni nami? Ndomukumbila ngeNdzimu, musindidziyidze!" 8 Ngobe waka ati, "Bhuda muwunli iwe meyambi!"

9 Yesu wakawumbhuzwa eti, "Zina lilo ndiyani?"

Wakahandula eti, "Zina langu loyi Ligiyoni; ngobe tibanjinji." 10 Meyambi yakawunkumbilisisa kuti dzisitatigwe kuhhe kwehango iyeyo.

11 Sangwenu kwaka kuna ngubi yengulube yakabe ifula muwhunde yedombo; 12 meyambi dzakawunkumbilisisa dziti, "Mutitatile kungulube tinogala mudzili." 13 Yesu wakadzibvumila. Meyambi dzikabhuda munlume dzikangina mungulube, ngulube dzakakulumuka nelubilo dzijitila nepakakungulukila dzikanowila mugungwa, dzakadzingaba zwiwulu zwibili; dzikakapitiwa nevula mugungwa dzikafa.

14 Balisi bakatihha bakanoleba munzi-nkulu nemuhangwanyana yose. Banhu bakabhuda kudze banobona kuti ini tjaka tjayetika. 15 Bakaswika kuna Yesu, bakabona waka aligegwe nemeyambi njinji aligele akambala zvibuyanana nenkulumbulo uwe wakatambunuka; bakahla. 16 Bakabakubona bakababudza tjayetika kuna waka aligegwe nemeyambi nekungulube.

17 Bakawunkumbilisisa kuti abhude muntunhu wabo.

18 Yesu wakati angina mukepe, nlume iwhoyo waka atongogagwa nemeyambi akawunkumbilisisa kuti abe naye.

19 Koga Yesu wakalamba, wakati kuwunli, "Yenda kanyi kumakamu awo, ubabudze zwinhu zwikulukulu zwawayetigwa naHe nekuti wawhigwa ngoni tjini."

20 Wakamilika ipapo akatangisa zibisa muDikapolisi* bukulu gwezwinhu zwaakayetigwa naYesu; banhu bose bakatjenama.

21 Yesu wakati abgwilila seli yeya ali mukepe, mbunga nkulunkulu ukawunkubunganila; iye waka ali muwhunde yegungwa. 22 Kukaswika umwe webatungamili besinagogu, zina loyi Jayirosi, paakabona Yesu wakapfigama pamakumbo awe. 23 Akawunkumbilisisa eti, "Nkololokadzi wangu ntukununu wefa. Ndomukumbila mubuye mowhumbiga maboko, kuyetila kuti anaye, kakale atjile."

24 Ndizo Yesu wakayenda naye; banhu banjinji bakawuntobela, besundanyidza.

25 Kwakakuna umwe nkadzimayi waka egwala bugwele gwebhihha malopa kwemakole ali gumi nemabili. 26 Waka adziyila kwazo eyenda kubalapi, atjipedza kose kwaaka anako, bugwele gusingabe hine, koga guyendilambeli. 27 Waka awha nekwaYesu, wakayenda hule kukwe pakati kwebanhu akabhata tjiyambalo tjaYesu. 28 Ngobe waka eti, "Dzene ndatubula bhata tjiyambalo tjitje ndinganaya."

29 Tjinyolotjo bhuda malopa kwakama; akawha mumbili uwe kuti watjinaya bugwele gwapela. 30 Tjinyolotjo Yesu wakawha kuti masimba abhuda muwunli, akatjebuka akati kumbunga, "Ndiyani wabhata tjiyambalo tjangu?"

31 Badiyiwa babe bakati kuwunli, "Banhu banjinji mobona kuti banosundanyidza besedzela pedlo namwi mungabhuzwa tjini kuti, ‘Ndiyani wandibhata?’ "

32 Koga Yesu wakatjebuka yeno nayeno kuti abone waka athama tjinhu tjakajalo. 33 Nkadzimayi ehla kakale etetema eziba tjayetika kuwunli, wakabuya akapfigama mbeli kukwe akawumbudza malebeswa ose. 34 Iye akahandula eti, "Nkololokadzi, galamoyo kuko kwathama ukanaya; yenda nekunyalala, bugwele gugo agupole."

35 Atjalebeleka kwakaswika bamwe bebva kunzi wentungamili wesinagogu bakati, "Nkololokadzi wenyu watjinyika. Mutjadziyidzilani Ndhiyi?"

36 Asingade whilila tjabanoleba, Yesu wakati kuntungamili wesinagogu, "Usihle, galamoyo koga." 37 Haazobvumila kuti kube nenhu unowuntobela kuhhe kwaPhethiro naJakobe naJohane nkulu waJakobe. 38 Paakaswika kun'umba yentungamili wesinagogu, wakabona sagadzikana kwebanhu, banhu bakabelila kakale bembila pehhugwi. 39 Wakati angina akababhuzwa eti, "Motilani hhoba yose iyeyi kakale molilani? Nsikana haazofa ulele."

40 Bakawunseka bulengwe. Koga iye wakati abadusa mun'umba, akatola tatayi namayi bensikana nebaaka ahha nabo, bakangina kwaka kulilele nsikana. 41 Ewumbhata neluboko wakati kuwunli, "Thalitha kowumi" kunobva kuti, "Nsikana, ndoti kukuli muka."

42 Tjinyolotjo nsikana wakamuka akayendayenda (waka anamakole ali gumi nemabili). Bakatjenama kwazo. 43 Wakakowhomesedza kuti akuna nhu wakafanila ziba nekwako, kakale wakati bape nsikana tjimwe tjinhu adle.