1 Sangwenu nzano weTjinkwa Tjisina Mbidzo, unoyi Phasika waka wasedzela. 2 Baphirisiti bakulu nebakwali baka behaka zila yekuti bangawumbulaya tjini; koga baka behla banhu.

3 Ipapo Satane wakangina muna Judasi unoyi Isikariyoti, waka ali umwe webaligumi nebabili. 4 Wakayenda kubaphirisiti bakulu nebalawuli bebalindi bethempeli, akalebeleka nabo kuti angatengesa Yesu tjini, kubali. 5 Bakahanha kwazo bakabvumilana kuti banowhowumpa mari. 6 Ndizo wakabvuma, akahaka nkoba wewuntengesa kusina lukawu gwebanhu.

7 Lakaswika hhuba lenzano weTjinkwa Tjisina Mbidzo, lilihhuba laka libhayiwa mhwizana yephasika. 8 Ndizo ke Yesu wakatuma Phethiro naJohane, eti, "Yendani munotilulamisila phasika, kuyetila kuti tiyidle."

9 Ibo bakati kuwunli, "Mohaka kuti tinoyilulamisila poni?"

10 Wakati kubali, "Lingani, hapa mungina munzi-nkulu, mowhohangana nenlume wakasenga tjilongo tjevula, muwuntobele kunzi waanowhongina, 11 muti kumweni wenzi, ‘Ndhiyi wati kumuli, iponi n'umba yebezi, pandinowhodlila phasika ndina badiyiwa bangu?’ 12 Unowhomutondekela n'umba whulu ipehhugwi ina zwidla zose yakalinda hingisiwa; mubaakanyile muyili."

13 Bakayenda, bakawana kuli sekwaababudza; baka baakanya phasika.

14 Lubaka gwaswika, wakagala kuti adle nebapositoli. 15 Wakati kubali, "Ndandiyemula kwazo kuti ndidle phasika iyeyi namwi ndisanhu ndadziyidziwa; 16 ngobe ndomubudza, anditjoyidla kuswika tjayinobva tjahhadzisika mubumambo gweNdzimu."

17 Wakatola nkombe unawayini, atjiboka kuNdzimu wakati kubali, "Tolani whoku, mukobane; 18 ngobe ndomubudza kubvila ngwenuwali anditjowhon'wa kwemitjelo yemahhambi kudzina bumambo gweNdzimu guhha."

19 Wakatola tjinkwa akaboka kuNdzimu, akatjipemula, akabapa eti, "Iwhoyu umbili wangu unopigwa imwi. Mukuthame ikoku mundikumbula." 20 Kakale bapedza dla, wakatola nkombe, akati, "Nkombe iwhoyu tjibvumilano tjitshwa mumalopa angu anotebuligwa imwi."

21 "Koga lingani, luboko gwa iwhoyo unowhonditengesa ndinago pazodliwa. 22 Ngobe Nkololo wenhu unoyenda sekwakwaka bigiwa neNdzimu; koga kwakawubangalalila iwhoyo nlume unowhowuntengesa!"

23 Bakatangisa bhuzwana kuti ndiyani unowhothama tjinhu tjakajalo pakati kwabo.

24 Kwakaba nesabvumilana pakati kwabo, kuti ndiyani waka ewhoba nkulu pabali bose. 25 Yesu wakati kubali, "Bomambo beBataya banobatshambidzila, ibabo banobatungamila banozwiti ‘Babhatshi bebanhu.’ 26 Koga ngakusijalo pakati kwenyu; nkulu pakati kwenyu ngaange sentjetjana, ntungamili ngaange sen'hingi. 27 Ndiyani nkulu, ugele epiwa zodliwa, kene unobhika epakula? Akuta ugele epiwa zodliwa? Koga imi ndipakati kwenyu ndimupakulila."

28 "Imwi ndimwi mama nami tjoselele mukulikwa kwangu. 29 Ndizo ndomupa bumambo, sekwandakapiwa bumambo naTate bangu, 30 kuti mudle kakale mun'we nami mubumambo gwangu, mugale pazwigalo zwetonga njudzi dzili gumi nembili dza Isirayeli."

31 "Simoni, Simoni! Whilila! Satane unohaka mulika, emuhhunga sezwidlo. 32 Koga ndakutembezelela kuti galamoyo kuko kusipele; kakale hapa wahanduka, usimise hama dzidzo."

33 Phethiro wakati kuwunli, "He, ndazwipila kuti ndiyende namwi kujele kene ndife namwi."

34 Yesu wakati, "Ndokubudza, Phethiro, gukurume alitowholila nasi, udza ulandula katatu kuti unondiziba."

35 Wakati kubali, "Pandakamutuma musina whomo kene kwama tjemari kene hangu, kuna tjamakatayila kene?"

Bakahandula beti, "Akuna."

36 Akaba eti kubali, "Koga ngwenu, unakwama tjemari ngaatjitole, newuna whomo ngaayitole bo. Usina bhangatjeke ngaatengese tjiyambalo tjitje atenge bhangatjeke. 37 Ndomubudza, lukwalo igogu gwakafanila hhadzisika mundili, gunoti, ‘Wakabagwa kan'ompela nebatjinyi’; ngobe kose kwakakwagwa nekwangu kuna sekwakunohhadzisika."

38 Badiyiwa bakahandula beti, "He kuna mabhangatjeke mabili ipapa."

Akati kubali, "Kwalulama."

39 Yesu wakabhuda akayenda kuDombo leMitoba, sekwaagala ethama; badiyiwa babe bakawuntobela. 40 Atjiswika po wakati kubali, "Tembezelani kudze musingine mukulikwa."

41 Wakatsheduka pabali akayenda nhambwana ingaposewa bgwe likawilapo, akapfigama akatembezela eti, 42 "Tate, hapa muda, dusani nkombe iwhoyu kundili; koga kusibe ngekuda kwangu, koga ngakuyetiwe kuda kwenyu." 43 (Kwakaswika ntumwa ebva kudzimu akahha ewunsimisa. 44 Anahungu whuluwhulu wakatembezela ngemasimba; akadona matukuta anonga madon'we emalopa anodonela pasi.)

45 Amilika pakutembezela wakayenda kubadiyiwa akanowana bakayizela nentha yebuyendasi, 46 akati kubali, "Mulelileni? Mukani mutembezele kudze musingine mukulikwa."

47 Etjalebeleka, kwakaswika mbunga webanhu, utungamigwa naJudasi umwe webaligumi nebabili. Wakasedzela kuna Yesu akawumputa; 48 Yesu eba eti kuwunli, "Judasi, notengesa Nkololo wenhu ngewumputa?"

49 Ibabo baka bena Yesu bebona kuti ini tjinotobela bakabhuzwa beti, "He, titeme nebhangatjeke?" 50 Umwe wabo akatema nlanda wemphirisiti upehhugwi akawunthubula zebe yekuludli.

51 Koga Yesu wakati, "Aa aa ngakusijalo!" Akabhata zebe yenlume iwhoyo akawumpodza.

52 Yesu wakakotjiti kubaphirisiti bakulu nebalawuli bebalindi bethempeli nebawhola, baka bawhowumbhata, "Mabinga hhibava kani, makasenga mabhangatjeke nedziswimbo? 53 Mahhuba ose tatili toseni muthempeli, amuzondibhata. Koga igogu lubaka gwenyu, nekulawula kwemasimba ehhalima."

54 Bakawunsunga bakayenda naye kun'umba yemphirisiti upehhugwi. Phethiro akatobela ali tjakulenyana. 55 Bakati babesa moto pakati kwen'ha, bakagala pasi, Phethiro bo akagala pakati kwabo. 56 Umwe n'hingikadzi wakati ewumbona aligele akavonekewa nemoto, akawunlingisisa, eba eti, "Iwhoyu nlume wayena Yesu."

57 Koga Phethiro wakalandula, eti, "Iwe nkadzimayi, anditowunziba imi."

58 Hule kwelubakanyana umwe kakale wakawumbona akati, "Iwe uwumwe wabo."

Koga Phethiro wakahandula eti, "Nlumewe! andita ndili umwe wabo."

59 Kwapinda lubaka gungabe awa, umwe kakale, wakati, "Ilebeswa iwhoyu nlumetate babeli bose, ngobe uNghalile."

60 Koga Phethiro wakati, "Nlumewe! tjawunoleba anditotjiziba."

Ipapo etjalebeleka gukurume liba lilila. 61 He wakahanduka akalinga Phethiro. Phethiro akakumbula matama aHe anoti, "Gukurume lisanhu lalila nasi, nowhondilandula katatu." 62 Phethiro wakabhudila kuhhe akanolila zwinogwadza.

63 Balume baka bakasunga Yesu bakatangisa wunkuwelela kakale bewunloba. 64 Bakawunzwina meho bakati kuwunli, "Lebesambeli! Ndiyani wakuloba?" 65 Bakawuntuka bamwe betukana nekukwe.

66 Kwakati kuyedza, bawhola nebaphirisiti bakulu kose nebakwali bakakubungana; bakayendisa Yesu kulubahhe gwabo. 67 Bakati kuwunli, "Hapa uli iwe Khirisitu utibudze."

Koga iye wakahandula eti, "Hapa ndingamubudza, amutowhogalamoyo; 68 kakale hapa ndingamubhuzwa amutowhondihandula. 69 Koga kubvisila ngwenuwali Nkololo wenhu unowhoba aligele kuludli gwemasimba eNdzimu."

70 Bose bakati, "UNkololo weNdzimu ngono?"

Akabahandula eti, "Moti ndi iye."

71 Ipapo bakati, "Titjahakilani gumwe busupi? Tazwiwhila tjabva munlomo uwe."