1 Banjinji bakatola lubaka kuti bakubunganye ndongoloso yezwinhu zwatinogalabgwe pakati kwedu. 2 Setiwamutjidza kwabakathama ibo baka balipo kutanga nebasumikili bedama, 3 ndabona kwakalulama kuti hule kwelonda nkwala wezwinhu zose nebunyambi ndibvila kwazwinotangisila, kuti ndimukwalile kutobelana kwazo, imwi He Thiyofilasi. 4 Kuyetila kuti muzibe lebeswa lezwinhu zwamakabudziwa.

5 Kwaka kuli yapo mumahhuba aHherodi mambo weJudiya, umwe mphirisiti waka eyi Zakhariya, ali webunga lebaphirisiti baAbhiya. Zakhariya waka ana mfumakadzi waka ali weludzi gwa Aroni zina lile eyi Elizabethi. 6 Bose bubili gwabo baka bali banhu bakalulama mbeli kweNdzimu betobela milayo yose nayiko kose kunolebgwa naHe basina nlandu. 7 Koga baka besina mwana nentha yekuti Elizabethi wakahaya mbeleko*, bose baka bakwegula baba nemakole manjinji.

8 Kwakayetikala kuti ali mun'hingo webuphirisiti gugwe mbeli kweNdzimu, kuli lubaka gwebunga labo lebaphirisiti, 9 kuyendidzana nenlenje webuphirisiti, waka ahagwa ngemalipa kuti angine muthempeli yaHe apise mhoza*. 10 Bunga lebanhu lose laka litembezela lili kuhhe mulubaka gwepfungayidziwa kwemhoza*. 11 Wakabona ntumwa waHe alimile kuludli gwetjibeso tjinopfungayidzigwa mhoza*. 12 Zakhariya ewumbona wakadziyidzika, akahhigwa nehla. 13 Koga ntumwa wekudzimu wakati kuwunli, "Usihle, Zakhariya, ngobe ntembezelo uwo wawhika, nkadzikulu uwo Elizabethi unowhokuzwalila nkololo, nowhowumpa zina linoyi Johane. 14 Iwe nowhohanha ukahanhisisa, nebanhu banjinji banowhohanhila zwagwa kukwe; 15 ngobe unowhoba nhu nkulunkulu pabuso gwaHe, atowhon'wa wayini kene kunolaladzisa, unowhobe nhu uhhele neMeya Yakayengemala kubvila atji muntumbu wameyabe. 16 Unowhohandusila bunji gwebana ba Isirayeli kuna He Ndzimu wabo. 17 Unowhoyenda elimbeli kukwe ali mumeya nemasimba a Elija, kudze ahandusile mimoyo yabotate kubana, nebasingawhilile kuti babe nebutjenjebvu guna bakalulama, elulamisila banhu kuti balinde buya kwaHe."

18 Zakhariya wakahandula eti kuntumwa wekudzimu, "Ikoku kunhu ndowhoziba tjini kuti kowhoyetika? Ngobe imi ndakwegula nenkadzikulu wangu waba nemakole manjinji."

19 Ntumwa wekudzimu wakahandula eti, "Ndoyi Gabhuriyeli, unoma mbeli koNdzimu; ndatumwa kuti ndiwhokubudza ndebo mbuya idzedzi. 20 Tjilinga ke, unowhoba mbebebe awutowhotubula lebeleka kudza kuswika hhuba linoyetika zwinhu izwezwi, nentha yekuti awutogalamoyo, mawhi andakubudza iwo anowhohhadzisika mulubaka gwawo."

21 Banhu baka bali kuhhe bakamilila Zakhariya, bakatjenamisiwa nenonoka bhuda kukwe muthempeli. 22 Wakati abhuda, akakon'wa iko lebeleka nabo, bakabva baziba kuti wabona tjilakidzilo tjeNdzimu muthempeli; wakawholebeleka nabo nemaboko, etendeka koga nezwinyala kusitjina whi linobhuda.

23 Kwakati lubaka gugwe gwehinga muthempeli gwapela, akayenda kunzi uwe. 24 Hule kwemahhuba iyawo Elizabethi nkadzikulu uwe wakabhata mimba, koga akazwisumbika kwemimwedzi mihanu eti, 25 "Ndiko hinga kwaHe kundili mumahhuba awe ekunditjebuka kuti andiduse honi pakati kwebanhu."

26 Mumwedzi webutanhatu Ndzimu wakatuma ntumwa Gabhuriyeli kuti ayende kunzi-nkulu wehango yeGalile unoyi Nazaretha, 27 kumhandala yaka ili muludo nenhhuhha unoyi Josefa wen'umba yaDavida, zina lemhandala liyi Mariya. 28 Wakaswika kuwunli akati, "Hanha! iwe unodiwa, He banawe."

29 Koga wakadziyidziwa nezwilebo zwentumwa eti munkumbulo uwe, "Whubuyisa kwakatini ikoku?" 30 Ntumwa wekudzimu wakati kuwunli, "Usihle Mariya, wawana ngoni dzeNdzimu. 31 Nowhobhata mimba ukatshibama nkololo, unowhowumpa zina linoyi Yesu. 32 Unowhoba nhu nkulunkulu, unowhodan'wa eyi uNkololo we Upehhugwihhugwi; He Ndzimu banowhowumpa tjigalo tjebumambo tjatate babe Davida. 33 Unowhotonga pehhugwi kwen'umba yaJakobe nekusingapele, bumambo gugwe agutowhopela."

34 Ipapo Mariya wakati kuntumwa wekudzimu, "Kowhoyetika tjini ikoku imi ndisingazibe nlume?"

35 Ntumwa wekudzimu wakahandula eti, "Meya Yakayengemala inowhobuya pehhugwi kuko, nemasimba e Upehhugwihhugwi anowhokufukidza, kobva kuti iwhoyu wawunowhotshibama unowhoyi wakayengemala, unowhodan'wa eyi Nkololo weNdzimu. 36 Tjilinga, na Elizabethi hama iyo bo, wakazwisenga mimba yenkololo iye akwegula, kwaba mimwedzi mitanhatu akazwisenga, iye waka eyi haatozwala. 37 Nekuti neNdzimu akuna tjisingatike."

38 Mariya ekahandula eti, "Ndinlandakadzi waHe; ngakuyetike kundili semawhi enyu." Ipapo ntumwa wekudzimu wakabva pawunli.

39 Mumahhuba iyawo Mariya wakamilika akayenda kuhango yezwitombwana nekulibilidza, kunzi-nkulu waJuda. 40 Wakanongina mun'umba yaZakhariya akabuyisa Elizabethi. 41 Kwakayetika kuti Elizabethi ewha buyisa kwaMariya, mwana umuntumbu wakatjuluka ehanha, Elizabethi wakahhala neMeya Yakayengemala. 42 Wakalebelekela pehhugwi ekati, "Waka kombolegwa iwe pakati kwebafumakadzi, mwana wawakasenga wakakombolegwa. 43 Kwayenda kutini mubupenyu gwangu kuti imi ndikumbiwe namayi baHe wangu? 44 Nentha yekuti whi lebuyisa kuko lati lingina muzebe dzangu mwana akatjuluka nentha yehanha kukwe muntumbu wangu. 45 Waka kombolegwa iwhoyo wakagalamoyo kuti kowhohhadzisika kose kwakalebgwa naHe kuna iye."

46 Mariya wakati,

"Meya yangu inokudza He,

47 nemeya yangu inakuhanha muNdzimu Ntjidzi wangu,

48 nentha yekuti wakatjebuka akabona lingigwa muvula kwenlandakadzi uwe,

lingani mubone kubva ngwenuwali kuyenda mbeli zwizekugwana zose zowhondidana zwiti nkadzimayi waka kombolegwa.

49 Iye wandiyetila zwinhu zwikulukulu unamasimba makulu.

Nezina lile lakayengemala.

50 Mawhilangoni awe apehhugwi

kwebanowunhla kubva kutjizekugwana kunoti kutjizekugwana.

51 Luboko gugwe gwalakidza masimba;

wakapaladza banozwida mumimoyo yabo.

52 Wakabadelusa muzwigalo zwabo ibabo bana masimba,

akamilidza banolingigwa pasi ebasa pehhugwi.

53 Wakagutsha banahhala ebapa zwinozipa,

bafumi wakabahandusa basina tjabakasenga.

54 Wakatjidza nlandalume uwe Isirayeli,

muku alakana mawhilangoni awe.

55 Seleba kukwe kunabotate bedu,

kuna Abhurahhamu neludzi gugwe nekusingapele."

56 Mariya wakagala naye mimwedzi mitatu, akabgwilila kun'ha uwe.

57 Ipapo lubaka gwa Elizabethi gwatjiswika gwesununguka, wakatshibama mbisana. 58 Babakidzani babe nehama dzidze bakawha kuti He bawuyetila mawhilangoni makulu, bakahanha kan'ompela naye.

59 Nehhuba lebuhhanakadzi bakahha bewhothumbila mwana, bakawuntumila zina linoyi Zakhariya laka lili zina latatayi. 60 Meyabe bakati akutayiko, "Wakafanila dan'wa eyi Johane."

61 Banhu bakati, "Akuna weludzi gwenyu unazina lakajalo." 62 Bakalebeleka nemaboko bebhuzwa tatayi kuti banohaka kuti mwana apiwe zina lipi.

63 Wakakumbila kuti apiwe gwangwariba, akakwala eti, "Zina lile ndiJohane." Bose bakatjenama. 64 Tjinyolotjo nlomo uwe wakahhulika, lulimi gugwe gukasununguka akalebeleka ekudza Ndzimu. 65 Banhu baka beli babakidzani babo bakawigwa nehla, kose ikoku kwakalebgwa muhango yose yezwitombwana yeJudiya. 66 Bose bakakuwha bakatjenama beti tjemumoyo, "Mwana iwhoyu unowhobe mwana wakatini?" Ngobe luboko gwaHe gwaka guli pehhugwi kukwe.

67 Tate babe Zakhariya bakahhadziwa neMeya Yakayengemala baka lebesambeli beti,

68 "Wakakombolegwa He Ndzimu wa Isirayeli!

Nekuti wahha kubanhu babe akabasunungula.

69 Wakatimilidzila lunyanga gwejidzo mun'umba

yenlandalume uwe Davida.

70 Seleba kukwe nemilomo yebalebesambeli babe bakayengemala bantolo,

71 kuti atitjidze kuzwita zwedu

tidusiwa mumaboko ebanotihema,

72 kuti atiyetile mawhilangoni aakagadzabgwe bobatategulu bedu,

ekumbula tjibvumilano tjitje tjakayengemala;

73 tjibvumilano tjaakathama kuna tate bedu Abhurahhamu;

74 kuti atisunungule mumaboko ezwita zwedu,

kuyetila kuti tiwutembezele tiwun'hingila tisingahle,

75 mukuyengemala nelulama mbeli kukwe mumahhuba

ebupenyu gwedu gose.

76 Iwe mwana unowhodan'wa uyi nlebesambeli weNdzimu Upehhugwihhugwi,

ngentha yekuti unowhoyenda mbeli kwaHe

ukula zila dzidze,

77 upa banhu luzibo gwetjidziwa

ngeyetigwa mazwibhatigwa matjinyo abo,

78 ngentha yemawhilangoni eNdzimu wedu,

tibhudigwa netjedza tjinobva pehhugwi tjiwhotikumba

79 kuti tjipe tjedza kubanhu bagele muhhalima balimuntuzi welufu,

kuti tjitungamile makumbo edu kuti ayende muzila yekunyalala."

80 Mwana wakakula, akasima mumeya, egala mutjilambanyika kudza kuswika hhuba laakalakidziwa kubanhu be Isirayeli.