1 Hule kwemahhuba wakabgwilila muKhaphenawume, banhu bakabudzana kuti umun'umba. 2 Banhu banjinji bakakubungana, gubungano lakabe gulu kwekuti kwaka kusitjina bugalo kene ipo pankoba wen'umba, akasumikila dama kubali. 3 Kwakaswika banhu bana, baka bakasenga umwe waka alobgwa negulukadzi*. 4 Bakakon'wa swika pedlo naYesu nentha yebunji gwebanhu, bakakwakwamula imwe ntha yedenga len'umba bakajitisila nhobo yaaka alilele payili unogwala. 5 Yesu wakati ebona galamoyo kwabo, akati kunghwele, "Nkololo, wayetigwa mazwibhatigwa matjinyo awo."

6 Kwaka kuna bamwe bakwali baka baligele ipapo, mumimoyo yabo beti, 7 "Ndiyani iwhoyu unoleba ejali? Unoleba haya! Ndiyani ungayetila mazwibhatigwa matjinyo kuhhe kweNdzimu yega?"

8 Tjinyolotjo Yesu wakaziba mumeya iye kuti banozwibhuzwa, akati kubali, "Kungentha yeni muzwibhuzwanya zwinhu zwakajali mumimoyo yenyu? 9 Ndikupi kulelu kuti nditi kuna wakalobgwa negulukadzi*, ‘Wayetigwa mazwibhatigwa matjinyo awo,’ kene kuti, ‘Milika utole nhobo iyo uyende’? 10 Koga ke, kuti mutjibona ke kuti Nkololo wenhu una masimba muhango, eyetila mazwibhatigwa matjinyo." Wakati kunlume wakalobgwa negulukadzi* 11 "Ndoti kukuli, milika utole nhobo iyo uyende kunzi uwo."

12 Tjinyolotjo wakamilika akatola nhobo iye bakalinga bose, akayenda; kwekuti bakasala baka kahabala bose, bakakudza Ndzimu, beti, "Atanhu tikakubona kwakajali."

13 Wakapamha akayenda kunsumho wegungwa; gubungano lose lakawunkubunganila, akabadiya. 14 Wakati epindazwe akabona Levi nkololo wa Alifayasi, aligele pan'umba inoketisigwa, Yesu akati kuwunli, "Unditobele." Wakamilika akawuntobela.

15 Kwakakoyetikala kuti Yesu paaka aligele mun'umba edla zodliwa, baketisi nebatjinyi banjinji bakabuyabo bakagala naYesu nebadiyiwa babe; ngobe baka bali banjinji baka bawuntobela. 16 Bakwali nebaFarisi bakati bewumbona edla nebatjinyi nebaketisi, bakabhuzwa badiyiwa babe beti, "Kungentha yeni edla nebaketisi nebatjinyi?"

17 Yesu paakakuwha, wakati kubali, "Bapenyu abatohaka nlapi, koga unohakiwa ngebanogwala; andizohhila kuti ndiwhodana bakalulama, koga batjinyi."

18 Badiyiwa baJohane nebaFarisi baka beyila zodliwa; banhu bakahha pawunli bakawumbhuzwa beti, "Kungentha yeni badiyiwa baJohane nebebaFarisi beyila zodliwa, koga benyu badiyiwa besingayile zodliwa?"

19 Yesu akabahandula eti, "Bezi bebukwe bangayila zodliwa iye nkwaha anabo mun'umba yebukwe? Hapa nkwaha atjinabo abangayile zodliwa. 20 Koga kowhoswika mahhuba nkwaha paanowhodusiwa mubali, ndipo pabanowhoyila zodliwa ilelo hhuba."

21 "Akuna nhu unopfumila tjigamba* tjitshwa patjiyambalo tjikulukugwi. Ngobe tjigamba tjitshwa tjingamwawula tjiyambalo tjikulukugwi gabu likapindilila. 22 Akuna nhu unosa wayini ndzwa mumikabo mikulukugwi; ngobe aangajalo, wayini inowhopalula mikabo, nayiyo wayini ikatebuka, nemikabo ikapwapwatika; koga wayini ndzwa ndeyinosiwa mumikabo mitshwa."

23 Kwakakoyetikala kuti muwumwe nsi wesabatha epalama mudziminda; beli mugwendo badiyiwa babe bakakowha miholo yezwidlo. 24 BaFarisi bakati kuwunli, "Linga, banoyetilani tjisingabvumigwe muhhuba lesabatha?"

25 Wakabahandula eti, "Amuzotongobala tjakayetiwa naDavida, ahaya kakale abhakhwa nehhala, iye nayibabo baaka enabo. 26 Kuti wakangina tjini mun'umba yeNdzimu, mumahhuba Abhiyatha ali mphirisiti nkulu, akadla tjinkwa tjakayengemala, tjakatjisingabvumigwe dliwa nenhu kuhhe kwebaphirisiti, kakale akabapa bo baaka enabo?"

27 Akati kubali, "Sabatha lakayetigwa banhu koga kusi kuti banhu bakayetigwa sabatha. 28 Nayikokoke Nkololo wenhu ndihe we kene ilo sabatha."