1 Wakati ebhuda muthempeli, umwe webadiyiwa babe akati kuwunli, "Ndhiyi, lingani kuti mabgwe akanaka tjini, nezwakabakwa, kuti zwakanaka tjini!"

2 Yesu wakawun'handula eti, "Nobona zwibakwa zwikulu izwezwi? Akuna bgwe linowhosala lilipehhugwi kwelimwe ipapa, lisingowholigigwa pasi."

3 Wakati egala paDombo leMitoba lakalingisana nethempeli, Phethiro, naJakobe, naJohane na Andhireya bakawumbhuzwa baliboga beti, 4 "Mutibudzeni, tjowhobe tjili tjipi, ini tjinowhobe tjilakidzilo hapa zwinhu zose izwezwi zwehhadzisika?"

5 Ndizo Yesu wakati kubali, "Mutjenjele kuti kusibe nenhu unomulaha. 6 Banjinji banowhohha muzina langu beti, ‘Ndi iye!’ banowholaha banhu banjinji. 7 Koga hapa muwha nekwengwa nebunyebenyebe nekwengwa musilobgwe nehana; ngobe zwinhu izwezwi zwakafanila yetikala, koga bupelo gowhobe gusanhu gukaswika. 8 Ngobe tjaba tjowhomukila tjimwe tjaba, nebumambo gowhomukila gumwe bumambo; kowhoba netengenyeka kwehango mumitunhu yakasiyana, kowhobe nebhamba; izwezwi zwinhu zowhobatanga kwelayidza gwadza kwelubaka gunohha."

9 "Koga imwi mutjenjele ngoba banowhomuyendesa kumbahhe, mowholobgwa mumasinagogu; mukamisiwa mbeli kwebabhati bemitunhu nabomambo ngentha yangu, gulibusupi kubali. 10 Ndebo mbuya yakafanila tanga yasumikigwa mutjaba tjose kutanga. 11 Koga hapa bemusunga bemuyendesa kulubahhe musidziyidzike nekuti mowholebani; koga mulebe kene ini kwamunowhopiwa nayigogo lubaka, ngobe koba kusi imwi munolebeleka, koga kuli Meya Yakayengemala. 12 Nkuluyi nenun'una banowhotengsana kuti umwe abulayiwe, tatayi banowhohandukila mwana, nebana banowhohandukila bazwadzi bakata kuti babulayiwe, 13 kakale mowhobengewa nebanhu bose ngentha yezina langu. Koga unosimidzila kukanoti kubupelo unowhotjidziwa.

14 "Koga hapa mubona mbipo inohemesa yepaladza ili pabugalo gusakafanila (unobala ngaapedzisise), bamuJudiya ngabatihhile kumatombo; 15 upehhugwi kwen'umba asijite, kene iko ngina mun'umba iye, kuti atole tjimwe tjinhu; 16 umuminda asihanduke kuti anotola tjiyambalo tjitje. 17 Koga kowhobabangalalila ibabo bakazwisenga nebanomwisa mumahhuba iyawo! 18 Tembezelani kuti ikoku kusitikale mulubaka gwembaba. 19 Ngoba kowhoba nedziyidzika kukulukulu kusakatongoba yapo kubvila pakutanga kwembumbiko Ndzimu yaakabumba kudza kuba ngwenuwali, akutowhopamha kukabeyapo kakale. 20 Kadzene He asakathubula mahhuba iyawo, kwakusingawhoba nenhu unotjidziwa; koga nentha yebakahalugwa babe, baakahala, wakathubula mahhuba ihawo."

21 "Hapa umwe nhu angati, lingani whoyu Khirisitu! kene, lingani whoyaa! musikugalemoyo ikoko. 22 Kowhohha boKhirisitu bemanyepwa nebalebesambeli bemanyepwa, banowhothama zwilakidzilo nematjenamiso, beyetila kuti balahe banhu, hapa kuyetikala, ibabo bakahalugwa. 23 Koga mutjenjele ngobe ndatjimubudza zwinhu zose zwisanhu zwaswika.

24 "Koga mumahhuba iyawo, hule kwedziyidzika ikoko, hhuba lowhoti zwi, mwedzi awutowhoba ntjena, 25 nyenyedzi dzowhowa dzibva kudzimu, masimba ose akudzimu anowhozunguzika. 26 Ndiko kwabanowhobona Nkololo wenhu ehha eli mumakole ena masimba makulu negudzo. 27 Kakale unowhotuma batumwa beNdzimu, bakakubunganya bahalugwa babe kubvila kumabhiko mana, kubvila kubupelo gwehango kunoti kubupelo gwekudzimu.

28 "Muzwidiye tjidiyo kubva mutjifananidzo tjenti wenkuyu, hapa lutabi gwawo gwabe gunyolo gutangisa sinila mahhani, moziba kuti tjilimo tjeesedzela. 29 Kwakajalo bo ke, hapa mubona zwinhu izwezwi zwiyetikala, zibani kuti waba pedlo, waba pankoba. 30 Lebeswa, ndoti kumuli, tjizekugwana itjetji atjitowhopinda zwinhu zose izwezwi zwisanhu zwayetikala. 31 Kudzimu nehango kowhopinda, koga matama angu atowhopinda."

32 "Koga akuna unoziba nekwehhuba ilelo nelubaka igogo, kene ibo batumwa kudzimu, kene iye Nkololo, kuhhe kwaTate boga. 33 Tjenjelani mulinde, mutembezele; ngobe amutoziba kuti lubaka gowhoswika lini. 34 Konga nhu wakayenda kuyimwe hango ikulekule akasiya nzi uwe, ekapa balanda babe masimba, umwe newumwe akalingisana nen'hingo uwe, akalaya nlindi wenkoba kuti agale akalinda. 35 Ndizo lindani ngobe amutoziba kuti mweni wenzi unowhobuya lini, kene madekwana kene pakati kwebusiku, kene mahhakuyedza, kene mangwanana. 36 Kungayetikala abuye musakalindila, amuwane makayizela. 37 Kwandinoleba kumuli ndokuleba kubanhu bose, ndoti. Lindani!"