1 Wakati apedza lebeleka nebanhu akangina muKhaphenawume. 2 Kwaka kuna umwe nlawuli webagwi bengwa bali gulu, waka ana nlandalume uwe waaka eda kwazo, nlandalume iwhoyo waka egwalilofa. 3 Wakati awha nekwaYesu, akawuntumila bawhola beMaJuta kudze banowunkumbila kuti abuye ewhotjidza nlandalume uwe. 4 Bakati baswika kuna Yesu tjinyolotjo bekawunkumbilisisa beti, "Nlume iwhoyu wakalizanila kuti muwuntile ikoku, 5 ngobe unoda tjaba tjedu kwazo, wakatibakila sinagogu."

6 Yesu wakayenda nabo. Wakati atjibapedlo nen'umba, nlawuli webagwi bengwa bali gulu wakatuma bakwinya babe kuwunli, benoti, "Tate, musizwidziyidze, andizolizanila kuti mungangina mun'umba yangu. 7 Kene imi ndahla ndibona ndisakafanila kuti ndingahha kumuli. Koga lebani dama, n'hingi wangu unowhopola. 8 Nami bo, ndinhu unohinga elipasi kwemasimba ebapehhugwi kwangu, ndina bagwi bengwa bapasi kwangu, ndoti kuna whoyu, ‘Yenda,’ akayenda, kuwumwe ndoti, ‘Ihha ngeno,’ unohha, ndoti kunlandalume wangu, ‘Thama whoku,’ akakuthama."

9 Yesu paakawha matama iyawa, wakatjenamisiwa nenlume iwhoyu, akatjebuka gubungano laka liwuntobela akati, "Ndomubudza, kene iko mu Isirayeli andizotongowana bugalimoyo gwakajali."

10 Ibabo baka batumwa bakati batjibgwilila kun'umba, bakanowana nlandalume waka egwala anaya.

11 Hhuba lakatobela wakayenda kunzi-nkulu unoyi Nayini, bunji gwebadiyiwa babe nebunji gwebanhu bakayenda naye. 12 Wakati abepedlo nenkoba wenzi-nkulu akahangana nebanhu bakasenga nlume waka atjinyika benowumbiganya, waka ali iye yega mwana wetjilikadzi, banhu banjinji bemunzi-nkulu iwhoyo baka beyenda netjilikadzi iyeyo. 13 He wakati ebona nkadzikulu iwhoyu akawuwhila ngoni, akakoti kuwunli, "Musilile." 14 Wakasedzela akabhata ntengate, baka bakasenga mbili wemfi bakama, iye akati kumfi, "Nhhuhha ndoti kukuli muka." 15 Waka atjinyika wakamuka akagala akatangisa lebeleka, Yesu akawuwamutjidza kuna meyabe.

16 Banhu bose bakahhigwa nehla, bakakudza Ndzimu beti, "Kwamuka nlebesambeli nkulunkulu pakati kwedu," kakale, "Ndzimu wakumba banhu babe."

17 Kwakalebgwa nekukwe muJudiya yose nehango dzipedlo.

18 Badiyiwa baJohane bakawumbudza zwinhu zose izwezwi, 19 Johane akadana babili, akabatuma kuna He eti, "Ndimwi unowhohha, kene timilile umwe?"

20 Bakaswika kuna Yesu bakati, "Johane Mbvubiki watituma kumuli eti, ‘Ndimwi unowhohha kene timilile umwe?’ "

21 Mulubaka igogo wakapodza baka begwala banjinji, akapodza nghwele njinji akatata kose nemeyambi, akapofunula mpho banjinji baka beli mapofu. 22 Wakabahandula eti, "Bgwililani munobudza Johane zwamabona nezwamawha. Mapofu anopofunuka nezwilema zoyenda, bagwele bemapele banotjenesewa, bomantshi zowha, bakafa banomusiwa, nendebo mbuya inosumikigwa kubahayi. 23 Wakakombolegwa nhu usingagwadziwe moyo ngentha yangu!"

24 Batumwa baJohane bakati bayenda akatangisa lebeleka nebanhu nekwaJohane eti, "Makayenda kutjilambanyika munobonani? Luhanga guzunguziwa nemhepo? 25 Maka munobonani? Nlume wakambala zwiyambalo zwakanaka? Banombala zwiyambalo zwakanaka baligele zwibuyanana, bagele mumiha yabomambo. 26 Makabhuda munobonani ngono? Nlebesambeli? Ee! ndomubudza, unopinda nlebesambeli. 27 Ndiye iwhoyu kwakakwagwa nekukwe kuyi, ‘Linga, ndotuma ntumwa wangu mbeli kuko, unowhokubaakanyila zila iwe usanhu waswika.’ 28 Ndomubudza, pakati kwayibo bose bakazwagwa nebetjikadzi akuna unkulu pana Johane; koga iwhoyo untukunu mubumambo gweNdzimu unkulu pawunli."

29 (Banhu bose kose nebaketisi bakati bekuwha ikoku, bakabvuma kuti zila yeNdzimu yakalulama, ngobe bose baka babvubikiwa mbvubiko waJohane. 30 Koga BaFarisi nebazibi benlayo bakalamba ndongoloso yeNdzimu nekwabo, ngobe besabvubikiwa ndiJohane.)

31 "Ngono ndowhobafananisa nani ibaba banhu bayitjetji tjizekugwana. Bakafanana nani kene? 32 Banonga bana bagele pabugalo gwetengesela, bedanilila bamwe beti, ‘Tamulidzila nyele amuzozana, tikamba njimbo dzelufu amuzolila.’ 33 Ngobe Johane Mbvubiki wakabuya esingadle tjinkwa esingan'we wayini; moti, ‘Una meyambi.’ 34 Nkololo wenhu wakahha edla kakale en'wa, ngono moti, ‘Lingani, tjidli nenlaladzi, nkwinya webaketisi nebatjinyi.’ 35 Koga ke butjenjebvu golayidziwa ngebana bose bago."

36 Umwe webaFarisi wakawunkumbila kuti anodla naye, akayenda kun'umba yeMfarisi, akanodla. 37 Umwe mfumakadzi munzi-nkulu iwhoyo, waka ali ntjinyi, wakati aziba kuti Yesu unodla kun'umba yeMfarisi, akabuya nekumbwana tjakayetiwa nebgwe linoyi alabhasita, tjemafuta anonhuwilila, 38 alimile hule kukwe, ntome kwemakumbo awe, elila, wakatangisa wanyolodza makumbo aYesu nemihodzi iye, akaabuhika nemavudzi awe, akawaputa, akaahhodza mafuta. 39 Mfarisi waka akoka Yesu ebona ikoku, wakalebeleka netjemumoyo* eti, "Iwhoyu nlume kadzene waali nlebesambeli, unoba aziba kuti ndiyani kakale umfumakadzi ludzini iwhoyu nhu unowunkunha, ngobe untjinyi."

40 Yesu wakalebeleka naye eti, "Simoni ndinatjinhu tjandinohaka kubudza."

Simoni wakahandula eti, "Lebani Ndhiyi."

41 Yesu wakati, "Kwaka kuna Nkweletesi waka enabanhu babili banowunkolota, umwe waka anakoloto tjemaloso esiliva ali makulu mahanu, umwe anakoloto tjemaloso esiliva ali makumi mahanu. 42 Bakati bubili gwabo bahaya kuti bangawunlipa neni iye akabayetila mazwibhatigwa zwikwelete zwabo. Tjindibudza, ndiwupi pakati kwabo unowhowundha kwazo?"

43 Simoni wakahandula eti, "Ndokumbula kuti iwhoya wakayetigwa mazwibhatigwa koloto tjinjinji."

Yesu eba ehandula eti, "Walebesa." 44 Ehandukila kumfumakadzi, wakati kuna Simoni, "Unobona mfumakadzi iwhoyu? Ndangina mun'umba iyo, ukasandipa vula yengula makumbo angu, koga iye wangudza makumbo angu nemihodzi iye akaabuhika nemavudzi awe. 45 Awuzotongondiputa koga nkadzimayi iwhoyu tjinga kwandangina muno haazotongoma puta makumbo angu. 46 Awuzotongohhodza n'holo wangu mafuta, koga nkadzimayi iwhoyu wahhodza makumbo angu nemafuta anonhuwilila. 47 Ndizo ndoti kukuli, wayetigwa mazwibhatigwa matjinyo awe manjinji, ngobe walayidza da kwazo kwazo; koga iwhoyo unoyetigwa mazwibhatigwa mahomanana, unoda kuhomanana."

48 Akaba eti kumfumakadzi, "Wayetigwa mazwibhatigwa matjinyo awo."

49 Bakabedla naye bakatangisa lebeleka tjekwabo beti, "Ndiyani iwhoyu unoyetila mazwibhatigwa matjinyo?"

50 Koga Yesu wakati kumfumakadzi, "Galamoyo kuko kwakutjidza; tjiyenda mukunyalala."