1 Wakati kubali, "Ndolebesa ndoti kumuli, kuna bamwe bamile ipapa basingawholabila lufu basanhu bakabona bumambo gweNdzimu guhha nemasimba."

2 Hule kwemahhuba matanhatu Yesu wakatola Phethiro, naJakobe naJohane akayenda nabo pehhugwi kwedombo lefulefu, pabakaba boga; Yesu akahanduka akabe tjimwe tjimo mbeli kwabo. 3 Zwiyambalo zwizwe zwakaba zwitjenatjena rwaa, akuna nhu muhango ungazwithama zwikaba zwitjenatjena sayikoko. 4 Kwakabonakala pabali Elija naMozisi; belebeleka naYesu. 5 Phethiro akati kuna Yesu, "Ndhiyi, kwakanaka kuti tipano; letjani tibake matumba matatu, limwe libe lenyu, limwe libe laMozisi, limwe libe la Elija." 6 Baka bohla kwazosa, asingatjazibe kuti angatini.

7 Kwakaswika gole likabakwitidza, kukabe newhi lakabva mugole, liti, "Iwhoyu ndiye Nkololo wangu wandinoda; muwuwhilile!" 8 Tjinyolotjo bakati betjebuka tjebuka, bakabona kusitjina nhu pabali, kuhhe kwaYesu yega.

9 Bakati bejita mudombo, Yesu akabalaya kuti basitongobudza iye nhu tjababona, kudza kunoswika lubaka gwemuka kweNkololo wenhu kubafi.

10 Bakadzikitidza, bebhuzwana kuti, "Muka kuna bakatjifa kobvani?" 11 Bakawumbhuzwa kuti, "Nentha yeni bakwali beti Elija wakafanila buya kutanga?"

12 Yesu wakahandula eti, "Elija unobuya kutanga kuti agadzikanye zwinhu zose; ngono kwakakwaligwani kuti Nkololo wenhu wakafanila dziyidzika kakale ayetiwe tjinhu tjisina n'hingo? 13 Koga ndomubudza, Elija wakatjibuya, kakale bakawunthama kose kwabaka beyemula, sekwakwaka kwagwa nekukwe."

14 Bakati beswika kubamwe badiyiwa, bakabona bunga lebanhu gulugulu lakabakombeledza bakwali bekakabadzana nabo. 15 Tjinyolotjo banhu bose bebona Yesu, bakaba nekuhanha kukulu, bakawuntihhilila benowunlezwa. 16 Wakababhuzwa eti, "Mokakabadzana nabo nekweni?"

17 Umwe nlume mubunga wakahandula eti, "Ndhiyi, ndahhisa mbisana wangu kumuli, ugegwe nemeyambi inowunkon'wesa lebeleka. 18 Meya iyeyo hapa iwunswikila, inowumposela pasi. Unobhuda mafulo munlomo, unolobanya meno kakale unowoma mbili. Ndakumbila badiyiwa benyu kuti bayitate, koga bakonegwa."

19 Yesu akahandula eti, "Ekee! Tjizekugwana tjisina bugalimoyo, ndowhoba namwi kukadza kukaba lini? Ndowhomuyetila moyonlefu kukadza kukaba lini? Muwunhhise kundili." 20 Ndizo bakawun'hhisa kuwunli.

Meya ikati ibona Yesu, tjinyolotjo ikawumbhata mbisana, akawila pasi ikawunkayikanya, ikawumposela pasi, akabhuda mafulo munlomo. 21 Yesu wakabhuzwa tatayi, eti, "Wabe nelubaka gungapani akajali?"

Tatayi bakahandula beti, "Kubvisila atjimwana. 22 Inosowumposela mumoto nemuvula kuti iwumbulaye. Koga hapa kuna tjamungathama, mutiwhile ngoni, mutitjidzeni."

23 Yesu wakahandula, eti, "Zwinhu zose zose zoyetikala kuna iye unogalamoyo."

24 Tjinyolotjo tate bembisana bakalebela pehhugwi, beti, "Ndogalamoyo, munditjidze ndikunde kusagalamoyo kwangu!"

25 Yesu wakati ebona kuti mbunga webanhu unolabuka uhha kubali, akatjemela meyambi eti, "Iwe meya yembebebe nebhubulazebe, ndoti bhuda muwunli usipamhe ukahanduka kakale."

26 Hule kwemimila newunkayikanya zwakayipa yakabhuda muwunli. Mbisana wakalingika sewafa; banjinji bakati, "Watjifa." 27 Koga Yesu wakawumbhata neluboko akawumilidza, akama.

28 Yesu atjingina mun'umba, badiyiwa babe bakawumbhuzwa bali boga beti, "Kungentha yeni iswi takonegwa yitata?"

29 Wakabahandula eti, "Whogu ludzi gobhuda koga ngentembezelo."

30 Bakamilika beyenda, bakapalama muGalile. Yesu waka asingade kuti kube nenhu unoziba kuti baponi; 31 nentha yekuti waka ediya badiyiwa babe. Wakati kubali, "Nkololo wenhu unowhonotugwa mumaboko ebanhu, banowhowumbulaya; hapa abulawa, hule kwemahhuba matatu unowhomuka."

32 Koga abazotongowawhisisa matama iyawa, kakale bakabehla wumbhuzwa nekwako.

33 Bakaswika kuKhaphenawume. Akati ali mun'umba akababhuzwa eti, "Mamukakabadzana nekweni tilimuzila?"

34 Koga bakanyalala nentha yekuti belimuzila baka bekakabadzana nekuti ndiyani nkulu pabamwe. 35 Wakagala pasi, akadana bose baligumi nebabili akati, "Hapa nhu ehaka kuti abe wekutanga, wakafanila kuti abe webupelo, kakale abe nlanda wabo bose." 36 Wakatola mwana ntukununu akawumisa pakati kwabo; akati awumilidza mumaboko awe, akati kubali, 37 "Kene yani unowamutjila mwana unonga iwhoyu muzina langu unowamutjila imi; kakale kene yani unondiwamutjila, haatowamutjila imi koga unowamutjila iye wakandituma."

38 Johane eba eti kuwunli, "Ndhiyi, tabona umwe nlume etata meyambi nezina lenyu tikawunlambisa, ngobe asi umwe wedu."

39 Yesu wakahandula eti, "Musiwunlambise. Akuna nhu unothama n'hingo nkulunkulu muzina langu ungabva mulubakanyana ehanduka eleba zwakayipa nekwangu, 40 ngobe kene yani usingagwisane naswi ndewedu. 41 Lebeswa, ndoti kumuli, nhu unomupa nkombe wevula kuti mun'we ngobe muli baKhirisitu, haatowholahikigwa nembhayilo uwe."

42 "Kene yani unothama kuti ibaba batjetjana banogalamoyo mundili batjinye, kowhobe kuli kuhine kuwunli kuti aposegwe mugungwa akasungiligwa hongwe whuluwhulu muntshibha. 43 Hapa luboko gugo gukuta kuti utjinye, uguthubule. Kuhine kuti ungine mubutjilo ulitjilema, pana kuti uyende kugehena unamaboko mabili, kuna moto usingadzime. 44 (Kuna gonye lisingafe, nemoto usingadzime.) 45 Hapa gumbo lilo lita kuti utjinye, ulithubule. Kuhine kuti ungine mubutjilo unagumbo lin'ompela pana kuti uposegwe mugehena unamakumbo mabili. 46 (Kuna gonye lisingafe, nemoto usingadzime.) 47 Hapa hhiho lilo lita kuti utjinye, ulikopole. Kuhine kuti ungine mubumambo gweNdzimu unahhiho lin'ompela pana kuti uposegwe mugehena unameho mabili, 48 kuna gonye labo lisingafe, nemoto usingadzime."

49 "Ngobe umwe nemwe unowhotjenesewa ngemoto, semunyu utjenesa tjibhayilo."

50 "Munyu wakalulama, koga hapa munyu usingatjawhakale babilila, ungamusidzigwa tjini kakale?"

"Ibani nemunyu mumuli, mugalisane nekunyalala."