1 Wakadana badiyiwa babe bali gumi nebabili akabapa masimba pehhugwi kwemeyambi, akabapa nemasimba elapa nghwele, 2 akabatuma kuti banosumikila nekwebumambo gweNdzimu, nekuti batjidze bose banogwala. 3 Wakati, kubali, "Musitole kene tjinhu mugwendo gwenyu, kene ludozo, kene whomo, kene zodliwa, kene mari, musitole kene zwiyambalo zwibili. 4 Iyeyo n'umba yamunongina, mugale muyili, mudza mubhuda munzi iwhoyo. 5 Banhu bakasamuwamutjila, mupule whuluba pamakumbo enyu hapa mobhuda munzi iwhoyo, kuti gube busupi pehhugwi kwabo."

6 Bakamilika bakayenda mumizi yose, besumikila ndebo mbuya betjidza banogwala pose pose.

7 Sangwenu Hherodi ntungamili wakawha kose kwaka kuyetikala, akatjenama, ngobe bamwe baka beti Johane wamuka kubafi, 8 bamwe baka beti Elija wamuka, bamwe bakati umwe webalebesambeli bantolo wamuka. 9 Hherodi wakati, "Johane ndakawunthubula n'holo; koga iwhoyu wandinowha kuyi unothama zwinhu zwakajali ndiyani?" Akayedza kuti awumbone.

10 Bapositoli bakati bahanduka bakawumbudza kwabaka bathama. Akabatola akayenda nabo bali boga kunzi-nkulu unoyi Bhethisayida. 11 Banhu bakati baziba, bakatobela; wakabawamutjila, akababudza nekwebumambo gweNdzimu, akatjidza bakabehaka tjidziwa.

12 Hhuba latewuka badiyiwa babe bali gumi nebabili bakahha kuwunli bakati, "Paladzani banhu, bayende kumizi nekubugalo gupedlo banowana zodliwa nepabangalala; ngobe pano ihango."

13 Koga wakabahandula eti, "Mubapeni tjabangadla."

Ibo bakati, "Tina zwinkwa zwihanu newhobe mbili koga, kuhhe kwekuti tiyende tinotenga zodliwa zwebanhu bose ibaba." 14 Kwaka kuna balume bangaswika zwiwulu zwihanu.

Wakati kubadiyiwa babe, "Itani kuti bagale bali mabunga ana banhu bali makumi mahanu."

15 Bakathama bejalo, baka bagadza pasi. 16 Akatola zwinkwa zwihanu newhobe mbili akalinga pehhugwi kudzimu, akaboka akazwipemula, akazwipa badiyiwa babe kuti bape banhu. 17 Bakadla bakaguta bose. Bakawolela zwipemu zwaka zwasala, zwikahhala zwitundu zwiligumi nezwibili.

18 Kwakayetika kuti etembezela aliyega, badiyiwa babe bakahha pawunli; akababhuzwa eti, "Banhu banoti ndimi yani?"

19 Bakahandula beti, "Bamwe banoti ndimwi Johane Mbvubiki; bamwe banoti, ndimwi Elija; bamwe banoti muwumwe webalebesambeli bantolo wakamuka kubafi."

20 Akababhuzwa eti, "Imwi moti ndimi yani?"

Phethiro wakahandula eti, "Ndimwi Khirisitu weNdzimu."

21 Koga wakabakowhomesedza akabalaya kuti basibudze kene nhu, 22 eti kubali, "Nkololo wenhu wakafanila dziyidzika kwazo, alandugwe ngebawhola nebaphirisiti bakulu nebakwali, ekotjibulawa, muhhuba lebutatu ekomusiwa kubafi."

23 Wakati kubali bose, "Hapa nhu ehaka nditobela ngaazwitoboke atole tjileyanyo tjitje mahhuba ose, anditobele. 24 Ngobe kene yani zwe unowholondolodza butjilo gugwe gowhunlahikila; koga kene yani unolahikigwa nebutjilo gugwe ngentha yangu, unowhogulondolodza. 25 Kotjidzani kuti nhu awane hango yose koga ekolahikigwa nebutjilo gugwe? 26 Hapa nhu anahoni nami nematama angu, iwhoyo nhu Nkololo wenhu unowhobe nehoni naye, hapa obuya alimugudzo lile nelaTate nelebatumwa bakayengemala. 27 Ndomubudza lebeswa, kuna bamile ipapa basingawholabila lufu, basanhu bakabona bumambo gweNdzimu."

28 Hule kwemahhuba angaba hhanakadzi Yesu aleba zwinhu izwezwi, wakatola Phethiro naJohane naJakobe, akatanha nabo pehhugwi kwedombo kuti banotembezela. 29 Wakati etembezela buso gugwe gukahanduka mamo ago, zwiyambalo zwizwe zwikaba zwitjenatjena zwipenyelela. 30 Linga, kwaka kuna balume babili, Mozisi na Elija, belebeleka naye, 31 baka boneka mukupenya belebeleka nekwefa kukwe, kwaaka kuwhohhadzisika muJerusalema. 32 Koga Phethiro nebamwe baka babhakhwa newhope, bakati bepapadzuka, bakabona penya kukwe nebalume babili balimile naye. 33 Kwakati balume ibabo bopalalana naye, Phethiro wakati kuna Yesu, "He, kwakanaka kuti tipano; letjani tibake matumba matatu, limwe libe lenyu, limwe libe laMozisi, limwe libe la Elija" (Asingazibe kuti unolebani.)

34 Atjalebeleka ikoku, kwakahha gole likabafukidza; bakahla kwazo pabakabengina mugole. 35 Kwakabhuda whi mugole likati, "Whoyu ndiye Nkololo wangu, wandakahala; muwuwhilile!"

36 Whi lakati lawhika, Yesu akawanika ali yega. Bakakutjengeta mumimoyo yabo, akuna nhu wabakabudza tjabakabona mumahhuba ihawo.

37 Hhuba lakatobela bakati bajita mudombo, bakahanganidziwa nebanhu banjinji. 38 Umwe nlume mubunga wakadanilila eti, "Ndhiyi, ndomukumbila mulinge nkololo wangu, ngobe ndiye yega mwana wangu; 39 unobhakwa nemeyambi ekomimila; ejalo ebhuda mafulo munlomo, inowunligila pasi, ayitogozwa wunletja. 40 Ndakumbila badiyiwa benyu kuti bayitate koga abazotubula."

41 Yesu wakahandula eti, "Ekee! Tjizekugwana tjisina bugalimoyo tjisingawhilile, ndowhoba namwi kukadza kukaba lini, ndimuyetila moyonlefu? Hhisa nkololo uwo ngeno."

42 Wakati ebuya naye meyambi ikawunkayikanya iwundziyidza. Koga Yesu wakatjemela meyambi, mbisana akanaya, akawumbgwiliza kuna tatayi. 43 Bose bakatjenamisiwa nemasimba makulu eNdzimu.

Koga bakati betjaka tjenamisiwa nezwinhu zwaaka ethama, akaba eti kubadiyiwa babe, 44 "Matama iyawa ngaangine muzebe dzenyu; Nkololo wenhu unowhotugwa mumaboko ebanhu." 45 Koga abazotongowawhisisa matama ihawo, akabe matama akasumbikika kubali, kudze basiwhisise; kakale bakahla wumbhuzwa nekwawo.

46 Kwakaba nekukakabadzana pakati kwebadiyiwa babe, behaka ziba kuti ndiyani ungayi ndiye nkulu pakati kwabo. 47 Yesu aziba mikumbulo yabo wakatola mwana ntjetjana akawumisa pedlo naye, 48 akati kubali, "Unowamutjila mwana iwhoyu muzina langu unowamutjila imi; ne unondiwamutjila unowamutjila wakandituma; ngobe iwhoyo untukunu pakati kwenyu mose ndiye unkulu."

49 Johane wakati kuwunli, "He, tabona umwe nlume etata meyambi nezina lenyu tikawundzibisa ngobe asingamutobele naswi."

50 Yesu wakati kuwunli, "Musiwundzibise; ngobe usingagwisane namwi ndewenyu."

51 Lubaka gweyenda kudzimu gwakati gwasedzela, Yesu wakazwimisila yenda kuJerusalema. 52 Wakatuma batumwa bakayenda mbeli kukwe, bakangina muntunhu wemaSamariya, benowubaakanyila kose. 53 Koga banhu abazowuwamutjila, ngobe kwaka kuli patjena kuti umuzila unoyenda kuJerusalema. 54 Badiyiwa babe Jakobe naJohane bakati bebona ikoku bakati, "He, mohaka kuti tidane moto ubve kudzimu ubapaladze?"

55 Yesu wakatjebuka akabatjemela. 56 Bakayenda kuwumwe nzi unotobela.

57 Bakati beyenda muzila umwe nlume akati kuna Yesu, "Ndowhomutobela kose kwamunoyenda."

58 Yesu wakawun'handula eti, "Mhungubgwe dzina mimwina, nenyunyi dzemumhepo dzina zwihaka; koga Nkololo wenhu haana paangaladzika n'holo."

59 Wakakoti kuwumwe, "Unditobele."

Koga iye wakahandula eti, "He, mundibvumileni nditange ndanobiganya tate bangu."

60 Koga Yesu wakati kuwunli, "Siya bafi babiganye bafi babo; koga iwe yenda unosumikila bumambo gweNdzimu."

61 Umwe wakati, "Ndowhomutobela, He; koga mundibvumileni ndinowoneka ben'ha wangu."

62 Yesu wakati kuwunli, "Akuna nhu unoti akabhata bhadza akakotjebuka hule wakafanila bumambo gweNdzimu."